Leviticus

27 Yehowa toaa so ka kyerɛɛ Mose sɛ: 2 “Ka kyerɛ Israelfoɔ sɛ, ‘Sɛ obi hyɛ bɔ titire+ bi de ɔkra bi ma Yehowa sɛdeɛ ɛboɔ a wɔatwa no teɛ a, 3 ɔbarima a wadi firi mfeɛ aduonu kɔsi aduosia no boɔ bɛyɛ nnwetɛbena aduonum, sɛdeɛ wɔbu dwetɛbena ano wɔ kronkronbea hɔ no. 4 Na sɛ ɔyɛ ɔbaa a, ɛboɔ no bɛyɛ nnwetɛbena aduasa. 5 Sɛ ɔyɛ ɔbarima a wadi firi mfeɛ nnum kɔsi aduonu a, ɛboɔ no bɛyɛ nnwetɛbena aduonu, na ɔbaa nso nnwetɛbena du. 6 Sɛ ɔyɛ abarimaa a wadi firi bosome baako kɔsi mfeɛ nnum a, ɛboɔ no bɛyɛ nnwetɛbena nnum,+ na abaayewa nso nnwetɛbena mmiɛnsa.

7 “‘Sɛ wadi mfeɛ aduosia ne akyire na ɔyɛ ɔbarima a, ɛboɔ no bɛyɛ nnwetɛbena dunum, na ɔbaa nso nnwetɛbena du. 8 Nanso sɛ ahia deɛ wahyɛ bɔ no na ɔrentumi ntua boɔ a wɔatwa+ no a, ɔmfa deɛ ɔpɛ sɛ ɔde no ma no mmɛgyina ɔsɔfoɔ no anim na ɔsɔfoɔ no nkyerɛ ne boɔ.+ Na ɛboɔ a deɛ ɔhyɛɛ bɔ no bɛtumi+ na ɔsɔfoɔ no bɛtwa.

9 “‘Sɛ ɛyɛ aboa a wɔtumi de no bɔ afɔdeɛ ma Yehowa a, deɛ ɔde bɛma Yehowa biara bɛyɛ ade kronkron.+ 10 Ɔrentumi nsesa; ɔrentumi mfa deɛ ɛyɛ nsesa deɛ ɛnyɛ, na ɔrentumi mfa deɛ ɛnyɛ nsesa deɛ ɛyɛ. Na sɛ ɛba sɛ ɔde aboa foforɔ sesa deɛ ɔde ahyɛ bɔ no a, ɛnneɛ mmoa mmienu no nyinaa bɛyɛ ade kronkron. 11 Nanso sɛ ɛyɛ aboa a ne ho nteɛ+ a wɔntumi mfa mma Yehowa a,+ ɛnneɛ ɔmfa aboa no mmɛgyina ɔsɔfoɔ no anim.+ 12 Afei ɔsɔfoɔ no nhwɛ sɛdeɛ aboa no teɛ, sɛ ɛyɛ oo, sɛ ɛnyɛ oo, na ɔntwa boɔ nto ne so. Deɛ ɔsɔfoɔ no bɛkyerɛ+ na ɛbɛyɛ ne boɔ. 13 Na sɛ deɛ ɔhyɛɛ bɔ no pɛ sɛ ɔsan nya n’adeɛ bio a, wɔbɛkyɛ ne boɔ no mu nnum ama no atua emu baako+ aka ne boɔ paa no ho.

14 “‘Sɛ obi hyira ne fie so ma Yehowa sɛ ade kronkron a, ɔsɔfoɔ no nhwɛ sɛdeɛ efie no teɛ, sɛ ɛyɛ oo, sɛ ɛnyɛ oo,+ na ɔntwa boɔ nto so. Deɛ ɔsɔfoɔ no bɛkyerɛ na ɛbɛyɛ ne boɔ. 15 Nanso sɛ onii a wahyira ne fie so de ama no pɛ sɛ ɔsan nya bio a, wɔbɛkyɛ ne boɔ no mu nnum ama no atua emu baako aka ne boɔ paa no ho.+ Afei ɛbɛsan abɛdi ne nsam.

