Bible Nsase No

BERE a Israel siesiee ne ho sɛ ɔbɛkɔ Bɔhyɛ Asase no so no, Mose kaa ne komam asɛm paa kyerɛɛ Onyankopɔn sɛ: “Mesrɛ wo, ma mintwa menkɔhwɛ asase pa a ɛwɔ Yordan agya no, bepɔw asase fɛfɛ no.”—Deut. 3:25.

Wɔ Mose fam no, na wontumi mma no kwan, nanso ɔforoo bepɔw bi a ani kyerɛ Yeriko huu asase no—‘Gilead de kosi Dan, ne Yuda asase de kosi atɔe fam po no ho, ne Negeb asasetaw no, ne Yordan bon mu.’ (Deut. 3:27; 34:1-4, NW) So woate saa din ahorow yi pɛn? Wunim mmeae a ɛwɔ?

Yehowa nkurɔfo kakraa bi pɛ na wobetumi atu kwan akɔ mmeae pii a wɔakenkan ho asɛm wɔ Bible mu no. Wontumi nyɛ nea Onyankopɔn kae sɛ ɔbɛma Abraham ayɛ no, sɛ wobekyinkyin afa Bɔhyɛ Asase no nyinaa so. (Gen. 13:14-17) Nanso, nokware Kristofo ani gye ho sɛ wobehu baabi a mmeae a Bible bobɔ din no wɔ na ama wɔahu sɛnea na ɛne mmeae foforo wɔ abusuabɔ.

‘Hwɛ Asase Pa No’ yɛ adwinnade a wubetumi de adi dwuma de ama ntease a wowɔ wɔ Kyerɛwnsɛm no mu no ayɛ kɛse. Mmeae a ɛwɔ hɔ ankasa, te sɛ Gilead a ne mfonini wɔ nhomawa no anim no, wom. Nea ɛma yɛte nneɛma ase kɛse koraa ne asase mfonini ahorow a ebetumi ama nimdeɛ a wowɔ wɔ mmeae a Bible abobɔ din ho no ayɛ kɛse no.

Asase mfonini a ɛwɔ kratafa 2 ne 3 no twe adwene si nsase anaa amantam akɛse so. Sɛ nhwɛso no, sɛ wuhu baabi a na Asiria ne Misraim da wɔ Bɔhyɛ Asase no ho a, wubetumi ate nkɔmhyɛ ahorow a ɛbobɔ saa nsase no din no ase yiye. (Yes. 7:18; 27:13; Hos. 11:11; Mika 7:12) Ná asase teateaa a wɔfrɛ no Bɔhyɛ Asase no yɛ tete nkwantanan so, na aman foforo pɛe sɛ wɔfa ɛhɔ asase pa, bobe nturo, ne ngodua no.—Deut. 8:8; Atem. 15:5.

Ɛtɔ mmere bi a wobɛpɛ sɛ wode asase mfonini biako bɛtoto foforo ho. Sɛ nhwɛso no, wɔmaa Yona dwumadi wɔ Asiria ahenkurow mu, nanso ɔfaa po so hyɛn kɔɔ Tarsis. (Yona 1:1-3) So wuhu saa mmeae no wɔ asase mfonini a edi kan no so? Nanso ɛnsɛ sɛ wudi mfomso fa Tarsis sɛ Tarso, beae a wɔwoo ɔsomafo Paulo no. Wubehu Tarso ne nkurow foforo wɔ asase mfonini a ɛwɔ ha yi so.

Susuw Abraham kwan a ɔfaa so no tenten ho bere a wuhu Ur, Haran, ne Yerusalem no. Bere a Yehowa frɛɛ no fii Ur no, ɔbɛtraa Haran, na afei otu kɔɔ Bɔhyɛ Asase no so. (Gen. 11:28–12:1; Aso. 7:2-5) Sɛ wusua “Tete Agyanom Wiase No” ho ade a, wubehu Abraham akwantu no ho nsɛm yiye wɔ kratafa 6-7.

