Asɛmmisa Afã

◼ Dɛn na yegyina so hu sɛ ɛsɛ sɛ yɛma obi nhoma?

Nea yegyina so titiriw de hu ne anigye a onipa no kyerɛ. Sɛ ofi komam kyerɛ asɛm no ho anigye a, yebetumi ama no nsɛmma nhoma abien, nhomawa, nhoma, anaa nhoma foforo biara a yɛde reyɛ adwuma no bi. Sɛ yehu sɛ sika a ɔwɔ no sua anaasɛ onni bi koraa a ɔde beyi ntoboa de aboa wiase nyinaa adwuma no mpo a, yebetumi de ama no. (Hiob 34:19; Adi. 22:17) Nanso, yɛmpɛ sɛ yɛde yɛn nhoma a ɛsom bo no ma wɔn a wɔnkyerɛ ho anisɔ no.—Mat. 7:6.

Dɛn na ofiewura bi yɛ a, ɛbɛkyerɛ sɛ n’ani gye asɛm no ho? Sɛ ofi ne pɛ mu ne yɛn bɔ nkɔmmɔ a, ɛyɛ adanse a edi mũ a ɛkyerɛ sɛ n’ani gye ho. Sɛ otie yɛn bere a yɛrekasa, obua yɛn nsɛmmisa, na ɔkyerɛ n’adwene a, na ɛkyerɛ sɛ ɔrenya nkɔmmɔbɔ no mu kyɛfa. Sɛ yɛrekenkan Bible no na ɔde n’ani di akenkan no akyi a, ɛda no adi sɛ ɔwɔ obu ma Onyankopɔn Asɛm. Mpɛn pii no, sɛ yebisa onii no sɛ ɔbɛkenkan nhoma a yɛde rema no no a, ɛboa paa. Ɛsɛ sɛ adawurubɔfo de atɛmpa di dwuma na ama wɔahu anigye a onipa no wɔ. Sɛ nhwɛso no, sɛ yɛreyɛ mmɔnten so adansedi a, ɛrenyɛ papa sɛ yɛde nsɛmma nhoma, nhomawa, anaa nhoma bɛma obiara kɛkɛ a ɔretwam no. Sɛ yentumi nhu sɛ onipa no ani gye asɛm no ho a, ɛbɛyɛ papa sɛ yɛbɛma no nsaano krataa anaa kratawa bi.

Saa ara nso na nhoma dodow a ɔdawurubɔfo bi hia na ama wayɛ ne som adwuma no so na obegyina agye nhoma, na ɛnyɛ ntoboa a obetumi ayi wɔ ho no. Yɛmmfa ntoboa nntua nhoma ho ka, na mmom yɛde boa ɔsom adwuma no afã horow nyinaa. Ɛmfa ho sɛnea yɛn sikasɛm te biara no, anisɔ bɛka yɛn ma yɛayi yɛn yam de nea yɛwɔ aboa Ahenni adwuma no, na ɛnyɛ nea yɛanya ma aboro so. (Mar. 12:41-44; 2 Kor. 9:7) Ɛbɛka yɛn nso ma yɛafa nhoma a yehia nkutoo sɛnea ɛbɛyɛ a yɛrensɛe ntoboa a yeyi de yɛ ɔsom adwuma no.

[Asɛm a wɔafa aka wɔ kratafa 2]

Ɛsɛ sɛ adawurubɔfo de atɛmpa di dwuma na ama wɔahu anigye a onipa no wɔ