Leviticus

14 Yehowa toaa so ka kyerɛɛ Mose sɛ: 2 “Sɛ kwata yɛ obi a, da a wɔde no bɛba ɔsɔfoɔ anim+ ama no akyerɛ sɛ ne ho te no, deɛ wɔbɛyɛ no ho mmara+ nie. 3 Ɔsɔfoɔ no nkɔ nsraban no akyi nkɔhwɛ kwatani no. Sɛ ɔsɔfoɔ no hunu sɛ ne ho afi+ a, 4 ɔsɔfoɔ no mma no mfa nnomaa+ a wɔn ho teɛ mmienu ne tweneduro+ ne koogyan+ ne sommɛ+ a ɔde bɛte ne ho mmra. 5 Ɔsɔfoɔ no mma wɔnkum anomaa baako wɔ kukuo a mmasuo wom no mu.+ 6 Afei ɔmfa anomaa baako a aka no ne tweneduro ne koogyan ne sommɛ no nyinaa mmɔ anomaa a wɔkum no mmasuo soɔ no mogya mu. 7 Na ɔmfa mpete+ deɛ ɔrebɛte ne ho afiri ne kwata ho no ho mprɛ nson.+ Afei ɔnkyerɛ sɛ ne ho te,+ na ɔnnyaa anomaa a aka no mma no ntu nkɔ wuram.+

8 “Ɛsɛ sɛ deɛ ɔrebɛte ne ho no si ne ntadeɛ+ na ɔyi ne ho nwi nyinaa na ɔdware+ ma ne ho teɛ ansa na waba nsraban no mu. Na ɔntena ne ntomadan akyi nnanson.+ 9 Da a ɛtɔ so nson no, ɔnyi ne tiri nwi+ ne n’abɔdwesɛ ne n’ani akyi nwi nyinaa. Asɛm no ara ne sɛ, ɛsɛ sɛ ɔyi ne ho nwi nyinaa si ne ntadeɛ na ɔdwareɛ, na ama ne ho ate.

10 “Na da a ɛtɔ so nwɔtwe+ no, ɔmfa adwennini nkumaa mmienu a wɔte apɔ ne odwammereɛ+ kumaa baako a ɔte apɔ a wadi afe mmra, na ɔmfa esiam muhumuhu efa nkyɛmu du mu mmiɛnsa a wɔde ngo afra ne ngo toa baako+ mmɛbɔ aduane afɔdeɛ.+ 11 Na ɔsɔfoɔ a ɔkyerɛ sɛ onipa no ho teɛ no mfa deɛ ɔrete ne ho no ne nneɛma no nyinaa mmra Yehowa anim ahyiaeɛ ntomadan no ano. 12 Afei ɔsɔfoɔ no mfa odwennini kumaa baako a ɔde bɛbɔ asodie afɔdeɛ+ no ne ngo no+ mmra, na ɔnhim no Yehowa anim sɛ ohim afɔdeɛ.+ 13 Ɔnkum odwennini no baabi+ a wɔkum mmoa a wɔde bɔ bɔne ne ɔhyeɛ afɔdeɛ no. Wɔnku no baabi a ɛhɔ yɛ kronkron,+ ɛfiri sɛ asodie afɔdeɛ yɛ ɔsɔfoɔ no dea+ te sɛ bɔne ho afɔdeɛ no ara. Ɛyɛ akronkronneɛ mu adekronkron.

14 “Afei nso ɔsɔfoɔ no mfa aboa a wɔde rebɛbɔ asodie afɔdeɛ no mogya no bi nyɛ deɛ ɔrete ne ho no asõ nifa ne ne nsa nifa kokuromoti ne ne nan nifa kokuromoti ho.+ 15 Ɔsɔfoɔ no nhwie ngo no+ bi ngu ɔno ara ne nsa benkum mu. 16 Na ɔsɔfoɔ no mfa ne nsateaa nifa mmɔ ngo a ɛwɔ ne nsa benkum mu no mu, na ɔmfa mpetepete hɔ mprɛ nson+ wɔ Yehowa anim. 17 Ɔsɔfoɔ no mfa ngo a aka wɔ ne nsam no bi nyɛ deɛ ɔrete ne ho no asõ nifa ne ne nsa nifa kokuromoti ne ne nan nifa kokuromoti ho. Ɔmfa nyɛ baabi a ɔde asodie afɔdeɛ no mogya yɛeɛ no.+ 18 Afei ɔsɔfoɔ no nsɔne ngo a aka wɔ ne nsam no ngu deɛ ɔrete ne ho no apampam, na ɔmpata+ mma no Yehowa anim.

