Atemmufoɔ
6 Na Israelfoɔ firii aseɛ yɛɛ Yehowa ani so bɔne,+ enti Yehowa de wɔn hyɛɛ Midian+ nsa mfeɛ nson. 2 Na Midian dii Israel so.+ Midian nti Israelfoɔ hwehwɛɛ amena wɔ mmepɔ mu, na wɔhwehwɛɛ abodan ne huntabea nso.+ 3 Sɛ Israelfoɔ yɛ afuo a,+ na Midianfoɔ ne Amalekfoɔ+ ne Apueeɛfoɔ+ abɛto ahyɛ wɔn so. 4 Wɔboaboa wɔn ano ne wɔn ko, na wɔsɛe wɔn asase so nnɔbaeɛ nyinaa kɔsi Gasa, na wɔnnya aduane anaa odwan anaa nantwie anaa afunumu biara wɔ Israel.+ 5 Wɔde wɔn mmoa ne wɔn ntomadan nyinaa ba. Na wɔba yuu sɛ ntutummɛ;+ wɔne wɔn yoma nni ano,+ na wɔba asase no so bɛsɛe no.+ 6 Midianfoɔ yi nti, ohia fitaa kaa Israelfoɔ no. Afei Israelfoɔ su frɛɛ Yehowa.+
7 Berɛ a Midianfoɔ haa Israelfoɔ maa wɔsu frɛɛ Yehowa no,+ 8 Yehowa somaa odiyifoɔ+ bi baa Israelfoɔ nkyɛn bɛka kyerɛɛ wɔn sɛ: “Deɛ Israel Nyankopɔn Yehowa seɛ nie, ‘Me na meyii mo firii Egypt+ de mo firii nkoafie baeɛ.+ 9 Megyee mo firii Egypt ne wɔn a wɔhaa mo nyinaa nsam, na mepamoo wɔn firii mo anim, na mede wɔn asase maa mo.+ 10 Bio nso meka kyerɛɛ mo sɛ: “Mene Yehowa mo Nyankopɔn.+ Monnsuro Amorifoɔ a mote wɔn asase soɔ+ no anyame.”+ Nanso moantie me.’”+
11 Akyire yi Yehowa bɔfoɔ+ bɛtenaa dupɔn a ɛsi Ofra no ase, Abiesarni+ Yoas dupɔn no. Saa berɛ no na ne ba Gideon+ reporo ayuo wɔ nsã-kyi-amena mu, sɛdeɛ Midianfoɔ no renhunu. 12 Afei Yehowa bɔfoɔ no baa ne nkyɛn bɛka kyerɛɛ no sɛ: “Ɔkatakyie kokoɔdurofoɔ, Yehowa ka wo ho.”+ 13 Ɛnna Gideon ka kyerɛɛ no sɛ: “Me wura, mesrɛ wo, sɛ Yehowa ka yɛn ho ampa a, adɛn nti na awie yɛn sei?+ N’anwanwadeɛ+ a yɛn agyanom kaa ho asɛm kyerɛɛ yɛn+ no wɔ he? Wɔkaa sɛ, ‘Ɛnyɛ Egypt na Yehowa yii yɛn firiiɛ?’+ Na afei deɛ Yehowa apo yɛn,+ na ɔde yɛn ahyɛ Midianfoɔ nsa.” 14 Na Yehowa danee n’ani kyerɛɛ no kaa sɛ: “Fa ahoɔden a wowɔ yi ara kɔ,+ na wobɛgye Israelfoɔ afiri Midianfoɔ nsam.+ Ɛnyɛ me na meresoma woɔ?”+ 15 Ɛnna ɔka kyerɛɛ no sɛ: “Yehowa, mesrɛ wo. Ɛdeɛn na mede bɛgye Israel?+ Manase abusuakuo mu nyinaa, m’asafo* na ɛsua, na mene kumaa wɔ m’agya fie.”+ 16 Na Yehowa ka kyerɛɛ no sɛ: “Mɛdi w’akyi,+ na wobɛsɛe Midianfoɔ+ sɛ onipa baako bi.”
17 Na ɔbuaa no sɛ: “Sɛ m’anim aba nyam w’anim+ a, ɛnneɛ yɛ sɛnkyerɛnne bi ma menhunu sɛ wo na wo ne me rekasa.+ 18 Mesrɛ wo mfiri ha nkɔ+ kɔsi sɛ mɛba wo nkyɛn de m’ayɛyɛdeɛ abɛsi w’anim.”+ Na ɔkaa sɛ: “Mɛtena ha atwɛn akɔsi sɛ wobɛba.” 19 Na Gideon kɔpɛɛ abirekyie ba+ bi noaeɛ, na ɔde esiam efa baako yɛɛ paanoo a mmɔreka nnim.+ Afei ɔde nam no guu kɛntɛn mu de ɛho nsuo no nso guu kukuo mu, na ɔde brɛɛ no dupɔn no ase.
