Hwɛ Mfaso a Ɛwɔ so sɛ Yɛbɛka Nea Yehowa Ayɛ Akyerɛ!
1 Dwom 48 kyerɛwfo a wɔde honhom kaa no no hyɛɛ Israelfo sɛ ‘wontwa Sion ho kɔntɔnkrɔn, wɔnkan n’abantenten, wɔnhwɛ n’aban a wɔtete mu na wɔatumi aka akyerɛ awo ntoatoaso a ebedi wɔn akyi no.’ Bere a ɔdɔ a wɔwɔ ma Yehowa kanyan wɔn no, wɔn ani begye saa beae a na teokrase nniso wɔ wɔ asase so no ho asɛm biara ho kɛse. Hwɛ sɛnea nsɛm yi mu biara bɛsom bo, efisɛ na eyi ne kurow a Yehowa de n’ankasa din ato so! Na wɔbɛka ho asɛm, ne titiriw no na ɛsɛ sɛ wɔhwɛ hu sɛ wɔn asefo ate nneɛma a wɔde asie wɔn ankasa komam no nyinaa asɛm.—Dw. 48:12, 13.
2 Ɛnnɛ yɛte bere a Yehowa Mesia teokrase nniso no nni asase so Sion bio, na mmom ɛwɔ ɔsoro Yerusalem mu. (Heb. 12:22) Yehowa Ahenni a ɛhyɛ Yesu Kristo nsa no redi tumi fi 1914. (Adi. 12:10) Yɛn ani gye ne dwumadi ho kɛse sen biara. Yɛn ani gye ɔkwan a Yehowa afa so adi n’asomfo anim wɔ asase so na ama wɔatumi ayɛ n’apɛde sɛ saa Ahenni no ananmusifo a aniwa hu wɔn no nso ho kɛse. Wɔaka eyi ho nsɛm pii a ɛyɛ anigye wɔ yɛn nhoma foforo Jehovah’s Witnesses—Proclaimers of God’s Kingdom no mu. Hwɛ sɛnea yɛn ani gyei bere a yɛn nsa kae wɔ “Ɔsoro Nkyerɛkyerɛ” Ɔmantam Nhyiam a yɛyɛɛ nnansa yi ara ase no!
3 Eduu September 1, 1993 no, na wɔayi nhoma no adi dedaw wɔ kasa horow 20 mu, na wogu so rekyerɛ ase na wɔatintim de adi wɔn a wɔka kasa foforo 13 ahiade ahorow ho dwuma. So mo abusua no anya bi? So morekenkan? So moreka nneɛma a musua fi mu no ho asɛm?
4 Bere a wɔhwɛɛ mfonini no na wɔkenkan ho nsɛm sɛnea wɔhyɛɛ nyansa wɔ nhyiam no ase no, anuanom pii fii ase kenkan emu nsɛm no ankasa ntɛm ara. Dɛn na wɔaka? Emu kakraa bi ni.
5 Onuawa bi kyerɛwee sɛ: “Ɛne nhoma biako pɛ a me nsa kae a me ho pere me yiye sɛ mɛkenkan awie na matumi asan akenkan bio. Mprempren makenkan adu ti 25. Dodow a mekenkan no, dodow no ara na m’ani tɛɛtɛɛ nsu na Yehowa ho dɔ hyɛ me koma ma. Nhoma no de nkuranhyɛ ma na ɛhyɛ gyidi den yiye.”
6 Onua bi a ɔde mfe bɛboro 40 asom Yehowa kae sɛ: “Mantumi anhu sɛnea nhoma yi kenkan begye adwene afa no. Manna ntɛm na mesɔree ntɛm, na mede adapɛn abien kenkan wiei. Ɛyɛ nhoma a ɛka koma sen biara a makenkan pɛn no mu biako ampa. Ɛyɛ nhwehwɛmu a wɔde ahokokwaw kɛse yɛe na ɛhyɛ nkuran yiye nso.”
