Nea Ɛbɛma Yɛatu Mpɔn wɔ Asɛnka Mu—Asasesin a Nnwuma Wom

Nea Enti a Ɛho Hia: Nnipa dodow no ara de bere pii na ɛyɛ adwuma. Enti sɛ yɛbɛnya saafo no aka Ahenni asɛmpa no akyerɛ wɔn a, gye sɛ yɛkɔ wɔn nnwuma mu. Sɛ yɛka asɛm no wɔ asasesin a nnwuma wom mu a, ɛbɛtumi ayɛ anigye na aso aba, efisɛ nnwuma mu deɛ, daa adwumayɛfo wɔ hɔ. Afei sɛ wɔhu yɛn a, wɔnya adwene sɛ yɛyɛ nnipa a wɔbɛtumi ne yɛn adi dwa, enti wɔte wɔn anim ma yɛn. Adeɛ baako a ɛbɛboa adawurubɔfo ne sɛ wɔbɛma wɔn ani ada hɔ na wɔasiesie wɔn ho kama. (2 Kor. 6:3) Enti ɛsɛ sɛ ɔsom adwuma sohwɛfo ma n’ani di adwuma no akyi na ɔhu adawurubɔfo a wɔyɛ asasesin a ɛte saa mu adwuma ne mpɛn dodow a wɔyɛ saa.

Ɔkwan a Wobɛfa so Ayɛ:

Siesie asɛm tiaa a wobɛka. Sɛ yɛtena adwumayɛfo no so kyɛ a, ebia bere foforo wɔremma yɛn kwan.
Kɔ hɔ bere a wɔwɔ adagye a wɔbɛtumi ne wo akasa, ebia anɔpa a nnipa nni adwumayɛfo no so kɛse.
Hwɛ sɛ wobɛsrɛ kwan afi adwuma no mu panin hɔ. Te w’anim ne no nkasa. Wobɛtumi aka sɛ, “Yɛde bere tiaa bi resrasra nkurɔfo wɔ wɔn nnwumam, efisɛ yɛntaa nto wɔn wɔ fie.” Di no adanse tiawa, na fa kratawa, nsɛmma nwoma, anaa nwoma foforo ma no. Ɛbɛyɛ papa sɛ yɛrenka ntoboa ho asɛm na amma wannya adwene sɛ yɛretɔn ade. Mmom, sɛ obi bisa yɛn nea yɛyɛ tua yɛn adwuma no ho ka a, ɛnneɛ yɛbɛtumi aka ntoboa ho asɛm.
Sɛ adwumam panin no te n’anim ma wo a, ɛnneɛ wobɛtumi asrɛ no sɛ wopɛ sɛ wo ne adwumayɛfo a aka no bɔ nkɔmmɔ tiawa. Sɛ ahomegyebea bi wɔ adwumam hɔ a, wobɛtumi asrɛ kwan na woagya yɛn nwoma no bi wɔ hɔ.
Ma w’ani nna hɔ na woanyɛ biribi a ɛbɛha adwumayɛfo no. Sɛ wohu sɛ odwumayɛni ne obi rekasa a, twɛn ma ɔnwie ansa na woakɔ ne nkyɛn.

Sɔ Wei Hwɛ Bosome Yi Mu:

Abusua Som a ɛdi hɔ no, mompɛ asɛm tiawa bi a mobɛtumi de adi adanse wɔ nnwumam na monyɛ ho ɔyɛkyerɛ.