Da Koro Nhyiam Titiriw Dwumadi Foforo

Da koro nhyiam titiriw dwumadi a ebefi ase July 2001 no asɛmti ne ‘Monyɛ Pɛ Wɔ Asɛm Ho Dwen Mu.’ (1 Kor. 14:20) Dɛn nti na mfaso wɔ so sɛ yɛbɛkɔ bi? Yɛte wiase a amumɔyɛ ayɛ mu ma mu. Sɛ yebetumi ako atia eyi a, ɛsɛ sɛ yenya honhom fam nneɛma ho ntease a edi mu na ama yɛatumi de papa adi bɔne so nim. Ɛno ne nea da koro nhyiam titiriw dwumadi no bɛboa yɛn ama yɛayɛ.

Ɔmansin sohwɛfo no de ɔkasa a ɛne “Nneɛma a Ebetumi Aboa Ma Yɛate Bible no Ase Yiye” bebue dwumadi no ano. Ɔbɛma yɛahu sɛnea yebetumi ayɛ den wɔ Kristofo gyidi mu. Ɔkasafo a wɔahyɛ da apaw no no besi sɛnea Bible mmara a yɛde bedi dwuma no ho hia na ama yɛanya nhumu kɛse no so dua bere a ɔrema ɔkasa a ɛne “Yɛ Honhom Muni Denam Wo Nkatede a Wobɛtete No So” no.

Ɛsɛ sɛ mmofra nso ma sɛnea wotumi te nneɛma ase no nya nkɔanim. Wɔbɛkyerɛkyerɛ eyi mu wɔ asɛm a ɛne “Nea Enti a Ɛsɛ sɛ Yɛyɛ Mmofra Wɔ Bɔneyɛ Mu” ne “Mmofra a Wɔhwehwɛ Ntease Nnɛ” no mu. Wobɛte sɛnea mmofra kyerɛ ɔkwan a wɔfa so hyɛ wɔn ho den wɔ honhom fam na ama wɔatumi akwati wiase nneyɛe bɔne ne ɔhaw no ho asɛm.

Yɛbɛyɛ dɛn atumi anya anigye kɛse wɔ asetram? Ɔkasafo a wɔahyɛ da apaw no no bɛkyerɛkyerɛ mu wɔ ɔkasa a ɛne, “Di Bible Nnyinasosɛm a Woate Ase no Akyi na Nya So Mfaso” no mu. Ɔbɛma nhwɛso ahorow a ɛkyerɛ sɛ Onyankopɔn Asɛm a yɛde bɔ yɛn bra no boa ma yegyina nsɛnnennen ano, sisi gyinae ahorow, na yenya mfaso pii fi nea Yehowa rekyerɛkyerɛ yɛn no mu.

Ɛsɛ sɛ wɔn a wɔpɛ sɛ wɔde nsu mu asubɔ yɛ wɔn ahosohyira ho nsɛnkyerɛnne ma Onyankopɔn no ka ho asɛm kyerɛ ɔhwɛfo guamtrani no ntɛm. Sɛ wɔkyerɛ bere a yɛde bɛyɛ da koro nhyiam titiriw no ara pɛ a, hyɛ no nsow wɔ wo kalenda so na yɛ nhyehyɛe pa kotie dwumadi a etu mpɔn yi bi. Mma ɔkasa ahorow a wɔbɛma wɔ da koro nhyiam titiriw no mu biara mmpa wo ti so! Ɛbɛhyɛ wo den ma woakɔ so atra wiase bɔne yi mu adi nokware ama Yehowa.