Nea Ɛbɛma Yɛatu Mpɔn wɔ Asɛnka Mu—Sɛnea Yɛbɛbua Ofiewura a Ne Bo Afu

Nea Enti a Ɛho Hia: Nnipa a yɛhyia wɔn wɔ asɛnka mu no pii bu adeɛ. Nanso, Yesu kaa sɛ ebinom bɛtan yɛn. (Yoh. 17:14) Wei enti, sɛ ofiewura bi bo fu a, ɛnsɛ sɛ ɛyɛ yɛn nwanwa. Mmom ɛsɛ sɛ yɛdi no ni na yɛma ɔhu sɛ yɛyɛ Yehowa asomfoɔ ampa. (Rom. 12:17-21; 1 Pet. 3:15) Ebia wei bɛka n’akoma ato ne yam. Afei nso ɛbɛyɛ adansedie ama ofiewura no ne obiara a ɔwɔ hɔ na sɛ berɛ foforɔ Yehowa Adansefoɔ kɔ wɔn kyɛn a wɔatie wɔn.—2 Kor. 6:3.

Ɔkwan a Wobɛfa so Ayɛ:

Sɛ ofiewura no bo fu a, te w’anim kyerɛ no; mma wo bo mfu. Ebia wei bɛma ne bo adwo. Ɔyɛ biribi a, ɛnsɛ sɛ wogye asɛm no ma wo ho. (Ɔsɛnk. 7:9) Wobɛhwɛ mpo na nneɛma nkɔ yie mma no anaasɛ yɛankɔ hɔ berɛ pa mu. Sɛ Ahennie asɛm no na ɛhyɛɛ no abufuo mpo a, ɛbɛtumi aba sɛ nkurɔfoɔ na atutu nsɛm agu n’asom.—2 Kor. 4:4.
Ɔka biribi a, yi n’ano bɔkɔɔ. (Mmeb. 15:1) Yɛreka yi, ebia wada na wokɔnyanee no anaa ɔreyɛ biribi na woma ɔtwaa so. Ɛwom, asɛnka adwuma no nyɛ adebɔne na yɛapa ho kyɛw. Nanso sɛ yɛkɔ obi nkyɛn na ɛnyɛ berɛ pa mma no a, ɛsɛ sɛ yɛpa no kyɛw. Ebi nso a, yɛn ho asɛm bi a wate na ama ne bo afuo. Sɛ saa a, wobɛtumi aka sɛ: “Mete wo ase paa; ɛyɛ me a, ebia anka ɛbɛha me. Nanso wohwehwɛ mu paa a, wobɛhu sɛ asɛm a woate afa yɛn ho no nyɛ nokorɛ. Wo deɛ ma menkyerɛkyerɛ mu.” Ɛbɛtumi aba nso sɛ yɛn nkyerɛkyerɛ anaa yɛn gyidie bi na ɔmpɛ. Ebia ɔnhu nea enti a yɛnnye mogya anaa yɛtu nkurɔfoɔ fi asafo no mu. Sɛ saa a, wobɛtumi aka sɛ: “Mete aseɛ. Wei yɛ biribi a ɛha nnipa pii. Nanso wo deɛ, yɛnhwɛ nea ɛwɔ Bible mu a ɛma yɛyɛ saa.”
Sɛ wohu sɛ ofiewura no bo afu dendeenden a, ɛnneɛ ɛnsɛ sɛ wo ne no yiyi nsɛm ano koraa; mmom fi hɔ ntɛm. Sɛ ɔka sɛ ɔmpɛ sɛ Yehowa Adansefoɔ tu wɔn nan si ne fie bio a, ka kyerɛ no sɛ moate, yɛmma hɔ bio.

Sɔ Wei Hwɛ Bosome Yi Mu:

Sɛ moreyɛ abusua som a, mobɛtumi abobɔ nsɛm yi so.
Sɛ obi bo fu na mofi ne nkyɛn a, wo ne nea ɔka wo ho no mmɔ ho nkɔmmɔ na sɛ ɔwɔ nyansahyɛ bi a moasusu ho.