Deuteronomium
26 “Na sɛ wonya duru asase a Yehowa wo Nyankopɔn de ama wo sɛ agyapadeɛ no so na wofa tena so a,+ 2 fa asase a Yehowa wo Nyankopɔn de ama woɔ no so aba a ɛdi kan+ no biara bi gu kɛntɛn mu kɔ faako a Yehowa wo Nyankopɔn de ne din bɛdua.+ 3 Na bra ɔsɔfoɔ a ɔwɔ hɔ saa berɛ no nkyɛn+ na ka kyerɛ no sɛ, ‘Mepɛ sɛ meka kyerɛ Yehowa wo Nyankopɔn nnɛ sɛ mabɛduru asase a Yehowa kaa yɛn agyanom ntam sɛ ɔde bɛma yɛn no so.’+
4 “Afei ɔsɔfoɔ no nnye kɛntɛn no mfiri wo nsam na ɔmfa nsi Yehowa wo Nyankopɔn afɔrebukyia no anim. 5 Ka no Yehowa wo Nyankopɔn anim sɛ, ‘Ná me papa yɛ Siriani a owuo bɔn ne ho;+ na ɔde nnipa kakraa bi+ kɔtenaa Egypt+ sɛ ɔhɔhoɔ, nanso akyire yi n’asefoɔ bɛdɔɔso yɛɛ ɔman kɛseɛ a wɔn ho yɛ den.+ 6 Afei Egyptfoɔ no firii aseɛ tan yɛn ani, na wɔhyɛɛ yɛn so maa yɛyɛɛ nkoadwuma a ɛyɛ den.+ 7 Enti yɛsũ frɛɛ Yehowa yɛn agyanom Nyankopɔn,+ na Yehowa tee yɛn nne+ na ɔhunuu yɛn amanehunu ne yɛn haw ne yɛn ahokyerɛ.+ 8 Afei Yehowa nam nsa a ɛyɛ den+ ne basa a wɔatene mu+ ne ahudeɛ+ ne nsɛnkyerɛnne ne anwanwadeɛ+ so yii yɛn firii Egypt. 9 Na ɔde yɛn aba ha sɛ yɛmfa asase a nufosuo ne ɛwoɔ sene soɔ yi.+ 10 Enti mede asase a Yehowa de ama me no so aba a ɛdi kan aba.’+
“Afei fa si Yehowa wo Nyankopɔn anim na koto Yehowa wo Nyankopɔn anim.+ 11 Na wo ne Lewini ne ɔhɔhoɔ a wabɛsoɛ woɔ ani nnye+ sɛ Yehowa wo Nyankopɔn ama wo ne wo fiefoɔ nnepa yi nyinaa.+
12 “Afe a ɛtɔ so mmiɛnsa no yɛ afe a wobɛkyɛ wo nnɔbaeɛ nyinaa mu du de baako aba.+ Enti ɛduru saa afe no a, kyɛ w’afuo mu nnɔbaeɛ a wonyaeɛ no mu du na fa emu baako ma Lewini ne ɔhɔhoɔ ne agyanka ne okunafoɔ, na wɔnni no wo kuro mu mmee.+ 13 Na kɔ Yehowa wo Nyankopɔn anim na ka kyerɛ no sɛ, ‘Mayi ade kronkron afiri me fie de ama Lewini ne ɔhɔhoɔ ne agyanka ne okunafoɔ+ sɛdeɛ ahyɛdeɛ a wode ama me no nyinaa teɛ. Memmane mfirii w’ahyɛdeɛ ho na me werɛ mfiriiɛ nso.+ 14 Berɛ a meredi awerɛhoɔ no manni bi, na berɛ a na me ho nteɛ no manyi bi, na mamfa bi amma owufoɔ biara. Matie Yehowa me Nyankopɔn asɛm, na mayɛ deɛ woahyɛ me nyinaa. 15 Firi wo tenabea kronkron+ a ɛwɔ soro hɔ no hwɛ wo man Israel na hyira wɔn+ ne asase a wode ama yɛn a nufosuo ne ɛwoɔ sene soɔ no,+ sɛdeɛ wokaa yɛn agyanom ntam no.’+
16 “Yehowa wo Nyankopɔn rehyɛ wo nnɛ sɛ di ahyɛdeɛ ne atemmusɛm+ yi so. Enti fa w’akoma+ ne wo kra+ nyinaa di so na yɛ. 17 Woama Yehowa aka nnɛ sɛ ɔbɛyɛ wo Nyankopɔn na woanante n’akwan so na woadi n’ahyɛdeɛ+ ne ne mmara nsɛm+ ne n’atemmusɛm+ so na woatie n’asɛm.+ 18 Na Yehowa nso ama woaka no nnɛ sɛ wobɛyɛ ne man, n’agyapadeɛ titire,+ sɛdeɛ ɔhyɛɛ wo bɔ no,+ na woadi ne mmara nsɛm nyinaa so. 19 Na ɔbɛma wo so asene aman a wabɔ nyinaa,+ na ɛde ayeyie abrɛ no, na ama ne din so, na ahyɛ no animuonyam. Na wobɛyɛ ɔman kronkron ama Yehowa wo Nyankopɔn+ sɛdeɛ wahyɛ bɔ no.”