¿Bin-utʼil ya skoltayotik te Jehová yuʼun ya xkujch kuʼuntik?

1. ¿Bin yuʼun ya skʼan ya xkujch kuʼuntik sok bin koltayel ay kuʼuntik? (1 Pedro 5:10).

AYOTIK ta kuxinel ta jun tiempo te banti bayal wokolil, ta jpisiltik ay bayal jproblematik. Ay machʼatik tsakbilik ta chamel te maʼyuk spoxil, ay yantik te ay machʼa lajem yuʼunik sok ay yantik te ya xkontrainot yuʼun te sfamiliaik o te ajwalil ta snacionik (Mat. 10:18, 36, 37). Jaʼ yuʼun ya skʼan te ya xkujch kuʼuntik, sok ya xjuʼ te seguro ayotik te ya skoltay Jehová spisil te j-abatetik yuʼun swenta ya xkujch yuʼunik, tey ochem akʼoplal-euk-a (kʼopona 1 Pedro 5:10).

2. ¿Bin-utʼil ya xkujch kuʼuntik te bitʼil j-abatotik yuʼun Jehová?

² Te ya xkujch kuʼuntik ya skʼan ya yal te maba ya jkom jbatik sok te ma xchʼay ta koʼtantik te smukʼul koʼtantik chikan bin ya jsitintaytik, te kontrainel, te wokoliletik sok te pruebaetik. ¿Bin-utʼil ya xkujch kuʼuntik te bitʼil j-abatotik yuʼun Jehová? Ma jaʼuk ta swenta kiptik, jaʼ ta swenta te kiptik te talem ta stojol te Dios (2 Cor. 4:7). Ta artículo ini ya xbajt kiltik chanchajp te koltayel yakʼojbotik te Jehová yuʼun ya xkujch kuʼuntik sok bin-utʼil ya jtuuntestik ta lek ta jujunchajp.

TE SKʼOPONEL DIOS

3. ¿Bin yuʼun ya xjuʼ ya kaltik te jaʼ jun mukʼul majtanil te ya xjuʼ ya jkʼopontik te Jehová?

³ Te Jehová yakʼojbotik jun lekil koltayel yuʼun ya xkujch kuʼuntik. Manchukme jmulawilotik yakʼoj te ya xjuʼ ya jkʼopontik (Heb. 4:16). Jnop kaʼiytik te bin smakbeyoj skʼoplal: ya xjuʼ ya jkʼopontik te Jehová chikan biluk-ora, chikan bin ya kalbeytik, ta yanyantik kʼopiletik sok chikan banti ayotik, manchukme namal ayotik o ayotik ta chukojibal (Jon. 2:1, 2; Hech. 16:25, 26). Te Jehová ya xkʼot ta yoʼtan te bin yaʼiyel ya kaʼiy jbatik ta swenta te tulan mel-oʼtan, manchukme wokol ya kaʼiytik yalbeyel (Rom. 8:26, 27). ¿Mabal jichuk te jaʼ mukʼul majtanil te ya xjuʼ ya jkʼopontike?

4. ¿Bin yuʼun lek te ya jkʼanbeytik koltayel te Jehová yuʼun ya xkujch kuʼuntik?

⁴ Ta Biblia te Jehová jamal ya yalbotik te «ya xjuʼ ya jkʼanbeytik chikan bin-a, jaʼnax teme jun ay sok te skʼanojel yoʼtane, yame yaʼiybotik te jkʼoptike» (1 Juan 5:14). Jaʼ yuʼun, ¿lekbal teme ya jkʼanbeytik koltayel yuʼun ya xkujch kuʼuntik? Lek, melel snitojbey sba skʼoplal sok te skʼanojel yoʼtane. ¿Bin-utʼil ya jnaʼtik? Melel te Biblia ya yal te kʼalal ya xkujch kuʼuntik te pruebaetik, te Jehová jich ya sutbey skʼop te Satanás (Prov. 27:11). Jaʼnix jich ya yal te ya skʼan «ya yakʼbey yil te yuʼel ta skoltayel te machʼatik jun yoʼtan yakik ta abatinel ta stojole» (2 Crón. 16:9). Jaʼ yuʼun ya xjuʼ ya schʼuun koʼtantik te Jehová ya skʼan sok ya xjuʼ ya skoltayotik yuʼun ya xkujch kuʼuntik (Is. 30:18; 41:10; Luc. 11:13).

5. ¿Bin-utʼil ya skoltayotik te oración ta stael te lamalkʼinal? (Isaías 26:3).

