Monhwehwɛ Wɔn a Wɔfata
1. Dɛn na yɛyɛ de kyerɛ sɛ yɛn ani sɔ hokwan a yɛanya de yɛ asɛnka adwuma no?
1 Bere a na Yesu reyɛ ne som adwuma no, ɔbɔɔ mmɔden pii kaa asɛmpa a ɛma awerɛkyekye no kyerɛɛ ahobrɛasefo. (Yes. 61:1, 2) Sɛ́ ahemmɔfo a yegyina Kristo ananmu no, ɛnnɛ yɛanya hokwan soronko sɛ yɛbɛyɛ nea yebetumi biara a yɛrempa abaw de ahwehwɛ wɔn a wɔfata wɔ yɛn asasesin mu de asuasua Yesu.—Mat. 10:11; 2 Kor. 5:20.
2. Ɔkwan bɛn so na Paulo yɛɛ fakaa, na dɛn na efii mu bae?
2 Yɛ Fakaa: Ná ɛyɛ ɔsomafo Paulo su sɛ obedi kan akɔ hyiadan mu akɔka asɛm no akyerɛ Yudafo ne wɔn a wɔasakra abɛyɛ Yudafo no. (Aso. 14:1) Bere a na Paulo ne Silas wɔ Filipi no, wɔkɔhwehwɛɛ nkurɔfo wɔ baabi a na ‘wosusuw sɛ wɔbɔ mpae’ wɔ hɔ. Wofii ase dii mmea bi a na wɔahyiam wɔ hɔ no adanse. Ntɛm ara na wɔn mu biako a wɔfrɛ no Lidia gyee nokware no.—Aso. 16:12-15.
3. Wɔ afie afie asɛnka adwuma a yɛyɛ akyi no, asɛnka adwuma no afã bɛn na yebetumi anya hokwan ayɛ?
3 Wɔ afie afie asɛnka adwuma a woyɛ wɔ w’asasesin mu akyi no, so wubetumi aka asɛm no akyerɛ nnipa a wuhyia wɔn wɔ hyɛn gyinabea, ahomegyebea, faako a wɔpɛ adwuma, akwan a nkurɔfo taa fa so, nnwuma ahorow mu, ne sotɔɔ akɛse a ɛwɔ w’asasesin no mu nso? Ebia wubetumi afa krataakyerɛw anaa telefon so adi nkurɔfo a wɔtete adan a wɔabɔ ho ban mu no adanse. Sɛ woma w’ani da hɔ na woyɛ fakaa a, wubetumi ahu nea ɛsɛ sɛ woyɛ wɔ tebea horow a ɛwɔ w’asasesin mu no ho, na ama woatumi ayɛ “pii wɔ Awurade adwuma no mu.”—1 Kor. 15:58.
4. Sɛ yɛn asafo no asasesin sua a, dɛn na yebetumi ayɛ?
4 Adawurubɔfo pii atu kɔ asafo foforo a ɛwɔ wɔn man anaa ɔman foforo so mu, na ama wɔanya hokwan atrɛw wɔn som adwuma no mu. Afoforo nso asua ɔman foforo so kasa sɛnea ɛbɛyɛ a wobetumi aka asɛm no akyerɛ nnipa a wofi aman foforo so no.
5. Adwene bɛn na ɛsɛ sɛ yenya wɔ mmere a yɛte mu yi ho, na dɛn na ɛsɛ sɛ yesi yɛn bo sɛ yɛbɛyɛ?
5 Ɛsɛ sɛ yɛn nyinaa ma ɛtena yɛn adwenem sɛ “afuw no ne wiase” no. (Mat. 9:37; 13:38) Esiane sɛ wiase bɔne yi awiei abɛn nti, ɛsɛ sɛ obiara susuw ne nsɛm tebea, ne dom akyɛde, ne hokwan ahorow a ebetumi ama wayɛ pii wɔ ɔsom adwuma no mu no ho anibere so. Yehowa ma yɛn awerɛhyem sɛ sɛ yɛde Ahenni nneɛma di kan a, obehyira mmɔden a yefi yɛn komam bɔ de trɛw yɛn som adwuma mu no so.—Mat. 6:33.