1 ENOK
Ɔne Onyankopɔn Nantewee
NNIPA a wɔtenaa ase a wɔtee nka sɛ wɔayɛ ankonam no, na Enok ka ho. Sɛ wode no toto ne bere sofo ho a, na ɔda mu fua. Ɔno nko ara ne onipa a ɔtenaa ase saa bere no a Bible ka ne ho asɛm sɛ: “Enok kɔɔ so ne nokware Nyankopɔn no nantewee.” Obi a ɔyɛ onipa de, ɛyɛɛ dɛn na otumi ne Onyankopɔn nantewee? Akokoduru ho ade bɛn na yebetumi asua afi Enok hɔ nnɛ?
Anyɛ yiye koraa no, akwan mmienu na Enok faa so ne Onyankopɔn nantewee. Ɛne sɛ, ɔtwee ne ho fii nneɛma bi a ɛmfata ho, ɛnna ɔyɛɛ nneɛma papa nso. Nnipa a na wɔn bra asɛe na wɔmfa Onyankopɔn nyɛ hwee no, wansuasua wɔn. Saa bere no, na Adam ne Hawa da so te ase, na na wɔanyinyin paa. Ná Enok tɔ wɔn so nson wɔ awo ntoatoaso mu. (Hwɛ bere ne nneɛma bi a esisii “Efi Tete Agyanom Bere So Kosi Atemmufo No Bere So.”) Ɛsa bɔne a Adam ne Hawa twa too hɔ no, na nnipa pii adi akyi ma wɔn nso asɔre atia Onyankopɔn. Adam babarima Kain kum ne nua Habel, onipa a odii kan kyerɛe sɛ ɔwɔ gyidi no. Ná Kain asefo no bi tirim yɛ den te sɛ ɔno ara, na ebi dii awurukasɛm kyɛn no mpo. (Gen. 4:23, 24) Nanso Enok de, atirimɔdensɛm a na ɛrekɔ so wɔ ne bere so no, wamfa ne ho anhyem, mmom, onyaa akokoduru twee ne ho fii ho. Ná ɔyɛ onipa a ɔpɛ asomdwoe, na wei sɔɔ Onyankopɔn ani.
Mfe pii ansa na wɔrewo Enok no, nkurɔfo ‘fii ase bɔɔ Yehowa din.’ (Gen. 4:26) Ɛbɛyɛ sɛ na wɔde Onyankopɔn din no ka abususɛm, na na wɔde di dwuma wɔ abosonsom mu de bu no animtiaa. Nanso nea na ɛrekɔ so nyinaa, Enok anyɛ bi. Ná ɔdɔ Yehowa, na na obu ne din kronkron no paa, enti ɔtwee ne ho fii nneɛma a ɛmfata a na nkurɔfo reyɛ wɔ ne bere so no ho.
Ná nkurɔfo pɛ sɛ wɔkum Enok, efisɛ asɛm a ɔka kyerɛɛ wɔn no anyɛ wɔn dɛ, nanso Yehowa de ne ho gyee mu bɔɔ ne ho ban
Onyankopɔn de adwuma soronko bi hyɛɛ Enok nsa sɛ ɔnyɛ ne diyifo. Ná obehia akokoduru kɛse na watumi ayɛ saa adwuma no, efisɛ na ɔrekɔka asɛm bi akyerɛ nnipa a wɔn bra asɛe koraa. Asɛm a Onyankopɔn somaa no sɛ ɔnkɔka ni: “Hwɛ! Yehowa de n’ahotefo mpempem pii bae, na obebuu obiara atɛn, na nneɛma bɔne a amumɔyɛfo nyinaa yɛ tiaa Onyankopɔn ne ahodwirisɛm a nnebɔneyɛfo a wonsuro no ka tiaa no nyinaa nti, obuu wɔn fɔ.”
Hyɛ no nsow sɛ, Enok kaa asɛm no te sɛ nea asi dedaw, te sɛ nea Onyankopɔn ama nkɔmhyɛ no abam dedaw. Wei kyerɛ sɛ, ke ara ne ke, na Enok asɛm no bɛba mu. Ná asɛm no yɛ atemmusɛm a ano yɛ hyew. Atemmusɛm a Enok kae no, emu nsɛm no bi ne, “nneɛma bɔne,” “amumɔyɛfo,” “ahodwirisɛm,” ne “nnebɔneyɛfo.” Enok nsɛm no, nkurɔfo te a na ɛrenyɛ wɔn dɛ, mmom, ɛbɛwowɔ wɔn. Nanso nea Yehowa pɛ sɛ wɔte no de, ɔde akokoduru ka kyerɛɛ wɔn.