⁵ Te Biblia ya stijbey yoʼtan te j-abatetik yuʼun Jehová te yakuk yalbeyik te bin ya smel yoʼtanik yuʼun sok jich «te lamalkʼinal te ya yakʼ te Dios te kʼax mukʼ, te maʼyuk jtuluk ants winik te ya xjuʼ ya xkʼot ta yoʼtan, jaʼme ya skanantaybeyex te awoʼtanik sok te snopojibal awuʼunik» (Filip. 4:7). ¡Ya kaltik bayal wokol yuʼun! Te ants winiketik te ma x-abatinik ta stojol te Jehová ya xkʼax bayal swokolik sok bayal bin ya spasik yuʼun yakuk staik lamalkʼinal. Pero, ma spaj te lamalkʼinal ya yakʼbotik te Jehová kʼalal ya jkʼopontik. Melel te kʼalal ya jkʼopontik ya smukʼulin koʼtantik ta jkʼaxel te ya skanantay te jpensartik sok te koʼtantik kʼalal ya yakʼbotik spisil-ora te lamalkʼinal (kʼopona Isaías 26:3). ¿Bin-utʼil ya spas? Jun jaʼ te kʼalal ya sjultes ta koʼtantik textoetik te ya yakʼ ta ilel te kʼuxotik ta yoʼtan sok te ya skʼan ya skoltayotik (Sal. 62:1, 2).

6. ¿Bin ya xjuʼ ya jkʼanbeytik te Jehová te kʼalal ya jkʼopontike? (Jaʼnix jich ilawil te foto).

⁶ ¿Bin-utʼil ya jtuuntestik ta lek te koltayel ini? Kʼalal ya jsitintaytik tulan wokoliletik, jkʼopontik te Jehová yuʼun ya kakʼbeytik jilel ta skʼab te jwokoltik, jkʼanbeytik lamalkʼinal sok spʼijil koʼtantik yuʼun ya jnaʼtik bin ya jpastik (Sal. 55:22; Prov. 2:10, 11). Mame jaʼuknax ya jkʼanbeytik koltayel yuʼun ya xkujch kuʼuntik, jaʼnix jich ya skʼan ya kalbeytik wokol yuʼun (Filip. 4:6). Ayuk ta koʼtantik stael ta ilel te bin-utʼil ya skoltayotik ta yorail wokol sok akʼa kalbeytik wokol ta swenta te ya skoltayotike. Mame xkakʼ smakotik ta yilel te bendicionetik te ya yakʼbotik te Jehová te wokoliletik ya jsitintaytike (Sal. 16:5, 6).

TE BIBLIA

7. ¿Bin-utʼil ya skoltayotik te snopel te Biblia yuʼun ya xkujch kuʼuntik?

⁷ Te Jehová yakʼojbotik te Biblia yuʼun ya skoltayotik yuʼun ya xkujch kuʼuntik. Tey-a ya jtatik bayal relatoetik te ya yakʼ jnaʼtik te ya skoltayotik te Jehová. Kiltik jun ejemplo, ta Mateo 6:8 jich ya yal: «Te aTatik te ay ta chʼulchan snaʼojix-a te bin ya xtuun awuʼunik te kʼalal mato akʼanojbeyik-ae». Te kʼopetik ini jaʼ la yal te Jesús, jaʼ te machʼa ya snaʼbey sba ta lek te Jehová. Jaʼ yuʼun, kʼalal ya xkʼax jwokoltik ya skʼan ya schʼuun koʼtantik te ya snaʼ te bin ya xtuun kuʼuntik te Jehová sok te ya skoltayotik. Te Jehová ay bintik tʼujbil sjapojbotik te yakʼoj ta tsʼibayel ta Biblia te ya yakʼ kiptik yuʼun ya xkujch kuʼuntik (Sal. 94:19).

8. 1) Ala junuk mantalil te ya skoltayotik yuʼun ya xkujch kuʼuntik. 2) ¿Bin ya skoltayotik yuʼun ya jultes ta koʼtantik te mantaliletik te ay ta Biblia te kʼalal ya xtuun kuʼuntik?