7 Daa Akenkan Nhyehyɛe: Ebinom a wɔkenkan nhoma mũ no nyinaa wiei ntɛm no asi wɔn bo sɛ wɔbɛsan akenkan bio, nanso afei de wɔbɛtɔ wɔn bo ase.
8 Sɛ ɛnyɛ wo nkutoo ne w’abusua muni a ɔwɔ nokware no mu a, ebia mobɛpɛ sɛ mode nhoma no afã horow di dwuma wɔ mo abusua adesua mu. Mmusua bi fii ase yɛɛ saa wɔ nna kakraa bi ntam bere a wonyaa nhoma no bi wɔ nhyiam no ase no. Eyi nkyerɛ sɛ ɛsɛ sɛ mubu ani gu nneɛma afoforo, te sɛ mo ho a mubesiesie ama Ɔwɛn-Aban adesua no so. Nanso mubetumi ahu sɛ mfaso wɔ so yiye sɛ mode simma 15 anaa 20 bio bɛkenkan Proclaimers nhoma no na moasusuw nsɛm no ho.
9 Mmusua afoforo kenkan nkratafa abien anaa abiɛsa—ebia asɛmti ketewaa biako anaa abien—anwummere biara a wɔadidi awie no. Ebia wɔakenkan nhoma no mu fã kɛse dedaw sɛ ankorankoro, nanso bere a wɔtɔ wɔn bo ase kenkan na wonya hokwan susuw asɛm no ho no, wonya mu mfaso. Ebinom a wɔreyɛ saa no de mfe pii asom Yehowa. Sɛ wɔkenkan a, wɔkaakae nsɛm a ɛyɛ anigye pii. Ɛma wɔn koma ani gye bere a wobom susuw nsɛm a esisii a wɔrekenkan ho asɛm no mu kyɛfa a wɔn ankasa nyae no ho no.
10 Esiane wo fi nsɛm tebea nti, ebia wubehu sɛ wo nkutoo na wokenkan nhoma no. Onuawa bi a ɔkyerɛw Asafo ti no kae sɛ: “Mekenkan nhoma yi kakra anadwo biara ansa na mada. Nhoma yi ama merenya anisɔ ne ɔdɔ kɛse ama nokware no, na mete nka sɛ mabɛn Yehowa kɛse, na meda no ase yiye sɛ meyɛ n’ahyehyɛde no muni. M’ani gye kratafa biara a mekenkan no ho ankasa.”
11 Ɛwom sɛ nhoma no so de, nanso ɔfã biara nnɔɔso saa. Ne fã a edi kan no ka nsɛm a esisi fi Abel bere so besi afe 1992 ho asɛm tiawa wɔ ɔkwan a ɛyɛ anigye so—ɛyɛ nkratafa 108 pɛ. Afã afoforo kura nkratafa 13 kosi 150. Wɔakyekyɛ afã horow yi mu biara mu ayɛ no ti dodow bi. Sɛ́ anka wobɛkenkan no ntɛmntɛm no, kenkan ɔfã biako, ti biako, anaa asɛmti ketewaa biako bere biara; nya mu anigye; na nya mu mfaso.
12 Gye Bere Susuw Nea Wokenkan no Ho: Dɛn na ɛbɛyɛ wo botae bere a wokenkan no? Ɛnsɛ sɛ woma nkratafa a wobɛkenkan—nhoma no a wobɛkenkan awie—ara kwa no yɛ wo botae. Proclaimers nhoma no kura wo honhom fam apɛgyade ho kyerɛwtohɔ. Ɛsɛ wuhu no yiye. Gye bere susuw nea asɛm a wokenkan no kyerɛ ho. Bere a wɔhwehwɛ Yehowa tete adansefo dwumadi mu no, susuw sɛnea wubetumi asuasua wɔn gyidi no ho. (Heb. 12:1, 2) Bere a wokenkan nea ɛyɛe a ɔwae kɛse no fii ase no, hyɛ asiane ahorow a esum wɔn a wɔtwee wɔn ho no afiri no nsow na woabɔ wo honhom fam yiyedi ho ban. Na bere a wokenkan yɛn nnɛyi abakɔsɛm no, hyɛ wɔn a Onyankopɔn de wɔn dii dwuma honhom fam su horow, sɛnea wɔdaa no adi sɛ Onyankopɔn apɛdeyɛ ne wɔn asetra mu ade titiriw a ɛsen biara, ne nea wɔyɛe wɔ tebea horow—na ebi mu yɛ den yiye—a Onyankopɔn maa ho kwan ho no nsow.—Heb. 13:7.
