Atɛntrenee Da Adi Wɔ Onyankopɔn Akwan Nyinaa Mu
“Ɔbotan no, n’adeyɛ yɛ pɛ, na n’akwan nyinaa yɛ trenee; ɔyɛ nokware Nyankopɔn na nkontompo nni no mu.”—DEUTERONOMIUM 32:4.
1. Yehowa su horow bɛn na Mose sii so dua wɔ dwom a ɔto kyerɛɛ Israel mma ansa na ɔrewu no mu, na dɛn nti na na ɔfata sɛ ɔkasa te sɛ nea ɔyɛe no?
YEHOWA a ɔne Ɔtemmufo Kɛse, Mmarahyɛfo, ne Ɔhene no ‘dɔ asɛntrenee ne atɛntrenee.’ (Dwom 33:5; Yesaia 33:22) Mose a na ɔne Mmara apam no ntamgyinafo ne odiyifo a “[Yehowa] huu no mmɔanim” no,—huu Yehowa akwantrenee no yiye. (Deuteronomium 34:10; Yohane 1:12) Bere tiaa bi ansa na Mose rewu no, osii Yehowa atɛntrenee a ɛsom bo yiye no so dua. Ɔkaa dwom a edi so yi mu nsɛm maa Israel asafo no nyinaa tee: “Ɔsoro, monyɛ aso, na merebɛkasa, na asase ntie m’anom nsɛm! . . . Na [Yehowa] din na mɛbɔ: momfa nidi mma yɛn Nyankopɔn. Ɔbotan no, n’adeyɛ yɛ pɛ, na n’akwan nyinaa yɛ trenee; ɔyɛ nokware Nyankopɔn na nkontompo nni no mu.”—Deuteronomium 32:1, 3, 4.
2. Ɔkwan bɛn so na atɛntrenee ada adi wɔ Onyankopɔn dwumadi ahorow nyinaa mu bere nyinaa, na dɛn nti na eyi ho hia?
2 Atɛntrenee da adi wɔ Yehowa dwumadi nyinaa mu na ɔde di dwuma ma ɛne nyansa, ɔdɔ ne tumi a ɔwɔ no hyia pɛpɛɛpɛ bere nyinaa. Onyankopɔn akoa Elihu kaee Hiob wɔ Hiob 37:23 sɛ: “Otumfoɔ de, yenhu no, ɔyɛ tumi mu ɔkɛse, na ɔrenkyea atemmu ne trenee a ɛdɔɔso.” Ɔhene Dawid kyerɛwee sɛ: ‘Efisɛ Yehowa dɔ atɛntrenee na ɔrennyaw n’anokwafo.’ (Dwom 37:28) Bɔhyɛ a ɛma yenya awerɛkyekye bɛn ara ni! Onyankopɔn rennyaw wɔn a wodi no nokware nyinaa no da wɔ n’akwan nyinaa mu. Onyankopɔn atɛntrenee de eyi ho bɔhyɛ ma!
Nea Enti a Atɛntrenee Nni Hɔ
3. Dɛn na enni nnipa mu nnɛ, na ɔkwan bɛn so na eyi aka onipa ne Onyankopɔn ntam abusuabɔ?
3 Esiane sɛ Yehowa yɛ Atɛntrenee Nyankopɔn, Nea ɔdɔ atɛntrenee ne ‘asase awiei Bɔfo’ nti, dɛn nti na atɛntrenee nni nnipa mu nnɛ koraa? (Yesaia 40:28) Mose de mmuae ma wɔ Deuteronomium 32:5 sɛ: “Wɔadi asɛmmɔne, wɔn nkekae nti, wɔnna so nye ne mma, wɔyɛ awo ntoatoaso kɔntɔnkye a wɔakyea.” Onipa dwumadi a ɛsɛe nneɛma no ama watwe ne ho afi ne Bɔfo ho araa ma wɔka Onyankopɔn adwene ne n’akwan ho asɛm sɛ ɛkorɔn sen onipa de “sɛ ɔsoro korɔn sen asase no.”—Yesaia 55:8, 9.
4. Ɔkwan bɛn na onipa apaw sɛ ɔbɛfa so, na eyi de no akodu he?
