NEEMIAS

1 Liʼe jaʼ li kʼusi laj yal Neemias*+ ti jaʼ xnichʼon Akaliase: li ta yuilal kislev* ta sjabilal 20, jaʼo te oyun ta pasob mantal Susa.*+ 2 Li vaʼ orae, jaʼo te kʼot skʼelun li jchiʼil ta vokʼel Ananie+ xchiʼuk te xchiʼinojan kʼotel yan viniketik ti likemik ta Judae. Vaʼun, la jakʼbeik kʼu yelan oyik li judaetik ti kuxulik toe, jaʼik li buchʼutik sutik talel ta slumalik ti chukbilik toʼox batele+ xchiʼuk la jakʼbeik kʼu yelan li Jerusalene. 3 Xi la stakʼbeikune: «Oy tajek svokolik xchiʼuk kʼexlal sba+ oyik li buchʼutik te oyik ta lum* ti jaʼik li buchʼutik kuxul komik kʼalal laj yichʼik toʼox chukel batele. Jinemik li smuroaltak Jerusalene+ xchiʼuk yichʼoj chikʼel ta kʼokʼ li stiʼtake».+

4 Kʼalal laj kaʼi li kʼusi laj yalike, lichoti, lik okʼkun xchiʼuk laj kat tajek koʼonton jayibuk kʼakʼal, la jpas-o ayuno*+ xchiʼuk la jpasilan orasion ta stojolal li Dios ta vinajele. 5 Xi laj kale: «Kajval Jeova ti voʼot Diosot ta vinajele, ti mukʼul Diosot xchiʼuk ti toj labal abae, ti chkʼot ta pasel avuʼun li atratoe xchiʼuk ti chavakʼ ta ilel tukʼil kʼanelal ta stojolal li buchʼutik skʼanojikote xchiʼuk ti chchʼunik amantale,+ 6 avokoluk, tsʼetano tal achikin xchiʼuk akʼo tal asat ta jtojolal sventa xachikintabun li j-orasion ti jaʼ avajtunelune. Li avie, yakal ta jkʼoponot ta kʼakʼal akʼobal+ ta sventa li j-israeletik ti jaʼ avajtuneltake. Jech xtok, chkalbe ta jamal smul li jteklum Israele, yuʼun spasoj smulik ta atojolal. Jsaʼoj jmulkutik, jsaʼoj jmul ek xchiʼuk li steklumal jtote.*+ 7 Ta melel, toj chopol jpasoj jbakutik ta atojolal,+ yuʼun muʼyuk jchʼunojkutik li kʼusitik avaloje, li amantaltake xchiʼuk li kʼusitik chapanbil avuʼun ti laj avakʼbe li avajtunel Moisese.+

8 »Avokoluk, vuleso ta ajol li amantal laj avalbe li avajtunel Moisese, ti xi laj avalbee: ‹Mi muʼyuk tukʼ chavakʼ abaike, tanpuk chabatik kuʼun ta stojolal jteklumetik.+ 9 Pe mi chasutik tal ta jtojolal xchiʼuk mi chachʼunik li jmantaltake xchiʼuk mi chapasike, akʼo mi tanpuk oyik kʼalal to stiʼiltak balumil li ateklumalike, voʼon ta jtsobik sutel+ tal xchiʼuk chkikʼik tal ti bu jtʼujoj ta sventa li jbie›.+ 10 Jaʼik avajtuneltak xchiʼuk jaʼ ateklumal ti la apoj lokʼel ta amukʼul atsatsale xchiʼuk li ta atsatsal kʼobe.+ 11 Kajval Jeova, avokoluk, tsʼet chikintao li j-orasion ti avajtunelune xchiʼuk li s-orasion avajtuneltak ti kʼupil sba tajek chaʼiik yichʼel ta mukʼ li abie. Avokoluk, akʼo lekuk kʼusi xkʼot ta pasel kuʼun avi ti avajtunelune xchiʼuk akʼo xkʼuxubinun+ li ajvalile».

Li vaʼ kʼakʼale, voʼon toʼox ta jpʼisbe yuchʼbol li ajvalile.+

2 Li ta yuilal nisan* kʼalal 20 jabil+ xa ox yochel ta ajvalil li Artajerjese,+ chuchʼ yaʼi vino li ajvalile, vaʼun ta skoj ti voʼon onoʼox jbainoj yichʼel batel li vinoe, laj kakʼbe li ajvalile.+ Pe mu bakʼinuk xkat koʼonton kʼalal te oyun ta yelovale. 2 Jaʼ yuʼun, xi laj yalbune: «¿Kʼu yuʼun solel chavat avoʼonton ti muʼyuk ipote? Leʼe oy kʼusi chopol chavaʼi, jech oxal chavat avoʼonton». Kʼalal jech laj yale, lixiʼ ta jyalel.

3 Vaʼun, xi laj kalbe li ajvalile: «¡Akʼo jaluk xkuxi li ajvalile! ¿Kʼuxi xa noʼox ti muʼyuk chkat koʼonton ti lilijem li jteklum ti bu mukul li jmoltotake xchiʼuk ti chikʼbil ta kʼokʼ li stiʼtake?».+ 4 Xi laj yalbun li ajvalile: «¿Kʼusi chakʼan ti xichʼ pasele?». Jech te lik jkʼopon ta anil li Dios ta vinajele.+ 5 Laje, xi laj kalbe li ajvalile: «Mi lek chil li ajvalile, mi lek chavil li avajtunele, takun batel ta Juda sventa xbat jchaʼvaʼan+ li jteklum ti bu mukul li jmoltotake». 6 Vaʼun, xi laj yalbun li ajvalil kʼalal te chotol ta xokon li meʼ ajvalile: «¿Kʼu sjalil chabat xchiʼuk kʼusi ora chasut tal?». Lek laj yaʼi li ajvalile, laj yakʼ batkun+ xchiʼuk laj kalbe kʼusi ora chisut tal.+

