Berɛsosɛm Nwoma a Ɛdi Kan

20 Afe no mfitiaseɛ* a ahemfo taa kɔ ɛko no, Yoab+ dii asraafoɔdɔm anim kɔto hyɛɛ Ammonfoɔ asaase so sɛee no, na ɔkɔtwaa Raba+ ho hyiaeɛ. Dawid deɛ, ɔtenaa Yerusalem,+ na Yoab to hyɛɛ Raba so sɛee kuro no.+ 2 Ɛno akyi no, Dawid yii Malkam abotire firii ne ti, na ɔhuu sɛ emu duro yɛ sika kɔkɔɔ dwetikɛseɛ* baako, na na aboɔden aboɔ nso hyehyɛ mu, na wɔde hyɛɛ Dawid ti. Ɔsesaa nneɛma pii nso firii kuro no mu.+ 3 Ɔde emu nnipa nso bae, na ɔmaa wɔpaee aboɔ, na wɔde nnadeɛ a ano yɛ nnam ne akuma yɛɛ adwuma.+ Saa na Dawid yɛɛ Ammonfoɔ nkuro nyinaa. Afei Dawid ne asraafoɔdɔm no nyinaa san baa Yerusalem.

4 Wei akyi no, Israelfoɔ ne Filistifoɔ koo wɔ Geser. Saa berɛ no, Husani Sibekai+ kum Sipai a ɔfiri Refaim+ asefoɔ mu no, na wɔdii Filistifoɔ no so.

5 Wɔsan ne Filistifoɔ no koe, na Yair ba Elhanan kum Gatni Goliat+ nua Lami; ɔno na na ne pea te sɛ ntomanwemfoɔ dua kɛseɛ+ no.

6 Ɛko sii bio wɔ Gat;+ ná ɔbarima tenten kɛseɛ bi+ wɔ hɔ a ne nsa mmienu no nyinaa wɔ nsateaa 6, na na ne nan mmienu no nyinaa nso wɔ nansoaa 6; ne nyinaa si 24. Ɔno nso, na ɔfiri Refaim+ asefoɔ mu. 7 Ná ɔtwa Israel adapaa daa,+ enti Dawid nua Simea+ ba Yonatan kum no.

8 Weinom yɛ Refaim+ asefoɔ a wɔfiri Gat,+ na Dawid ne ne nkoa kunkum wɔn.