4 Mma wo werɛ mfi da sɛ onipa Bɔfo annwene onipa sɛ ɔnyɛ obi a watwe ne ho afi Ne ho. Yeremia susuw tebea no ho wɔ ɔkwan a ɛteɛ so ma yɛn bere a ɔka eyi no: “[Yehowa], mahu sɛ onipa kwan nni ne nsam, enni ɔbarima nsam, sɛnea ɔnam a obetutu n’anammɔn.” (Yeremia 10:23) Onyankopɔn akwantrenee ne ne tumidi a onipa apow no ama ɔde ne ho akɔhyɛ dɔm bi a aniwa nhu wɔn a ɛsono wɔn koraa a wɔwɔ tumi kɛse a wɔne Satan Ɔbonsam ne n’adaemone a wɔka ne ho no ase. Ɔsomafo Yohane kae pefee sɛ: “Wiase nyinaa da ɔbɔne no mu.” Adaemone dɔm yi ani nnye ho koraa sɛ wɔbɛma atɛntrenee atra adesamma mu.—1 Yohane 5:19.
5. Fa atɛntrenee a enni wiase nnɛ no ho nhwɛso ahorow ma.
5 Amerika aban mmaranimfo panyin William French Smith sii atɛntrenee a enni hɔ wɔ nneɛma nhyehyɛe yi nna a edi akyiri yi mu no so dua wɔ 1984 mu. Bere a Smith reka mmere a wɔde da afiase wɔ Amerika amansin 12 mu wɔ 1977 ne 1983 ntam ho nhwehwɛmu ho asɛm no, ɔkae sɛ: “Ɔmanfo bu no sɛ mmaratofo a wɔsen biara—awudifo, mmonnaatofo, ne nnubɔne tɔnfo—da afiase kyɛ yiye. Ahyehyɛde no nhwehwɛmu . . . da sɛnea ɛyɛ mmerɛw ma nsɛmmɔnedifo a wɔnsakra no sɛ wɔbɛsan aba mmorɔn so ma wɔabedi nsɛmmɔne afoforo no adi.” Ɛnyɛ nwonwa sɛ Paul Kamenar a ɔyɛ Washington Mmara Ahyehyɛde no muni kae sɛ: “Atemmu nhyehyɛe no mu taa gow.”
6. (a) Abrabɔ tebea bɛn mu na na Yuda wɔ ansa na ɔrekɔ nnommumfa mu? (b) Nsɛm bɛn na Habakuk bisae, na so wobetumi abisa saa nsɛm no nnɛ?
6 Na atemmu mu agow wɔ Yuda man no mu nyinaa ansa na Babilonfo asraafo reko afa wɔ 607 A.Y.B. mu. Enti, wofi soro de honhom kaa odiyifo Habakuk ma ɔkyerɛwee sɛ: “Mmara mu agow, na atɛmpa mfi ara da, efisɛ abɔnefo twa ɔtreneeni ho hyia, enti atemmu fi a, na akyea.” (Habakuk 1:4) Tebea a ɛnteɛ yi maa odiyifo no bisaa Yehowa sɛ: “Wo a w’aniwa yɛ kronkron a wuntumi nhwɛ bɔne na wuntumi nhwɛ ɔhaw, ɛdɛn nti na wohwɛ nkɔnkɔnsafo, na ɔbɔnefo mene ɔtreneeni a ɔteɛ sen no a, woyɛ komm?” (Habakuk 1:13) Ɛnnɛ, ebia nnipa a atɛnkyea a ɛkɔ so wɔ adesamma dwumadi nyinaa mu aka wɔn no nso bebisa sɛ: Dɛn nti na atɛntrenee Nyankopɔn no kɔ so hwɛ ntɛnkyea a wobu wɔ asase so no? Dɛn nti na ɔma ‘atemmu fi a, na akyea’? Dɛn nti na ‘ɔyɛ komm’? Eyinom yɛ nsemmisa a ɛho hia na Onyankopɔn Asɛm a ɛsom bo a ɛne Bible no nkutoo na ɛde nokware mmuae a ɛma akomatɔyam ma.
Nea Enti a Onyankopɔn Ama Atɛnkyea ho Kwan
7. (a) Dɛn nti na Paradise a Onyankopɔn de maa onipa no fii ne nsa? (b) Nsɛmpɔw bɛn na wɔma ɛsɔree wɔ Eden, na ɔkwan bɛn so na Onyankopɔn atɛntrenee dii eyi ho dwuma?