7 Xi laj kalbe li ajvalile: «Mi lek chil li ajvalile, akʼo kichʼ akʼbel batel kartaetik sventa li ajvaliletik ta smaleb kʼakʼal ukʼum Eufrates*+ sventa xakʼik jelavkun batel ta slumalik yoʼ xikʼot ta Judae. 8 Jech xtok, akʼo yichʼ takbel batel karta li Asafe, li buchʼu chchabi li teʼtikaltik yuʼun ajvalile, sventa xakʼbun teʼetik ti chtun ta stsʼamteʼal li yochebaltak Snail Soltaroetik+ ti te nopol xil li temploe,* sventa li smuroaltak jteklume+ xchiʼuk sventa li na bu chibate». Jaʼ yuʼun, laj yakʼbun li ajvalile,+ yuʼun te xchiʼinojun li Jdiose.*+

9 Ta tsʼakal une, likʼot ti bu oy li ajvaliletik ta smaleb kʼakʼal ukʼum Eufratese* xchiʼuk laj kakʼbe li skartatak ajvalile. Jech xtok, la stak batel bankilal soltaroetik li ajvalile xchiʼuk viniketik ti kajajtik ta kaʼ sventa xchiʼinikune. 10 Kʼalal laj yaʼi li Sanbalat+ ti likem ta Bet-Orone xchiʼuk kʼalal laj yaʼi li Tobias+ ti jaʼ j-ammon+ vinik, ti jaʼ bankilal j-abtele,* toj chopol laj yaʼiik ti oy buchʼu kʼot skolta li jteklum Israele.

11 Laj une, likʼot ta Jerusalen xchiʼuk oxib kʼakʼal te likom. 12 Lilik ta akʼobaltik xchiʼuk jayvoʼ viniketik, pe muʼyuk buchʼu laj kalbe li kʼusi yakʼoj ta koʼonton Jdios ti akʼo jpas sventa li Jerusalene. Jaʼ noʼox jtuk ti kajalun batel ta jkot vuroe, li yantike ta yakan batik. 13 Ta akʼobaltik lilokʼ batel li ta ochebal ti Stenlejaltik sbie,+ te lijelav ta yeloval li nioʼ ti Mukʼta Chon sbi sventa xibat li ta ochebal ti Chikʼobil Kʼaʼep+ sbie. La jkʼel lek li smuroaltak Jerusalen ti jinemike xchiʼuk li stiʼtak ti chikʼbil ta kʼokʼe.+ 14 Te lijelav batel li ta ochebal ti Nioʼ+ sbie xchiʼuk li ta Stanke Ajvalile, ta skoj ti toj chukul li bee, mu xjelav li jvuro jkajlebinoj batele. 15 Pe jech-o ikʼ osil kʼalal libat ta stenlejaltike*+ xchiʼuk la jkʼel-o batel li muroe, laj une lisut tal xchiʼuk te li-och tal li ta ochebal ti Stenlejaltik sbie. Vaʼun, jaʼ jech lisut tal.

16 Li itsʼinal jpasmantaletike+ muʼyuk laj yaʼiik ti bu li-aye mi jaʼuk ti kʼusi ay jpase; yuʼun muʼyuk toʼox kʼusi kalojbe li judaetike, li paleetike, li bankilaletike, li itsʼinal jpasmantaletike xchiʼuk li yan j-abteletike. 17 Laj une, xi laj kalbeike: «Avilojik ti toj chopol li kʼusi jnuptanojtike, ti solel busul slilijemal li Jerusalene xchiʼuk ti chikʼbil ta kʼokʼ li stiʼtake. Laʼik, laʼ jchaʼvaʼanbetik smuroaltak li Jerusalen sventa xlaj skʼoplal li labanele». 18 Vaʼun, laj kalbeik kʼu yelan la skoltaun li Jdiose+ xchiʼuk li kʼusitik laj yalbun li ajvalile.+ Jaʼ yuʼun, xi laj yalike: «Likutik ta svaʼanel». Jech la stsatsubtas sbaik* sventa spasik li lekil abtelale.+

19 Kʼalal laj yaʼi li Sanbalat ti likem ta Bet-Orone, li Tobias+ ti jaʼ j-ammon+ vinik, ti jaʼ bankilal j-abtele* xchiʼuk li Guesem ti jaʼ j-arabia vinike,+ lik slabanunkutik+ xchiʼuk lik spʼajunkutik, xi laj yalike: «¿Kʼusi xa noʼox ti yakal chapasike? ¿Mi yuʼun yakal chatoy abaik ta stojolal li ajvalile?».+ 20 Pe xi la jtakʼbeike: «Jaʼ tskoltaunkutik li Dios ta vinajel sventa lek xbat li kʼusi ta jpaskutike,+ voʼonkutik chlik jmeltsankutik, yuʼun yajtunelunkutik; yan li voʼoxuke mu stakʼ xtal atikʼ abaik, muʼyuk aderechoik xchiʼuk chʼabal kʼusi apasojik sventa xavichʼik vulesel ta jolil ta Jerusalene».+

3 Li mero bankilal pale Eliasib+ xchiʼuk li xchiʼiltak ta paleale lik smeltsanik li ochebal ti Chij+ sbie. La xchʼultajesik*+ xchiʼuk laj yakʼbeik li stiʼtake. Te lik xchʼultajesik li ta ochebal ti Chij sbie, vaʼun kʼot kʼalal to ta Tayal kʼelob osil Mea+ xchiʼuk kʼot kʼalal to ta Tayal kʼelob osil Ananel.+ 2 Ta sjelavel batele, te abtejik li viniketik ta Jerikoe;+ ta sjelavel batel xtoke, te abtej li Sakur ti jaʼ xnichʼon Imrie.

