Jinsi Upendo Unavyotusaidia Kushinda Woga

1. Ni baadhi ya mambo gani ambayo kwa kawaida watu huogopa?

FIKIRIA kisa hiki halisi. Nestor na María mke wake, walitaka kutumikia kwenye eneo lenye uhitaji mkubwa.b Hata hivyo, ili kutimiza hilo walihitaji kuishi maisha rahisi. Lakini walihofu kwamba huenda wasiwe na furaha ya kweli ikiwa wataishi maisha rahisi. Biniam, alipojifunza na kuwa Shahidi wa Yehova katika nchi ambayo kazi yetu inapingwa, alitambua kwamba akiwa mtumishi wa Mungu angeteswa. Hilo lilimwogopesha. Lakini alikuwa na hofu hata zaidi kuhusu jinsi ambavyo huenda watu wa familia yake wangetenda baada ya kujua kuhusu dini yake mpya. Valérie aligunduliwa kwamba ana aina fulani mbaya ya kansa, na haikuwa rahisi kwake kupata daktari ambaye angeheshimu imani yake inayotegemea Biblia kuhusu damu. Hivyo aliogopa kwamba huenda angekufa.

2. Kwa nini tunahitaji kujitahidi kushinda woga wetu?

² Je, umewahi kuwa na woga kama huo? Wengi wetu tumewahi. Ikiwa hatutajifunza jinsi ya kudhibiti woga wetu, inaelekea tutafanya maamuzi mabaya ambayo huenda yataharibu uhusiano wetu na Yehova. Hivyo ndivyo Shetani anavyotaka. Pia, anajaribu kutumia woga wetu ili kutufanya tukose kutii sheria za Yehova, kutia ndani amri ya kuhubiri habari njema. (Ufu. 12:17) Shetani ni mwovu, mkatili, na ana nguvu. Lakini unaweza kujilinda dhidi yake. Jinsi gani?

3. Ni nini kitakachotusaidia kushinda woga wetu?

³ Tunaposadiki kwamba Yehova anatupenda, yaani, yuko upande wetu, tunaweza kushinda jitihada za Shetani. (Zab. 118:6) Kwa mfano, mwandikaji wa Zaburi ya 118 alikabili hali fulani ngumu sana. Alikuwa na maadui wengi, kutia ndani baadhi ya watu mashuhuri (mstari wa 9, 10). Nyakati fulani, alikabili mkazo mkubwa (mstari wa 13). Na alikuwa amepata nidhamu kali kutoka kwa Yehova (mstari wa 18). Hata hivyo, mtunga zaburi huyo alichochewa kuimba hivi: “Sitaogopa.” Ni nini kilichomfanya ahisi yuko salama kabisa? Alijua kwamba ingawa Yehova alikuwa amemtia nidhamu, Baba yake wa mbinguni alimpenda sana. Mtunga zaburi huyo alisadiki kwamba hata akikabili hali gani, sikuzote Mungu wake mwenye upendo angekuwa tayari kumsaidia.​—Zab. 118:29.

4. Tunaweza kushinda woga gani ikiwa tunaamini kwamba Mungu anatupenda?

⁴ Tunapaswa kusadiki kwamba Yehova anatupenda kibinafsi. Usadikisho huo utatusaidia kushinda mambo matatu ambayo watu huogopa kwa ukawaida, nayo ni (1) kuogopa kwamba hatutaweza kuiandalia familia yetu, (2) kuogopa wanadamu, na (3) kuogopa kifo. Watu waliotajwa katika fungu la kwanza, waliweza kushinda woga wao kwa sababu walisadiki kwamba Mungu anawapenda.

KUOGOPA KWAMBA HATUTAWEZA KUIANDALIA FAMILIA YETU

5. Huenda kichwa cha familia akahangaishwa na mambo gani? (Tazama picha kwenye jalada.)

⁵ Kichwa cha familia Mkristo anachukua kwa uzito jukumu la kuiandalia familia yake mahitaji ya kimwili. (1 Tim. 5:8) Ikiwa wewe ni kichwa cha familia, labda wakati wa janga la Covid-19 kulikuwa na uwezekano kwamba ungepoteza kazi yako. Huenda ulikuwa na wasiwasi kwamba hutaweza kuiandalia familia yako chakula na kulipa kodi ya nyumba. Huenda pia ulihofu kwamba ikiwa ungepoteza kazi yako, hungeweza kupata kazi nyingine. Au kama Nestor na María waliotajwa awali, huenda ulisita kufanya mabadiliko katika kazi yako ili uishi maisha rahisi. Shetani amefaulu sana kuwafanya watu walemewe na woga kama huo.

