Temanmufo—Hena Na Ɛbɛbɔ Wɔn Ho Ban?—Dɛn Na Bible Ka Fa Ho?

Tie amanneɛbɔ bi a Amanaman Nkabom no de ato gua:

• Efi October 7 besi October 23, 2023 no, Gaza ne Israel ntɔkwaw no ama nnipa bɛboro 6,400 ahwere wɔn nkwa, na 15,200 nso na apirapira. Nnipa a yɛreka wɔn ho asɛm yi, dodow no ara yɛ temanmufo. Nnipa mpempem pii nso na ntɔkwaw no nti wɔaguan afi wɔn fie.

• Russia ne Ukraine ntɔkwaw no, ɛde besi September 24, 2023 no, na temanmufo bɛboro 9,701 na afa ho awu wɔ Ukraine; wɔn a wɔapirapira nso ano si 17,748.

Wɔn a akokoakoko ama wɔredi amia no, anidaso bɛn na Bible de ma wɔn?

Akyea na emmui; anidaso wɔ hɔ

Bible aka ato hɔ sɛ Onyankopɔn bɛma ‘akodi agyae wɔ asaase nyinaa so.’ (Dwom 46:9) Ɔde ahenni anaa aban bi befi soro aba, na ɛbɛba abɛsɛe nnipa aban nyinaa. Afei, Onyankopɔn Ahenni no na ebedi nnipa so. (Daniel 2:44) Saa Ahenni no bɛma yɛn kɔn mu adwo yɛn.

Onyankopɔn Ahenni no, Yesu Kristo na ɔyɛ so hene, na hwɛ nneɛma a ɔbɛyɛ ama yɛn no bi:

• “Obegye ohiani a osu frɛ no, ne mmɔborɔwa ne nea onni boafo nso. Ɔbrɛfo ne ohiani asɛm bɛyɛ no mmɔbɔ, na obegye ahiafo nkwa. Obegye wɔn afi nhyɛso ne atirimɔdensɛm mu.”—Dwom 72:12-14.

Abɛbrɛsɛ ne abenedi a akokoakoko ne awudisɛm kɔfa ba no, Onyankopɔn de n’Ahenni no beyi ne nyinaa afi hɔ koraa.

• “Ɔbɛpopa wɔn aniwa mu nisu nyinaa, na owu nni hɔ bio, na awerɛhow ne osu ne yaw nso nni hɔ bio. Kan nneɛma no atwam.”—Adiyisɛm 21:4.

Ɛrenkyɛ, Onyankopɔn Ahenni no bɛba abɛsesa wiase koraa ama yɛn ho atɔ yɛn. “Ɔko, ne ɔko ho nsɛm” a abu so nnɛ no, Bible kaa ho asɛm too hɔ. (Mateo 24:6) Akokoakoko ne nneɛma foforo a ɛrekɔ so wɔ wiase nnɛ no kyerɛ sɛ, yɛte “awiei mmere no mu,” na ɛrenkyɛ, nnipa amammuo nyinaa befi hɔ.—2 Timoteo 3:1.