7 Sɛnea Mose dii ho adanse no, Onyankopɔn nnwuma yɛ pɛ. Na ɛte saa wɔ nnipa baanu a wodi kan a Onyankopɔn de wɔn traa Eden Paradise no fam. (Genesis 1:26, 27; 2:7) Na nhyehyɛe mu no nyinaa yɛ pɛ a ɛbɛma adesamma adi yiye na wɔn ani agye. Ɔsoro kyerɛwtohɔ no ka kyerɛ yɛn sɛ: “Na Onyankopɔn huu nea ɔyɛe nyinaa, na hwɛ, eye papa.” Nanso ahotɔ a na ɛwɔ Eden no ankyɛ. Wɔ honhom abɔde otuatewfo bi nkɛntɛnso ase no, wɔtwetwee Hawa ne ne kunu Adam ma wɔne Yehowa nyaa ntawntawdi wɔ ɔkwan a Ɔnam so di wɔn so no ho. Wɔmaa sɛnea ahyɛde a Onyankopɔn de maa wɔn no teɛ no ho baa asɛm. (Genesis 3:1-6) Teɛ a Onyankopɔn tumidi teɛ ho mpoatwa yi maa abrabɔ mu nsɛmpɔw a ɛho hia sɔree. Ɔbarima nokwafo Hiob abakɔsɛm ho kyerɛwtohɔ kyerɛ sɛ mprempren wɔama Onyankopɔn abɔde nyinaa mudi mu kura nso ho aba asɛm. Atɛntrenee hwehwɛ sɛ wɔbɛma bere na wɔde asiesie nsɛmpɔw a ehia amansan no.—Hiob 1:6-11; 2:1-5; hwɛ Luka 22:31 nso.
8. (a) Amanehunu tebea bɛn na onipa hu ne ho wom mprempren? (b) Anidaso bɛn na wohu wɔ Mose dwom no mu?
8 Paulo kaa amanehunu tebea a adesamma wom a Onyankopɔn akwantrenee a wɔapow nti na ama aba saa no ho asɛm tiawa wɔ Romafo 8:22. Ɔsomafo no kyerɛwee wɔ hɔ sɛ: “Abɔde nyinaa penepene, na ɛko awo bedu nnɛ yi.” Saa ‘ɔpene’ ne ‘awoko’ no fã kɛse fi atɛntrenee a enni adesamma mu bere a “onipa di onipa so tumi ma ɛdan no bɔne” no. (Ɔsɛnkafo 8:9) Nanso yɛde aseda ma Ade Nyinaa so Tumfoɔ Nyankopɔn wɔ ma a ɔremma atɛnkyea a ɛte saa no ho kwan mma ɛnkɔ so daa no ho! Hyɛ nea Mose san kae wɔ eyi ho wɔ ne dwom no mu wɔ Deuteronomium 32:40, 41 no nsow: “Sɛ mete ase daa yi! Sɛ me [Yehowa] mesew me nkrante nnyinamnyinam no na me nsa so atemmu mu a, medi wɔn a wɔne me di asi were, na matua m’atamfo ka.”
9. Kyerɛkyerɛ sɛnea Yehowa nsa ‘soo atemmu mu’ bere a onipa tew atua no mu?
9 Yehowa nsa soo “atemmu” mu wɔ Eden. Onyankopɔn buu onipa kumfɔ ntɛm ara wɔ ɔkwan a ɛteɛ so esiane sɛ ɔhyɛɛ da buu Ne mmara so nti. Ɔka kyerɛɛ Adam sɛ: “Woyɛ dɔte, na dɔte mu na wobɛsan akɔ.” (Genesis 3:19) Mfehaha pii akyi no, ɔsomafo Paulo kaa ade a ɛyɛ hu a Adam bɔne no de brɛɛ adesamma abusua mũ no nyinaa ho asɛm tiawa. Ɔkyerɛwee sɛ: Sɛnea ɛnam onipa biako so na bɔne baa wiase, na owu nam bɔne so bae no, saa na ɛyɛe na owu trɛw kaa nnipa nyinaa, efisɛ wɔn nyinaa ayɛ bɔne.”—Romafo 5:12.
