Nea Ɛbɛma Yɛatu Mpɔn wɔ Asɛnka Mu—Yɛ Ɔboafo Pa

Nea Enti a Ɛho Hia: Yesu hui sɛ sɛ obi rekɔka asɛm no na onya obi ka ne ho a, ɛboa paa. Enti, bere a ɔsomaa asuafo 70 dii n’anim sɛ wɔnkɔka asɛm no, ɔsomaa wɔn baanu baanu. (Luka 10:1) Sɛ ɔdawurubɔfo bi ho kyere no wɔ asɛnka mu anaa onhu sɛnea ɔbɛma asɛmmisa bi ho mmuae a, wo a wo ne no nam no betumi ayɛ ɔboafo pa ama no. (Ɔsɛnk. 4:9, 10) Wubetumi aka wo suahu akyerɛ no, na wubetumi nso ama no nyansahyɛ a ɛbɛboa no ma n’asɛnka adwuma no atu mpɔn. (Mmeb. 27:17) Bere a monam kwan so rekɔ nyinaa wubetumi ne no abɔ nkɔmmɔ ahyɛ no nkuran.—Filip. 4:8.

Ɔkwan a Wobɛfa so Ayɛ:

Sɛ nea ɔka wo ho no redi obi adanse a, ɛyɛ a tie no yiye. (Yak. 1:19) Sɛ ɔrekenkan kyerɛwsɛm bi a, hwɛ wo Bible mu di akenkan no akyi. Wotie nkɔmmɔbɔ no yiye a ɛbɛma woahu baabi a wubetumi aboa no.
Sɛ nkɔmmɔbɔ no rekɔ so a, egye nhumu na woahu baabi a ɛsɛ sɛ wode w’ano tom. (Mmeb. 25:11) Sɛ wo ne ɔdawurubɔfo bi kɔyɛ ne Bible adesua na wo nso woka bi a, etumi boa paa. Moreyɛ afie afie asɛnka de a, nea wo ne no nam no ani begye ho sɛ edu ne so a, wobɛma no kwan ma wakasa. Nanso, sɛ ɔyɛ ɔdawurubɔfo foforo anaasɛ wuhu sɛ obi abisa asɛm ama ne ho akyere no a, ɛnde wubetumi aboa no. Sɛ wo ne obi reyɛ afie afie asɛnka adwuma, sankɔhwɛ anaa Bible adesua na ɔrekasa a, ntwa n’ano, nnye nkɔmmɔ no mmɔ so, na nkɔfa asɛm foforo mmɛbom.
Sɛ wowɔ osuahu bi a, ka kyerɛ no. Edu baabi na wuhu sɛ nea wo ne no nam no hia nyansahyɛ bi a ɛbɛma watu mpɔn wɔ asɛnka adwuma no mu a, nka w’ano ntom. (Mmeb. 3:27) Bere pa mu no, wubetumi abisa no sɛ: “Wuhuu nea woyɛe no sɛn?” Wubetumi nso aka sɛ: “Mepɛ sɛ mema wo nyansahyɛ bi,” anaa “Sɛ mihyia tebea a ɛte saa a, nea metaa yɛ ni.” Sɛ wo ne obi nam asɛnka mu, na biribiara a ɔbɛka no wonnya ho asɛm ka a, n’abam bebu. Nanso sɛ woto wo bo ase ma no a, nyansahyɛ biara a wode bɛma no no, obegye atom.

Sɔ Eyi Hwɛ wɔ Ɔsram Yi Mu:

Sɛ nea wo ne no nam asɛnka mu ka asɛm bi anaa ɔyɛ biribi a ɛkyerɛ sɛ ɔyɛ ɔboafo pa a, mopɔn a, ka ho asɛm kyerɛ no.