Jeremias
2 La skʼoponun tal li Jeovae, xi laj yalbune: 2 «Batan, xi xbat avalbe ta xchikin li Jerusalene: ‹Xi chal li Jeovae:
«Xvul lek ta jol ti kʼu yelan laj avakʼ ta ilel ta atsebal li tukʼil kʼanelale,+
li kʼanelal laj avakʼbun ta ilel kʼalal laj avakʼ ave ti chijnupune,+
ti la atsʼakliun batel ta takixokol balumile,
ta jsep osil ti muʼyuk kʼusi tsʼunbile.+
3 Chʼul toʼox ilat yuʼun Jeova li Israele,+ li sba sat stsʼunobe»›.
‹Buchʼuuk noʼox ti oy kʼusi chopol tspasbee oy smul chkʼot.
Chvul vokolil ta stojolalik›, xi li Jeovae».+
4 Chikintaik li kʼusi chal Jeovae, snitilulal Jakob
xchiʼuk akotolik utsʼ alaliletik ta jteklum Israel.
5 Xi chal li Jeovae:
«¿Kʼusi jchopolil laj yilik li amoltotakik+
ti solel namajik tajek batel ta jtojolale
xchiʼuk ti la stsʼakliik batel li lokʼoletik ti muʼyuk sbalilike+ xchiʼuk ti jech muʼyuk sbalil kʼotik eke?+
6 Muʼyuk xi la sjakʼike: ‹¿Bu oy li Jeova
ti la slokʼesutik tal ta yosilal Ejiptoe,+
ti la sbeiltasutik ta takixokol balumile,
ta jun balumil ti takin tajeke+ xchiʼuk ti oy chʼenetike,
ta jun balumil ti bu muʼyuk voʼe+ xchiʼuk ti ikʼmutsʼan* tajeke,
ta jun balumil ti mu junuk vinik echʼem tee
xchiʼuk ti bu mu junuk krixchano te nakale?›.
7 Vaʼun, laj kikʼoxuk tal ta jsep osil ti oy kʼusitik xchʼi
sventa xalobeik li sate xchiʼuk li kʼusitik lekik chlokʼ tee.+
8 Muʼyuk xi la sjakʼik li paleetike: ‹¿Bu oy li Jeovae?›.+
Li buchʼutik oy ta sbaik Mantale muʼyuk laj yojtikinikun,
li jchabichijetike la stoy sbaik ta jtojolal,+
li j-alkʼopetike kʼotik ta j-alkʼopetik yuʼun Baal+
xchiʼuk jaʼ la stsʼakliik batel li diosetik ti muʼyuk kʼusi lek chakʼike.
9 Xi chal li Jeovae: ‹Jaʼ yuʼun, ta jsaʼoxuk ta kʼop yan velta+
xchiʼuk ta jsaʼ ta kʼop li xnichʼnab anichʼnabe›.
10 ‹Pe echʼ tuchʼik li lumetik ta tiʼtiʼnab* yuʼun jkitimetike+ xchiʼuk kʼelavil kʼusi xuʼ xataik.
Jech, takik batel aʼyej ta Kedar+ xchiʼuk nopbeik lek skʼoplal;
kʼelik mi oy jech kʼotem ta pasel kʼuchaʼal taje.
11 ¿Mi oy van junuk mukʼta lum ti sjeloj sdios ta yan diosetik ti mu meleluke?
Pe li jteklumale laj yiktaik li jmukʼulale, jaʼ bat saʼik li kʼusitik muʼyuk sbalile.+
12 Vinajel, labaluk sba xavil kʼalal chakʼel batel taje;
nikan ta skoj ti toj xibal sbae›, xi li Jeovae,
13 ‹Yuʼun oy chaʼtos ti kʼusitik chopol la spas li jteklumale:
Laj yiktaikun komel ti voʼon snioʼalun voʼ ti chakʼ kuxlejale+
xchiʼuk la sjokʼik* yav yaʼal stukik,
jun yav voʼ ti jomole, ti mu xchʼam yuʼun voʼe›.