6. Shetani anajaribu kutufanya tuamini nini?

⁶ Shetani anajaribu kutufanya tuamini kwamba Yehova hatujali sisi binafsi na kwamba hatatusaidia inapohusu kuiandalia familia yetu. Matokeo ni kwamba huenda tukafikia mkataa kuwa tunahitaji kufanya jambo lolote lile ili tusipoteze kazi yetu, hata ikiwa itamaanisha kupuuza kanuni za Maandiko.

7. Yesu anatuhakikishia jambo gani?

⁷ Yesu anamfahamu Baba kuliko mtu mwingine yeyote anavyomfahamu, hivyo anatuhakikishia kwamba Mungu wetu ‘anajua kile tunachohitaji hata kabla hatujamwomba.’ (Mt. 6:8) Na Yesu anajua kwamba Yehova yuko tayari kutuandalia mahitaji yetu. Tukiwa Wakristo, sisi ni washiriki wa familia ya Mungu. Kwa kuwa Yehova ni Kichwa cha familia, tunaweza kuwa na uhakika kwamba atatenda kulingana na kanuni aliyoongoza iandikwe kwenye 1 Timotheo 5:8.

8. (a) Ni nini kinachoweza kutusaidia tusiogope kwamba hatutaweza kuiandalia familia yetu? (Mathayo 6:31-33) (b) Tunaweza kuigaje mfano wa wenzi wa ndoa kwenye picha wanaompelekea chakula dada fulani?

⁸ Tunaposadiki kwamba Yehova anatupenda na anaipenda familia yetu, tutakuwa na uhakika kwamba atatuandalia vitu tunavyohitaji. (Soma Mathayo 6:31-33.) Yehova anataka kutuandalia mahitaji yetu, naye anatuandalia kwa ukarimu na upendo sana! Alipoiumba dunia, hakutupatia tu vitu vya msingi vinavyotusaidia tuendelee kuwa hai. Kwa upendo aliijaza dunia vitu ambavyo vinatuletea furaha sana. (Mwa. 2:9) Hata ikiwa nyakati nyingine tunapata mahitaji ya msingi tu, ni vema kukukumbuka kwamba angalau tumepata mahitaji hayo msingi. Yehova hajashindwa kutuandalia mahitaji yetu. (Mt. 6:11) Tunapaswa kukumbuka kwamba vitu vyote vya kimwili tunavyojinyima sasa, haviwezi kulinganishwa na mambo ambayo Mungu wetu mwenye upendo atatuandalia sasa na wakati ujao. Hilo ndilo jambo ambalo Nestor na María walikuja kutambua.​—Isa. 65:21, 22.

9. Unajifunza nini kutokana na mfano wa Nestor na María?

⁹ Nestor na María waliishi maisha mazuri huko Kolombia. Walisema hivi: “Tulifikiria kurahisisha maisha na kupanua huduma yetu, lakini tulihofu kwamba hatungekuwa na furaha ikiwa tungerahisisha maisha yetu.” Ni nini kilichowasaidia kushinda woga wao? Walitafakari njia nyingi ambazo Yehova alikuwa amewaonyesha upendo. Wakiwa wamesadiki kwamba sikuzote Yehova atawatunza, waliacha kazi zao zenye mshahara mnono. Waliuza nyumba yao na kuhamia katika eneo la nchi yao ambalo lilikuwa na uhitaji mkubwa wa wahubiri wa Ufalme. Wanahisije kuhusu uamuzi wao? Nestor anasema hivi: “Tumejionea ukweli wa Mathayo 6:33. Hatujakosa kamwe mahitaji yoyote ya kimwili. Na sasa tuna furaha zaidi maishani.”

KUOGOPA WANADAMU

10. Ni sababu gani zinazofanya wanadamu wawaogope wanadamu wenzao?

¹⁰ Tangu zamani, wanadamu wamekuwa wakiumizana wenyewe kwa wenyewe. (Mhu. 8:9) Kwa mfano, watu wanatumia vibaya mamlaka yao, wahalifu wanafanya vitendo vya ukatili, wanafunzi wenye jeuri huwanyanyasa na kuwatisha wanafunzi wenzao shuleni, na hata baadhi ya watu wanawatendea watu wa familia zao kwa ukatili. Ndiyo sababu wanadamu wanawaogopa wanadamu wenzao! Shetani anajaribu jinsi gani kufanya tulemewe na woga wa wanadamu?

11-12. Shetani anatumiaje woga wa wanadamu dhidi yetu?

¹¹ Shetani anatumia woga wa wanadamu kujaribu kutufanya tulegeze msimamo wetu na tuache kuhubiri. Shetani amezishawishi serikali zipige marufuku kazi yetu na kututesa. (Luka 21:12; Ufu. 2:10) Katika ulimwengu wa Shetani, watu wengi wanaeneza habari zisizo za kweli na uwongo mbaya sana kuhusu Mashahidi wa Yehova. Watu wanaoamini uwongo huo huenda wakatudhihaki au hata kutushambulia. (Mt. 10:36) Je, tunashangazwa na mbinu za Shetani? Hatushangai. Tayari alikuwa akizitumia katika karne ya kwanza.​—Mdo. 5:27, 28, 40.

