Deuteronomium
14 “Yehowa mo Nyankopɔn mma ne mo.+ Enti monhwɛ na awufoɔ nti moantwitwa mo ho ammobɔ mo ho akam+ na moanyi mo anim nwi.+ 2 Wo deɛ, woyɛ ɔman kronkron+ ma Yehowa wo Nyankopɔn, na Yehowa ayi wo afiri asase so aman nyinaa mu de wo ayɛ ne man, n’agyapadeɛ titire.+
3 “Nni akyiwadeɛ biara.+ 4 Mmoa a mobɛtumi aweɛ nie:+ nantwie, odwan, ne abirekyie, 5 ne ɔforoteɛ, wansane, adowa,+ ɔkwaduo, ɔtwe, ɔdabɔ, ne eyuo. 6 Mobɛtumi awe aboa biara a ne nan mu apae ayɛ nta na ɔpu wesa.+ 7 Nanso mmoa a wɔpu wesa anaa wɔn nan mu apae yi deɛ, monnwe: yoma+ ne adanko+ ne atwaboa,+ ɛfiri sɛ wɔpu wesa deɛ, nanso wɔn nan mu mpaeeɛ. Wɔn ho nte mma mo. 8 Bio nso monnwe prako,+ ɛfiri sɛ ne nan mu apae deɛ, nanso ɔmpu nwesa. Ne ho nte mma mo. Monnwe wɔn nam, na monnsɔ wɔn afunu mu.+
9 “Nsuo mu nam a mobɛtumi aweɛ nie: Aboa biara a ntɛtɛ ne abena wɔ ne ho deɛ, mobɛtumi awe.+ 10 Aboa biara a ɔnni ntɛtɛ anaa abena deɛ, monnwe.+ Ne ho nte mma mo.
11 “Mobɛtumi awe anomaa biara a ne ho teɛ. 12 Nanso yeinom deɛ monnwe: ɔkɔdeɛ, ɔkɔrebia, ne pɛtɛ tuntum,+ 13 ne ɔkompɛtɛ ne ɔkom+ ne asansa, ne wɔn a wɔn su te saa; 14 ne kwaakwaadabi+ ahodoɔ nyinaa; 15 ne sohori,+ ɔpatuo, asomfena, ne akorɔma, ne wɔn a wɔn su te saa; 16 ne ɔpatubiaa, patuo asotenten,+ ne suborɔkokɔ, 17 ne pokupoku,+ pɛtɛ, ne po so anene, 18 ne asukɔnkɔn ne asunoma ahodoɔ a wɔn su te saa, ne asɔkwaa ne apan.+ 19 Bio nso ntuboa manyamanya biara ho nte mma mo.+ Monnwe. 20 Nanso mobɛtumi awe ntuboa a wɔn ho teɛ nyinaa.
21 “Monnwe aboa funu biara.+ Fa ma ɔhɔhoɔ a ɔte wo kurom ma no nwe, anaa tɔn ma ɔmamfrani a ɔwɔ wo nkyɛn, ɛfiri sɛ moyɛ ɔman kronkron ma Yehowa mo Nyankopɔn.
“Nnoa abirekyie ba wɔ ne maame nufosuo mu.+
22 “Afe biara kyɛ w’afuo mu nnɔbaeɛ nyinaa mu du na fa baako bra.+ 23 Afei fa w’ayuo ne wo nsã foforɔ ne wo ngo nkyɛmu du mu baako, ne w’anantwie ne wo nnwan mu mmakan bra baabi a Yehowa wo Nyankopɔn de ne din bɛdua no.+ Fa bra bɛdi no n’anim na ama woasua sɛ wobɛsuro Yehowa wo Nyankopɔn daa.+
24 “Sɛ baabi a Yehowa wo Nyankopɔn de ne din bɛdua+ no ware dodo+ sɛ wobɛsoa nneɛma no akɔ hɔ (na Yehowa wo Nyankopɔn ahyira wo) a,+ 25 ɛnneɛ dane no sika na kyekyere kura kɔ baabi a Yehowa wo Nyankopɔn bɛyi asi hɔ no. 26 Woduru hɔ a, fa sika no tɔ biribiara a wo kra kɔn dɔ:+ nantwie, odwan, abirekyie, bobesa anaa mmosã+ foforɔ biara. Biribiara a wo kra bɛbisa no, fa bra bɛdi no Yehowa wo Nyankopɔn anim, na wo ne wo fiefoɔ nyinaa ani nnye.+ 27 Na mmu w’ani ngu Lewini a ɔwɔ wo kurom no so,+ ɛfiri sɛ wannya w’agyapadeɛ no mu kyɛfa biara.+
28 “Mfeɛ mmiɛnsa awieeɛ no, fa nnɔbaeɛ a wonyaa no saa afe no mu nkyɛmu du mu baako bra+ wo kurom. 29 Na ɛsiane sɛ Lewifoɔ+ annya w’agyapadeɛ no mu kyɛfa nti, wɔne ahɔhoɔ+ ne nnyanka ne akunafoɔ+ a wɔwɔ wo kurom no bɛba abɛdi amee, na adwuma biara a wo nsa bɛsɔ mu no,+ Yehowa wo Nyankopɔn bɛhyira so.+