14 ‹¿Mi jaʼ jun jtunel li Israele? O ¿mi jaʼ jun mosoil ti vokʼ ta sna yajvale?
Vaʼun chaʼa, ¿kʼu yuʼun laj yichʼik ikʼel batel yuʼun li krixchanoetike?
Toj xibal sba komtsanbat li slumale.
Laj xa yichʼ tsanbel skʼakʼal li jteklumetik yuʼune, jaʼ yuʼun muʼyuk xa jnaklejetik.
16 Li jteklum Nof*+ xchiʼuk Tapanese+ te chveʼik ta ajol xchiʼuk tʼaxjol chakom yuʼunik.
17 Taje la asaʼ atuk
ta skoj ti laj avikta komel li Jeova ti jaʼ Adiose,+
kʼalal jaʼo la sbeiltasot batel li ta bee.
18 Avi une, ¿kʼu yuʼun ti oy ta avoʼonton chabat li ta sbelel Ejipto+
sventa xbat avuchʼ li voʼ ta ukʼum Siore?*
¿Kʼu yuʼun ti oy ta avoʼonton chabat li ta sbelel Asiria+
sventa xbat avuchʼ li voʼ ta ukʼum Eufratese?
19 Skʼan oy kʼusi xachan ta skoj li achoplejale
xchiʼuk skʼan xavichʼ tukʼibtasel ta skoj ti muʼyuk tukʼ avakʼoj abae.
Teuk ta ajol xchiʼuk akʼo venta ti toj chopol xchiʼuk ti chakʼ at-oʼonton+
mi laj avikta li Jeova ti jaʼ Adiose;
muʼyuk axiʼtaojun* jutebuk›,+ xi li Ajvalil ti jaʼ Mukʼul Jpasmantale, li Jeova ti jaʼ bankilal yuʼun soltaroetike.*
20 ‹Yuʼun voʼne xa la jlilin li akʼatlom teʼale+
xchiʼuk la jtuchʼ li akadenaile.
Pe xi laj avale: «Muʼyuk chitun ta atojolal»,
yuʼun te levelot chachon aba+
ta sba skotol tayal bikʼtal vitsetik xchiʼuk ta yolon skotol mukʼtik teʼetik.+
21 La jtsʼunot kʼuchaʼal jpets tsajal lekil uva,+ ti toj lek li stsʼunobale;
jaʼ yuʼun, ¿kʼuxi ti lakʼataj ta skʼob teʼtikal chopol uvae?›.+
22 ‹Akʼo mi xapok aba ta vikarvonato xchiʼuk akʼo mi xavakʼbe aba epal xavon,
jech-o ikʼ chkilot ta skoj li amule›,+ xi li Ajvalil Jeova ti jaʼ Mukʼul Jpasmantale.
23 ¿Kʼuxi ti xi chavale: ‹Muʼyuk kikʼubtasoj jba.
Muʼyuk jtsʼaklioj batel li Baaletike›?
Akʼo avil venta kʼu yelan atalelal li ta stenlejaltike.
Nopbo skʼoplal li kʼusitik apasoje.
Xakoʼolaj kʼuchaʼal tsebal kameyo ti lek x-anilaje,
muʼyuk tukʼ stamoj batel sbe xchiʼuk xyal xmuy noʼox.
24 Li teʼtikal meʼ vuro ti nopem xaʼi takixokol balumile
xvusvun noʼox sniʼ tsaʼ* teʼtikal tot vuro ta skoj ti tskʼan tajek chkuchomaje.
¿Buchʼu van xuʼ spajtsan kʼalal jaʼo yorail chkuchomaje?
Mi tskʼan chbat saʼike, jecheʼ noʼox tslubes sbaik.
