Ahenni Adawurubɔfo Bɔ Amanneɛ
Yehowa De Akatua Ma Abofra Nokwafo Bi
MMOFRA anokwafo som bo kɛse ma Yehowa. Ɛsɛ sɛ aberantewa bi osuahu a edi hɔ yi hyɛ mmofra afoforo nkuran ma wokura wɔn mudi mu bere a wɔsom Yehowa no.
Wɔ Argentina no, abarimaa bi a wadi mfe 11 no ne nuabarima akumaa ne wɔn nenabea suaa nhoma Nokware a Ɛde Kɔ Daa Nkwa mu No. Mmarimaa no awofo sɔre tiae ntɛm ara, na wɔbaraa mmarimaa no sɛ ɛnsɛ sɛ wɔkɔ nhyiam horow a wɔyɛ no Ahenni Asa so no ase. Bere bi mu no, sɛ mmarimaa no bɛkɔ nhyiam a, wɔfa aguaree no mfɛnsere mu huruw si abrannaa no so, fo ɔfasu no so si ofi a ɛtoa wɔn so abrannaa so na afei wofi hɔ kɔ Ahenni Asa so. Afei obi kɔka kyerɛɛ wɔn maame sɛ wɔkɔ Yehowa Adansefo nhyiam horow. Wɔn maame hunahunaa wɔn sɛ ɔbɛhwe wɔn, na eyi maa akumaa no bɔɔ hu ma ogyaee adesua no. Nanso ɔpanyin no kɔɔ so suaa ade. Otumi kɔɔ nhyiam horow no a n’awofo anhu ho hwee mfe anum.
Bere a odii mfe 16 no, na ɔpɛ sɛ ɔyɛ ntoaso sukuu mu adesua bi a wɔnkyerɛ wɔ ne kurom hɔ. Na fie hɔ a obefi no nso bɛma wanya ahofadi kɛse de asua nokware no. N’awofo penee so sɛ wɔbɛma wakɔ, na biribiara kɔɔ so yiye asram abiɛsa. Afei sukuu panyin no bɔɔ n’awofo amanneɛ sɛ wɔn babarima no mpɛ sɛ okyia frankaa anaa ɔto ɔman dwom no. Aberantewa no tumi dii nea enti a ontumi mfi ahonim pa mu nyɛ nneɛma a ɛte sɛɛ no ho adanse fɛfɛ wɔ sukuu panyin no, n’awofo, ɔkyerɛwfo bi, mmaranimfo bi, ne akyerɛkyerɛfo du anim. (Exodus 20:4, 5) N’awofo no bo fuwii yiye. Ne maame kɔtɔɔ atuo sɛ ɔrekɔtow abɔ ne nenabea no, efisɛ osusuwii sɛ ɔno na wama eyi aba. Nanso ne nsa anka ne nkutoo da.
Akyiri yi, ɛnam obi a ɔyɛ wɔn abusua no adamfo nyansahyɛ ne sukuu panyin no mpeneso so no, awofo no sii gyinae sɛ wɔde abofra no bɛkɔ adwenemyarefo ayaresabea, efisɛ wosusuwii sɛ adwenemyare aduruyɛ bɛma wagyaa ne gyidi no mu. Ayaresabea hɔ adwumayɛfo de abarimaa no traa kar mu kɔɔ baabi a ɛbɛyɛ kilomita 100 na wɔde aduru insulin ne nnuru afoforo pii wowɔɔ no paane kosii sɛ ade tɔɔ ne so. N’ani so tetew no no, na onhu faako a ɔwɔ, ontumi nhyɛ obiara nsow, na ne werɛ fii nneɛma bi. Wɔyɛɛ ne ho nhwehwɛmu pii akyi no, aduruyɛfo no antumi anhu adwenemyare biara wɔ ne ho. Nanso ayaresabea no kɔɔ so de nnuru no wowɔɔ no paane. Bere a abarimaa no ani so atetew no no, na ɔkɔ so bɔ Yehowa mpae sɛ onnnyaw no na ɔsrɛɛ no sɛ ɔmma no ahoɔden na watumi agyina. Yehowa bɔɔ ne ho ban na akyiri yi, woyii no fii ayaresabea hɔ.
Da koro bi, sukuu panyin no bisaa aberantewa no sɛ wasiesie ne ho sɛ ɔbɛpa ne gyidi anaa. Bere a ɔkae sɛ dabi no, sukuu panyin no ka kyerɛɛ n’awofo no sɛ wɔnsan mfa no nkɔ ayaresabea hɔ efisɛ wabɔ dam asen kan no. N’awofo no kɔpɛɛ dan maa no wɔ fie bi mu na wɔka kyerɛɛ ofiewura no sɛ ɔnhwɛ ma wankɔ Yehowa Adansefo nhyiam horow. Bere a n’awofo no fii hɔ kɔe no, hwɛ sɛnea abarimaa no ho dwiriw no! Na wɔn a fie hɔ yɛ wɔn de no yɛ Yehowa Adansefo! Awiei koraa no, n’awofo no ma wogyaee no adwenemyare ho aduruyɛ no, efisɛ wohui sɛ aduruyɛfo no adaadaa wɔn. Saa bere no ara mu no, Argentina Asennibea Kunini no hyɛe sɛ enni hokwan sɛ wɔpam Yehowa Adansefo mma fi sukuu sɛ wɔankyia frankaa nti.
So sɔhwɛ ahorow yi ho baa abofra nokwafo yi mfaso? Yiw. Ose: “Mitumii dii aduruyɛfo, akyerɛkyerɛfo, mfɛfo sukuufo, awofo, ne abusuafo, nokwarem no, kurom hɔfo nyinaa adanse pii. M’awofo kateeyɛ no ano abrɛ ase kakraa na wɔanya Adansefo no ho adwempa kakra sen kan no. Mprempren, sɛ mibu kɔmpɔ hwɛ me mmofraase a, mihu sɛnea yɛn Nyankopɔn no hwɛ wɔn a wodi no nokware no anwonwa kwan so na ɔyɛ wɔn brɛbrɛ. Ɛte sɛnea odwontofo no kae wɔ Dwom 27:10 no pɛpɛɛpɛ: ‘Sɛ m’agya ne me na gyaw me mpo a, Yehowa ankasa begye me.’”
Mprempren aberantewa yi adi mfe 23, waware, na ɔyɛ hyew yiye wɔ Yehowa som mu. Nokwarem no, anohyeto nni tumi a Yehowa de wowaw no mu.—Dwom 55:22.