Leviticus

10 Akyire yi, Aaron mma Nadab ne Abihu+ de wɔn gya kukuwa+ baeɛ na wɔde egya guu so. Afei wɔde aduhwam+ guu so na wɔde egya foforɔ bi a Yehowa mmaa ho kwan+ bɔɔ afɔdeɛ n’anim. 2 Na egya firi Yehowa anim bɛhyee wɔn,+ na wɔwuwuu Yehowa anim.+ 3 Afei Mose ka kyerɛɛ Aaron sɛ: “Deɛ Yehowa aka nie, ‘Ma wɔnte me din ho+ wɔ wɔn a wɔbɛn me+ no anim, na wɔnhyɛ me animuonyam+ ɔman no nyinaa anim.’” Na Aaron yɛɛ komm.

4 Enti Mose frɛɛ Aaron papa nua Usiel+ mma Misael ne Elisafan, na ɔka kyerɛɛ wɔn sɛ: “Mommra mmɛfa mo nuanom mfiri kronkronbea no anim nkɔ nsraban no akyi.”+ 5 Wɔba bɛsoaa wɔn kɔɔ nsraban no akyi, sɛdeɛ Mose kaeɛ no. Saa berɛ no nyinaa na wɔn ntade tenten no hyehyɛ wɔn.

6 Ɛnna Mose ka kyerɛɛ Aaron ne ne mma a wɔaka no, Eleasar ne Itamar, sɛ: “Monhwɛ na moannya mo tiri nwi basaa,+ na monnsunsuane mo ntadeɛ mu na moanwu na ne bo amfu nnipa no nyinaa.+ Ɔsɛeɛ a Yehowa nam egya so de baeɛ yi, mo nuanom Israelfoɔ bɛsu ama mo. 7 Monhwɛ na moamfiri ahyiaeɛ ntomadan yi ano ankɔ baabiara na moanwu,+ ɛfiri sɛ Yehowa sra ngo wɔ mo so.”+ Enti wɔyɛɛ sɛdeɛ Mose kaeɛ no.

8 Afei Yehowa ka kyerɛɛ Aaron sɛ: 9 “Berɛ biara a wo ne wo mma bɛba ahyiaeɛ ntomadan no mu no, monnnom bobesa anaa mmosã+ foforɔ biara na moanwu. Yei yɛ ahyɛdeɛ a mo ne mo nkyirimma bɛdi so daa, 10 na ɛbɛma nnipa ahunu nsonsonoeɛ a ɛwɔ akronkronneɛ ne deɛ ɛho agu fĩ ntam, ne deɛ ɛho teɛ ne deɛ ɛho nteɛ ntam.+ 11 Afei nso ɛbɛma moatumi de ahyɛdeɛ a Yehowa nam Mose so de maeɛ nyinaa akyerɛkyerɛ Israelfoɔ no.”+

12 Na Mose ka kyerɛɛ Aaron ne ne mma a wɔaka, Eleasar ne Itamar, sɛ: “Momfa aduane afɔdeɛ+ a wɔde egya hye maa Yehowa no nkaeɛ no na monni no afɔrebukyia no ho. Monni no berɛ a emu nkaeɛ, ɛfiri sɛ ɛyɛ akronkronneɛ mu adekronkron.+ 13 Na monni no baabi a ɛhɔ yɛ kronkron,+ ɛfiri sɛ ɛyɛ wo ne wo mma kyɛfa a ɛfiri Yehowa gya afɔdeɛ mu. Saa na wahyɛ me. 14 Wo ne wo mma mmarima ne wo mma mmaa a wɔka wo ho+ no bɛwe aboa no koko a wɔhim de bɔɔ afɔdeɛ+ no ne ne nan a ɛyɛ afɔrebɔdeɛ kronkron+ no wɔ baabi a ɛhɔ yɛ kronkron, ɛfiri sɛ ɛyɛ wo ne wo mma kyɛfa a ɛfiri Israelfoɔ asomdwoeɛ afɔdeɛ mu. 15 Na wɔde aboa no nan a ɛyɛ afɔrebɔdeɛ kronkron no ne ne koko a wɔhim de bɔɔ afɔdeɛ+ no ne aboa a wɔde bɔɔ egya afɔdeɛ no sradeɛ bɛba, na wɔbɛhim no Yehowa anim. Ɛbɛyɛ wo ne wo mma a wɔka wo ho no kyɛfa+ daa, sɛdeɛ Yehowa ahyɛ no.”

16 Mose hwehwɛɛ baabiara sɛ ɔbɛhunu abirekyie a wɔde bɛbɔɔ bɔne ho afɔdeɛ+ no, na ɔhunuu sɛ wɔahye ne nyinaa. Enti ne bo fuu Aaron mma a wɔaka no, Eleasar ne Itamar, na ɔkaa sɛ: 17 “Adɛn nti na moanwe aboa a wɔde bɔɔ bɔne ho afɔdeɛ no wɔ baabi a ɛhɔ yɛ kronkron?+ Monnim sɛ ɛyɛ akronkronneɛ mu adekronkron a ɔde ama mo sɛ monsoa asafo no mmusuo na mompata mma wɔn Yehowa anim?+ 18 Wɔamfa aboa no mogya amma kronkronbea hɔ.+ Anka ɛsɛ sɛ mowe no baabi a ɛhɔ yɛ kronkron, sɛdeɛ wɔhyɛɛ me no.”+ 19 Ɛnna Aaron ka kyerɛɛ Mose sɛ: “Ɛnnɛ wɔde deɛ wɔde bɛbɔ bɔne ho afɔdeɛ ne ɔhyeɛ afɔdeɛ aba Yehowa anim,+ nanso hwɛ asɛm a ato me. Sɛ mewee aboa a wɔde bɔɔ bɔne ho afɔdeɛ no nnɛ a, anka ɛbɛma Yehowa bo adwo anaa?”+ 20 Berɛ a Mose tee yei no, ne bo tɔɔ ne yam.