¹² Kuogopa upinzani kutoka kwa serikali, si silaha pekee ambayo Shetani anatumia. Baadhi ya watu wanaogopa zaidi jinsi watu wa familia watakavyowaona baada ya kujifunza kweli, kuliko wanavyoogopa kuumizwa kimwili. Wanawapenda sana watu wa familia zao na wangependa wao pia wamjue na kumpenda Yehova. Wanaumia sana watu wa familia zao wanaposema mambo mabaya kumhusu Mungu wa kweli na waabudu wake. Hata hivyo, katika visa fulani watu hao wa ukoo ambao mwanzoni waliwapinga, baadaye walijifunza kweli. Lakini namna gani ikiwa watu wa ukoo wanakatisha kabisa uhusiano nasi kwa sababu ya imani yetu mpya? Tutatendaje?

13. Kuwa na uhakika kwamba Mungu anatupenda kunatusaidiaje watu wa familia wanapotutenga? (Zaburi 27:10)

¹³ Tunafarijiwa na kweli nzuri sana inayotajwa kwenye Zaburi 27:10. (Soma.) Tunapokumbuka jinsi Yehova anavyotupenda sana, tunahisi tukiwa salama hata tunapokabili upinzani. Na tuna uhakika kwamba atatuthawabisha kwa sababu ya uvumilivu wetu. Yehova atatutimizia mahitaji yetu ya kimwili, kihisia, na kiroho kwa njia bora zaidi kuliko mtu mwingine yeyote! Biniam, aliyetajwa awali, alitambua jambo hilo.

14. Tunaweza kujifunza nini kutokana na mfano wa Biniam?

¹⁴ Biniam aliamua kuwa Shahidi wa Yehova ingawa alijua kwamba angekabili mateso makali. Fikiria jinsi kujua kwamba Yehova anampenda, kulivyomsaidia kushinda woga wa wanadamu. Anasema hivi: “Kwa kweli niliteswa sana. Lakini jambo nililoogopa zaidi kuliko kuteswa na serikali, ni upinzani kutoka kwa familia yangu. Niliogopa kwamba uamuzi wangu wa kuwa Shahidi wa Yehova ungemvunja moyo baba yangu ambaye hakuwa Shahidi na kwamba familia yangu ingefikiri nimepoteza mwelekeo.” Hata hivyo, Biniam alisadiki kwamba sikuzote Yehova huwatunza wale anaowapenda. Biniam anaeleza hivi: “Nilitafakari jinsi Yehova alivyowasaidia wengine kuvumilia matatizo ya kiuchumi, ubaguzi, na kushambuliwa na umati. Nilijua kwamba ikiwa ningeshikamana na Yehova, angenibariki. Nilipokamatwa mara nyingi na hata kuteswa sana, nilijionea moja kwa moja jinsi Yehova anavyotusaidia sana tunapohitaji msaada na ikiwa tunaendelea kuwa waaminifu.” Yehova alikuwa Baba halisi kwa Biniam, na watumishi wa Yehova walithibitika kuwa familia ya kweli kwa Biniam.

KUOGOPA KIFO

15. Kwa nini ni jambo la kawaida kuogopa kifo?

¹⁵ Biblia inasema kwamba kifo ni adui. (1 Kor. 15:25, 26) Huenda tukahangaishwa tunapokabili kifo, hasa ikiwa sisi au mpendwa wetu ana ugonjwa mbaya sana. Kwa nini tunaogopa kufa? Kwa sababu Yehova alituumba tukiwa na tamaa ya kufurahia kuishi milele. (Mhu. 3:11) Woga unaofaa kuhusu kifo unaweza kulinda uhai wetu. Kwa mfano, unaweza kutuchochea kufanya maamuzi mazuri inapohusu kula chakula chenye afya, kuwa na ratiba ya kufanya mazoezi, kutafuta msaada wa madaktari na tiba inapohitajika, na kuepuka kuhatarisha uhai wetu isivyo lazima.

