Deuteronomium
13 “Sɛ obi sɔre wo kurom sɛ odiyifoɔ+ anaa ɔdaeɛsofoɔ+ na ɔma wo sɛnkyerɛnne anaa anwanwadeɛ bi,+ 2 na sɛnkyerɛnne anaa anwanwadeɛ a ɔkaa ho asɛm kyerɛɛ woɔ no ba mu+ na ɔka kyerɛ mo sɛ, ‘Momma yɛnkɔdi anyame foforɔ a monnim wɔn akyi nkɔsom wɔn a,’ 3 monntie saa odiyifoɔ anaa ɔdaeɛsofoɔ no anom asɛm.+ Monhunu sɛ Yehowa mo Nyankopɔn resɔ mo ahwɛ+ sɛ mode mo akoma nyinaa ne mo kra nyinaa dɔ Yehowa mo Nyankopɔn anaa.+ 4 Yehowa mo Nyankopɔn akyi na monnie, na ɔno na monsuro no, ne mmara so na monnie, n’asɛm na montie, ɔno na monsom no, na ne ho na momfa mo ho mfam.+ 5 Saa odiyifoɔ+ anaa ɔdaeɛsofoɔ no deɛ, monku no,+ ɛfiri sɛ ɔpɛ sɛ ɔtu mo aso na mosɔre tia Yehowa mo Nyankopɔn a ɔyii mo firii Egypt asase soɔ na ɔgyee mo firii nkoafie no. Ɔpɛ sɛ momane firi kwan a Yehowa mo Nyankopɔn ahyɛ sɛ momfa soɔ no so;+ enti monyi bɔne biara mfiri mo mu.+
6 “Sɛ wo nuabarima, wo maame ba paa, anaa wo babarima anaa wo babaa anaa wo yere a ɔda wo kokom anaa wo yɔnko berɛboɔ+ bi daadaa wo kokoam sɛ, ‘Ma yɛnkɔsom anyame foforɔ’+ a wo ne w’agyanom nnim wɔn, 7 anyame a aman a wɔatwa mo ho ahyia a wɔbɛn mo anaa wɔwɔ akyirikyiri, ɛfiri asase ano kɔsi asase ano, som wɔn no a, 8 mpene so na ntie no,+ na nhu no mmɔbɔ, na mma wo yam nnhyehye wo mmma no,+ na nkata ne so; 9 Ku no ntɛm.+ Ma wo nsa nni kan wɔ ne so, na ɔman no nyinaa nni akyire mma no nwu.+ 10 Si no aboɔ ma no nwu,+ ɛfiri sɛ ɔpɛ sɛ ɔdane wo firi Yehowa wo Nyankopɔn a ɔyii wo firii Egypt asase so nkoafie no ho.+ 11 Israelfoɔ nyinaa bɛte na wɔasuro, na wɔrenyɛ bɔne a ɛte saa bio mo mu.+
12 “Sɛ wonya kɔtena asase a Yehowa wo Nyankopɔn de ama woɔ no so a, ebia wobɛte sɛ wɔreka no nkuro no bi mu sɛ, 13 ‘Nnipa hunu bi asɔre+ pɛ sɛ wɔsɛe kuro no mufoɔ adwene,+ na wɔka sɛ: “Momma yɛnkɔsom anyame foforɔ” a monnim wɔn.’ 14 Ɛba saa a hwehwɛ asɛm no mu hwɛ+ sɛ ɛyɛ nokorɛ anaa. Na wohunu sɛ wɔayɛ akyiwadeɛ a ɛte saa wɔ wo mu ampa a, 15 fa nkrantɛ kunkum nnipa a wɔwɔ kuro no mu nyinaa.+ Na fa nkrantɛ sɛe+ kuro no ne emu nneɛma ne emu nyɛmmoa nyinaa pasaa. 16 Afei boaboa asadeɛ a aka nyinaa ano gu kuro no mfimfini, na fa gya hye kuro no+ ne asadeɛ no nyinaa sɛ afɔdeɛ mũ ma Yehowa wo Nyankopɔn. Kuro no bɛdane amamfõ akɔsi daa,+ na wɔrenkyekyere bio. 17 Na mfa wo nsa nka abusudeɛ+ yi mu biara na Yehowa bo adwo+ na ne yam ahyehye no na wahu wo mmɔbɔ+ na wama w’asefoɔ adɔɔso sɛdeɛ ɔkaa w’agyanom ntam no.+ 18 Enti tie Yehowa wo Nyankopɔn na di n’ahyɛdeɛ a mede rema wo nnɛ yi nyinaa so+ na woayɛ deɛ ɛtene Yehowa wo Nyankopɔn ani so.+