⁸ Te Biblia jaʼnix jich yichʼoj mantaliletik te ya skoltayotik yuʼun ya xkujch kuʼuntik. Te mantaliletik ini, ay bin lek ya yakʼ jnoptik te ya skoltayotik yuʼun lekuk te bin ya jtatik ta nopel spasel (Prov. 2:6, 7). Jich bitʼil, te Biblia ya stij koʼtantik yuʼun manchuk jaʼ ya xbajt ta koʼtantik snopilanel te bin ya xkʼot ta pasel ta pajel chaʼbej, te jaʼuknax ya kakʼ ta koʼtantik te bin ya xkʼax ta jujun kʼajkʼal (Mat. 6:34). Teme ya jkʼaytes jbatik ta skʼoponel te Biblia sok te ya jnopilan ta koʼtantik, maba wokol ya kaʼiytik sjultesel ta koʼtantik te mantaliletik te ya skoltayotik ta jujunchajp te bin ya xkʼax ta jtojoltike.

9. ¿Bin ya xlokʼ kuʼuntik-a teme ya jnopilan ta koʼtantik te relatoetik te ay ta Biblia?

⁹ Jaʼnix jich, te Biblia yichʼoj relatoetik te ya yalbey skʼoplal ants winiketik te la smukʼulin yoʼtanik te Jehová sok te la yichʼik koltayel (Heb. 11:32-34; Sant. 5:17). Kʼalal ya jnopilan ta koʼtantik te relatoetik-abi, ya yichʼ yip te smukʼul koʼtantik ta stojol te Jehová, te «ha ahnibal cuʼuntic soc ha quiptic, ha ya scoltayotic ta ora te cʼalal ay jwocoltic» (Sal. 46:1). Teme ya kiltik te schʼuunel yoʼtanik te j-abatetik yuʼun Dios ta namey sok te bitʼil kujch yuʼunik, ya stij koʼtantik yuʼun ya jkʼayinbeytik te ejemplo yuʼunik (Sant. 5:10, 11).

10. ¿Bin ya skʼan ya jpastik yuʼun ya skoltayotik te bin ya jnoptik ta Biblia?

¹⁰ ¿Bin-utʼil ya jtuuntestik ta lek te koltayel ini? Jkʼopontik te Biblia ta jujun kʼajkʼal sok kakʼtik ta jun lista textoetik te ya xjuʼ ya skoltayotik. Bayal hermanoetik ya skʼoponik ta jujun sab te texto yuʼun jujun kʼajkʼal, melel jich ya yaʼiyik te jaʼ ya xkoltayotik yuʼun ay stseʼelil yoʼtanik ta sjunal kʼajkʼal. Jaʼ te bin kʼax ta stojol jtul hermana te Mariea sbiil. Te smama sok te spapa la yichʼik albeyel te yichʼojik cáncer, jaʼ yuʼun te Marie la skanantay te smeʼ stat te jayebxan u kuxinike. Te Marie ya yal te bin koltayot yuʼun ya xkujch yuʼun: «Ta jujun sab kʼayemon-a te ya jkʼopon te folleto Nopa te sKʼop Dios sok ya jnopilan ta koʼtan. Jaʼ te bin la skoltayon yuʼun jaʼuk la kakʼ ta koʼtan te Jehová sok te bintik tʼujbil ya yal ta Biblia swenta ma jaʼuk bajt ta koʼtan snopilanel te wokoliletik te yak ta kʼaxel ta jtojol-ae» (Sal. 61:2).

TE HERMANOETIK

11. ¿Bin-utʼil ya skoltayotik te ejemplo yuʼun te hermanoetik kʼalal ya xkujch yuʼunik te swokolike?

¹¹ Te Jehová yakʼojbotik hermanoetik ta swolol Balumilal yuʼun ya skoltayotik swenta ya xkujch kuʼuntik. Snaʼel te pajal yak ta kʼaxel jwokoltik sok te hermanoetik te ayik ta swolol Balumilal, ya yakʼ smukʼul kʼinal kaʼiytik (1 Ped. 5:9). ¿Bin yuʼun? Melel kʼalal ya kiltik te ya sitintayik wokoliletik te pajalik te bitʼil ya xkʼax ta jtojoltik sok te ya xkujch yuʼunik, ya yakʼ schʼuun koʼtantik te jaʼnix jich ya xkujch kuʼuntik biluk pruebaetik te ya xkʼax ta jkuxlejaltik (Hech. 14:22).

12. ¿Bin ya xjuʼ ya jpastik ta stojol te yantike? (2 Corintios 1:3, 4).