16. Shetani anajaribu jinsi gani kutumia vibaya woga wetu wa asili kuelekea kifo?

¹⁶ Shetani anajua kwamba tunafurahia kuishi. Hata hivyo, anadai kwamba tutadhabihu kila kitu tulicho nacho, hata uhusiano wetu pamoja na Yehova, ili tu tuendelee kuwa hai. (Ayu. 2:4, 5) Amekosea sana! Kwa kuwa yeye ndiye “aliye na uwezo wa kusababisha kifo,” anajaribu kutumia vibaya woga wetu wa asili kuelekea kifo ili kutufanya tumwache Yehova. (Ebr. 2:14, 15) Katika visa fulani, baadhi ya watu wanaotumiwa na Shetani, wanatishia kuwaua waabudu wa Yehova ikiwa hawatakana imani yao. Katika visa vingine, huenda Shetani akatumia ugonjwa unaohatarisha uhai kujaribu kufanya tulegeze msimamo wetu. Madaktari au watu wa familia wasio Mashahidi, huenda wakatushinikiza tukubali kutiwa damu mishipani, jambo ambalo litavunja sheria ya Mungu. Au huenda mtu fulani akajaribu kutushawishi tufikirie matibabu mengine ambayo ni kinyume na kanuni za Maandiko.

17. Kulingana na Waroma 8:37-39, kwa nini hatupaswi kuogopa kifo?

¹⁷ Ingawa hatutaki kufa, tunajua kwamba Yehova hataacha kutupenda hata tukifa. (Soma Waroma 8:37-39.) Marafiki wa Yehova wanapokufa, anawaweka katika kumbukumbu yake, kana kwamba wako hai. (Luka 20:37, 38) Anatamani kuwafufua. (Ayu. 14:15) Yehova amelipa bei kubwa sana ‘ili tuwe na uzima wa milele.’ (Yoh. 3:16) Tunajua jinsi Yehova anavyotupenda sana na kutujali. Hivyo, badala ya kumwacha Yehova tunapokuwa wagonjwa au kukabili kifo, tunamtegemea ili kupata faraja, hekima, na nguvu. Hivyo ndivyo Valérie na mume wake walivyofanya.​—Zab. 41:3.

18. Unaweza kujifunza nini kutokana na mfano wa Valérie?

¹⁸ Alipokuwa na umri wa miaka 35, Valérie aligunduliwa kwamba alikuwa na aina fulani mbaya sana ya kansa. Fikiria jinsi upendo ulivyomsaidia kushinda woga wa kifo. Anasema hivi: “Siku nilipogunduliwa kwamba nina ugonjwa huo, maisha yetu yalibadilika sana. Nilihitaji kufanyiwa upasuaji mkubwa ili nipone. Nilizungumza na madaktari wengi, lakini wote walikataa kunifanyia upasuaji bila damu. Niliogopa, lakini nilitii amri ya Mungu, na nisingekubali kamwe kutiwa damu mishipani. Katika maisha yangu yote, Yehova alikuwa amenionyesha upendo mwingi sana, sasa nilikuwa na fursa ya kumwonyesha upendo wa kweli. Kila mara nilipopata habari mbaya, niliazimia hata zaidi kumfurahisha Yehova na nisingekubali Shetani ashinde. Hatimaye, nilifaulu kufanyiwa upasuaji bila damu. Ingawa bado nina matatizo ya kiafya, sikuzote Yehova ametuandalia mahitaji yetu. Kwa mfano, katika mkutano wa kutaniko wa mwisho wa juma kabla ya kugunduliwa na ugonjwa huo, tulijifunza makala ‘Kukabiliana na Matatizo ya Leo kwa Ujasiri.’c Makala hiyo ilitufariji sana. Tuliisoma tena na tena. Makala kama hizo na ratiba nzuri ya kiroho, imenipatia mimi na mume wangu amani ya moyoni na imetusaidia kuwa na usawaziko na kufanya maamuzi mazuri.”

KUSHINDA WOGA WETU

19. Ni nini kitakachotokea hivi karibuni?

¹⁹ Kwa msaada wa Yehova, Wakristo ulimwenguni pote wameshinda changamoto mbalimbali na wamefaulu kumpinga Ibilisi. (1 Pet. 5:8, 9) Wewe pia unaweza kufaulu. Hivi karibuni, Yehova atamwagiza Yesu na watawala wenzake ‘wazivunje kazi za Ibilisi.’ (1 Yoh. 3:8) Baada ya hapo, watumishi wa Mungu walio duniani ‘hawataogopa chochote na hawatakuwa na sababu yoyote ya kuhofu.’ (Isa. 54:14; Mika 4:4) Hata hivyo, kabla ya wakati huo kufika, tunahitaji kuendelea kujitahidi sana kushinda woga wetu.

20. Ni nini kitakachotusaidia kushinda woga wetu?

²⁰ Ni lazima tuendelee kuimarisha uhakika wetu kwamba Yehova anawapenda na kuwalinda watumishi wake. Tutafaulu kufanya hivyo kwa kutafakari na kuzungumzia jinsi Yehova alivyowalinda watumishi wake zamani. Na tunaweza kukumbuka jinsi ambavyo ametusaidia sisi binafsi kukabiliana na hali zenye kutaabisha. Kwa msaada wa Yehova, tunaweza kushinda woga wetu!​—Zab. 34:4.