Ɛnnɛ Nnipa Suban Sɛe Ara Na Ɛresɛe—Dɛn Na Ama Aba Saa?—Dɛn Na Bible Ka Fa Ho?

Ɛnnɛ nnipa suban sɛe ara na ɛresɛe. Wokɔ ayaresabea a, ayarefo a wɔrebegye ayaresa no, ebi tumi kekaw mu gu adɔkotafo no so; wɔn a wɔyɛ adwuma wɔ adidibea no nso, nnipa a ɛba hɔ bedidi no bi tumi de wɔn anim yɛ fam; wote wimhyɛn mu a, akwantufo no bi tumi dwoodwoo wimhyɛn mu adwumayɛfo no; wokɔ sukuu mu nso a, sukuu nkwadaa no bi ate nkensen; wɔdi wɔn atikyafo ho fɛw, wɔhunahuna wɔn, na wɔtumi mpo tow hyɛ wɔn so. Afei nso, ɛtɔ da na wote nea amanyɔfo bi ayɛ a wobɛtɛɛ w’anom. Amanyɔfo no bi nso de, nneɛma a wɔyɛ no sum ase no, ennya mmɛdaa gua, enti wɔbɔ wɔn ho safohene sɛ wɔn ho nni asɛm nanso wɔntee da.

Sɛ obi pɛ sɛ onya suban pa paa a, ɛno ara ne sɛ obesua Bible na ɔde nea ɛka no abɔ ne bra. Bible san ma yehu nea enti a nnipa pii nni suban nnɛ.

Adɛn Na Suban Pa Ho Ayɛ Nã Saa?

Yɛka sɛ obi wɔ suban pa a, ɛkyerɛ sɛ saa nipa no, ɔbɔ bra pa, na ɔnyɛ basabasa. Suban pa wɔ hɔ yi, ɛyɛ obiara fɛ, nanso wokɔ wiase baabiara a, nnipa suban sɛe ara na ɛresɛe.

• Adwumakuw bi a wɔfrɛ wɔn Gallup bisabisaa Amerikafo bi nsɛm, na nea wɔkae ne sɛ, seesei sɛ wɔhwɛ nnipa dodow no ara a ɛwɔ United States no suban, na wɔde toto mfe 22 a abɛsen kɔ no ho a, wɔhu sɛ ɛnnɛ de, ɛnkɔ yiye koraa.

• Nhwehwɛmu foforo a wɔyɛe wɔ aman 28 mu nso, wɔbisabisaa nnipa 32,000 nsɛm, na wɔn mu bɛyɛ 20,800 kaa sɛ, ɛnnɛ sɛnea nnipa atoto wɔn ani awe no, wɔnhuu bi saa da.

Sɛnea nnipa suban asɛe nnɛ no, Bible kaa ho asɛm too hɔ.

• “Awiei mmere no mu no, mmere a emu yɛ den bɛba. Nnipa bɛyɛ pɛsɛmenkominya, wɔbɛyɛ sikanibere, wɔbɛhoahoa wɔn ho, wɔbɛyɛ ahantan, wɔbɛkeka abususɛm, wɔrentie wɔn awofo asɛm, wɔbɛyɛ bonniayɛ, . . . wobedi atirimɔdensɛm, [na] wɔbɛyɛ wɔn a wɔmpɛ papa.”—2 Timoteo 3:1-3.

Sɛnea saa nkɔmhyɛ yi reba mu nnɛ no, wopɛ sɛ wuhu ɛho nsɛm pii a, kenkan asɛm a yɛato din “Did the Bible Predict the Way People Think and Act Today?”

Akwankyerɛ a ɛbɛboa yɛn ama yɛanya suban pa

Wiase a yɛwɔ mu nnɛ no, suban pa ho akɔ atwee. Nanso nnipa mpempem pii ahu sɛ, Bible betumi aboa obi ama wanya suban pa. Afotu a ɛwɔ mu no, “enni huammɔ da.” (Dwom 111:8) Ebi na edidi so yi:

• Nea Bible aka: “Biribiara a mopɛ sɛ nnipa yɛ ma mo no, mo nso monyɛ mma wɔn saa ara.”—Mateo 7:12.

  Nea ɛkyerɛ: Yɛn nyinaa ani gye ho sɛ afoforo bebu yɛn na wɔne yɛn adi no yiye, enti saa ara na ɛsɛ sɛ yɛne afoforo di.

• Nea Bible aka: “Afei a moayi nkontompo agu yi, mo mu biara nka nokware nkyerɛ ne yɔnko.”—Efesofo 4:25.

  Nea ɛkyerɛ: Ɛsɛ sɛ yɛka nokware bere nyinaa, na ɛsɛ sɛ yɛma yɛn abrabɔ nso kyerɛ sɛ yɛyɛ anokwafo.

Sɛ wopɛ sɛ wuhu wei ho nsɛm pii a, yɛsrɛ wo kenkan:

• Ɔwɛn-Aban a yɛato din “Papa Ne Bɔne—Akwankyerɛ a Wubetumi De Wo Ho Ato So.”

• Asɛm a yɛato din “Tolerance—How the Bible Can Help.”