3 Li xnichʼnab Asenaae la svaʼanik li ochebal ti Choy+ sbie; laj yakʼbeik steʼel,+ laj yakʼbeik stiʼtak, syavealtak xchiʼuk stakʼinaltak. 4 Ta sjelavel batele, te abtej li Meremot+ ti jaʼ xnichʼon Uriya xchiʼuk ti jaʼ smom Akose. Ta sjelavel batel xtoke, te abtej li Mesulam+ ti jaʼ xnichʼon Berekias xchiʼuk ti jaʼ smom Mesesabele. Ta sjelavel batel xtoke, te abtej li Sadok ti jaʼ xnichʼon Baanae. 5 Ta sjelavel batele, te abtejik li jtekoaetike,+ pe li buchʼutik lek ojtikinbil yuʼunike muʼyuk la sbikʼtajes sbaik sventa x-abtejik ta stojolal li yajvalike.

6 Li Joiada ti jaʼ xnichʼon Paseae xchiʼuk li Mesulam ti jaʼ xnichʼon Besodeyae la smeltsanik li ochebal ti Voʼneal Jteklum+ sbie. Laj yakʼbeik steʼel, laj yakʼbeik stiʼtak, syavealtak xchiʼuk stakʼinaltak. 7 Ta sjelavel batele, te abtejik li Melatias ti jaʼ jgabaon+ vinike xchiʼuk li Jadon ti jaʼ jmeronot vinike, viniketik ti likemik ta Gabaon xchiʼuk ta Mispae,+ ti ventainbilik yuʼun li ajvalil ta smaleb kʼakʼal ukʼum Eufratese.*+ 8 Ta sjelavel batele, te abtej li Usiel ti jaʼ xnichʼon Araya ti xtojob yabtelanel oroe. Ta sjelavel batel xtoke, te abtej Ananias ti jmeltsanej muil pomadae;* jech xtok, la spakʼbeik batel chʼulul tonetik li Jerusalene jaʼ to ti kʼot ta Mukʼta Muroe.+ 9 Ta sjelavel batele, te abtej li Refaya ti jaʼ xnichʼon Ure xchiʼuk ti jaʼ ajvalil ta j-oʼlol yosilal Jerusalene. 10 Ta sjelavel batele, te abtej ta yeloval sna stuk li Jedaya ti jaʼ xnichʼon Arumafe xchiʼuk ta sjelavel batel xtoke, te abtej li Atus ti jaʼ xnichʼon Asabneyae.

11 Li Malkiya ti jaʼ xnichʼon Arim+ xchiʼuk li Asub ti jaʼ xnichʼon Paat-Moabe+ la smeltsanik jvokʼ ek, la smeltsanik xtok li Tayal kʼelob osil Ornoetike.+ 12 Ta sjelavel batele, te abtej xchiʼuk stsebetak li Salum ti jaʼ xnichʼon Aloese, ti jaʼ ajvalil ta j-oʼlol yosilal Jerusalene.

13 Li Anun xchiʼuk li jnaklejetik ta Sanoae+ la smeltsanik li ochebal ti Stenlejaltik+ sbie; jaʼ la svaʼanik, laj yakʼbeik stiʼtak, syavealtak xchiʼuk stakʼinaltak, jech xtok, la smeltsanik jmil xukʼubil* snatil muro ti kʼot kʼalal to ta ochebal ti Chikʼobil Kʼaʼep+ sbie. 14 Li Malkiya ti jaʼ xnichʼon Rekabe, ti jaʼ ajvalil li ta yosilal Bet-Akereme,+ la smeltsan li ochebal ti Chikʼobil Kʼaʼep sbie; jaʼ la svaʼan, laj yakʼbeik stiʼtak, syavealtak xchiʼuk stakʼinaltak.

15 Li Salun ti jaʼ xnichʼon Kolose, ti jaʼ ajvalil li ta yosilal Mispae,+ la smeltsan li ochebal ti Nioʼ+ sbie; jaʼ la svaʼan xchiʼuk laj yakʼbe sjol, laj yakʼbeik stiʼtak, syavealtak xchiʼuk stakʼinaltak. Jech xtok, la smeltsan li muro ta Stankeal Voʼ+ ti te oy ta xokon li Nichimaltik yuʼun Ajvalile+ xchiʼuk kʼot kʼalal to ta Eskalera+ ti chyal tal ta Steklumal Davide.+

16 Ta sjelavel batele, te abtej li Neemias ti jaʼ xnichʼon Asbuk, ti jaʼ ajvalil ta j-oʼlol yosilal Bet-Sure,+ te la slikes ta yeloval Smukinal David,+ vaʼun kʼot kʼalal to ta stankeal voʼ+ ti meltsanbil toʼoxe xchiʼuk kʼalal to ta Sna Jpaskʼopetik.

17 Ta sjelavel batele, te abtejik li jlevietike: te abtej li Reum ti jaʼ xnichʼon Banie. Ta sjelavel batel xtoke, te abtej ta smeltsanel slumal stuk li Asabias ti jaʼ ajvalil ta j-oʼlol yosilal Keilae.+ 18 Ta sjelavel batele, te abtejik li xchiʼiltakike: te abtej li Bavai ti jaʼ xnichʼon Enadade, ti jaʼ ajvalil ta j-oʼlol yosilal Keilae.