10. Asefo baanu bɛn na wɔn ase afɛe fi bere a Adam tew atua no, na Yehowa ayɛ n’ade dɛn?
10 Wɔ onipa atuatew akyi no, Onyankopɔn kae nso sɛ: “Na mede ɔtan mɛto wo ne ɔbea no ntam, ɛne w’asefo ne n’asefo ntam. Ɔno na ɔbɛbɔ wo ti, na wo nso woaka ne nantin.” (Genesis 3:15, 17-19) Asefo baanu yi ase afɛe wɔ mfe 6,000 mu na “ɔtan” akɔ so wɔ wɔn ntam bere nyinaa. Nanso Yehowa akwantrenee nsakrae wɔ nneɛma nyinaa a ɛsakra wɔ asase so no mu. Ɔnam ne diyifo Malaki so ka sɛ: ‘Na me, Yehowa, mensakrae ɛ.’ (Malaki 3:6) Eyi ama atɛntrenee ada adi wɔ akwan a Yehowa nam so ne adesamma atuatewfo a wɔnyɛ pɛ no adi no mu bere nyinaa. Yehowa ntwee ne ho mfii ne trenee nnyinasosɛm a ɛkorɔn no ho da bere a ɔma eyi ne ne su horow a ɛyɛ nwonwa a ɛne nyansa, ɔdɔ, ne tumi hyia mpo no.
Onyankopɔn Boa Onipa
11, 12. Ɔkwan bɛn so na Dwom 49 ka tebea a onipa wom no ho asɛm yiye?
11 Te sɛ posena (octopus) kɛse bi anan no, Satan nkɛntɛnso bɔne no akyekyere adesamma abusua mũ no nyinaa. Oo, hwɛ sɛnea ɛho hia ntɛm sɛ wobegye adesamma afi nnipa a wɔnyɛ pɛ nniso nhyehyɛe a ɛnteɛ nso ase na ɛnyɛ owu asotwe a ɛda wɔn so no nko ase!
12 Wɔaka tebea a ɛyɛ hu a onipa hu ne ho wom fi bere a wobuu no kumfɔ no ho asɛm yiye wɔ Kora mma dwom a edi so yi mu: “Aman nyinaa, muntie eyi, mo a mote wiase nyinaa, monyɛ aso. Nnipa mma mpapahwekwa oo, mmarima mma a wɔwɔ din oo, adefo ne ahiafo nyinaa. Onua rentumi nnye onipa da, ɔremma Onyankopɔn ne mpatade, na wɔn kra gye bo yɛ den, na ɛma ogyaw hɔ koraa, sɛ ɔntra ase ara daa, na wanhu ɔdamoa.” (Dwom 49:1, 2, 7-9) Esiane atɛntrenee a Onyankopɔn ada no adi nti eyi nyinaa aba!
13, 14. (a) Hena nkutoo na obetumi agye onipa, na dɛn nti na onii a Onyankopɔn apaw no no fata saa? (b) Ɔkwan bɛn so na Yesu bɛyɛɛ “Yiw” maa Onyankopɔn bɔhyɛ ahorow nyinaa?
13 Ɛnde, he na mmoa betumi afi aba? Hena na obetumi agye onipa afi owu tumi ase? Dwom no bua sɛ: “Me kra de, Onyankopɔn begye no asaman (Sheol) nsam.” (Dwom 49:15) Onyankopɔn dɔ kɛse a ɛyɛ adwuma ma ɛne N’atɛntrenee hyia no nkutoo na ebetumi agye onipa afi “asaman (Sheol) nsam.” Wɔsan buaa yɛn nsemmisa no wɔ Yesu ne Farisini Nikodemo a na ɔde ahwɛyiye di dwuma no ntam anadwo nkɔmmɔbɔ bi mu. Yesu ka kyerɛɛ no sɛ: “Sɛnea Onyankopɔn dɔ wiase ni, sɛ ɔde ne ba a ɔwoo no koro no mae, na obiara a ogye no di no anyera, na wanya daa nkwa.” (Yohane 3:16) Ansa na Onyankopɔn Ba a ɔwoo no koro no reba asase so no, na ɔne n’Agya te soro. Wɔ saa asetra ansa na ɔrebɛyɛ onipa no mu no, wɔkaa ne ho asɛm yiye sɛ ‘n’ani ka nnipa mma ho.’ (Mmebusɛm 8:31) Ɛnde, hwɛ sɛnea ɛfata sɛ Yehowa apaw honhom abɔde titiriw yi—Ne Ba a ɔwoo no koro no—sɛ ommegye adesamma!
