Fa Nsɛm a Asete Nyɛ Den Kyerɛkyerɛ
1. Dɛn ne ade biako a ehia paa na ama yɛn nkyerɛkyerɛ mu ada hɔ, na atu mpɔn?
1 Ade a ehia paa na ama yɛn nkyerɛkyerɛ atu mpɔn ne sɛ yɛbɛma asete ayɛ mmerɛw. Sɛ yesusuw ɔkwan a Ɔkyerɛkyerɛfo Kɛse, Yesu, faa so kyerɛkyerɛe no ho a, ɛbɛboa ma yɛn ‘nkyerɛkyerɛ atu mpɔn.’—2 Tim. 4:2; Yoh. 13:13.
2. Dɛn na ehia na ama yɛn nkyerɛkyerɛ asete ayɛ mmerɛw, na nkɛntɛnso bɛn na nkyerɛkyerɛ a ɛte saa wɔ?
2 Ka Nsɛm a Asete Nyɛ Den: Yebetumi ahu nokwasɛm a emu da hɔ a asete nyɛ den a onipa bi aka pɛn no bi wɔ Bepɔw so Asɛnka no mu. (Mateo ti 5 kosi 7) Ɔkwan a Yesu faa so ‘kyerɛkyerɛe’ no maa nnipakuw a na wɔretie no no “ho dwiriw wɔn.” Yesu nsɛm a na ɔreka no kaa asraafo a wɔsomaa wɔn sɛ wɔnkɔkyere no no koma ma wɔkae sɛ: “Obiara nkasae saa da.” (Mat. 7:28, 29; Yoh. 7:46) Ɛho nhia sɛ yɛde nsɛmfua akɛse a asete yɛ den anaa nkyerɛkyerɛmu a ɛkɔ akyiri pii di dwuma na ama afoforo ate nokware no ase yiye. Yebetumi de nsɛm a obiara te ase akyerɛkyerɛ nokware no mu ma emu ada hɔ.
3. Dɛn na ebetumi ama ebinom de nsɛm apuapua wɔn atiefo, na dɛn na ɛbɛboa yɛn na yɛanyɛ saa?
3 Susuw Nsɛm Dodow a Ɛsɛ sɛ Woka Ho: Ná Yesu susuw n’atiefo no ho na ama wahu nsɛm dodow a ɛsɛ sɛ ɔka kyerɛ wɔn wɔ bere pɔtẽẽ bi mu. (Yoh. 16:12) Ɛsɛ sɛ yɛde yɛn ani to fam na yɛdannan yɛn nsɛm mu ma ɛne wɔn a yɛka asɛm no kyerɛ wɔn no ahiade hyia. Eyi ho hia, titiriw bere a yɛredi abusuafo, wɔn a wɔakyerɛ asɛm no ho anigye foforo, anaa mmofra adanse no. Sɛ wɔwɛn wɔn aso tie yɛn yiye mpo a, ɛsɛ sɛ yɛhwɛ yiye na yɛamfa nsɛm pii ampuapua wɔn. Wɔn a wɔwɔ koma pa no bɛkɔ so asua nokware a ɛfa Yehowa Nyankopɔn ho no ho ade.—Yoh. 17:3; 1 Kor. 3:6.
4. Dɛn nti na mfaso wɔ so sɛ yɛde yɛn adwene besi nsɛntitiriw so sen sɛ yɛde nkyerɛkyerɛmu pii bɛma?
4 Fa W’adwene si Nsɛntitiriw So: Yesu amfa nsɛm pii anhyehyɛ ne nkyerɛkyerɛ mu. Bere a ɔkae sɛ: ‘Wɔn a wɔwɔ nkae ada mu nyinaa befi adi’ no, wamfa owusɔre a wɔn a wɔteɛ ne wɔn a wɔnteɛ benya no mu nkyerɛkyerɛmu a ɛkɔ akyiri amma saa bere no. (Yoh. 5:28, 29) Sɛ yɛreyɛ Bible adesua a, ɛsɛ sɛ yɛde yɛn adwene si nsɛntitiriw no so na ɛnsɛ sɛ yɛde nsɛm bi a ɛmfa adesua no ho hyehyem.
5. Sɛ yɛde nsɛm a asete nyɛ den kyerɛkyerɛ a, mfaso bɛn na yebenya?
5 Yɛn ani sɔ paa sɛ Yehowa de nsɛm a asete nyɛ den akyerɛkyerɛ yɛn ne ho nokwasɛm nyinaa! (Mat. 11:25) Momma yɛmfa nsɛm a asete nyɛ den nkyerɛkyerɛ, na ama yɛn som adwuma no asow aba ma yɛn ani agye.