18 Obiara a ɔte ne ho no, deɛ ɔno ara pɛ na ɔdi akyire;
Ɔpo nyansa nyinaa.
2 Kwasea ani nnye nteaseɛ ho,
Na mmom deɛ ɛwɔ n’akomam na ɔyi no adi.+
3 Sɛ ɔbɔnefoɔ ba a, animtiabuo nso ba,
Na animguaseɛ ne aniwuo na ɛnam.+
4 Onipa anom nsɛm yɛ nsuo a emu dɔ.+
Nyansa asutire yɛ nsuo a ɛtene bu fa so.
5 Ɛnyɛ papa sɛ wobɛyɛ animhwɛ na woadi ama ɔbɔnefoɔ,+
Na ɛnyɛ papa nso sɛ wobɛbu ɔteneneeni atɛnkyea.+
6 Kwasea anom asɛm de ntɔkwa ba,+
Na n’ano frɛfrɛ ɛhweɛ.+
7 Kwasea ano na ɛsɛe no,+
Na n’ano na ɛsum ne nkwa fidie.
8 Deɛ ɔsɛe nkurɔfoɔ din no, ne nsɛm te sɛ aduane a ɛyɛ dɛ;+
Nkurɔfoɔ memene kɔgu wɔn yafunu mu tɔnn.+
9 Obiara a ɔyɛ akwadworɔ wɔ n’adwuma ho no,
Ne nua ne ɔdesɛefoɔ.+
10 Yehowa din yɛ abandenden.+
Emu na ɔteneneeni dwane kɔ, na ɔnya ahobammɔ.+
11 Osikani ahonyadeɛ ne ne kuro a ɛyɛ den;
N’ani so no, ɛte sɛ fasuo a ɛbɔ ne ho ban.+
12 Sɛ onipa akoma ma ne ho so a, deɛ ɛdi akyire ba ne ahweaseɛ,+
Na ahobrɛaseɛ ba a, deɛ ɛdi akyire ba ne animuonyam.+
13 Sɛ obi bua asɛm ansa na wate emu nokorɛ a,
Ɛyɛ nkwaseasɛm ne animguaseɛ ma no.+
14 Onipa honhom tumi boa no wɔ ne yareɛ mu,+
Na honhom a abubuo deɛ, hwan na ɔbɛtumi asoa?+
15 Onipa a ɔwɔ nteaseɛ no, n’akoma nya nimdeɛ,+
Na anyansafoɔ aso hwehwɛ nimdeɛ.
16 Onipa akyɛdeɛ bue kwan ma no;+
Ɛde no kɔ nnipa atitire anim.
17 Deɛ ɔdi kan ka n’asɛm no, anhwɛ a wobɛka sɛ n’asɛm yɛ dɛ,+
Kɔsi sɛ deɛ ɔne no anya asɛm no bɛba na wabɛbisabisa no nsɛm.+
18 Sɛ wɔbɔ ntonto a, ɛma akyinnyeɛ to twa,+
Na ɛpata atumfoɔ a mente-me-ho-ase aba wɔn ntam.
19 Onua a wɔafom no no, n’asɛm yɛ den sene kuro a wɔato ho fasuo;+
Na mansotwe bi wɔ hɔ a, ɛte sɛ nnadeɛ a wɔde abram abankɛseɛ akyi.+
20 Onipa anom aba na ɛhyɛ ne yafunu ma;+
Na deɛ ɛfiri n’anom ba na ɛbɛmee no.
21 Owuo ne nkwa wɔ kɛtrɛma nsam;+
Wɔn a wɔpɛ sɛ wɔde yɛ adwuma no bɛdi so aba.+
22 Deɛ wanya ɔyere pa no, wanya adepa,+
Na Yehowa bɛgye no atom.+
23 Ohiani rekasa a ɔpa kyɛw,
Na osikani reyi ano a, ɔtu ne nsɛm bumbum.
24 Ayɔnkofoɔ bi wɔ hɔ a, obiara nya ne yɔnko a, ɔremfa ne ho nkyɛ no,+
Na adamfoɔ bi deɛ, ɔntwe ne ho da, ɔkyɛn onua mpo.+