Bere a nkurɔfo no tee asɛm no, wɔyɛɛ wɔn ade sɛn? Ɛno de, Bible nhyɛ da nka, nanso ɛma yehu paa sɛ eduu baabi no, na Enok nkwa da asiane mu paa. Yɛyɛ dɛn hu saa? Bible ka sɛ: “Eduu bere bi no wɔanhu no bio, efisɛ Onyankopɔn faa no kɔe.” Adɛn, dɛn na esii? Nea ɛte ne sɛ, na atirimɔdenfo a wɔwɔ Enok bere so no retan n’ani paa. Yehowa amma kwan amma wɔankum n’adamfo a ɔda ne koma so yi, anaa wɔanyɛ no ayayade, mmom ɔdɔ a Yehowa wɔ ma Enok nti, otwaa ne nkwa so bɔkɔɔ a wante owuyaw biara. Nea Yehowa yɛe nti, obiara annya Enok anyɛ no ayayade biara; Yehowa da so kae no, na obenyan no daakye.
Ansa na Enok rewu no, Yehowa maa no akyɛde bi. Yɛkenkan wɔ Bible mu sɛ: “Ansa na wɔreyi [Enok] afi hɔ no, onyaa adanse sɛ wasɔ Onyankopɔn ani yiye.” Ebetumi aba sɛ, asomdwoe a daakye nnipa benya bere a asaase adan Paradise no, Yehowa maa Enok nyaa ɛho anisoadehu! Ansa na Enok reka n’ani agu so no, na obetumi anya awerɛhyem kɛse sɛ, Yehowa dɔ no, na esiane gyidi kɛse a ɔwɔ, ne akokoduru a ɔkɔɔ so daa no adi nti, Yehowa ahyira no!
Kenkan asɛm yi fi Bible mu:
Yensusuw wei ho:
Dɛn ne dɛn na Enok yɛe a ɛkyerɛ sɛ na ɔwɔ akokoduru?
Sua Pii Ka Ho
1. Bere a Bible kaa sɛ nnipa fii ase “bɔɔ Yehowa din” no, na ɛkyerɛ sɛn? (Gen. 4:26; w01 9/15 29 ¶3)
2. Enok ne ɔnokwafo a odii kan yɛɛ adwuma bi. Ná ɛyɛ adwuma bɛn? Ɛyɛɛ dɛn na otumi yɛɛ n’adwuma no? (w01 9/15 31 ¶6)
3. Ansa na Enok refi ase ahyɛ nkɔm no, ɛbɛyɛ sɛ na onim sɛ obehyia n’akokoduru ho sɔhwɛ. Ná ɔbɛyɛ dɛn ahu? (w06 10/1 19 ¶13-14) A
Mfoni A
4. Ebinom gye di sɛ, wɔfaa Enok kɔɔ soro, nanso wobɛyɛ dɛn akyerɛkyerɛ mu sɛ wɔamfa no ankɔ soro? (Yoh. 3:13; Heb. 11:5, 13)
Dɛn Na Woasua?
Bere bɛn paa na yebehia akokoduru na yɛatumi aka asɛm no? Sɛ yɛhwɛ Enok nhwɛso no a, ɛma yehu sɛ dɛn na ebetumi aboa yɛn ama yɛanya akokoduru? B
Mfoni B
Sɛ yenya akokoduru ne Yehowa nantew a, ɛma ɔte nka sɛn? (Mmeb. 27:11; Heb. 11:5)
Wobɛyɛ dɛn asuasua sɛnea Enok daa akokoduru adi no?
Dwinnwen Asɛm Yi Ho Kɔ Akyiri
Dɛn na asɛm yi ma mihu fa Yehowa ho?
Nea Yehowa abɔ ne tirim sɛ ɔbɛyɛ no, dɛn na asɛm yi ma mihu fa ho?
Sɛ Onyankopɔn nyan Enok ba a, asɛm bɛn na mebisa no?
Sua Biribi Foforo Wɔ Ha
Sɛn na Enok nhwɛso no betumi aboa wo ama woagyina aturuturasɛm anaa basabasayɛ ano?
Suasua Wɔn a Na Wɔwɔ Gyidi, Ɛnyɛ Wɔn a Na Wonni Gyidi—Suasua Enok, Nsuasua Lamek (2:53)
Nea ɛboaa Enok ma onyaa gyidi no, dwinnwen ho.
“Wo Ne Onyankopɔn Nnantew Wɔ Bere a Basabasayɛ Wom Yi Mu” (w05 9/1 13-17)