17 Ɛyɛ sɛ wobɛdi paanoo wesee wɔ baabi a asomdwoeɛ wɔ+
Sene sɛ wobɛdi aduane sɔkyee wɔ efie a akasakasa wom mu.+
2 Akoa a ɔwɔ nhunumu no, ɔbɛdi ɔba a ɔyɛ aniwudeɛ so,
Na ɔno nso bɛnya agyapadeɛ te sɛ owura no ba no.
3 Kukuo a wɔnane adeɛ wom wɔ hɔ ma dwetɛ, ɛnna fononoo wɔ hɔ ma sika kɔkɔɔ,+
Na deɛ ɔhwehwɛ akomam ne Yehowa.+
4 Onipabɔnefoɔ yɛ aso tie asɛm a ɛyɛ ya,
Na ɔdaadaafoɔ tie kɛtrɛma a ɛtwa nkontompo.+
5 Obiara a ɔdi ohiani ho fɛ no, ɔdidi ne Bɔfo atɛm,+
Na obiara a ɔdi ne yɔnko amanehunu ho ahurisie no, ɔremfa ne ho nni.+
6 Nkɔkoraa ne mmerewa ahenkyɛ ne mmanana,
Na mma mmarima animuonyam ne wɔn agyanom.
7 Sɛdeɛ kasa a ɛtene mfata kwasea no,+
Saa ara na nkontompo kasa mfata ɔhene koraa!+
8 Akyɛdeɛ te sɛ aboɔdenboɔ ma ne wura;+
Baabiara a ɔbɛfa biara, ɛma ɛsi no yie.+
9 Obiara a ɔde bɔne kyɛ no hwehwɛ ɔdɔ,+
Na deɛ ɔkɔ so tĩ asɛm mu deɛ, ɔtete nnamfoɔ a wɔbɔ kosua tafere ntam.+
10 Deɛ ɔwɔ nteaseɛ no, animka boa no paa+
Sene sɛ wɔbɛtwa kwasea mmaa ɔha.+
11 Onipabɔnefoɔ deɛ, atuateɛ nko ara na ɔhwehwɛ,
Na wɔbɛsoma otirimuɔdenfoɔ ama wakɔtwe n’aso.+
12 Sɛ wohyia sisire a wɔakye ne mma a,
Ɛyɛ sene sɛ wobehyia kwasea a ɔte ne nkwaseasɛm mu.+
13 Sɛ obi de bɔne tua papa so ka a,
Bɔne rempa ne fie.+
14 Sɛ wohyɛ ntɔkwa ase a, ɛte sɛ deɛ woretue tadeɛ mu nsuo;
Akasakasa nnya mfirii aseɛ no, twa so kɔ.+
15 Obiara a ɔbu ɔbɔnefoɔ bem ne obiara a ɔbu ɔteneneeni fɔ no,+
Wɔn nyinaa yɛ Yehowa akyiwadeɛ.
16 Mfasoɔ bɛn na ɛwɔ so sɛ kwasea wɔ deɛ ɔbɛtumi de anya nyansa
Berɛ a ɔnni tire a ɔde bɛsua nyansa?+
17 Yɔnko berɛboɔ deɛ, ɔkyerɛ ne dɔ berɛ nyinaa,+
Na ɔyɛ onua a wɔwoo no maa amanehunu berɛ.+
18 Onipa a ɔnnim nyansa kyea obi nsam, na ɔpene so sɛ,
Ɔbɛdi agyinamu wɔ ne yɔnko anim.+
19 Deɛ ɔpɛ ntɔkwa no, ɔpɛ mmarato.+
Obiara a ɔma ne pono ano kwan kɔ soro no frɛfrɛ ahweaseɛ.+
20 Akoma mu nkontompofoɔ deɛ, ɛrensi wɔn yie,+
Na deɛ ɔka nnaadaasɛm no bɛsɛe.
21 Ɔbarima a ɔwo ɔba kwasea bɛdi ne ho awerɛhoɔ;
Na abɔfra a ɔnnim nyansa no, ne papa nni anigyeɛ.+
22 Anigyeɛ akoma yɛ aduro papa;+
Na honhom a abotoɔ deɛ, ɛma ahoɔden so te.+
23 Ɔbɔnefoɔ gye adanmudeɛ wɔ kokoam
Sɛdeɛ ɛbɛyɛ a ɔbɛkyea atemmuo.+
24 Deɛ ɔwɔ nhunumu no, nyansa wɔ n’anim pɛɛ,
Na kwasea ani deɛ, ɛdeda asaase ano akyirikyiri.+
25 Ɔba kwasea ma ne papa di awerɛhoɔ,
Na ɔhyɛ deɛ ɔwoo no no ahometeɛ.+
26 Ɛnyɛ papa sɛ wɔbɛtwe ɔteneneeni aso,
Na ɛmfata sɛ wɔbɛbɔ onimuonyamfoɔ mmaa.
27 Onipa a ɔwɔ nimdeɛ hwɛ ne nsɛm yie,+
Na deɛ ɔwɔ nhunumu to ne bo ase.+
28 Kwasea mpo, sɛ ɔmua n’ano a, wɔbu no onyansafoɔ,
Na deɛ ɔka n’ano tom no, wɔbu no sɛ ɔwɔ nhunumu.