Asase mfonini a edi kan no ne nea ɛwɔ ha yi nnyina bere pɔtee bi so. Abien yi akyi no, asase mfonini ahorow no gyina sɛnea nsɛm no kɔɔ so sisii nnidiso nnidiso no so. Nkurow anaa nsɛm a ɛwɔ asase mfonini no so no fa nsɛm a esisii bere pɔtee bi ho. Ɛwom sɛ ɛnyɛ din biara a ɛwɔ asase mfonini so no na ɛwɔ Edin a Wɔahyehyɛ (wɔ kratafa 34-5) no mu de, nanso sɛnea ɛte no, ebetumi aboa wo ma woahu asase mfonini ahorow a ɛfa asɛm a woreyɛ ho nhwehwɛmu no ho no.

Bɔhyɛ Asase no so nkurow akɛse ne nketewa pii wɔ asase mfonini a ɛwɔ nhoma yi mfinimfini (kratafa 18-19) no so sen biara. Asase Mfonini Ho Nkyerɛkyerɛmu no bɛboa wo ma woahu Lewifo nkurow ne guankɔbea nkurow asia no, na ɛbɛma woahu sɛ ebia wɔbɔɔ beae bi din wɔ Hebri Kyerɛwnsɛm, Hela Kyerɛwnsɛm, anaa n’abien nyinaa mu anaa.

Wonnim mmeae bi a wɔabobɔ din wɔ Bible mu no nnɛ, ma enti saa din ahorow no mu dodow no ara nni asase mfonini a ɛwɔ nhomawa yi mfinimfini no so. Afei nso, wɔantumi amfa nkurow akɛse ne nketewa biara, te sɛ nkurow a na ɛwɔ mmusuakuw no nsase so nyinaa amma so. (Yos. ti 15-19) Nanso, saa asase mfonini no taa de nkurow a ɛbemmɛn no din ba na ama woatumi de w’ani abu baabi a ɛwɔ no. Wɔahyehyɛ asase so nneɛma bi (te sɛ mmepɔw, nsubɔnten, ne nsubon) agyirae, na wɔde kɔla ahorow akyerɛ nkoko ne akwan. Nkyerɛkyerɛmu a ɛte saa betumi aboa wo ma woayɛ Bible mu nsɛm bi ho mfonini wɔ w’adwene mu.

Bible mu mmeae ho nsɛm pii wɔ nhoma a ɛka nneɛma pii ho nsɛm, Insight on the Scriptures, a ɛwɔ kasa horow pii mu no mu.a Bere a wode ɛno ne nhoma foforo a wɔde sua Bible redi dwuma no, ma ‘Hwɛ Asase Pa No’ nhomawa no mmɛn wo. Hwɛ mu bere a woresua Kyerɛwnsɛm a mfaso wɔ so ma wo wɔ w’asetra mu nyinaa no.—2 Tim. 3:16, 17.

[Ase hɔ asɛm]

[Asase mfonini wɔ kratafa 4, 5]

(Wopɛ nsɛm a wɔahyehyɛ awie no a, hwɛ nhoma no mu)

Bible mu Nsase/Nkurow Atitiriw

A1 ITALIA

A2 ROMA

A3 SICILY

A4 MALTA

C2 MAKEDONIA

D2 Filipi

D2 HELA

D3 ATENE

D3 Korinto

D3 KRETA

D3 LIBIA

D3 Antiokia (Pisidia)

E3 Efeso

E3 PATMO

E3 RODO

E5 MEMFIS

E5 MISRAIM

E2 ASIA KUMAA

Ɛ3 Tarso

Ɛ3 Antiokia (Siria)

Ɛ3 KIPRO

Ɛ4 Sidon

Ɛ4 Damasko

Ɛ4 Tiro

Ɛ4 Kaesarea

Ɛ4 BƆHYƐ ASASE

Ɛ4 YERUSALEM

Ɛ4 MOAB

Ɛ4 Kades

Ɛ4 EDOM

F3 Eden Turo?

F3 ASIRIA

F3 Haran

F3 SIRIA

F5 ARABIA

G3 NINIWE

G4 BABILON

G4 KALDEA

G4 Susan

G4 Ur

H3 MEDIA

[Mmepɔw]

Ɛ5 Bepɔw Sinai

G2 ARARAT MMEPƆW

[Nsu ahorow]

D3 Mediterranea Po (Ɛpo Kɛse)

Ɛ1 Ɛpo Tuntum

Ɛ5 Ɛpo Kɔkɔɔ

H2 Caspian Po

H5 Persia Faka

[Nsubɔnten]

E5 Nil Asubɔnten

F3 Eufrate Asubɔnten

G3 Tigris Asubɔnten