14 Paulo kaa Yesu ho asɛm sɛ: “Efisɛ Onyankopɔn bɔ dodow a ɔhyɛe no, ɔno mu na yiw no wɔ.” (2 Korintofo 1:20) Wɔka bɔhyɛ yi biako a odiyifo Yesaia kyerɛwee no ho asɛm wɔ Mateo 12:18, 21, faako a yɛkenkan eyi fa Yesu ho no: “Hwɛ, m’akoa a mayi no, nea medɔ no a me kra ani sɔ no; mede me honhom megu no so, na waka atemmu akyerɛ amanaman. Na ne din so na amanaman de wɔn ani bɛto.”—Hwɛ Yesaia 42:1-4.
15, 16. Ɔkwan bɛn so na etumi yɛɛ yiye ma Yesu bɛyɛɛ Adam asefo “Daa-Agya”?
15 Wɔ Yesu asase so som adwuma no mu no, ɔdaa no adi pefee sɛ awiei koraa no amanaman mufo de wɔn ho bɛto ne din so na wɔnam saayɛ so anya Onyankopɔn atɛntrenee mu mfaso. Yesu kae sɛ: “Onipa ba no amma sɛ wɔnsom no, na ɔbɛsomee, na ɔde ne kra ayɛ agyede ama nnipa pii nen.” (Mateo 20:28) Onyankopɔn mmara a ɛyɛ pɛ a wɔde maa Israelfo no kae sɛ: “Ɔkra nsi ɔkra ananmu.” (Deuteronomium 19:21) Enti, bere a Yesu de ne nkwa a ɛyɛ pɛ no too hɔ wɔ owu mu na wɔde Onyankopɔn tumi nyanee no ma ɔsan foro kɔɔ soro akyi no, na obetumi de bo a ne ɔdesani nkwa a ɛyɛ pɛ no som no ama Yehowa de agye Adam nkwa hokwan ahorow no. Yesu nam ɔkwan yi so bɛyɛɛ “Adam a odi akyiri [anaa ɔto so abien]” a mprempren wɔama no tumi sɛ ɔnyɛ “Daa-Agya” mma Adam asefo gyidifo.—1 Korintofo 15:45; Yesaia 9:6.
16 Enti wɔada Onyankopɔn nkwagye kwan a ɛnam ne dɔ nsiesiei a ɛne ne Ba, Yesu Kristo ogye afɔre no so no ‘ayi adi akyerɛ amanaman no’ adi. Ɔsoro atɛntrenee da adi wom ampa. Hwɛ sɛnea ɛsɛ sɛ yɛde aseda ma sɛ Onyankopɔn de ɔkwan a wɔnam so ‘begye yɛn kra afi asaman’ no ama!
Agyede no Akyi a Yebegyina
17, 18. Nkabom adeyɛ bɛn na C. T. Russell de ne ho hyeem wɔ 1870 mfe no mu, nanso ɔkwan bɛn so na Barbour maa ne ho dwiriw no wɔ 1878 mu?
17 Te sɛ afeha a edi kan Kristofo no, nnɛyi Yehowa Adansefo akura Yesu Kristo ogye afɔre ho nkyerɛkyerɛ no mu bere nyinaa. Ɛyɛ anigye sɛ yɛbɛkae sɛ na Ɔwɛn Aban Asafo no titrani a odi kan, Charles Taze Russell yɛ nyamesom nsɛmma nhoma a wɔfrɛ no The Herald of the Morning no yɔnko samufo ne ne sika fam boafo wɔ bere bi mu. Mfiase no na Adventistni N. H. Barbour a ofi Rochester, New York, U.S.A. no na otintim saa nsɛmma nhoma no. Na Russell wɔ ne mfe 20 mu nanso na Barbour anyin sen no.
