Woresiesie Wo Ho Ama Nkaedi No?

Nisan da a ɛtɔ so 13 afe 33 Y.B. no, na Yesu nim sɛ anwummere baako pɛ na aka a ɔne ne nnamfonom bɛhyiam ansa na n’atamfo akum no. Na ɔne wɔn bɛdi Twam no na wɔwie a, ɔde Awurade Anwummeduan no asi hɔ. Na wei yɛ biribi a ɛho hia paa, enti na ɛgye ahosiesie. Enti ɔsomaa Petro ne Yohane sɛ wɔnkɔsiesie baabi a wɔbɛhyɛ fã no. (Luka 22:7-13) Ɛfi saa bere no, afe biara sɛ Nkaedi no reyɛ adu so a, Kristofo yɛ ahoboa a ɛfata. (Luka 22:19) Afe yi Nkaedi no bɛba so April 3. Nneɛma bɛn saa na ɛsɛ sɛ yɛyɛ de siesie yɛn ho ansa na da no adu?

Ahoboa a Mpanyimfo Bɛyɛ:

Sɛ mobɛhyia wɔ Ahenni Asa so oo, sɛ baabi foforo oo, monhwɛ sɛ obiara bɛnya baabi atena. Afei monhwɛ sɛ akanea wɔ hɔ, na mframa fa hɔ. Momprapra hɔ nsiesie hɔ kama.
Mompaw onua a ɔbɛma ɔkasa no, guamtenani, ne wɔn a wɔbɛbɔ paanoo ne nsã no so mpae.
Sɛ asafo bi bɛdi kan ayɛ ama asafo foforo adi so aba a, montoto nneɛma yie na obiara nhu bere a ne dwumadi bɛfi ase. Momma asafo a ɛdi kan no nhu baabi a wɔbɛfa apue, ne baabi a wɔn a wodi so no bɛfa aba mu. Saa ara na monhwɛ sɛnea kar bɛfa akɔ mu na afa apue.
Mompaw wɔn a wɔbɛgye ahɔho ne wɔn a wɔde bobesa ne paanoo bɛfa nkurɔfo anim, na momma wɔnhu wɔn adwuma no ani so.
Monyɛ nhyehyɛe a ɛbɛma mo nsa aka paanoo ne bobesa a ɛfata, prɛte, glass, pon, ne nea wɔde bɛsɛ so.

Ahoboa a Adawurubɔfo Bɛyɛ:

Bɔ mmɔden sɛ wɔbɛto nsa afrɛ nnipa dodow biara a wobɛtumi aba Nkaedi no.
Nea ɛbɛyɛ na wo werɛ remfi wo Bible asuafo, abusuafo, wo mfɛfo sukuufo ne adwumayɛfo ne afoforo a wonim wɔn nyinaa no, di kan kyerɛw wɔn din to hɔ. Afei fa wɔn so mmaako mmaako na to nsa frɛ wɔn.
Nkaedi rebɛdu a, wotwa Bible fa bi ma yɛn sɛ yɛnkenkan. Gye bere kenkan na susu ho.
Du asa no so ntɛm na woatumi ama ahɔho akwaaba.