13 Wubehu sɛ ɛhyɛ gyidi den sɛ wobɛhwehwɛ nsɛm a ɛkyerɛ sɛnea Yehowa ama ne nkurɔfo ate Bible mu nokware a yɛwɔ nnɛ no ase pefee mu. Asase so ahyehyɛde a Yehowa de di dwuma no ho anisɔ a wowɔ bɛyɛ kɛse bere a wuhu ahyehyɛde no nkɔso yiye no. Akyinnye biara nni ho sɛ w’ani begye bere a wokenkan sɛnea asɛmpa no adu asase no mmeae a ɛwɔ akyirikyiri de ama nkɔmhyɛ abam no. Anokwafo a wɔwɔ wiase afanan nyinaa a wɔabɔ Ahenni no dawuru nnamyɛ so suahu ahorow bɛka wo koma. Ɛbɛhyɛ wo den ma woadi w’ankasa sɔhwɛ ahorow ho dwuma bere a wokenkan nea anuanom mmarima ne mmea anokwafo agyina ano dedaw esiane ɔdɔ a wɔwɔ ma Yehowa nti no.
14 Sɛ mokenkan asɛm no fã bi wie a, munnye bere nsusuw mfaso a ɛwɔ so no ho mmom, na muntĩ mu. Sɛ wowɔ mmofra nkumaa a, ma wɔnka mfonini ahorow no ho asɛm ne nea wonim wɔ emu nnipa no ho. Sɛ wo nkutoo mpo na wokenkan a, bɔ mmɔden sɛ wobɛka nea wusua no akyerɛ afoforo. Fa asɛm no di dwuma wɔ sankɔhwɛ ne ofie Bible adesua mu bere a ɛfata. Tĩ a wubetĩ mu bɛma aka w’adwene ne wo koma mu, na afoforo nso benya mu mfaso.
15 Kyerɛ Emu Nsɛm ho Anigye: Ɛsɛ sɛ mmere a wode kenkan Proclaimers nhoma no yɛ nea anigye ne mfaso wom.
16 So wo ne w’abusua bɛpɛ sɛ muhu Yehowa Adansefo wiase nyinaa adwumayɛbea ti no ho nsɛm? Nkratafa 208-9 kyerɛ adan ne nneɛma a Asafo ti no de dii dwuma mfe ɔha a atwam ni wɔ Pittsburgh mpɔtam hɔ no. Nkratafa 216-7 ma wuhu adan a wɔde dii dwuma akyiri yi wɔ Brooklyn. Nkratafa 352-6 hɔ mfonini ahorow no betumi aboa ma wɔayɛ nnɛ wiase nyinaa adwumayɛbea ti no ho mfonini wɔ w’adwenem. Ti 26 ne 27 ka adwuma a wɔyɛ wɔ Betel, na nkratafa 295-8 de Betel asetra ho nsɛm afoforo ma.
17 Yɛn mu dodow no ara ntumi nkɔsrasra Asafo ti no baa dwumadibea ahorow pii. Proclaimers nhoma no nkratafa 357-401 de wo kyinkyin wiase nyinaa. Ɛho nhia sɛ wohwɛ no ntɛmntɛm. Gye bere kakra hwɛ ɔman biara na nya ho anigye. Fa wiase nyinaa ho asase mfonini a ɛwɔ nkratafa 415-17 no hwehwɛ ɔman biara. Kenkan nsɛm a ɛka baa dwumadibea biara mfonini ho no. Wubetumi de nsɛmti a wɔahyehyɛ [index] no nso anya nsɛm afoforo a ɛyɛ anigye a ɛfa ɔman biara ho. Fa hokwan yi hu wo honhom fam abusua no mufo a wɔwɔ aman afoforo so no.
