Berɛsosɛm Nwoma a Ɛdi Kan
21 Ɛnna Satan* tuu n’ani sii Israel so, na ɔpiapiaa Dawid sɛ ɔnkan Israelfoɔ.+ 2 Enti Dawid ka kyerɛɛ Yoab+ ne ɔman no mu mpanimfoɔ sɛ: “Monkɔkan Israelfoɔ mfiri Beer-Seba nkɔsi Dan,+ na mommɛka wɔn dodoɔ nkyerɛ me.” 3 Ɛnna Yoab kaa sɛ: “Yehowa mma ne man mmu mmɔ ho 100! Me wura ɔhene, wɔn nyinaa nyɛ wo nkoa anaa? Adɛn nti na me wura pɛ sɛ ɔyɛ saa? Adɛn nti na worebɛma asodie aba Israel so?”
4 Nanso, ɔhene asɛm bunkam Yoab deɛ so, enti Yoab kɔkyinii Israel nyinaa, na ɔsan baa Yerusalem.+ 5 Afei Yoab de nnipa a wɔkan wɔn no dodoɔ brɛɛ Dawid; wɔnyaa Israel mmarima a wɔde sekan kɔ ɛko 1,100,000, na Yuda nso, wɔnyaa mmarima a wɔde sekan kɔ ɛko 470,000.+ 6 Lewifoɔ ne Benyaminfoɔ deɛ, wɔankan wɔn anka ho,+ ɛfiri sɛ ɔhene asɛm no yɛɛ Yoab abufu.+
7 Nokorɛ Nyankopɔn no ani annye asɛm no ho koraa, enti ɔtwee Israel aso. 8 Ɛnna Dawid ka kyerɛɛ nokorɛ Nyankopɔn no sɛ: “Adeɛ a mayɛ yi deɛ, mayɛ bɔne+ kɛseɛ. Na afei, mepa wo kyɛw, fa w’akoa bɔne kyɛ no,+ na madi nkwaseasɛm paa.”+ 9 Ɛnna Yehowa ka kyerɛɛ Gad+ a ɔyɛ ɔdehunufoɔ ma Dawid no sɛ: 10 “Kɔ na kɔka kyerɛ Dawid sɛ, ‘Deɛ Yehowa aka nie: “Mede nneɛma mmiɛnsa resi w’anim. Yi mu baako na memfa nyɛ wo.”’” 11 Ɛnna Gad baa Dawid anim bɛka kyerɛɛ no sɛ: “Deɛ Yehowa aka nie, ‘Yi deɛ wopɛ: 12 mfeɛ mmiɛnsa a ɛkɔm+ bɛba, anaa abosome mmiɛnsa a mo atamfo de bɛpra mo akɔ na wɔn sekan anya mo,+ anaasɛ Yehowa sekan a ɛbɛba mo so nnansa ama Yehowa bɔfoɔ de ɔsɛeɛ aba+ Israel asaase nyinaa so, kyerɛ sɛ, nsanyareɛ a ɛdi awuo a ɛbɛba asaase no so.’+ Afei dwene ho na ma me mmuaeɛ nkɔma deɛ ɔsomaa me no.” 13 Ɛnna Dawid ka kyerɛɛ Gad sɛ: “Asɛm yi ama maboto paa. Mesrɛ wo, mma onipa nntwe m’aso,*+ ma Yehowa mmom ntwe m’aso, ɛfiri sɛ ne mmɔborɔhunu dɔɔso pii.”+
14 Enti Yehowa de nsanyareɛ a ɛdi awuo+ baa Israel maa Israelfoɔ 70,000 wuwuiɛ.+ 15 Afei nso, nokorɛ Nyankopɔn no somaa ɔbɔfoɔ kɔɔ Yerusalem sɛ ɔnkɔkunkum ɛhɔfoɔ. Berɛ a Yehowa huu sɛ ɔrebɛfiri aseɛ no, mmusuo a ɛreba no yɛɛ no mmɔbɔ,*+ enti ɔka kyerɛɛ ɔbɔfoɔ a wɔayi no sɛ ɔnkunkum ɛhɔfoɔ no sɛ: “Ayɛ yie!+ Fa wo nsa to hɔ.” Saa berɛ no, na Yehowa bɔfoɔ no gyina Yebusini+ Ornan ayuporobea+ no nkyɛn.