19 Ta sjelavel batele, te abtej li Eser ti jaʼ xnichʼon Jesua,+ ti jaʼ ajvalil ta Mispae, la smeltsan jvokʼ li ta yeloval muyebal ti jaʼ sbelel li snail abtejebal sventa paskʼope, ti te xkom yoʼ bu oy li Yikobtak Muroe.+

20 Ta sjelavel batele, te tsots abtej li Baruk ti jaʼ xnichʼon Sabaie+ xchiʼuk la smeltsan jvokʼ ek, te la slikes yoʼ bu oy li Yikobtak Muroe, vaʼun kʼot kʼalal to ta yochebal sna li Eliasib+ ti jaʼ mero bankilal palee.

21 Ta sjelavel batele, te abtej li Meremot+ ti jaʼ xnichʼon Uriyae xchiʼuk ti jaʼ smom Akose, la smeltsan jvokʼ ek. Te la slikes ta yochebal sna li Eliasibe, vaʼun kʼot kʼalal to jot sna.

22 Ta sjelavel batele, te abtejik li paleetik ti jaʼik viniketik ta yosilal Jordane.*+ 23 Ta sjelavel batele, te abtejik ta yeloval sna stukik li Benjamin xchiʼuk li Asube. Ta sjelavel batel xtoke, te nopol abtej ta sna stuk li Asarias ti jaʼ xnichʼon Maaseya xchiʼuk ti jaʼ smom Ananiae. 24 Ta sjelavel batele, li Binui ti jaʼ xnichʼon Enadade la smeltsan jvokʼ ti te chlik ta sna Asariase, vaʼun kʼot yoʼ bu oy li Yikobtak Muroe+ xchiʼuk kʼalal to ta xchikin muro.

25 Ta sjelavel batele, li Palal ti jaʼ xnichʼon Usaie te abtej ta yeloval ti bu oy li Yikobtak Muroe xchiʼuk li ta tayal kʼelob osil ti te lokʼem batel ta Sna* li Ajvalile,+ ti mas xa toyol oy ti stsakoj xa sba batel xchiʼuk li Yamakʼ* Jchabivanejetike.+ Ta sjelavel batele, te abtej li Pedaya ti jaʼ xnichʼon Parose.+

26 Li buchʼutik chtunik ta templo*+ ti nakalik ta Ofele+ te to kʼalal abtejik li ta ochebal ti Voʼ+ sbi ti te xkom ta slokʼeb kʼakʼale xchiʼuk li ta tayal kʼelob osil ti te napʼal ta muroe.

27 Ta sjelavel batele, la smeltsanik jvokʼ li jtekoaetike,+ te la slikesik batel li ta mukʼta tayal kʼelob osil ti te napʼal ta muroe, vaʼun kʼot kʼalal to ta muro Ofel.

28 Li paleetike te lik abtejikuk li ta yakʼol ochebal ti Kaʼ+ sbie, te noʼox ta yeloval sna stukik.

29 Ta sjelavel batele, te abtej ta yeloval sna stuk li Sadok+ ti jaʼ xnichʼon Imere.

Ta sjelavel batel xtoke, te abtej li Semaya ti jaʼ xnichʼon Sekaniase xchiʼuk ti jaʼ chchabi li ochebal ti Slokʼeb Kʼakʼal+ sbie.

30 Ta sjelavel batele, li Ananias ti jaʼ xnichʼon Selemiase xchiʼuk li Anun ti jaʼ svakvoʼal xnichʼon Salafe jvokʼ-o bu la smeltsanik.

Ta sjelavel batel xtoke, te abtej ta yeloval smukʼta kuarto stuk li Mesulam+ ti jaʼ xnichʼon Berekiase.

31 Ta sjelavel batele, te abtej li Malkiya ti xtojob yabtelanel oroe, te to kʼalal la smeltsan ta snail li buchʼutik chtunik ta temploe*+ xchiʼuk li jpʼolmajeletike, te lik ta yeloval li ochebal ti bu Chkʼelvanik sbie xchiʼuk kʼot kʼalal to ti bu oy li kuarto ta sba xchikin muroe.

32 Li buchʼutik xtojobik yabtelanel oroe xchiʼuk li jpʼolmajeletike te lik abtejikuk ti bu oy li kuarto ta sba xchikin muroe, vaʼun kʼot kʼalal to ochebal ti Chij+ sbie.

4 Vaʼun, kʼalal kʼot ta xchikin Sanbalat+ ti yakal ta jchaʼvaʼankutik li muroe, kap sjol xchiʼuk chopol tajek laj yaʼi xchiʼuk lik slaban li judaetike. 2 Xi laj yal ta yeloval li xchiʼiltake xchiʼuk li soltaroetik ta Samariae: «¿Kʼusi yakal tspasik li judaetik ti muʼyuk tsots yipike? ¿Mi spas van yuʼun stukik? ¿Mi chakʼik van milbil matanaletik? ¿Mi ta van stsuts yuʼunik ta jun noʼox kʼakʼal? ¿Mi tspas van yuʼunik ta ton yan velta li tonetik ti kʼakʼemik xa ti te oy li ta slilijemal+ kʼusitike?».

3 Laje, xi laj yal li Tobias+ ti jaʼ j-ammon+ vinik ti te vaʼal ta stsʼel Sanbalate: «Akʼo mi jkot noʼox uni vet xmuy ta sba li kʼusi yakal chavaʼanike, ta sjines li amuroik ti pasbil ta tone».