19 “Ɔsɔfoɔ no mmɔ bɔne ho afɔdeɛ+ no na ɔmpata mma deɛ ɔrete ne ho afiri ne ho fĩ ho no, na ɛno akyi no ɔnkum aboa a ɔde bɛbɔ ɔhyeɛ afɔdeɛ no. 20 Afei ɔsɔfoɔ no+ mmɔ ɔhyeɛ afɔdeɛ ne aduane afɔdeɛ+ no afɔrebukyia no so, na ɔsɔfoɔ no mpata mma no+ na ne ho nte.+

21 “Na sɛ ɔyɛ hiani+ na ne nsa nsõ so+ a, ɔmfa odwennini kumaa baako mmra sɛ asodie afɔdeɛ ne ohim afɔdeɛ, na wɔmfa mpata mma no. Afei ɔmfa esiam muhumuhu efa nkyɛmu du mu baako a ɔde ngo afra ne ngo toa baako mmra sɛ aduane afɔdeɛ, 22 ne mmuruburo+ mmienu anaa mmorɔnoma mma mmienu, deɛ ne nsa bɛsõ soɔ biara. Ɔde aboa baako bɛbɔ bɔne ho afɔdeɛ na ɔde baako abɔ ɔhyeɛ afɔdeɛ. 23 Da a ɛtɔ so nwɔtwe no+ ɔmfa mmrɛ ɔsɔfoɔ no wɔ ahyiaeɛ ntomadan+ no ano Yehowa anim. Ɛno na wɔde bɛte ne ho.+

24 “Na ɔsɔfoɔ no mfa odwennini a ɔde bɛbɔ asodie afɔdeɛ+ no ne ngo no mmra, na ɔnhim no Yehowa anim sɛ ohim afɔdeɛ.+ 25 Na ɔnkum odwennini a ɔde rebɛbɔ asodie afɔdeɛ no, na ɔsɔfoɔ no mfa mogya no bi nyɛ deɛ ɔrete ne ho no asõ nifa ne ne nsa nifa kokuromoti ne ne nan nifa kokuromoti ho.+ 26 Afei ɔsɔfoɔ no nhwie ngo no bi ngu ɔno ara ne nsa benkum mu.+ 27 Na ɔmfa ne nsateaa nifa mmɔ ngo a ɛwɔ ne nsa benkum mu no mu, na ɔmfa mpetepete+ hɔ mprɛ nson wɔ Yehowa anim. 28 Ɔsɔfoɔ no mfa ngo a aka wɔ ne nsam no bi nyɛ onipa no asõ nifa ne ne nsa nifa kokuromoti ne ne nan nifa kokuromoti ho. Ɔmfa nyɛ baabi a ɔde asodie afɔdeɛ no mogya yɛeɛ no.+ 29 Na ɔsɔfoɔ no nsɔne ngo a aka wɔ ne nsam no ngu deɛ ɔrete ne ho no apampam,+ na ɔmpata mma no Yehowa anim.

30 “Afei ɔmfa mmuruburo anaa mmorɔnoma a ne nsa bɛsõ soɔ+ no baako mmra. 31 Deɛ ne nsa bɛsõ soɔ no, ɔmfa baako mmɔ bɔne ho afɔdeɛ+ na ɔmfa baako nso mmɔ ɔhyeɛ afɔdeɛ+ nka aduane afɔdeɛ no ho. Na ɔsɔfoɔ no mpata+ mma deɛ ɔrete ne ho wɔ Yehowa anim no.

32 “Yei ne mmara a ɛwɔ hɔ ma deɛ ɔyaree kwata nanso ne nsa nsõ n’ahodwiradeɛ soɔ no.”