16 Dawid maa n’ani so, na ɔhuu Yehowa bɔfoɔ no sɛ ɔgyina ɔsoro ne asaase ntam atwe sekan akura+ ne nsam na ɔde akyerɛ Yerusalem so. Saa berɛ no, na Dawid ne mpanimfoɔ no firafira awerɛhoɔ ntoma,*+ na ntɛm ara na wɔgyaa wɔn ho hwee hɔ de wɔn anim butubutuu fam.+ 17 Dawid ka kyerɛɛ nokorɛ Nyankopɔn no sɛ: “Ɛnyɛ me mmom na mekaa sɛ wɔnkan ɔman no? Me na mafom na mayɛ bɔne;+ nnwan yi deɛ, ɛdeɛn na wɔayɛ? O Yehowa me Nyankopɔn, mesrɛ wo, me mmom na tene wo nsa wɔ me so; me ne me papa fie. Wo man deɛ, mfa ɔhaw yi mma wɔn so.”+
18 Ɛnna Yehowa bɔfoɔ ka kyerɛɛ Gad+ sɛ ɔnka nkyerɛ Dawid sɛ ɔnkɔsi afɔrebukyia mma Yehowa wɔ Yebusini+ Ornan ayuporobea hɔ. 19 Enti Dawid tiee asɛm a Gad kaa no Yehowa din mu no, na ɔkɔeɛ. 20 Saa berɛ no, na Ornan reporo hwiit; ɔtwaa n’ani no, ɔhuu ɔbɔfoɔ no, na ne mma nnan a wɔka ne ho no kɔhintaeɛ. 21 Berɛ a Dawid kɔtoo Ornan no, ɔmaa n’ani so huu Dawid, na ntɛm ara na Ornan firii ayuporobea hɔ, na ɔde n’anim kɔbutuu fam wɔ Dawid anim. 22 Dawid ka kyerɛɛ Ornan sɛ: “Tɔn ayuporobea no ma me* na mensi afɔrebukyia wɔ hɔ mma Yehowa. Ka ne boɔ nyinaa kyerɛ me ma mentua ka sɛdeɛ ɛbɛyɛ a mmusuo no bɛfiri ɔman no so.”+ 23 Ɛnna Ornan ka kyerɛɛ Dawid sɛ: “Mede kyɛ wo; ma me wura ɔhene mfa nyɛ deɛ ɔpɛ biara.* Hwɛ, mɛma wo anantwie a wode bɛbɔ ɔhyeɛ afɔreɛ, ayuoporo adeɛ+ a wode bɛsɔ gya, ne hwiit a wode bɛbɔ aduane afɔreɛ. Mede ne nyinaa ma wo.”
24 Nanso, Ɔhene Dawid ka kyerɛɛ Ornan sɛ: “Daabi, mɛtɔ atua ho ka nyinaa, na meremfa deɛ ɛyɛ wo deɛ nkɔbɔ ɔhyeɛ afɔreɛ mma Yehowa a merentua hwee.”+ 25 Enti Dawid karii sika kɔkɔɔ nnwetɛbena* 600 maa Ornan de tɔɔ asaase no. 26 Ɛnna Dawid sii afɔrebukyia+ wɔ hɔ maa Yehowa, na ɔbɔɔ ɔhyeɛ afɔreɛ ne asomdwoeɛ afɔreɛ wɔ so. Ɔsu frɛɛ Yehowa na ɔgyee no so, na ɔtɔɔ gya+ firii soro bɛguu ɔhyeɛ afɔrebukyia no so maa no hyee afɔrebɔdeɛ no. 27 Afei Yehowa kasa kyerɛɛ ɔbɔfoɔ no+ maa no san de ne sekan no hyɛɛ ne bɔha* mu. 28 Berɛ a Dawid huu sɛ Yehowa atie no wɔ Yebusini Ornan ayuporobea hɔ no, ɔkɔɔ so bɔɔ afɔreɛ wɔ hɔ. 29 Yehowa ntomadan a Mose yɛɛ wɔ serɛ so no ne afɔrebukyia a na wɔbɔ ɔhyeɛ afɔreɛ wɔ so no deɛ, saa berɛ no, na ɛwɔ sorɔnsorɔmmea* a ɛwɔ Gibeon+ no. 30 Nanso na Dawid ntumi nkɔɔ hɔ nkɔbisaa Onyankopɔn hɔ biribi, ɛfiri sɛ na ɔsuro Yehowa bɔfoɔ no sekan no.