4 Vaʼun, xi la jpas orasione: «Dios kuʼunkutik, chikintao, yuʼun yakal chkichʼkutik pʼajel.+ Akʼo sutuk ta stojolal stukik*+ ti chlabanvanike, akʼo ta skʼob yajkontraik xchiʼuk akʼo yichʼik chukel batel ta yan lum. 5 Mu xamukbe li smulike xchiʼuk mi jaʼuk xatupʼbe li spaltailike,*+ yuʼun la xchopol kʼoptaik li j-abteletike».

6 Jech muʼyuk laj kikta jbakutik ta svaʼanel li muroe, la snup sba kuʼunkutik sjoylej li muroe xchiʼuk la sta kuʼunkutik j-oʼlol li stayleje, li jteklume jech-o laj yakʼ ta yoʼontonik li abtele.

7 Pe kʼalal kʼot ta xchikin Sanbalat, Tobias,+ j-arabiaetik,+ j-ammonetik xchiʼuk j-asdodetik+ ti xkechet noʼox batel smeltsanel li smuroaltak Jerusalene xchiʼuk ti yakal chichʼ makel batel ti bu jomajtike, kap tajek sjolik. 8 Jmoj lik snop skʼopik sventa chtal stsakik ta kʼop li Jerusalene xchiʼuk sventa oyuk kʼop te. 9 Yan li voʼonkutike la jkʼoponkutik li Dios kuʼunkutike xchiʼuk la jvaʼankutik jchabivanej ta kʼakʼal akʼobal sventa jchabi jbakutik ta stojolalik.

10 Akʼo mi jech, li krixchanoetik ta Judae xi chalike: «Kʼunib xa yipik li j-abteletike,* pe ep to te slilijemal kʼusitik, mu onoʼox xuʼ kuʼuntik svaʼanel li muroe».

11 Xi chalilanik li kajkontrakutike: «Muʼyuk tsnaʼik xchiʼuk muʼyuk chakʼik venta kʼalal te xa oyutik ta stojolalike, vaʼun ta jmiltik xchiʼuk ta jpajesbetik li yabtelike».

12 Li judaetik ti te nopol xil sbaik ta naklej xchiʼuk li yajkontraike chtalik li ta jteklume xchiʼuk ep ta velta* xi chalilanike: «Chtalik ta jtojolaltik ta buyuk noʼox».

13 Jaʼ yuʼun, la jvaʼan viniketik ta yut muro ti bu mas pekʼel li osil ti xuʼ x-ochik ta anile xchiʼuk ta jujuchop utsʼ alaliletik la jvaʼan ti chapalik xchiʼuk s-espadaik, slansaik xchiʼuk s-arkoike. 14 Kʼalal laj kil ti xiʼike, ta anil noʼox litots xchiʼuk xi laj kalbeik li bankilaletike,+ li itsʼinal jpasmantaletike xchiʼuk li yantik ta jteklume: «Mu xaxiʼik ta stojolalik.+ Vuleso ta ajolik ti toj mukʼ xchiʼuk toj labal sba li Jeovae;+ pasik kʼop ta sventa li achiʼiltakike, li akeremtakike xchiʼuk li atsebetakike, li avajnilike xchiʼuk li anaike».

15 Vaʼun, kʼalal kʼot ta xchikin kajkontrakutik ti laj kaʼikutik li kʼusi yakal tspasike xchiʼuk ti makbatik ta be yuʼun melel Dios li kʼusi snopoj xa ox tspasike, jkotolkutik lisutkutik batel ta svaʼanel li muroe. 16 Li vaʼ kʼakʼale, jaʼo te lik ti j-oʼlol noʼox jviniktak tspasik abtelale,+ yan li j-oʼlole stsakoj slansaik, s-eskudoik,* s-arkoik xchiʼuk smak sbekʼtalik.* Vaʼun, li bankilaletike+ la skoltaik* skotol li krixchanoetik ta Juda 17 ti te ch-abtejik ta svaʼanel li muroe. Li buchʼutik chkuchik li ikatsile ta jun noʼox skʼob ch-abtejik, yan li ta jun skʼobike stsakoj yabtejebik sventa paskʼop. 18 Xchukinoj s-espadaik ta jujuntal kʼalal yakalik ta abtel li j-abteletike xchiʼuk te vaʼal ta jxokon li buchʼu tsjupan kachue.+

19 Vaʼun, xi laj kalbe li bankilaletike, li itsʼinal jpasmantaletike xchiʼuk li yantik ta jteklume: «Toj mukʼ xchiʼuk toj jamal li abtelale, tanpuk oyutik li ta muroe xchiʼuk nomtik xkil jbatik ta jujuntal. 20 Kʼalal mi laj avaʼiik chbakʼ li kachue, tsobo abaik tal ti bu oyunkutike. Jaʼ tspas kʼop ta jtojolaltik li Jdiostike».+

21 Jaʼ yuʼun, kʼalal stsakoj slansaik li j-oʼlole, li voʼonkutike jech-o li-abtejkutik, jaʼo ta jlikeskutik kʼalal chlokʼ talel li kʼakʼale xchiʼuk jaʼ to ta jkechankutik kʼalal chlokʼ talel li kʼanaletike. 22 Li vaʼ kʼakʼale, xi laj kalbe li jteklume: «Ta jujuntal li viniketik xchiʼuk li yajtunelike akʼo te x-echʼ yuʼunik akʼobal li ta yut Jerusalene, vaʼun jaʼ chchabiutik li ta akʼobaltike xchiʼuk ch-abtejik li ta kʼakʼaltike». 23 Jaʼ yuʼun, li voʼon xchiʼuk li jchiʼiltake, li kajtuneltake,+ li jchabivanejetik ti te tijilik tal ta jtojolale muʼyuk la jlokʼ-o li jkʼuʼ jpokʼkutike xchiʼuk ta jujuntal jtsakojkutik-o ta jbatsʼikʼobkutik li kabtejebkutik sventa paskʼope.