33 Yehowa ka kyerɛɛ Mose ne Aaron sɛ: 34 “Sɛ moduru Kanaan asase+ a mede ama mo sɛ mo agyapadeɛ+ no so na mede kwata hyɛ fie bi mu wɔ mo asase no so a,+ 35 efiewura no mmɛbɔ ɔsɔfoɔ no amanneɛ sɛ, ‘Biribi te sɛ yare bɔne bi aba me fie.’ 36 Ɔsɔfoɔ no nhyɛ mma wɔnyi biribiara mfiri fie hɔ ansa na wabɛhwɛ ade bɔne a aba hɔ no, anyɛ saa a ɔbɛbu biribiara a ɛwɔ fie hɔ sɛ ɛho nte. Afei ɔsɔfoɔ no bɛba abɛhwɛ fie hɔ. 37 Sɛ ɔba na ɔhunu sɛ biribi a ɛte sɛ akokɔsradeɛ a ani dum wɔ dan no ho ama no adidi kɔ dan no mu kakra a, 38 ɔsɔfoɔ no mfiri fie hɔ nkɔ abɔnten na ɔnto fie no mu+ nnanson.

39 “Da a ɛtɔ so nson no, ɔsɔfoɔ no nsan nkɔ fie hɔ nkɔhwɛ.+ Sɛ ɔhunu sɛ yareɛ no atrɛ dan no ho a, 40 ɔsɔfoɔ no nhyɛ mma wɔnyiyi+ aboɔ a yareɛ no ayɛ ho no, na wɔnkɔto ngu kuro no akyi baabi a ɛhɔ nteɛ. 41 Afei ɔmma wɔnwerɛwerɛ fie no mu adan nyinaa ho na wɔnkɔto dɔteɛ no ngu kuro no akyi baabi a ɛhɔ nteɛ. 42 Wɔwie a, wɔmfa aboɔ foforɔ nhyɛ kane deɛ no ananmu, na wɔnwɔ dɔteɛ foforɔ nsra dan no ho.

43 “Sɛ wɔyiyi aboɔ no, werɛwerɛ dan no ho, de dɔteɛ sra ho wie, na yareɛ no san ba a, 44 ɔsɔfoɔ+ no mmra mmɛhwɛ. Sɛ ɔhunu sɛ yareɛ no atrɛ fie hɔ a, ɛyɛ kwata a ɛyɛ hu+ na aba fie hɔ. Ɛho nte. 45 Afei ɔmma wɔnnwiri efi mũ no nyinaa ngu, na wɔnkɔto ɛho aboɔ ne nnua ne dɔteɛ nyinaa ngu kuro no akyi baabi a ɛhɔ nteɛ.+ 46 Nanso sɛ wɔto fie no mu+ na obi ba hɔ a, ne ho rente kɔsi anwummerɛ;+ 47 na deɛ ɔbɛda fie hɔ ne deɛ ɔbɛdidi fie hɔ no nsi ne ntadeɛ.+

48 “Na sɛ wɔde dɔteɛ sra dan no ho wie na ɔsɔfoɔ no bɛhwɛ na yareɛ no nsan mmaa fie hɔ a, ɛnneɛ ɔnkyerɛ sɛ fie no ho te, ɛfiri sɛ yareɛ no ase atu.+ 49 Deɛ ɛbɛyɛ na wate fie no ho afiri bɔne ho no, ɔnhwehwɛ nnomaa+ mmienu ne tweneduro+ ne koogyan+ ne sommɛ. 50 Na ɔnkum anomaa baako wɔ kukuo a mmasuo wom no mu.+ 51 Ɛno akyi no, ɔmfa tweneduro no ne sommɛ+ ne koogyan ne anomaa baako a aka no nyinaa mmɔ anomaa a wɔkum no mmasuo soɔ no mogya mu, na ɔmfa mpete+ fie no ho mprɛ nson.+ 52 Afei ɔmfa anomaa no mogya ne mmasuo no ne anomaa a aka no ne tweneduro no ne sommɛ ne koogyan no nte fie no ho mfiri bɔne ho. 53 Na ɔnnyaa anomaa a aka no wɔ kuro no akyi mma no nkɔ wuram, na ɔmpata+ mma fie no na ɛho nte.

54 “Yei ne mmara a ɛwɔ hɔ berɛ a kwata+ ayɛ obi ne berɛ a ne nwi atutuo,+ 55 berɛ a kwata ayɛ atadeɛ mu+ anaa aba fie bi mu, 56 berɛ a biribi abɛsi obi honam ani na ahyɛ nsuo anaa ne honam atwintwam anaa asoa.+ 57 Yei yɛ akwankyerɛ+ a ɛbɛma wɔahunu adeɛ a ɛho nteɛ ne deɛ ɛho teɛ. Yei ne kwata ho mmara.”+