18 Sɛ nnipa hyiam gye wɔn ani a, ɛtɔ da bi a wɔde wiase nokwasɛm ahorow ho nimdeɛ di agoru. So mfaso kɛse remma so sɛ yebehu mmere ne nsɛntitiriw a esisii wɔ Yehowa nkurɔfo nnɛyi abakɔsɛm mu no? Wubehu nokwasɛm a ɛtete saa pii wɔ Proclaimers nhoma no nkratafa 718-23. Saa nokwasɛm no de nnyinaso titiriw bi ma; wubetumi de nhoma no fã a aka no mu nsɛm aka ho. Gyina so yɛ ntimu. Ebia abusua no mu mmofra bɛkyere agu wɔn tirim ntɛm so. Ebia yɛn a yɛanyin no mu bi ntumi nyɛ no ntɛmntɛm saa. Nanso eyinom yɛ teokrase abakɔsɛm mu nsɛm a yebetumi anya mu mfaso afi hu a yebehu no mu. Bere a woahu mmere no ne nsɛntitiriw no, gyina saa nhyɛase no so sua pii. Hwɛ asɛm biara a esii no mu nsɛm dodow a wubetumi akae. Afei ka nea asɛm a esii no biara yɛe wɔ Onyankopɔn pɛ a ɛyɛɛ hɔ no mu ho asɛm. Afei, susuw sɛnea anya w’ankasa asetra so tumi, ne sɛnea nea Yehowa reyɛ no fa wo ho no ho.
19 Hu Hokwan Ahorow a Wowɔ: Bere a wokenkan Jehovah’s Witnesses—Proclaimers of God’s Kingdom na wususuw ho no, wubehu Yesaia 60:22 mmamu. Nhoma no ka wɔ kratafa 519 sɛ: “Nkɔmhyɛ a ese ‘nea osua koraa bɛdan apem’ no anya mmamu dedaw, na abam aboro so mpo! Wɔ aman bɛboro 50 a na ‘nea osua koraa’ biako pɛ mpo nni hɔ—baabi a na Yehowa Ɔdansefo biara nni hɔ 1919, a na wɔnkaa asɛm no wɔ hɔ koraa—no, Yehowa ayeyifo bɛboro apem na wɔwɔ hɔ nnɛ. Wɔ aman yi bi mu no, mprempren Yehowa Adansefo a wɔyɛ Onyankopɔn Ahenni no adawurubɔfo a wɔyɛ nnam mpem dudu pii, yiw, bɛboro ɔpeha mpo na wɔwɔ hɔ! Wiase nyinaa no, Yehowa Adansefo abɛyɛ ‘ɔman a ɛyɛ den’—na sɛ wiase nyinaa asafo biako no, anyɛ yiye koraa no wɔdɔɔso sen wiase no mu aman 80 a wodi wɔn ankasa ho so no mu biara mu nnipa.”
20 Akyinnye biara nni ho sɛ yenwiee saa Ahenni nkɔso adwuma no. Nea ɛne eyi bɔ abira no, Yehowa ama anya nkɔanim sen biara. Wubenya mu kyɛfa akodu he? So wunim hokwan a ɛwɔ hɔ ma wo no nyinaa ankasa? Bere a wusua nea afoforo reyɛ no, ɛmmra sɛ wo koma bɛka wo ma wode wo ho ama de anya adwuma kɛse a yɛn ɔdɔ Nyankopɔn no nam Yesu Kristo so rekyerɛ kwan wɔ yɛn bere yi mu no mu kyɛfa akosi ase.