Leviticus

27 Yehowa toaa so ka kyerɛɛ Mose sɛ: 2 “Ka kyerɛ Israelfo sɛ, ‘Sɛ obi hyɛ bɔ titiriw+ bi de ɔkra bi ma Yehowa sɛnea ɛbo a wɔatwa no te a, 3 ɔbarima a wadi fi mfe aduonu kosi aduosia no bo bɛyɛ nnwetɛbona aduonum, sɛnea wobu dwetɛbona ano wɔ kronkronbea hɔ no. 4 Na sɛ ɔyɛ ɔbea a, ɛbo no bɛyɛ nnwetɛbona aduasa. 5 Sɛ ɔyɛ ɔbarima a wadi fi mfe anum kosi aduonu a, ɛbo no bɛyɛ nnwetɛbona aduonu, na ɔbea nso nnwetɛbona du. 6 Sɛ ɔyɛ abarimaa a wadi fi ɔsram biako kosi mfe anum a, ɛbo no bɛyɛ nnwetɛbona anum,+ na abeawa nso nnwetɛbona abiɛsa.

7 “‘Sɛ wadi mfe aduosia ne akyi na ɔyɛ ɔbarima a, ɛbo no bɛyɛ nnwetɛbona dunum, na ɔbea nso nnwetɛbona du. 8 Nanso sɛ ahia nea wahyɛ bɔ no na ɔrentumi ntua bo a wɔatwa+ no a, ɔmfa nea ɔpɛ sɛ ɔde no ma no mmegyina ɔsɔfo no anim na ɔsɔfo no nkyerɛ ne bo.+ Na ɛbo a nea ɔhyɛɛ bɔ no betumi+ na ɔsɔfo no betwa.

9 “‘Sɛ ɛyɛ aboa a wotumi de bɔ afɔre ma Yehowa a, nea ɔde bɛma Yehowa biara bɛyɛ ade kronkron.+ 10 Ɔrentumi nsesa; ɔrentumi mfa nea eye nsesa nea enye, na ɔrentumi mfa nea enye nsesa nea eye. Na sɛ ɛba sɛ ɔde aboa foforo sesa nea ɔde ahyɛ bɔ no a, ɛnde mmoa abien no nyinaa bɛyɛ ade kronkron. 11 Nanso sɛ ɛyɛ aboa a ne ho ntew+ a wontumi mfa mma Yehowa a,+ ɛnde ɔmfa aboa no mmegyina ɔsɔfo no anim.+ 12 Afei ɔsɔfo no nhwɛ sɛnea aboa no te, sɛ eye oo, sɛ enye oo, na ontwa bo nto no so. Nea ɔsɔfo no bɛkyerɛ+ na ɛbɛyɛ ne bo. 13 Na sɛ nea ɔhyɛɛ bɔ no pɛ sɛ ɔsan nya n’ade bio a, wɔbɛkyɛ ne bo no mu anum ama watua emu biako+ aka ne bo no ankasa ho.

14 “‘Sɛ obi hyira ne fie so ma Yehowa sɛ ade kronkron a, ɔsɔfo no nhwɛ sɛnea fie no te, sɛ eye oo, sɛ enye oo,+ na ontwa bo nto so. Nea ɔsɔfo no bɛkyerɛ na ɛbɛyɛ ne bo. 15 Nanso sɛ onii a wahyira ne fie so de ama no pɛ sɛ ɔsan nya bio a, wɔbɛkyɛ ne bo no mu anum ama watua emu biako aka ne bo no ankasa ho.+ Afei ɛbɛsan abedi ne nsam.

