Nea Ɛbɛma Yɛatu Mpɔn wɔ Asɛnka Mu—Tete Adawurubɔfo Foforo

Nea Enti a Ɛho Hia: Ɛsɛ sɛ wɔn a wɔabɛyɛ Yesu asuafo foforo no di nea wɔahyɛ yɛn “nyinaa” so. Ahyɛde yi baako ne sɛ wɔde nokware no bɛkyerɛkyerɛ nkurɔfo. (Mat. 28:19, 20) Asuafo foforo yi mu pii akyerɛw wɔn din wɔ Teokrase Ɔsom Sukuu no mu, na ebia wɔtumi di abusuafo anaa wɔn nnamfo adanse. Nanso bere a wɔgu so resua ade no, nokware no bɛka wɔn koma na wɔbɛhu sɛ Yehowa pɛ sɛ nnipa nyinaa te asɛmpa no. Wei nti ebia wɔbɛpɛ sɛ wɔne yɛn bom yɛ asɛnka adwuma no. (Rom. 10:13, 14) Sɛ asafo mu mpanimfoɔ pene so sɛ wɔnyɛ adawurubɔfo a wɔmmɔɔ asu a, ɛsɛ sɛ yɛtete wɔn wɔ asɛnka adwuma no mu. Wei bɛboa ma wɔde akokoduru ayɛ adwuma no.—Luka 6:40.

Ɔkwan a Wobɛfa so Ayɛ:

Boa ɔdawurubɔfo foforo no ma ɔnhu nwoma ne nneɛma foforo a ɔbɛtumi de ayɛ asɛnka adwuma no. Worekɔ asɛnka a, nneɛma bɛn na wode gu wo bag mu? Fa kyerɛ no na ɔnhu nea wode emu biara yɛ.
Monhwɛ Yɛn Ahenni Som mu na mompaw nyansahyɛ bi a mobɛtumi de adi adanse na mommobɔ so. Hyɛ no nkuran ma ɔmfa ɔno ara ne nsɛm nka. Monhwɛ Ɔsom Sukuu nwoma no kratafa 82 na mompaw emu nea ɛfata mo asasesin no na monsusu ho. Si so dua ma ɔnhu sɛ ɛhia sɛ ɔma n’ani ku ne ntadehyɛ ne n’ahosiesie nyinaa ho.—2 Kor. 6:3, 4.
Kɔ so ara boa no. Kyerɛ ɔdawurubɔfo foforo no dwuma a yɛde asasesin kratasin (territory card) no di ne sɛnea yɛhyehyɛ afie afie asɛnka kyerɛwtohɔ no. Ma ɔnhu sɛnea ɔbɛyɛ kyerɛwtohɔ bere a wanya obi a n’ani gye asɛm no ho. Kyerɛ no sɛnea yɛde nwomawa a wɔato din Good News for People of All Nations ne jw.org yɛ adwuma wɔ asɛnka mu. Sɛ ɔnya obi wɔ asɛnka mu a, kyerɛ no ma ɔnhu nea ɔbɛyɛ de aboa no.—1 Kor. 3:6.
Nya ne ho abotare na kamfo no. (Mmeb. 25:11) Afei nso yɛ nhwɛso pa ma ɔnsua. Sɛ wode nsi yɛ asɛnka adwuma no na woyi wo yam boa no a, ɛbɛnya nkɛntɛnso pa wɔ ne so, na ne werɛ remfi da.

Sɔ Wei Hwɛ Bosome Yi Mu:

Fa wo suani no ka wo ho bere a worekɔyɛ afie afie asɛnka adwuma no, sankɔhwɛ, anaa Bible adesua. Sɛ wonni Bible suani a wafi asɛnka ase a, ɛnneɛ pɛ ɔdawurubɔfo bi a ne ho nkokwaeɛ ka wo ho.