Jaʼ to tstaik mi la sta yorail chkuchomaje.*
25 Mu me xalubes avakan
xchiʼuk mu me xtakij anukʼ ta snutsel li kʼusitik muʼyuk sbalile.
Pe xi laj avale: ‹¡Muʼyuk xa kʼusi stakʼ pasel!+
26 Jech kʼuchaʼal chkʼexav jun j-elekʼ mi laj yichʼ taele,
jaʼ jech laj yichʼ akʼel ta kʼexlal li jteklum Israele,
li ajvaliletik yuʼunike xchiʼuk li bankilaletik yuʼunike,
li paleetik yuʼunike xchiʼuk li j-alkʼopetik yuʼunike.+
27 Xi chalbeik li jtekʼ teʼe: ‹Voʼot jtotot›+
xchiʼuk xi chalbeik li jpʼej tone: ‹Voʼot la avokʼesun›.
Jaʼuk li voʼone svalopatinojikun komel, muʼyuk skʼelojikun tal.+
Vaʼun, xi chalik kʼalal jaʼo yorail svokolike:
‹¡Totsan talel xchiʼuk koltaunkutik!›.+
28 Jteklum Juda, ¿bu oy li diosetik avuʼun ti la apase?+
Akʼo totsikuk tal mi xuʼ yuʼunik spojot kʼalal jaʼo yorail avokole,
yuʼun solel ep tajek adiostak jech kʼuchaʼal ep tajek li jteklumetik avuʼune.+
29 Xi chal li Jeovae: ‹¿Kʼu yuʼun ti jech-o chasaʼikun ta kʼope?
¿Kʼu yuʼun ti la atoy aba akotolik ta jtojolale?›.+
30 Jecheʼ noʼox ti la jmaj li anichʼnabike.+
Muʼyuk la xchʼunik tukʼibtasel;+
la amil ta a-espadaik li j-alkʼopetik avuʼunike,+
jech kʼuchaʼal chmilvan li jkot leone.
31 Jkʼol kuxlejal, nopbeik skʼoplal li kʼusi yaloj Jeovae.
¿Mi kʼotemun kʼuchaʼal takixokol balumil ta stojolal li Israele?
O ¿mi kʼotemun kʼuchaʼal jun lum ti bu ikʼmutsʼan* ta jyalele?
¿Kʼu yuʼun xi laj yal li jteklumale: ‹Chibatkutik ti bu xal koʼontonkutike.
Muʼyuk xa chisutkutik tal ta atojolal›?+
32 ¿Mi xchʼay van ta sjol snatsʼtak* li jun tojol tsebe?
¿Mi xchʼay van ta sjol xchuk sventa nupunel li jun jnupunel tsebe?
Pe li jteklumale jal xa tajek ti xchʼayojun ta sjole.+
33 Ants, ¡xatojob lek saʼel abe yoʼ xata viniketik sventa skʼanote!
Achanubtasoj aba lek ta stambel sbelel li kʼusi toj chopole.+
34 Yuʼun li akʼuʼ apokʼe balal* ta xchʼichʼel li buchʼutik* muʼyuk smulik ti abol sbaike,+
akʼo mi muʼyuk te bonol xchʼichʼelik la jta ti bu la atsatsal jam ochel tiʼ nae,
jaʼ te oy ta sliklej li akʼuʼ apokʼe.+
35 Pe xi chavale: ‹Muʼyuk jmul.
Ta melel, muʼyuk xa ilinem ta jtojolal li Diose›.
Pe li avie, ta jchapanot,
yuʼun xi chavale: ‹Muʼyuk jsaʼoj jmul›.
36 ¿Kʼu yuʼun muʼyuk tsots skʼoplal chavil ti junuk noʼox abe atamoje?
37 Jech xtok, apikoj xa ajol ta kʼexlal chalokʼ talel ta skoj taje,+
yuʼun li Jeovae laj xa spʼaj li buchʼutik apatoj toʼox avoʼonton ta stojolalike;
muʼyuk kʼusi lek chata yuʼunik».