Yɛn Nsɛmma Nhoma No—Wɔayɛ no Sɛnea Nnipa Pii Ani Begye Ho
1. Ɔkwan bɛn so na akoa nokwafo ne ɔbadwemma kuw no suasua Paulo?
1 Sɛnea ɔsomafo Paulo sakraa ɔkwan a na ɔfa so ka asɛmpa no mu na ama wanya “nnipa ahorow nyinaa” no, saa ara na akoa nokwafo ne ɔbadwemma kuw no nso nam yɛn nsɛmma nhoma no so nya nnipa a wofi mmeae ahorow na wokura gyidi ahorow no nyinaa. (1 Kor. 9:22, 23) Enti nea ɛbɛyɛ na yɛatumi de Ɔwɛn-Aban ne Awake! no adi dwuma yiye no, ɛsɛ sɛ yɛbɔ mmɔden sɛ yɛbɛma wɔn a wotintim nsɛmma nhoma yi maa wɔn no tena yɛn adwene mu.
2. Henanom na wɔn ani begye Awake! no ho?
2 Awake!: Wɔyɛɛ nsɛmma nhoma yi maa nnipa a wɔte sɛ “Atene mmarima” a Paulo kasa kyerɛɛ wɔn no. (Aso. 17:22) Ná saa mmarima no nyɛ Kristofo, na na wɔnte Kyerɛwnsɛm no ase yiye. Saa ara na wɔn a wɔkyerɛw Awake! no maa wɔn no nimdeɛ wɔ Bible no ho sua anaasɛ wonni ho nimdeɛ koraa. Ebetumi aba sɛ wonnim Kristofo nkyerɛkyerɛ ho hwee, ebia wɔn ani nnye nyamesom ho anaasɛ wonnim mfaso a ɛwɔ Bible no so. Nea enti a wotintim Awake! ne sɛ ɛbɛma wɔn a wɔkenkan no ahu sɛ nokware Nyankopɔn no wɔ hɔ. Nsɛmma nhoma yi botae foforo nso ne sɛ ɛbɛma wɔn a wɔkenkan no agye Bible no adi, na aboa wɔn ma wɔahu sɛ Yehowa Adansefo yɛ soronko koraa wɔ nyamesom kuw ahorow no ho.
3. Henanom na wɔayɛ Ɔwɛn-Aban no mu biara ama wɔn?
3 Ɔwɛn-Aban: Nsɛmma nhoma yi a wɔyɛ ma ɔmanfo no botae ne sɛ wɔn a wɔwɔ obu kakra ma Onyankopɔn ne Kyerɛwnsɛm no bɛkenkan. Saafo yi wɔ Bible no ho nimdeɛ kakra, nanso wɔnte emu nokware nkyerɛkyerɛ no ase. Wɔte sɛ atiefo a Paulo kaa wɔn ho asɛm sɛ ‘wosuro Onyankopɔn’ no. (Aso. 13:14-16) Wɔakyerɛw Ɔwɛn-Aban a adesua nsɛm wom no ama Yehowa Adansefo titiriw. Ná Paulo nim sɛ wɔn a wɔkenkan ne nkrataa no nim Kyerɛwnsɛm no mu na wɔwɔ nokware no ho nimdeɛ a edi mũ. (1 Kor. 1:1, 2) Saa ara na wɔakyerɛw nea adesua nsɛm wom no ama wɔn a wɔba yɛn nhyiam ahorow ase na wonim nsɛmfua a Adansefo no de di dwuma ne wɔn nkyerɛkyerɛ no.
4. Dɛn nti na ɛsɛ sɛ yehu nsɛmma nhoma biara a yɛde bɛma wɔ asɛnka mu no mu nsɛm?
4 Ɛwom sɛ yɛtaa de nsɛmma nhoma ahorow abien no bom ma de, nanso biako pɛ na yɛka ho asɛm ansa na yɛde ama. Enti fa yɛ wo botae sɛ wubehu emu biara mu nsɛm. Ɛno bɛboa wo paa ma woahu asɛm a onipa a wubehyia no no ani begye ho.