**Nea Ɛbɛma Yɛatu Mpɔn wɔ Asɛnka Mu—Sɛnea Yɛde Bible Kyerɛkyerɛ Nwoma No Bɛma**

Nea Enti a Ɛho Hia: Nwoma baako a ɛmpa yɛn asɛnka bag mu ne Bible Kyerɛkyerɛ nwoma no. Nanso sɛ yɛamfa amma obi a, yɛbɛyɛ dɛn ne no asua? Wei nti ɛhia sɛ yɛn nyinaa hu ɔkwan a yɛbɛfa so de nwoma yi ama wɔ asɛnka mu. (Mmeb. 22:29) Yɛwɔ akwan pii a yɛbɛtumi afa so de ama, enti ɔdawurubɔfo biara bɛtumi ahwɛ nea ɛbɛboa no.

Ɔkwan a Wobɛfa so Ayɛ:

Di kan bisa asɛm bi a ofiewura no ani bɛgye ho, na dan kɔ ti pɔtee bi a ɛkyerɛkyerɛ asɛm no mu. Wohwɛ ti biara mfiase a, nsɛmmisa bi wɔ hɔ. Wobɛtumi afa emu baako abisa ofiewura no. Ɔbua wie a, kenkan kyerɛwsɛm bi a ɛfata na dan kɔ nkyekyɛm a wɔakyerɛkyerɛ asɛm no mu no, na monsusu ho tiawa.
Bio, wobɛtumi de nsɛm a ɛwɔ kratafa 3-5 no akyerɛ ofiewura no, na woadan akɔ baabi a ɔbɛnya ɛho mmuaeɛ wɔ nwoma no mu. Nhwɛso bi ni: Wobɛtumi aka asɛm bi a asi nnansa yi, na woaka akyerɛ ofiewura no sɛ nnipa bebree bisa nsɛm te sɛ nea ɛwɔ kratafa 3 no. Wobɛtumi nso aka sɛ woresrasra w’afipamfo ne wɔn asusu nneɛma pa a ɛbɛba daakye ho. Afei fa mfoni a ɛwɔ kratafa 4-5 no kyerɛ no na bisa sɛ, “Nsɛm a ɛwɔ ha yi mu nea ɛwɔ he na ɛbam a wopɛ?” Wopɛ nso a, ka sɛ wode bere tiaa bi resrasra nkurɔfo ama wɔanya nsɛmmisa bi ho mmuaeɛ. Afei dan kɔ kratafa 6 na fa nsɛmmisa a ɛwɔ aseɛ hɔ no kyerɛ ofiewura no na bisa nea ɔpɛ sɛ mobɔ ho nkɔmmɔ.
Ka nwoma no ho asɛm tẽẽ kyerɛ no. Wobɛtumi aka sɛ: “Yɛne nkurɔfo sua nwoma yi ma wɔte Bible ase. Woahu bi pɛn? [Twɛn ma ɔmmua.] Ɛnha wo a, mesrɛ wo fa wo Bible bra na memfa bere tiaa bi nkyerɛ wo sɛnea yɛde nwoma yi sua Bible.”

Sɔ Wei Hwɛ Bosome Yi Mu:

Sɛ moreyɛ abusua som a, mobɛtumi abobɔ nsɛm yi so.
Sɛ wowɔ asɛnka mu a, ka ɔkwan a wobɛfa so de nwoma yi ama no kyerɛ ɔdawurubɔfo a wo ne no nam no. (Mmeb. 27:17) Sɛ wohu sɛ nsɛm a woasiesie no mmoa a, sesa no.