Amos

2 “Deɛ Yehowa aka nie,

‘“Moab bɔne* a ɛtɔ so mmiɛnsa+ ne deɛ ɛtɔ so nnan nti, deɛ maka no, merentwe nsan,

Ɛfiri sɛ ɔhyee Edom hene nnompe de yɛɛ akaadoo.

 2 Enti mede egya bɛto Moab, na ɛbɛhye Keriot aban a ɛyɛ den no.+

Moab bɛwu wɔ dede mu,

Ɔbɛwu wɔ ɛko nteateamu ne abɛn nnyegyeeɛ mu.+

 3 Mɛtwa ɔhene* no afiri ne mu,

Na mɛkum emu mpanimfoɔ nyinaa aka ne ho,”+ Yehowa asɛm nie.’

 4 Deɛ Yehowa aka nie,

‘Yuda bɔne* a ɛtɔ so mmiɛnsa+ ne deɛ ɛtɔ so nnan nti, deɛ maka no, merentwe nsan,

Ɛfiri sɛ wɔpoo Yehowa mmara,*

Na wɔanni n’ahyɛdeɛ so.+

Mmom, atorɔ a wɔn agyanom dii akyire no,* ɛno ara na wɔadi akyire afom kwan.+

 5 Enti mede egya bɛto Yuda,

Na ɛbɛhye Yerusalem aban a ɛyɛ den no.’+

 6 Deɛ Yehowa aka nie,

‘Israel bɔne* a ɛtɔ so mmiɛnsa+ ne deɛ ɛtɔ so nnan nti, deɛ maka no, merentwe nsan,

Ɛfiri sɛ wɔtɔn ɔteneneeni gye dwetɛ,

Na wɔtɔn ohiani gye mpaboa.+

 7 Wɔtiatia mmɔborɔwafoɔ tiri so hyɛ mfuturo mu,+

Na wɔsi ahobrɛasefoɔ kwan.+

Ɔbarima ne ne papa ne ɔbaa baako da,*

Na wɔde gu me din kronkron no ho fĩ.

 8 Ntoma a wɔma nkurɔfoɔ de bɛsi awowa no, ɛno na wɔda so wɔ afɔrebukyia biara ho,+

Na nsã a wɔabɔ ebinom ka ama wɔde aba no na wɔnom wɔ wɔn anyame fie.’*

 9 ‘Nanso me na mesɛee Amorini no wɔ wɔn anim,+

Amorini a na ne tenten te sɛ sida dua, a ne ho yɛ den sɛ odum no;

Mesɛee n’aba a ɛwɔ so, ne ne nhini a ɛwɔ fam no.+

10 Meyii mo firii Egypt asaase so,+

Na memaa monantee serɛ so mfeɛ 40,+

Na memaa mokɔgyee Amorini no asaase fae.

11 Memaa mo mma no bi bɛyɛɛ adiyifoɔ,+

Na memaa mo mmeranteɛ no bi bɛyɛɛ Nasirifoɔ.+

12 ‘Nanso mode nsã* puapuaa Nasirifoɔ no,+

Na moka kyerɛɛ adiyifoɔ no sɛ: “Monnhyɛ nkɔm.”+

13 Enti mɛyam mo wɔ baabi a mowɔ,

Sɛdeɛ teaseɛnam a wɔde hwiit* a wɔatwa no foforɔ ahyɛ no ma yam biribiara a ɛfa so no.

14 Deɛ ne ho yɛ hare rennya baabi nnwane nkɔ,+

Na deɛ ne ho yɛ den ahoɔden bɛsa,

Na ɔsabarima biara rentumi nnwane mpere ne nkwa.*

15 Deɛ ɔkura agyan rentumi nnyina,

Na deɛ ne nan ase yɛ hare rentumi nnwane,

Na deɛ ɔte pɔnkɔ so rentumi nnwane mpere ne nkwa.*

16 Ɔsabarima a ɔwɔ akokoɔduro paa* mpo,

Ɔde ne ho kwaterekwa* na ɛbɛdwane saa da no,’+ Yehowa asɛm nie.”