Berɛsosɛm Nwoma a Ɛdi Kan

23 Berɛ a Dawid bɔɔ akɔkoraa a ɔregye nna awuo* no, ɔde ne ba Solomon sii Israel so hene.+ 2 Afei ɔboaboaa Israel mpanimfoɔ, asɔfoɔ,+ ne Lewifoɔ+ no nyinaa ano. 3 Na wɔkan Lewifoɔ a wɔadi mfeɛ 30 rekɔ no;+ mmarima a wɔkan wɔn mmaako mmaako no dodoɔ yɛ 38,000. 4 Weinom mu 24,000 na wɔhwɛɛ Yehowa fie adwuma no so, na wɔde 6,000 nso yɛɛ mpanimfoɔ ne atemmufoɔ;+ 5 ná 4,000 yɛ apono ano ahwɛfoɔ,+ na na 4,000 nso de nnwontoɔ nneɛma yi Yehowa ayɛ+ sɛdeɛ Dawid kaeɛ no; ɔkaa sɛ: “Mayɛ sɛ wɔmfa nyi Onyankopɔn ayɛ.”

6 Afei Dawid kyekyɛɛ wɔn mu akuakuo+ sɛdeɛ Lewi mma teɛ: Gerson, Kohat, ne Merari.+ 7 Gersonfoɔ no nie: Ladan ne Simei. 8 Ladan mma ne otitire Yehiel, Setam ne Yoel;+ wɔyɛ mmiɛnsa. 9 Simei mma ne Selomot, Hasiel ne Haran; wɔyɛ mmiɛnsa. Weinom ne Ladan abusuafie mpanimfoɔ. 10 Simei mma ne Yahat, Sina, Yeus, ne Beria. Nnan yi ne Simei mma. 11 Yahat ne wɔn so panin, Sisah na ɔdi hɔ. Yeus ne Beria deɛ, wɔanwo mma mmarima pii, enti wɔde wɔn boom yɛɛ wɔn abusuafie baako, na wɔmaa wɔn adwuma korɔ.

12 Kohat mma ne Amram, Yisar,+ Hebron, ne Usiel;+ wɔyɛ nnan. 13 Amram mma ne Aaron+ ne Mose.+ Nanso wɔyii Aaron+ sɛ ɔne ne mma na daa wɔbɛte Kronkron Mu Kronkronbea no ho na wɔabɔ afɔreɛ wɔ Yehowa anim, na wɔasom no de ne din ahyira nnipa daa.+ 14 Nokorɛ Nyankopɔn nipa Mose deɛ, wɔkan ne mma no kaa Lewi abusuakuo ho. 15 Mose mma ne Gersom+ ne Elieser.+ 16 Sebuel+ na ɔyɛ Gersom mma no so panin. 17 Elieser asefoɔ* no so panin ne Rehabia;+ Elieser anwo mma mmarima foforɔ anka ne ho, nanso Rehabia woo mma mmarima bebree. 18 Yisar+ mma no so panin ne Selomit.+ 19 Hebron mma no so panin ne Yeria, deɛ ɔtɔ so mmienu ne Amaria, deɛ ɔtɔ so mmiɛnsa ne Yahasiel, na deɛ ɔtɔ so nnan ne Yekameam.+ 20 Usiel+ mma no so panin ne Mika, na deɛ ɔtɔ so mmienu ne Yisiya.

21 Merari mma ne Mahli ne Musi.+ Na Mahli mma ne Eleasar ne Kis. 22 Nanso Eleasar wui a wanwo mma mmarima; mma mmaa na ɔwoeɛ. Enti wɔn papa nua Kis mma mmarima warewaree wɔn. 23 Musi mma ne Mahli, Eder, ne Yeremot; wɔyɛ mmiɛnsa.

24 Weinom ne Lewi asefoɔ a wɔkan wɔn bobɔɔ wɔn din sɛdeɛ wɔn agyanom abusuafie ne abusuafie mpanimfoɔ teɛ. Wɔn a wɔadi mfeɛ 20 rekɔ no, wɔma wɔyɛɛ Yehowa fie nnwuma. 25 Ná Dawid aka sɛ: “Israel Nyankopɔn Yehowa ama ne man anya ahotɔ,+ na ɔbɛtena Yerusalem afebɔɔ.+ 26 Afei nso, ɛho renhia sɛ Lewifoɔ no soa ɔsom ntomadan no ne emu nneɛma a wɔde som no bio.”+ 27 Dawid ahyɛdeɛ a ɛtwa toɔ a ɔde maeɛ no nti, wɔkan Lewi asefoɔ a wɔadi mfeɛ 20 rekɔ no. 28 Ná wɔn adwuma ne sɛ wɔbɛboa Aaron mma+ no na wɔasom wɔ Yehowa fie hɔ, ahwɛ adihɔ+ ne adidibea no so, adwira ade kronkron biara ho, na wɔayɛ adwuma biara a ɛho hia wɔ nokorɛ Nyankopɔn no fie hɔ. 29 Wɔboa maa wɔyɛɛ paanoo a wɔde taataa so no,*+ esiam muhumuhu a wɔde bɔ aduane afɔreɛ, paanoo ntraantraa a mmɔka* nnim,+ keeki a wɔtõ wɔ apampaa so, ne esiam a wɔafete;+ nneɛma a wɔde susu adeɛ nyinaa, wɔn na na wɔhwɛ so. 30 Ná wɔbɛgyina hɔ anɔpa biara+ ada Yehowa ase ayi no ayɛ, na anwummerɛ nso wɔayɛ saa ara.+ 31 Sɛ ɛduru berɛ a wɔbɔ afɔreɛ ma Yehowa no a, daa na wɔboa ma wɔbɔ ɔhyeɛ afɔreɛ wɔ Yehowa anim Homeda biara,+ bosome foforɔ biara,+ ne afahyɛ berɛ+ mu, mprɛ dodoɔ a mmara no kyerɛ sɛ wɔnyɛ no. 32 Afei nso, na wɔyɛ ahyiaeɛ ntomadan ne kronkronbea hɔ adwuma, na na wɔboa wɔn nuanom Aaron mma a wɔyɛ Yehowa fie som adwuma no.