5 Akʼo mi jech, li jteklume xchiʼuk li yajnilike tsots avanik ta skontrainel li xchiʼiltakik ta judaile.+ 2 Jlome xi chalike: «Toj epunkutik xchiʼuk li jkeremtakutike xchiʼuk li jtsebetakutike. Skʼan jsaʼkutik sat tsʼunobil sventa jlajeskutik xchiʼuk sventa mu xichamkutik». 3 Yantik xtoke xi chalike: «Sventa jtakutik sat tsʼunobil li ta yorail kʼalal chʼabal veʼlile, chkakʼkutik ta prental* kosilkutik, ti butik tsʼunbil j-uvakutike xchiʼuk li jnakutike». 4 Oy to yantik ti xi chalike: «Jchʼamunojkutik takʼin sventa jtojbekutik patan li ajvalile,+ ta skoj taje, kakʼojkutik xa ta prental* li kosilkutike xchiʼuk ti butik jtsʼunoj j-uvakutike. 5 Jun jbekʼtalkutik xchiʼuk jmoj jchʼichʼelkutik xchiʼuk li jchiʼiltakutike,* li jnichʼnabkutik xtoke xkoʼolajik xchiʼuk li xnichʼnabike. Akʼo mi jech, skʼan xkakʼkutik ta mosoil li jkeremtakutik xchiʼuk li jtsebetakutike, oy xa mosoinbilik junantik li jtsebetakutike.+ Pe muʼyuk kʼusi stakʼ jpaskutik sventa mu jechuk xkʼot ta pasele, yuʼun yan-o xa yajval li kosilkutike xchiʼuk ti butik jtsʼunoj j-uvakutike».

6 Li-ilin tajek kʼalal laj kaʼi ti jech x-avlajetik laj yalike. 7 Jaʼ yuʼun, la jkʼelbe lek skʼoplal li svokolike, muʼyuk lek laj kaʼi li kʼusi tspasik li bankilaletike xchiʼuk li itsʼinal jpasmantaletike, vaʼun xi laj kalbeike: «Toj ep chakʼanbeik sjol* li kʼusi chavakʼbeik xchʼamun li achiʼiltakike».+

Jech xtok, la jchapan jun mukʼta tsobajel sventa xchapaj li kʼope. 8 Xi laj kalbeike: «Ti bu kʼalal xuʼ laj kilkutike, la jmankutik lokʼel tal li jchiʼiltaktik ta judail ti yichʼojik toʼox chonel batel ta mukʼtik lumetike. Pe ¿mi ta van xachonik batel yan velta li achiʼiltakik+ sventa xkichʼkutik chonbel talel yan veltae?». Vaʼun, te tsʼijil komik, muʼyuk xa kʼusi la stakʼik. 9 Laje, xi to laj kale: «Muʼyuk lek li kʼusi chapasike. ¿Mi mu skʼanuk te xaxanavik li ta sbetak Jdiostik*+ sventa mu kʼusi xtal stikʼ ta jsatik li mukʼta lumetik ti jaʼ kajkontratike? 10 Jech xtok, li voʼone, li jchiʼiltak ta vokʼele xchiʼuk li kajtuneltake yakal chkakʼkutik achʼamunik takʼin xchiʼuk chkakʼkutik akʼexik sat tsʼunobil. Avokolikuk, mu xa xakʼanbeik sjol+ kʼalal oy kʼusi chavakʼik ta chʼome. 11 Avokolikuk, sutesbeik avi li yosilike,+ ti butik stsʼunoj s-uvaike, ti butik stsʼunoj s-olivaike xchiʼuk li snaike. Jech xtok, sutesbeik li sjol yilike,* li sat tsʼunobile, li achʼ vinoe xchiʼuk li aseite ti yakal chakʼanbeik ta persa ta sjol yilike».

12 Jaʼ yuʼun, xi laj yalike: «Chkakʼbekutik sutel li kʼusitik taje xchiʼuk muʼyuk xa kʼusi ta jkʼanbekutik sutel. Jech ta jpaskutik kʼuchaʼal laj avale». Jech oxal, la jtak ta ikʼel li paleetike xchiʼuk laj kalbeik li vaʼ viniketik ti akʼo yalik ta jamal ti tspasik li kʼusi laj yalike. 13 Jech xtok, la jlilin li xpuxbenal jkʼuʼ jpokʼe* xchiʼuk xi laj kale: «Jaʼ jech ta slilinoxuk li melel Dios mi muʼyuk la apasik li kʼusi laj yichʼ alele. Li Diose ta spojboxuk li anaike xchiʼuk li kʼusitik oy avuʼunike, jaʼ to mi muʼyuk xa kʼusi xkom avuʼunike». Vaʼun, xi laj yal sjunul li tsobobbaile: «¡Jechuk!».* Laj une, la skʼupil kʼoptaik li Jeovae xchiʼuk li jteklume la spasik li kʼusi laj yakʼ yeik tspasike.

