Deuteronomium

10 “Saa berɛ no Yehowa ka kyerɛɛ me sɛ, ‘Sene aboɔpono mmienu te sɛ kane deɛ no+ na fa bra me nkyɛn wɔ bepɔ no so. Afei fa dua yɛ adaka.+ 2 Mɛtwerɛ nsɛm a na ɛwɔ aboɔpono a ɛdi kan a wobubuu no no soɔ no agu foforɔ no so, na fa sie adaka no mu.’ 3 Enti mede ɔkanto dua yɛɛ adaka na mesenee aboɔpono mmienu sɛ kane deɛ no.+ Afei mede aboɔpono mmienu no kɔɔ bepɔ no so. 4 Na ɔtwerɛɛ Nsɛm Du+ no guu aboɔpono no so sɛdeɛ na ɛwɔ kane deɛ no soɔ no.+ Yei ne nsɛm a Yehowa firi gya mu ka kyerɛɛ mo bepɔ no ho,+ da a asafo no bɔɔ dwa no.+ Yehowa wieeɛ no, ɔde maa me. 5 Afei mesiane firii bepɔ no so+ na mede aboɔpono no bɛsiee adaka a mayɛ no mu sɛdeɛ Yehowa hyɛɛ sɛ menyɛ no.+

6 “Israelfoɔ tu firii Beerot Bene-Yaakan+ kɔɔ Mosera. Ɛhɔ na Aaron wu maa wɔsiee no,+ na ne ba Eleasar sii n’ananmu dii sɔfoɔ.+ 7 Afei wɔfiri hɔ kɔɔ Gudgoda, na wɔfiri Gudgoda kɔɔ Yotbata,+ asase a nsubɔnten sene soɔ no.

8 “Saa berɛ no Yehowa yii Lewi abusuakuo+ no sɛ wɔnsoa Yehowa apam adaka no+ na wɔnnyina Yehowa anim nsom no+ na wɔmfa ne din nhyira nnipa+ de bɛsi nnɛ. 9 Yei nti na Lewi annya ne nuanom agyapadeɛ no bie no.+ Yehowa ne n’agyapadeɛ sɛdeɛ Yehowa mo Nyankopɔn ka kyerɛɛ no no.+ 10 Medii adaduanan wɔ bepɔ no so sɛ kane no, awia ne anadwo,+ na saa berɛ no nso Yehowa tiee me.+ Ná Yehowa mpɛ sɛ ɔsɛe mo.+ 11 Afei Yehowa ka kyerɛɛ me sɛ, ‘Sɔre di ɔman no anim ma wɔnkɔfa asase a mekaa wɔn agyanom ntam sɛ mede bɛma wɔn no.’+

12 “Afei Israel, ɛdeɛn na Yehowa wo Nyankopɔn hwehwɛ firi wo hɔ+ sɛ wobɛsuro+ Yehowa wo Nyankopɔn na woanante n’akwan nyinaa soɔ+ na woadɔ no,+ na wode w’akoma nyinaa ne wo kra nyinaa asom Yehowa wo Nyankopɔn,+ 13 na woadi Yehowa ahyɛdeɛ ne ne mmara+ a mede rema wo nnɛ yi soɔ, na asi wo yie?+ 14 Kae sɛ ɔsoro, ɔsoro mu soro mpo, ne asase ne deɛ ɛwɔ soɔ nyinaa yɛ Yehowa wo Nyankopɔn dea.+ 15 W’agyanom nko ara na Yehowa kaa wɔn bataa ne ho yii ne dɔ adi kyerɛɛ wɔn. Enti na wayi mo a moyɛ wɔn nkyirimma+ no afiri aman nyinaa mu, sɛdeɛ ɛteɛ nnɛ yi. 16 Enti montwa mo akoma twetia+ na monnsene mo kɔn bio.+ 17 Yehowa mo Nyankopɔn yɛ anyame mu Onyankopɔn+ ne awuranom mu Awurade,+ Onyankopɔn tumfoɔ pumpuni a ne ho yɛ hu.+ Ɔnyɛ animhwɛ+ na ɔnnye adanmudeɛ biara.+ 18 Ɔno na ɔbu atɛn ma nnyanka ne akunafoɔ,+ na ɔdɔ ahɔhoɔ+ ma wɔn aduane ne nkataho. 19 Mo nso monnɔ ahɔhoɔ+ ɛfiri sɛ na moyɛ ahɔhoɔ Egypt asase so.+

20 “Yehowa wo Nyankopɔn na suro no.+ Ɔno na som no,+ ne ho na fa wo ho fam,+ na ne din na fa ka ntam.+ 21 Ɔno na kamfo no,+ na ɔno ne wo Nyankopɔn a wayɛ anwanwadeɛ akɛseɛ a wode w’ani ahunu yi.+ 22 Akra aduɔson na w’agyanom de wɔn kɔɔ Egypt,+ nanso seesei Yehowa wo Nyankopɔn ama woayɛ dɔm kɛseɛ sɛ ɔsoro nsoromma.+