Ɔmansin Nhyiam Dwumadi Foforo

Nnipa a wɔwɔ wiase pɛ sɛ yenya adwene sɛ wɔrensɛe wiase yi da. Nanso Onyankopɔn Asɛm ma yehu sɛ ɛnte saa koraa. (1 Yoh. 2:15-17) Ɛboa yɛn ma yɛte ase sɛ ‘ademude a yɛbɛhyehyɛ wɔ asase so’ no yɛ ɔbrɛgu. Nea ɛbɛyɛ na wɔahyɛ Onyankopɔn nkurɔfo den no, wɔayɛ ɔmansin nhyiam a yɛbɛkɔ wɔ 2007 ɔsom afe no mu ho nhyehyɛe, na ɛbɛkyerɛkyerɛ asɛmti, ‘Hyehyɛ W’ademude Ɔsoro’ no mu.—Mat. 6:19, 20.

Honam fam adedodowpɛ ho asɛm wɔ nea wɔka ho asɛm wɔ Efesofo 2:2 sɛ “sɛnea mframa a ɛrebɔ no panyin pɛ; ɛno ne honhom a seesei ɛyɛ adwuma wɔ asoɔden mma mu no” mu. Sɛnea mframa wɔ baabiara a yetumi home no, saa ara na “wiase honhom” nso adonnɔn wiase no. (1 Kor. 2:12) Esiane sɛ ano yɛ den paa nti, wɔka sɛ ɛwɔ tumi. Ɔmansin nhyiam dwumadi foforo no bɛboa yɛn ma yɛakwati wiase adedodowpɛ su no na yɛde yɛn adwene asi nneɛma a ɛho hia paa so. (Mat. 6:33) Bio nso, nhyiam no bɛboa yɛn ma yɛde yɛn ho ato Yehowa so bere a yɛreyɛ yɛn som adwuma no ɛmfa ho nhyɛso ne ɔtaa ahorow a yehyia.

Hwɛ sɛ wobɛkɔ nnanu no nyinaa na ‘wode w’adwene asi nsɛm a wobɛte no so akyɛn sɛnea woyɛ daa no.’ (Heb. 2:1) Yɛ kyerɛwtohɔ ntiantiaa a wubetumi de adi dwuma wɔ w’asetra ne wo som adwuma mu. Sɛ wokotie honhom fam dwumadi a ɛma denhyɛ yi fi mfiase kosi awiei a, ɛbɛhyɛ wo nkuran ma woakɔ so ‘ahyehyɛ ademude wɔ ɔsoro’!