14 Kʼalal la svaʼanun li ajvalil+ sventa xikʼot ta ajvalil li ta yosilal Judae, ti lik ta sjabilal 20+ kʼalal ta sjabilal 32+ yochel ta ajvalil li Artajerjese,+ jaʼ xkaltik, 12 jabil, muʼyuk la jlajeskutik xchiʼuk jchiʼiltak li veʼlil chichʼ akʼbel li ajvalile.+ 15 Pe li yantik ajvalil baʼyel echʼike laj yakʼbeik ep svokol li jteklume xchiʼuk laj yichʼbeik 40 siklo* plata jujun kʼakʼal sventa pan xchiʼuk vino. Li yajtuneltak xtoke yakʼojbeik svokol li jteklume. Yan li voʼone mu jechuk la jpas+ ta skoj ti jxiʼtaoj* li Diose.+

16 Jech xtok, la jkolta jba ta svaʼanel li muro liʼe xchiʼuk mi jsepuk osil li-akʼbatkutik+ xchiʼuk te laj yichʼik tsobel skotol li kajtuneltak ta sventa li abtelale. 17 Oy 150 ta voʼ judaetik xchiʼuk itsʼinal jpasmantaletik ti te veʼik ta jmexae xchiʼuk li buchʼutik talik ta jtojolalkutik ti likemik talel ta mukʼtik lumetike. 18 Jujun kʼakʼal la smeltsanbeikun* jkot tot vakax, vakot lekil chij xchiʼuk mutetik, jun velta li ta lajlajuneb kʼakʼale, oy kuʼunkutik ep ta tos epal vino. Akʼo mi jech, muʼyuk la jkʼan ta persa li veʼlil chichʼ akʼbel li ajvalile, yuʼun tsots xa onoʼox chil svokolik ta yabtelik li krixchanoetike. 19 Jaʼ yuʼun, xi la jpas orasione: «Dios kuʼun, vulesun me ta ajol xchiʼuk akʼbun bendision ta skoj li kʼusitik la jpas ta stojolal li jteklum liʼe».+

6 Laj une, kʼalal albatik Sanbalat, Tobias,+ Guesem ti jaʼ j-arabia+ vinik xchiʼuk li yan kajkontrakutik ti laj xa jchaʼvaʼan li muroe+ xchiʼuk ti laj xa yichʼ makel ti bu jomajtike (akʼo mi muʼyuk toʼox kakʼojbe stiʼtak ochebaletik li vaʼ kʼakʼale),+ 2 li Sanbalat xchiʼuk Gueseme xi laj yalbeikun tal ta ora jun aʼyeje: «Laʼ, jchʼakbetik yorail yoʼ jtsob jbatik li ta bikʼtal lumetik ta stenlejaltik Onoe».+ Pe snopoj ox chilbajinikun. 3 Jaʼ yuʼun, la jtakbe batel j-almantaletik xchiʼuk xi laj kalbeike: «Muʼyuk xokolun, yakal ta jpas jun mukʼta abtelal, mu stakʼ xiyal tal. Yuʼun mi yal jkʼeloxuke, chpaj li abtele». 4 Chanib to velta jech laj yalbeikun tal li aʼyeje, jech la jtakʼbeik batel xchanibal velta.

5 Vaʼun, li Sanbalate la stakbun tal jun yajtunel ti stsakoj tal jlik karta ti muʼyuk makale, taje svoʼobal xa velta la stakbun talel li aʼyeje. 6 Xi tsʼibabil tale: «Kʼotem xa ta xchikin mukʼtik lumetik ti anopoj chatoy abaik xchiʼuk li judaetike,+ jech chal li Guesem+ eke. Jaʼ yuʼun, yakal chavaʼan li muroe, chalik xtok ti chakʼot la ta ajvalile. 7 Jech xtok, avaʼanoj j-alkʼopetik sventa xi xalik akʼoplal ta sjunul Jerusalene: ‹¡Oy xa jun ajvalil li ta Judae!›. Taje chichʼ albel li ajvalile. Jaʼ yuʼun, laʼ, jloʼiltabetik skʼoplal».

8 Akʼo mi jech, xi la jtakʼbe sutele: «Mi jtosuk jech kʼotem ta pasel li kʼusi chavale; jaʼ noʼox chanop ta ajol* atuk li kʼusi chavale». 9 Yuʼun skotolik jaʼ noʼox tskʼan tsibtasunkutik kʼalal xi chalike: «Chlubtsaj skʼobik ta abtel, vaʼun muʼyuk tstsuts yuʼunik».+ Laje, xi la jpas orasione: «Dios, tsatsubtasbun li jkʼobe».+

10 Libat ta sna Semaya ti jaʼ xnichʼon Delayae xchiʼuk ti jaʼ smom Meetabele, ti jaʼo te sbajoj sba ta snae. Xi laj yalbune: «Jchʼakbetik yorail sventa xijbat li ta sna melel Diose, ta yut li temploe, vaʼun jmakbetik li stiʼ temploe, yuʼun chtal smiloxuk. Chtal smiloxuk ta akʼobaltik». 11 Pe xi laj kale: «¿Mi skʼan van xjatav li jun vinik kʼuchaʼal voʼone? ¿Mi xuʼ van x-och ta templo li jun vinik kʼuchaʼal voʼon xchiʼuk ti mu xchame?+ ¡Muʼyuk chi-och!». 12 Te une, laj kakʼ venta ti maʼuk stakoj tal li Diose, yuʼun jaʼ stojojik li Tobias xchiʼuk Sanbalat+ sventa xal li kʼusi chopol chkʼot ta jtojolale. 13 Laj yichʼ tojel sventa sibtasun xchiʼuk ti jsaʼ jmule. Taje jaʼ sventa oyuk lek srasonal yuʼunik ti sokesbeikun jkʼoplale xchiʼuk sventa xakʼikun ta kʼexlal.

14 Jaʼ yuʼun, xi la jpas orasione: «Dios kuʼun, vuleso ta ajol li kʼusi spasojik li Tobias+ xchiʼuk Sanbalate, jech xtok, vuleso ta ajol li meʼ j-alkʼop Noadias xchiʼuk li yan j-alkʼopetik ti nopajtik noʼox tskʼan tsibtasikune».