16 “‘Na sɛ obi twa n’asase fã+ hyira so ma Yehowa a, aba dodoɔ a ɔbɛdua no soɔ na ɛbɛkyerɛ ne boɔ: Sɛ ɛyɛ atokoɔ a, homar+ susudeɛ baako biara bɛyɛ nnwetɛbena aduonum. 17 Na sɛ Ahofadie afe+ no mu ara na ɔhyiraa n’asase no so a, ɛboɔ a wɔbɛtwa ato hɔ no na wɔde bɛgyeɛ. 18 Sɛ Ahofadie afe no akyi na ɔhyiraa n’asase no so a, ɔsɔfoɔ no nhwɛ mfeɛ a aka ansa na Ahofadie afe asan aduru na ɔnkyerɛ ne boɔ. Enti ɔbɛhwɛ mfeɛ a aka no na wate boɔ a wɔatwa no so.+ 19 Na sɛ deɛ ɔhyiraa soɔ no pɛ asase no bio a, ɛnneɛ wɔnkyɛ ne boɔ no mu nnum na ɔntua mu baako nka ne boɔ paa no ho. Afei ɛbɛsan abɛdi ne nsam.+ 20 Nanso sɛ wannye asase no na wɔtɔn ma obi foforɔ a, ne nsa renka bio. 21 Ɛduru Ahofadie afe no mu a, asase no bɛyɛ ade kronkron a wɔahyira so+ ama Yehowa. Ɛbɛyɛ ɔsɔfoɔ no agyapadeɛ.+

22 “‘Sɛ asase a wahyira so ama Yehowa no nyɛ ɔno ara n’agyapadeɛ,+ na mmom ɔtɔeɛ a, 23 ɛnneɛ ɔsɔfoɔ no nsese mfiri saa berɛ no nkɔsi Ahofadie afe no so na ɔnkyerɛ ne boɔ, na ɔmfa mma da no ara.+ Ɛyɛ ade kronkron ma Yehowa.+ 24 Ahofadie afe no duru a, asase no bɛsan akɔdi deɛ ɔtɔ firii ne hɔ no nsam; ɔno na ɛyɛ n’agyapadeɛ.+

25 “‘Ɛsɛ sɛ wɔbu biribiara boɔ sɛdeɛ wɔbu dwetɛbena ano wɔ kronkronbea hɔ. Dwetɛbena biara yɛ gerah aduonu.+

26 “‘Aboa biara abakan deɛ, ɛnsɛ sɛ obi hyira soɔ, ɛfiri sɛ ɛyɛ Yehowa dea+ dada. Nantwie oo, odwan oo, ɛyɛ Yehowa dea.+ 27 Na aboa a ne ho akum+ abakan deɛ, sɛ ɔpɛ sɛ ne nsa ka bio a, ɔntua ɛboɔ a wɔatwa ato hɔ no, na ɔmfa ɛboɔ no nkyɛmu nnum mu baako nka ho.+ Na sɛ wantɔ a, ɛnneɛ wɔntɔn no sɛdeɛ ne boɔ teɛ.

28 “‘Nanso sɛ obi yi n’agyapadeɛ bi si hɔ sɛ ɔde ama Yehowa korakora*+ a, ɛyɛ onipa oo, aboa oo, n’asase oo, obiara rentumi ntɔn, na ɔrentumi nnye bio nso.+ Ɛyɛ akronkronneɛ mu adekronkron ma Yehowa. 29 Afei nso sɛ wɔyi onipa bi si hɔ ma ɔsɛeɛ a, obiara rentumi ntua nnye no.+ Ɛsɛ sɛ wɔku no.+

30 “‘Na asase so nnɔbaeɛ ne dua so aba nyinaa nkyɛmu du mu baako+ yɛ Yehowa dea. Ɛyɛ akronkronneɛ ma Yehowa. 31 Na sɛ obi pɛ sɛ ɔsan tɔ nkyɛmu du mu baako no a, ɛnneɛ ɔntua ne boɔ no na ɔmfa ɛboɔ no nkyɛmu nnum mu baako nsan nka ho.+ 32 Na nantwie oo, odwan oo, biribiara a ɛfa odwanhwɛfoɔ poma ase+ no, deɛ ɛtɔ so du biara bɛyɛ akronkronneɛ ama Yehowa. 33 Ɛnsɛ sɛ ɔhwɛ mu hwɛ sɛ ɛyɛ anaa ɛnyɛ, na ɔnnsesa no nso. Ɛba sɛ ɔsesa no a, ɛnneɛ ɛno ne deɛ ɔde sesaeɛ no nyinaa bɛyɛ akronkronneɛ.+ Ɔrentumi nnye bio.’”

34 Yeinom ne ahyɛdeɛ+ a Yehowa de maa Mose sɛ ɔmfa mma Israelfoɔ wɔ Bepɔ Sinai+ soɔ.