¹² Te kermanotaktik bayal bin-utʼil ya xjuʼ ya skoltayotik. Te jpuk-kʼop Pablo la sta ta ilel te yuʼun-nix jich-a. Kʼalal chukul ta sna-a te Pablo bayal bintik-utʼil la yichʼ koltayel yuʼun te hermanoetik. Ta cartaetik te la stsʼibay tey la yaltiklanbey sbiil-a sok la yaltiklanbey wokol te bitʼil akʼbot smukʼul kʼinal yaʼiy sok yip yoʼtan (Filip. 2:25, 29, 30; Col. 4:10, 11). Ta ora ini te hermanoetik jaʼnix jich ya skoltayotik yuʼun ya xkujch kuʼuntik sok jaʼnix jich ya xjuʼ ya jkoltaytik-euk te machʼatik ya xtuun yuʼunik (kʼopona 2 Corintios 1:3, 4).

13. ¿Bin koltayot yuʼun te Maya yuʼun ya xkujch yuʼun te swokole?

¹³ Kiltik te bin kʼax ta stojol jtul hermana te kuxinem ta Rusia te Maya sbiil. Ta 2020, chaʼoxtul policiaetik ochik ta sna. Ta patil, te Maya la yichʼ ichʼel ta kʼop ta swentanax te la yalbey yantik te bin schʼuunoj. ¿Bin-utʼil koltayot yuʼun te hermanoetik? Te hermana jich la yal: «Ta jun buelta te kʼalal jich ya kaʼiy te ma xjuʼix kuʼun-a, te hermanoetik la skʼopononik ta teléfono, la stikunbonik mensaje sok cartaetik te banti ya yalbonik te kʼuxon ta yoʼtanik». Jich la yalxan: «Spisil-ora jnaʼoj te ayon ta jun mukʼul familia te ay skʼuxul yoʼtanik, pero jaʼto tal ta jaʼbil 2020 ta swenta te bin kʼax ta jkuxlejal la kil te yuʼun-nix jich-a».

14. ¿Bin ya skʼan ya jpastik yuʼun ya jta jlekilaltik ta swenta te koltayel yuʼun te hermanoetik? (Jaʼnix jich ilawil te foto).

¹⁴ ¿Bin-utʼil ya jtuuntestik ta lek te koltayel ini? Kʼalal ya xkʼaxotik ta wokoliletik mame xnamajotik ta stojol te kermanotaktik. Juluk ta koʼtantik te spisil-ora ya xjuʼ ya jkʼanbeytik koltayel te ancianoetik, te jich kʼoemik bitʼil «ahnibal yuʼun te tulan icʼ te ya smac te tulan yicʼal haʼal» (Is. 32:2). Mame xchʼay ta koʼtantik te jaʼnix jich te kermanotaktik ya sitintayik bayal wokoliletik. Teme ay bin lek ya jpastik ta stojol te machʼa ya xtuun yuʼun, ya skoltayotik yuʼun ma jaʼuk ya xbajt ta koʼtantik snopilanel te jwokoltik sok ya skoltayotik yuʼun ya xkujch kuʼuntik biluk pruebaetik te ya xkʼax ta jtojoltik (Hech. 20:35).

TE SMUKʼUL KOʼTANTIK

15. ¿Bin-utʼil koltayot te Jesús te smukʼul yoʼtan sok bin-utʼil ya skoltayotik-euk? (Hebreos 12:2).

¹⁵ Te Jehová ay bin ya yakʼ jmaliytik ta pajel chaʼbej te ya skoltayotik yuʼun ya xkujch kuʼuntik (Rom. 15:13). Juluk ta koʼtantik te Jesús kujch yuʼun te tulan wokolil te la sitintay ta Balumilal ta swenta te ay bin la smaliye (kʼopona Hebreos 12:2). Snaʼoj-a teme jun yoʼtan ya yakʼ sba jich ya skoltaybey skʼoplal te sbiil te Jehová. Jaʼnix jich ya skʼan-a te ya schaʼjokin te sTat ta chʼulchan sok te ya smaliy te ya sta yorail te ya xjajch ta wentainwanej sok te machʼatik tsabilik yuʼun ya xbajtik ta chʼulchan. Pajal kʼoem sok te smukʼul koʼtantik ta swenta te ya xkuxinotik ta sbajtelkʼinal ta jun nichimal kʼinal ya skoltayotik yuʼun ya xkujch kuʼuntik biluk wokolil te ya jsitintaytik ta balumilal yuʼun te Satanás.

16. ¿Bin-utʼil koltayot jtul hermana te smukʼul koʼtantik sok bin ya yakʼbat anop te bin la yale?

