Berɛsosɛm Nwoma a Ɛdi Kan

22 Ɛnna Dawid kaa sɛ: “Nokorɛ Nyankopɔn Yehowa fie nie, na afɔrebukyia yi so na Israel bɛbɔ ɔhyeɛ afɔreɛ.”+

2 Afei Dawid kaa sɛ wɔmmoaboa ahɔhoɔ+ a wɔabɛtena Israel nyinaa ano, na ɔmaa wɔn adwuma sɛ wɔmpae aboɔ na wɔnsene mfa nsi nokorɛ Nyankopɔn no fie no.+ 3 Afei nso, Dawid siesiee nnadeɛ bebree a wɔde bɛyɛ apono ho nnadewa ne deɛ wɔde bɛsosɔ nneɛma mu, ne kɔbere bebree a wɔntumi nkari,+ 4 ne sida nnua+ a ɛnni ano, ɛfiri sɛ Sidonfoɔ+ ne Tirofoɔ+ de sida nnua bebree brɛɛ Dawid. 5 Ɛnna Dawid kaa sɛ: “Me ba Solomon yɛ abɔfra, na ne ho nkokwaeɛ,*+ na efie a wɔrebɛsi ama Yehowa no nso, ɛsɛ sɛ ɛyɛ dan kɛseɛ paa,+ na ɛyɛ fɛ na ɛgye din+ wɔ asaase nyinaa so.+ Enti mɛboaboa nneɛma ano ama no.” Ɛno nti Dawid pɛɛ nneɛma pii de sieeɛ ansa na ɔrewu.

6 Afei nso, ɔfrɛɛ ne ba Solomon, na ɔka kyerɛɛ no sɛ ɔnsi fie mma Israel Nyankopɔn Yehowa. 7 Dawid ka kyerɛɛ ne ba Solomon sɛ: “Me deɛ, na ɛda m’akoma so sɛ mɛsi fie ama Yehowa me Nyankopɔn din.+ 8 Nanso deɛ Yehowa ka kyerɛɛ me ne sɛ, ‘Woahwie mogya pii agu, na woadi ako akɛseɛ. Ɛnyɛ wo na wobɛsi fie ama me din+ ɛfiri sɛ woahwie mogya pii agu asaase so wɔ m’anim. 9 Hwɛ, wobɛwo ɔbabarima.+ Ɔbɛyɛ asomdwoeɛ* nipa, na mɛma ne ho adwo no n’atamfo a wɔatwa ne ho ahyia nyinaa nsam;+ wɔbɛfrɛ no Solomon,*+ na mɛma Israel anya asomdwoeɛ na wɔn ho adwo wɔn wɔ ne berɛ so.+ 10 Ɔno na ɔbɛsi fie ama me din;+ ɔbɛyɛ me ba na me nso mayɛ n’agya.+ Mɛma n’ahennie adwa atim Israel so afebɔɔ.’+

11 “Enti afei me ba, Yehowa nni w’akyi na ɛnsi wo yie, na si Yehowa wo Nyankopɔn fie no sɛdeɛ ɔka faa wo ho no.+ 12 Sɛ Yehowa ma wodi Israel so a, ɔmma wo nhunumu ne nteaseɛ+ a wode bɛdi Yehowa wo Nyankopɔn mmara so.+ 13 Sɛ wohwɛ di ahyɛdeɛ ne atemmusɛm a Yehowa nam Mose so de maa Israel no so pɛpɛɛpɛ a, ɛnneɛ ɛbɛwie wo yie.+ Nya akokoɔduro na ma wo ho nyɛ den. Nsuro, na mmɔ hu.+ 14 Mamia m’ani paa aboaboa weinom nyinaa ano de asie ama Yehowa fie no: sika kɔkɔɔ dwetikɛseɛ* 100,000, dwetɛ dwetikɛseɛ 1,000,000, ne kɔbere ne dadeɛ+ a ne dodoɔ nti wɔntumi nkari. Masan asiesie nnua ne aboɔ agu hɔ+ nanso ɛno deɛ, pɛ bi ka ho. 15 Adwumayɛfoɔ pii wɔ hɔ a wɔbɛboa wo: abopaefoɔ ne aboɔ ne nnua ho adwumfoɔ+ ne nnipa a wɔn ho akokwa wɔ adwuma biara mu.+ 16 Sika kɔkɔɔ ne dwetɛ ne kɔbere ne nnadeɛ no nni ano.+ Keka wo ho na firi adwuma no ase. Yehowa nni w’akyi.”+

17 Ɛnna Dawid ka kyerɛɛ Israel mpanimfoɔ nyinaa sɛ wɔmmoa ne ba Solomon; ɔkaa sɛ: 18 “Yehowa mo Nyankopɔn nka mo ho anaa? Ɛnyɛ ɔno na wama mo ho adwo mo afiri aman a atwa mo ho ahyia nyinaa nsam? Ɔde asaase no sofoɔ nyinaa ahyɛ me nsa, na Yehowa ne ne man adi asaase no so. 19 Na afei, momfa mo akoma ne mo kra* nyinaa nhwehwɛ Yehowa mo Nyankopɔn,+ na momfiri aseɛ nsi nokorɛ Nyankopɔn Yehowa tenabea kronkron no,+ na momfa Yehowa apam adaka ne nokorɛ Nyankopɔn nneɛma kronkron no+ mmra efie a wɔasi ama Yehowa din no mu.”+