20 Na nokorɛ Nyankopɔn bɔfoɔ no ka kyerɛɛ no sɛ: “Fa nam ne paanoo a mmɔreka nnim no kɔsi ɔbotan kɛseɛ no so,+ na hwie ɛho nsuo no gu so.” Na ɔyɛɛ saa. 21 Afei Yehowa bɔfoɔ no de poma a ɔkura no ano kaa nam ne paanoo no, na egya firi ɔbotan no mu bɛhyee nam ne paanoo no.+ Na Yehowa bɔfoɔ no yera firii n’anim. 22 Afei Gideon hunuu sɛ ɛyɛ Yehowa bɔfoɔ.+
Enti Gideon kaa sɛ: “Ei, Awurade Tumfoɔ Yehowa! Yehowa bɔfoɔ na mahunu n’anim yi!”+ 23 Ɛnna Yehowa ka kyerɛɛ no sɛ: “Asomdwoeɛ nka wo,+ nsuro.+ Worenwu.”+ 24 Afei Gideon sii afɔrebukyia+ wɔ hɔ maa Yehowa, na wɔfrɛ+ no Yehowa-Salom bɛsi nnɛ. Ɛwɔ Abiesarfoɔ kuro Ofra+ mu.
25 Saa anadwo no, Yehowa ka kyerɛɛ no sɛ: “Fa wo papa nantwinini a ɔtɔ so mmienu a wadi mfeɛ nson no, na bubu Baal afɔrebukyia+ a wo papa siiɛ no, na twa bosom dua a ɛwɔ ho no.+ 26 Afei hyehyɛ aboɔ fa yɛ afɔrebukyia ma Yehowa wo Nyankopɔn wɔ aban yi atifi, na twitwa bosom dua a wobɛtwa no mu asinasini na fa nantwinini a ɔtɔ so mmienu yi bɔ ɔhyeɛ afɔdeɛ wɔ so.” 27 Enti Gideon yii ne nkoa no mu mmarima du sɛ wɔrekɔyɛ deɛ Yehowa aka akyerɛ no no.+ Nanso na ɔsuro ne papa fiefoɔ ne kurom hɔfoɔ, enti wanyɛ adwuma no awia; ɔyɛɛ no anadwo.+
28 Anɔpahema a kurom hɔfoɔ sɔreeɛ no, wɔnkɔhwɛ a, Baal afɔrebukyia na wɔabubu no yi, na bosom dua+ a ɛwɔ ho no nso na wɔatwa yi! Ná wɔde nantwinini a ɔtɔ so mmienu no nso abɔ afɔdeɛ wɔ afɔrebukyia a wɔasie no so. 29 Na wɔbisabisaa wɔn ho sɛ: “Hwan na ɔyɛɛ saa adeɛ yi?” Ɛnna wɔfirii aseɛ hwehwɛɛ mu. Akyire yi wɔkaa sɛ: “Yoas ba Gideon na ɔdii saa dwuma yi.” 30 Enti kurom hɔfoɔ ka kyerɛɛ Yoas sɛ: “Fa wo ba no bra ma yɛnku no,+ ɛfiri sɛ wabubu Baal afɔrebukyia na watwa bosom dua a ɛwɔ ho no nso.” 31 Ɛnna Yoas+ ka kyerɛɛ nnipa a wɔbaa ne soɔ no nyinaa sɛ:+ “Mo na mobɛdi Baal asɛm ama no, anaa mo na mobɛgye no? Deɛ ɔbɛka Baal asɛm ama no no, wɔnku no anɔpa yi ara.+ Sɛ ɔyɛ Onyankopɔn+ na obi abubu n’afɔrebukyia a, momma ɔno ara nka n’asɛm.”+ 32 Enti da no ara, ɔtoo ne din Yerubaal,+ na ɔkaa sɛ: “Obi abubu Baal afɔrebukyia a, momma ɔno ara nka n’asɛm.”+
33 Na Midianfoɔ+ ne Amalekfoɔ+ ne Apueeɛfoɔ+ nyinaa boaa wɔn ano+ kutuu na wɔtwa baa Yesreel+ bɔn mu. 34 Afei Yehowa honhom+ bɛduraa Gideon ho, na ɔhyɛnee abɛn+ frɛɛ Abiesarfoɔ+ bɛdii n’akyi. 35 Bio nso, ɔtuu abɔfoɔ+ kɔɔ Manase asase nyinaa so, na wɔn nso bɛdii n’akyi. Na ɔtuu abɔfoɔ foforɔ kɔɔ Aser ne Sebulon ne Naftali nsase so, na wɔbɛhyiaa no.
36 Na Gideon ka kyerɛɛ nokorɛ Nyankopɔn no sɛ: “Sɛ wonam me so bɛgye Israel, sɛdeɛ woaka no a,+ 37 ɛnneɛ mede odwan nwi rekɔhata ayuporobea. Sɛ bosuo fɔ odwan nwi no nko ara, na fam hɔ nyinaa wo a, mɛhunu ampa sɛ wonam me so bɛgye Israel, sɛdeɛ woaka no.” 38 Na saa ara na ɛbaeɛ. Berɛ a ɔsɔree anɔpa a ɔkyĩĩ bosuo no firii odwan nwi no mu no, nsuo a ɛfiri mu baeɛ no yɛɛ ɛsɛn kɛseɛ bi mã. 39 Ɛnna Gideon ka kyerɛɛ nokorɛ Nyankopɔn sɛ: “Mesrɛ wo, mma wo bo mmfu me; ma menka asɛm baako pɛ. Ma memfa odwan nwi yi nsɔ adeɛ baako pɛ nhwɛ. Mesrɛ wo ma nwi no nko ara nwo, na bosuo mfɔ fam hɔ nyinaa.” 40 Na anadwo no, Onyankopɔn yɛɛ saa. Nwi no nko ara woeɛ, na bosuo fɔɔ fam hɔ nyinaa.