Deuteronomium
9 “Israel tie, ɛnnɛ woretwa Yordan+ akɔpamo aman akɛseɛ a ɛyɛ den sene woɔ+ akɔfa nkuro akɛseɛ a wɔato ho abantenten akɔduru soro.+ 2 Wɔyɛ nnipa a wɔsoso woware. Yeinom ne Anakim+ mma no, na wonim wɔn na woate sɛ wɔka wɔn ho asɛm sɛ, ‘Hwan na ɔbɛtumi agyina Anak mma anim?’ 3 Ɛnnɛ wonim yie sɛ Yehowa wo Nyankopɔn di w’anim retwa akɔ hɔ.+ Ɔte sɛ egya a ɛhye adeɛ.+ Ɔno ara bɛsɛe+ wɔn na wabrɛ wɔn ase w’anim. Enti tu wɔn na sɛe wɔn ntɛm, sɛdeɛ Yehowa aka akyerɛ woɔ no.+
4 “Sɛ Yehowa wo Nyankopɔn pamo wɔn firi w’anim a, nka no w’akomam sɛ, ‘Me tenenee nti na Yehowa de me aba sɛ memmɛfa asase yi.’+ Kae sɛ aman yi amumuyɔ nti na Yehowa repamo wɔn afiri w’anim.+ 5 Ɛnyɛ wo tenenee+ anaa w’akomam a ɛteɛ+ nti na worekɔfa wɔn asase no, mmom aman no amumuyɔ nti na Yehowa wo Nyankopɔn repamo wɔn afiri w’anim yi,+ na ama ntam a Yehowa kaa w’agyanom Abraham+ ne Isak+ ne Yakob+ no aba mu. 6 Enti hunu sɛ ɛnyɛ wo tenenee nti na Yehowa wo Nyankopɔn de asase pa yi rema woɔ ama woafa, ɛfiri sɛ woyɛ ɔman a wo kɔn asene.+
7 “Kae: Mma wo werɛ mmfiri sɛdeɛ wohyɛɛ Yehowa wo Nyankopɔn abufuo ɛserɛ no soɔ no.+ Ɛfiri da a mofirii Egypt bɛsi nnɛ a mowɔ ha yi, daa mote atua tia Yehowa.+ 8 Horeb mpo mogyegyee Yehowa maa n’ani bereeɛ, na Yehowa bo fu maa anka ɔretɔre mo ase.+ 9 Berɛ a mekɔɔ bepɔ no so sɛ merekɔgye aboɔpono+ a mo ne Yehowa ntam apam+ wɔ soɔ no, medii adaduanan awia ne anadwo wɔ bepɔ no so+ (manni hwee na mannom nsuo nso). 10 Ɛnna Yehowa maa me aboɔpono mmienu a Onyankopɔn de ne nsateaa atwerɛ nsɛm wɔ soɔ,+ nsɛm a Yehowa firi gya mu ka kyerɛɛ mo bepɔ no soɔ nyinaa, da a asafo no bɔɔ dwa no.+ 11 Berɛ a adaduanan, awia ne anadwo, no soeɛ no, Yehowa de aboɔpono mmienu a apam no ho mmara wɔ soɔ no maa me.+ 12 Yehowa ka kyerɛɛ me sɛ, ‘Sɔre firi ha kɔ ntɛm, ɛfiri sɛ wo nkurɔfoɔ a wokɔyii wɔn firii Egypt no reyɛ abusudeɛ.+ Wɔamane ntɛm afiri ahyɛdeɛ a mede ama wɔn no ho. Hwɛ, wɔayɛ dadeɛ honi afa.’+ 13 Yehowa toaa so ka kyerɛɛ me sɛ, ‘Hwɛ, mahunu sɛ ɔman yi yɛ ɔman a wɔn kɔn asene.+ 14 Ma mensɛe+ wɔn mpepa wɔn din mfiri ɔsoro ase+ na menyɛ wo ɔman kɛseɛ a ɛyɛ den nsene wɔn.’+
15 “Enti medanee me ho si firii bepɔ no so, berɛ a na egya redɛre bepɔ no soɔ.+ Ná aboɔpono mmienu a apam no ho mmara wɔ soɔ no wɔ me nsa mmienu mu.+ 16 Mebɛhunuu sɛ ampa moayɛ bɔne atia Yehowa mo Nyankopɔn! Ná moayɛ nantwie ba honi.+ Momanee ntɛm firii kwan a Yehowa hyɛɛ mo no so.+ 17 Mehunuu saa no, megyaa aboɔpono mmienu no mu hwee hɔ maa no bubuu mo anim.+ 18 Na mebutuu Yehowa anim adaduanan awia ne anadwo sɛdeɛ meyɛɛ kane no. Manni hwee na mannom nsuo nso,+ mo bɔne a moyɛeɛ nyinaa nti, bɔne a moyɛɛ no Yehowa ani soɔ sɛ mode bɛhyɛ no abufuo.+ 19 Mehwɛ sɛdeɛ Yehowa bo afuo na n’ani abere mo soɔ no a, na mesuro sɛ ɔbɛtwa mo afiri hɔ.+ Nanso saa berɛ no nso Yehowa tiee me.+
20 “Yehowa bo fuu Aaron nso dendeenden maa anka ɔretwa no afiri hɔ,+ nanso mepaa kyɛw+ maa Aaron nso saa berɛ no. 21 Afei mede gya hyee nantwie ba honi a ɛyɛ mo abusudeɛ no,+ na mebubuu mu yam no muhumuhu sɛ mfuturo, na meto guu nsuo a ɛfiri bepɔ mu sene no mu.+
22 “Berɛ a mowɔ Tabera,+ Masa+ ne Kibrot-Hatawa+ no nso mohyɛɛ Yehowa abufuo.+ 23 Na berɛ a Yehowa somaa mo firi Kades-Barnea+ sɛ, ‘Monkɔfa asase a mede ama mo!’ no nso, motee Yehowa mo Nyankopɔn so atua,+ na moannye no anni+ na moantie no.+ 24 Ɛfiri da a mehunuu mo yi, daa mote Yehowa so atua.+
25 “Enti mebutuu Yehowa anim adaduanan awia ne anadwo,+ ɛfiri sɛ na Yehowa aka sɛ ɔbɛtwa mo afiri hɔ.+ 26 Na mepaa Yehowa kyɛw+ sɛ, ‘Awurade Tumfoɔ Yehowa, nsɛe wo man a wɔyɛ wo ara w’agyapadeɛ+ a wode wo tumi kɛseɛ ne basa a ɛyɛ den+ gyee wɔn firii Egypt+ no. 27 Kae wo nkoa Abraham ne Isak ne Yakob.+ Nhwɛ ɔman yi asoɔden ne wɔn amumuyɔ ne wɔn bɔne,+ 28 anyɛ saa a ɔman+ a woyii yɛn firii hɔ no sofoɔ bɛka sɛ: “Yehowa antumi amfa wɔn ankɔ asase a ɔhyɛɛ bɔ sɛ ɔde bɛma wɔn no so, na ɛsiane sɛ ɔtan wɔn nti, wayi wɔn kɔ sɛ ɔrekɔkunkum wɔn wɔ serɛ so.”+ 29 Nnipa yi da so ara yɛ wo ara w’agyapadeɛ+ a wode wo tumi kɛseɛ ne wo basa a woatene mu yii wɔn.’+