Teokrase Ɔsom Sukuu Ma 2001
1 Yɛwɔ Kyerɛwnsɛm mu ntease pii nti a ɛsɛ sɛ yɛn nyinaa de yɛn ho hyɛ Teokrase Ɔsom Sukuu no mu kɛse.—Mmeb. 15:23; Mat. 28:19, 20; Aso. 15:32; 1 Tim. 4:12, 13; 2 Tim. 2:2; 1 Pet. 3:15.
2 Yɛayɛ Bible akenkan ho nhyehyɛe aka sukuu no ho bere tenten ni. Ɛma yetumi kenkan Bible no kratafa biako da biara. Efi afe yi mfiase no, yɛayɛ Bible akenkan ho nhyehyɛe wɔ dapɛn a yɛbɛyɛ sɔhwɛ no mu. Bible akenkan nhyehyɛe a wɔde kaa nea yɛyɛ daa no ho a efii ase mfe abiɛsa a atwam ni no aba awiei. Nanso, sɛ wopɛ sɛ wokenkan Bible no pii sen nea wɔatwa ama yɛn no a, wubetumi ayɛ w’ankasa nhyehyɛe.
3 Dwumadi a Ɛto so 2 no tete anuanom mmarima ma wotumi ‘kenkan’ Onyankopɔn Asɛm ‘wɔ baguam.’ (1 Tim. 4:13) Sɛ wunya akenkan dwumadi a, di kan kenkan no den mpɛn pii. Wubetumi abɔ Asafo no Bible akenkan a ɛwɔ kasɛt so no atie na ama woahu nsɛmfua din bobɔ, ɛnne nsakrae, ne akwan foforo a ɛma obi hu akenkan yiye no.
4 Dwumadi a Ɛto so 3 ne 4 no gyina Reasoning nhoma, a wɔyɛe na yɛde adi dwuma wɔ asɛnka mu no, so. Sɛ asɛm a wɔapaw ama wo no dɔɔso a wuntumi mfa bere a wɔde ama no nwie a, ka nea mubetumi de adi dwuma wɔ mo asafo no asasesin mu no nkutoo ho asɛm. Wubetumi afa ɔkwan biara a ɛso bɛba mfaso wɔ mo asasesin no mu so ayɛ wo dwumadi no.
5 Bɔ mmɔden biara a wubetumi sɛ wubedi ɔfa a wɔde bɛma wo wɔ sukuu no mu ho dwuma. Gye bere siesie wo ho yiye, na fi komam kasa. Wubetumi ahyɛ asafo no nkuran, na sɛ wufi koma nyinaa mu de wo ho hyɛ Teokrase Ɔsom Sukuu a yɛbɛyɛ wɔ afe 2001 mu no mu a, wubenya so mfaso.