Wonyaa Asɔfo Bi a Wɔn Bo Afuw Ho Abotare

Artur yɛ ɔmansin sohwɛfo wɔ Armenia. Bere bi, ɔkɔsraa Yehowa Adansefo asafo bi, na ohui sɛ, baguam adansedi a wɔde nhoma ahorow hyehyɛ trɔk mu yɛ no, na wɔnyɛ bi. Ná Artur pɛ sɛ ɔhyɛ asafo no nkuran ma wɔde wɔn ho hyɛ baguam adansedi no mu, enti ɔne ne yere Anna ne Ɔdansefo bi a wɔfrɛ no Jirayr de trɔk a nhoma hyehyɛ mu yi bi kɔɔ kurow ketewa bi mu. Wɔde trɔk no sii baabi a nnipa pii twam wɔ hɔ.

Ankyɛ koraa, nkurɔfo a na wɔretwam no beyiyii nhoma no bi. Nanso, ɔkwan foforo yi a wɔfaa so dii adanse no maa asɔretiafo adwene baa wɔn so. Da koro bi, asɔfo mmienu bi baa trɔk no ho. Nea wohui ara ne sɛ, baako de ne nan abɔ trɔk no akɔhwe baabi. Afei ɔbɔɔ Artur ani so ma n’ahwehwɛniwa tɔɔ fam. Artur, Anna, ne Jirayr bɔɔ mmɔden sɛ wobedwudwo asɔfo no koma, nanso ankosi aga. Afei asɔfo no tiatiaa trɔk no so, na wɔbɔɔ nhoma no nyinaa petee. Wodidii Adansefo no atɛm na wɔkekaa bi kyerɛɛ wɔn; wowiei no, wogyaa wɔn hɔ kɔe.

Artur, Anna, ne Jirayr de asɛm no kɔdan apolisifo a wɔwɔ kurom hɔ no. Wɔkaa nea asi kyerɛɛ wɔn, na wɔkaa Bible no ho asɛm kyerɛɛ apolisifo no ne nkurɔfo a wɔyɛ adwuma wɔ hɔ no. Wɔmaa Adansefo mmiɛnsa no kwan ma wokohuu polisifo panyin no. Mfiase no, na ɔpanyin no pɛ sɛ Adansefo no kyerɛkyerɛ nea esii no mu kɔ akyiri. Nanso sɛ ɔhwɛ sɛnea Artur so ware, nanso wammɔ ɔsɔfo no bi no a, na ɛyɛ no nwonwa paa. Enti ogyaee nsɛm a na ɔrebisabisa wɔn no. Afei obisaa Yehowa Adansefo gyidi ho nsɛm pii. Wɔn ani baa wɔn ho so no, na wɔne no abɔ nkɔmmɔ nnɔnhwerew nnan! Polisifo panyin no ani gyee nkɔmmɔ a wɔbɔe no ho araa ma ɔkae sɛ: “Wei ne asɔre papa! Mɛyɛ na maba bi!”

Ade kyee no, Artur san kogyinaa trɔk no ho. Ɔbarima bi a ohuu nea esii no baa Artur nkyɛn bɛka kyerɛɛ no sɛ, ohuu nea asɔfo no yɛe nyinaa. N’ani gyee sɛnea Artur gyinaa hɔ dinn a wammua wɔn no ho. Ɔsan kaa sɛ, kan no, na obu asɔfo no paa, nanso nea ohui no ama obu a ɔwɔ ma wɔn no nyinaa asa.

Saa anwummere no, polisifo panyin no san too nsa frɛɛ Artur ma ɔsan baa steehyɛn hɔ. Sɛ́ anka ɔne no bɛka nea esii no ho asɛm no, obisaa nsɛm pii faa Bible no ho. Polisifo mmienu bɛkaa nkɔmmɔ no ho.

Ade kyee no, Artur san kɔsraa polisifo panyin no. Saa bere yi de, okoyii Bible ho video ahorow kyerɛɛ no. Polisifo panyin no frɛɛ polisifo a wɔwɔ hɔ no ma wɔbɛhwɛɛ bi.

Asɔfo mmienu bi subammɔne nti, polisifo pii tee asɛmpa no bere a edi kan koraa. Wei ama wɔn mu dodow no anya Yehowa Adansefo ho adwempa.