16 “‘Na sɛ obi twa n’asase fã+ hyira so ma Yehowa a, aba dodow a obedua wɔ so na ɛbɛkyerɛ ne bo: Sɛ ɛyɛ atoko a, homar+ susude biako biara bɛyɛ nnwetɛbona aduonum. 17 Na sɛ Ahofadi afe+ no mu ara na ohyiraa n’asase no so a, ɛbo a wobetwa ato hɔ no na wɔde begye. 18 Sɛ Ahofadi afe no akyi na ohyiraa n’asase no so a, ɔsɔfo no nhwɛ mfe a aka ansa na Ahofadi afe asan adu na ɔnkyerɛ ne bo. Enti ɔbɛhwɛ mfe a aka no na watew bo a wɔatwa no so.+ 19 Na sɛ nea ohyiraa so no pɛ asase no bio a, ɛnde wɔnkyɛ ne bo no mu anum na ontua mu biako nka ne bo no ankasa ho. Afei ɛbɛsan abedi ne nsam.+ 20 Nanso sɛ wannye asase no na wɔtɔn ma obi foforo a, ne nsa renka bio. 21 Edu Ahofadi afe no mu a, asase no bɛyɛ ade kronkron a wɔahyira so+ ama Yehowa. Ɛbɛyɛ ɔsɔfo no agyapade.+

22 “‘Sɛ asase a wahyira so ama Yehowa no nyɛ n’ankasa agyapade,+ na mmom ɔtɔe a, 23 ɛnde ɔsɔfo no nsese mfi saa bere no nkosi Ahofadi afe no so na ɔnkyerɛ ne bo, na ɔmfa mma da no ara.+ Ɛyɛ ade kronkron ma Yehowa.+ 24 Ahofadi afe no du a, asase no bɛsan akodi nea ɔtɔ fii ne hɔ no nsam; ɔno na ɛyɛ n’agyapade.+

25 “‘Ɛsɛ sɛ wobu biribiara bo sɛnea wobu dwetɛbona ano wɔ kronkronbea hɔ. Dwetɛbona biara yɛ gerah aduonu.+

26 “‘Aboa biara abakan de, ɛnsɛ sɛ obi hyira so, efisɛ ɛyɛ Yehowa dea+ dedaw. Nantwi oo, oguan oo, ɛyɛ Yehowa dea.+ 27 Na aboa a ne ho akum+ abakan de, sɛ ɔpɛ sɛ ne nsa ka bio a, ontua ɛbo a wɔatwa ato hɔ no, na ɔmfa ɛbo no nkyem anum mu biako nka ho.+ Na sɛ wantɔ a, ɛnde wɔntɔn no sɛnea ne bo te.

28 “‘Nanso sɛ obi yi n’agyapade bi si hɔ sɛ ɔde ama Yehowa korakora*+ a, ɛyɛ onipa oo, aboa oo, n’asase oo, obiara rentumi ntɔn, na ɔrentumi nnye bio nso.+ Ɛyɛ akronkronne mu ade kronkron ma Yehowa. 29 Afei nso sɛ woyi onipa bi si hɔ ma ɔsɛe a, obiara rentumi ntua nnye no.+ Ɛsɛ sɛ wokum no.+

30 “‘Na asase so nnɔbae ne dua so aba nyinaa nkyem du mu biako+ yɛ Yehowa dea. Ɛyɛ akronkronne ma Yehowa. 31 Na sɛ obi pɛ sɛ ɔsan tɔ nkyem du mu biako no a, ɛnde ontua ne bo no na ɔmfa ɛbo no nkyem anum mu biako nsan nka ho.+ 32 Na nantwi oo, oguan oo, biribiara a ɛfa oguanhwɛfo poma ase+ no, nea ɛto so du biara bɛyɛ akronkronne ama Yehowa. 33 Ɛnsɛ sɛ ɔhwɛ mu hwɛ sɛ eye anaa enye, na ɔnnsesa nso. Ɛba sɛ ɔsesa a, ɛnde ɛno ne nea ɔde sesae no nyinaa bɛyɛ akronkronne.+ Ɔrentumi nnye bio.’”

34 Eyinom ne ahyɛde+ a Yehowa de maa Mose sɛ ɔmfa mma Israelfo wɔ Bepɔw Sinai+ so.