18 Ɛte sɛ nea nkabom no kɔɔ so yiye kosii 1878 bere a wɔ ɔkwan a ɛyɛ nwonwa so no, Barbour tintimii asɛm bi a na ɛkyerɛ sɛ ogye ho nkyerɛkyerɛ no nyɛ nokware. Russell reka nea esii no ho asɛm no, ɔkae sɛ: “Owura Barbour . . . kyerɛw asɛm bi maa The Herald no a ɛkyerɛ sɛ Mpata no ho nkyerɛkyerɛ no nyɛ nokware—ɔkyerɛe sɛ na ɛnyɛ nokware sɛ Kristo wu no ne Agyede bo a wotua wɔ Adam ne n’abusua ho no, na ɔkae sɛ Awurade wu no rentumi ntua onipa bɔne ho asotwe ka te sɛ nea asase so ɔwofo bi remmu akoroteaa a wɔde bɛwɔ nwansena mu ma apue ma wahu amane no sɛ bɔne bi a anibere wom a ɛwɔ ne ba ho no ho akatua a ɛfata.”
19. (a) Dɛn na Russell yɛe wɔ adwene a na Barbour kura wɔ agyede no ho no ho? (b) So nea na Russell pɛ sɛ ɛba wɔ Ɔwɛn-Aban no ho no abam?
19 Na Russell hokafo a na wanyin sen no no betumi adan ne ti nanso amma saa. Akyinnyegye bi kɔɔ so asram pii wɔ nsɛmma nhoma no mu, Barbour kyerɛe sɛ agyede no nyɛ nokware na Russell nso kyerɛwee sɛ ɛyɛ nokware. Awiei koraa no, Russell ne Barbour ammɔ koraa bio na ofii ase tintim nsɛmma nhoma a na saa bere no wɔfrɛ no Zion’s Watch Tower and Herald of Christ’s Presence no. C. T. Russell daa nkate yi adi wɔ nsɛmma nhoma foforo no ho: “Ayɛ Agyede no kyigyinafo titiriw fi mfiase; na yɛnam Onyankopɔn dom so wɔ anidaso sɛ ɛbɛyɛ saa akodu awiei.” So samufo Russell anidaso no abam? Ɛda adi sɛ ɛte saa! Bere a saa nsɛmma nhoma koro yi ara de nkyerɛkyerɛmu rema no, ne kratafa 2 ka sɛ nsɛmma nhoma no ‘hyɛ gyidi a wobenya wɔ ɔhene a mprempren ɔredi tumi, Yesu Kristo, a ne mogya a ohwie gui no bue kwan ma adesamma sɛ wobenya daa nkwa mu no ho nkuran.’
20. Nsemmisa bɛn na aka a ɛsɛ sɛ wobua nnɛ?
20 Enti ɛde besi baabi tɔnn a yɛadu wɔ asɛm a yɛresusuw ho yi mu no, yɛadi Onyankopɔn atɛntrenee akyi wɔ ɔkwan a wɔhwehwɛ sɛ wɔbɛfa so agye adesamma afi bɔne ne owu afobu a ɛda wɔn so ase no mu. Ɔdɔ na ɛde eyi mae. Nanso, nsemmisa te sɛ nea edidi yi so aka a ɛsɛ sɛ wobua: Ɔkwan bɛn so na wɔde Yesu Kristo ogye afɔre no so mfaso ma? Ɔkwan bɛn so na wubetumi anya mu mfaso, na ebegye bere bɛn? Asɛm a edi so no de mmuae a yegye di sɛ ɛbɛma ahotoso a wowɔ sɛ atɛntrenee da adi wɔ Onyankopɔn akwan nyinaa mu no ayɛ kɛse no bɛma.
Wubebua Dɛn?
◻ Onyankopɔn bu atɛntrenee sɛ ɛho hia dɛn?
◻ Dɛn nti na atɛnkyea wɔ adesamma mu pii saa?
◻ Ɔkwan bɛn so na Onyankopɔn yɛɛ nsiesiei maa gye a wobegye onipa afi owu mu?
◻ Ɔwɛn-Aban no akura agyede no mu akodu he?
[Mfonini wɔ kratafa 20]
Mose ka ne dwom no mu nsɛm kyerɛ wɔ Moab tataw so
[Mfonini wɔ kratafa 23]
Onyankopɔn dɔ wiase no araa ma ɔde ne Ba a ɔwoo no koro no mae