¹⁶ Te bitʼil ay smukʼul koʼtantik ta swenta te kuxinel ta sbajtelkʼinal jaʼ koltaybil yuʼun jtul hermana te Alla sbiil, te kuxinem ta Rusia. Kʼalal te smamalal la yichʼ tsakel bael sok la yichʼ otsesel ta chukojibal, jich la yal te hermana: «Te bin la skoltayon yuʼun maba ya xchebaj koʼtan jaʼ te la jkʼopon Dios sok te la jnopilan ta koʼtan te tʼujbil majtanil te ya jmaliytik ta pajel chaʼbej. Jnaʼoj te ya xlaj skʼoplal te wokoliletik ini. Te Jehová ya yaʼiy tsalaw, soknix te joʼotike».

17. ¿Bin-utʼil ya kakʼtik ta ilel te mukʼ skʼoplal ta koʼtantik te bin ya jmaliytik ta pajel chaʼbej? (Jaʼnix jich ilawil te foto).

¹⁷ ¿Bin-utʼil ya jtuuntestik ta lek te koltayel ini? Jlokʼes jtiempotik yuʼun ya jnopilan ta koʼtantik te bin tʼujbil sjapojbotik te Jehová te ya xbajt spas ta pajel chaʼbej. Jnop kaʼiytik te ayotikix ta achʼ balumilal sok te yakotikix ta smulanel te bendicionetik te ya xbajt yakʼbotik te Jehová. Kʼalal jich ya jpastik, te wokoliletik te ya xkʼax kuʼuntik ta ora ini jich ya kiltik te «jkʼaxelnax ay» (2 Cor. 4:17). Jaʼnix jich jpastik tulan yuʼun ya kalbeytik yantik ta swenta te bin jchʼuunojtike. ¿Yabal xkʼot ta koʼtantik te wokolil ya sitintayik te ants winiketik ta balumilal yuʼun te Satanás te ma snaʼik ta swenta te bin ya xbajt spas te Jehová ta pajel chaʼbej? Manchukme jun-nax buelta ya xkʼopojotik sok te ants winiketik ya xjuʼ ya jtijbeytik yoʼtan yuʼun ya skʼan ya snaʼik ta swenta te bin sjapoj te Jehová ta pajel chaʼbej.

18. ¿Bin yuʼun ya xjuʼ ya smukʼulin koʼtantik te bin jamal yalojbotik te Jehová?

¹⁸ Kʼalal te Job jun yoʼtan kujchemix yuʼun-a te wokoliletik, jich la yalbey te Jehová: «Ya jnaʼ te spisil ya xhuʼ awuʼun, soc te ma xhuʼ ta comel te bin anopoje» (Job 42:2). Te Job kʼot ta yoʼtan te maʼyuk bin ya xmakot te Jehová yuʼun ya skʼotes ta pasel te bin jamal yaloj. Te kʼalal jich ya xkʼot ta koʼtantik ya skoltayotik yuʼun ya xkujch kuʼuntik. Kʼaltik jun ejemplo, jnop kaʼiytik te jtul ants yichʼoj tulan chamel sok chebajem yoʼtan, melel ay baemix ta stojol bayal doctoretik sok maʼyuk machʼa juʼem yuʼun skoltayel te antse. Ta jun buelta ya sta jtul doctor te pʼijuben ta lek sok ya snaʼ te bin chamelil yichʼoj sok ya x-albot te ya xpoxtayote. Manchukme ayto ta chamel, lek ya yaʼiy sba sok maba wokol ya yaʼiy te ya xkujch yuʼun, melel ya snaʼ te ya sta spoxil sok te ya xlekub. Jaʼnix jich kʼoem kʼalal ya jnaʼtik te ya xkʼot ta pasel te nichimal kʼinal ya yakʼ kiptik yuʼun ya xkuj kuʼuntik te wokoliletik.

19. ¿Bin koltayel ay kuʼuntik yuʼun ya xkujch kuʼuntik biluk wokolil?

¹⁹ Jich te bin-utʼil la jnoptikix yuʼun ya xkujch kuʼuntik te Jehová yakʼojbotik te Biblia, te ya xjuʼ ya jkʼopontik, te hermanoetik sok te bin ya jmaliytik ta pajel chaʼbej. Teme ya jpastik tulan ta stuuntesel ta lek te majtaniletik-abi, ya skoltayotik yuʼun ya jsitintaytik te wokoliletik jaʼto te kʼalal ya yichʼ lajinel te balumilal yuʼun te Satanás sok te wokoliletik (Filip. 4:13).