15 Jech oxal, tsuts ta skʼakʼalil 25 yuʼun elul* li muroe, tsuts ta 52 kʼakʼal.

16 Kʼalal kʼot ta xchikin skotol li kajkontrakutike xchiʼuk kʼalal laj yilik li mukʼtik lumetik te ta jpat jxokonkutike, kʼexavik tajek+ xchiʼuk laj yakʼik venta ti laj yichʼ pasel li abtelal ta skoj ti koltavan li Dios kuʼunkutike. 17 Li vaʼ kʼakʼale, li bankilaletik+ ta Judae la stakbeik batel epal karta li Tobiase, vaʼun la stakʼ sutel li Tobiase. 18 Ep li buchʼutik te oyik ta Judae laj yalik ta jamal ti tukʼ chakʼ sbaik ta stojolale, yuʼun jaʼ sniʼ li Sekanias ti jaʼ xnichʼon Arae,+ li skerem Tobias ti Jeoanan sbie yikʼojbe stseb Mesulam+ ti jaʼ xnichʼon Berekiase. 19 Jech xtok, nopolik noʼox lekik kʼusi chalbeikun ta stojolal, vaʼun chbat yalbeik skotol li kʼusi chkale. Li Tobias une tstak talel kartaetik sventa tsibtasun.+

7 Kʼalal tsuts xchaʼvaʼanel li muroe,+ laj kakʼbe li stiʼtake,+ vaʼun laj yichʼik biiltasel li jchabiej ochebaletike,+ li jkʼejimoletike+ xchiʼuk li jlevietike.+ 2 Vaʼun, laj kakʼbe sbain Jerusalen li jchiʼil ta vokʼel ti Anani+ sbie xchiʼuk li Ananias ti jaʼ bankilal li ta Snail Soltaroetike.+ Yuʼun jaʼ jun vinik ti xuʼ lek jpat koʼontontik ta stojolale xchiʼuk ti xiʼtaoj* li melel Diose,+ jaʼ mu sta li yantike. 3 Jaʼ yuʼun, xi laj kalbeike: «Jaʼ to chichʼ jamel ochebaletik ta Jerusalen mi kʼixnaj xa lek li kʼakʼale. Kʼalal jaʼo te vaʼalik li jchabivanejetike, skʼan sbajik li stiʼtake xchiʼuk akʼo xkʼuxtaik.* Jaʼ chichʼik vaʼanel ta jchabivanejetik li jnaklejetik ta Jerusalene, te chvaʼiik ti bu ch-albatike xchiʼuk te chvaʼiik ta yeloval snaik ta jujuntal». 4 Li jteklume lek jamal xchiʼuk lek mukʼ, pe muʼyuk ep krixchanoetik te+ xchiʼuk muʼyuk toʼox chaʼvaʼanbil li naetike.

5 Pe li Jdiose laj yakʼ ta koʼonton ti jtsob li bankilaletike, li itsʼinal jpasmantaletike xchiʼuk li jteklum sventa stsak sbiik li ta slistail jujuchop utsʼ alaliletike.+ Te une, la jtabe li slivroal ti bu oy sbiik ta lista li jujuchop utsʼ alaliletik ti baʼyel muyik tale, xi tsʼibabil la jtae:

6 «Liʼe jaʼ li judaetik ta jteklum* ti lokʼik tal ti ikʼbilik toʼox batel yuʼun li Nabukodonosor+ ti jaʼ ajvalil ta Babiloniae xchiʼuk ta mas tsʼakale, sutik batel+ ta Jerusalen xchiʼuk ta Juda, te batik ta slumalik ti bu likemik ta jujuntale.+ 7 Liʼe jaʼ li buchʼutik la xchiʼinik sutel li Sorobabele:+ Jesua,+ Neemias, Asarias, Raamias, Naamani, Mardokeo, Bilsan, Misperet, Bigvai, Neum xchiʼuk Baana.

»Liʼe jaʼ li jayvoʼ j-israel viniketik ti sutik tale:+ 8 li xnichʼnabtak Parose jaʼ 2,172; 9 li xnichʼnabtak Sefatiase jaʼ 372; 10 li xnichʼnabtak Arae+ jaʼ 652; 11 li snitilulal Paat-Moab+ ta xnichʼnab Jesua xchiʼuk Joabe+ jaʼ 2,818; 12 li xnichʼnabtak Elame+ jaʼ 1,254; 13 li xnichʼnabtak Satue jaʼ 845; 14 li xnichʼnabtak Sakaie jaʼ 760; 15 li xnichʼnabtak Binuie jaʼ 648; 16 li xnichʼnabtak Bebaie jaʼ 628; 17 li xnichʼnabtak Asgade jaʼ 2,322; 18 li xnichʼnabtak Adonikame jaʼ 667; 19 li xnichʼnabtak Bigvaie jaʼ 2,067; 20 li xnichʼnabtak Adine jaʼ 655; 21 li snitilulal Ater ta xnichʼnab Esekiase jaʼ 98; 22 li xnichʼnabtak Asume jaʼ 328; 23 li xnichʼnabtak Besaie jaʼ 324; 24 li xnichʼnabtak Arife jaʼ 112; 25 li xnichʼnabtak Gabaone+ jaʼ 95; 26 li viniketik ta Belen xchiʼuk ta Netofae jaʼ 188; 27 li viniketik ta Anatote+ jaʼ 128; 28 li viniketik ta Bet-Asmavete jaʼ 42; 29 li viniketik ta Kiryat-Jearim,+ Kefira xchiʼuk Beerote+ jaʼ 743; 30 li viniketik ta Rama xchiʼuk ta Guebae+ jaʼ 621; 31 li viniketik ta Mikmase+ jaʼ 122; 32 li viniketik ta Betel+ xchiʼuk ta Aie+ jaʼ 123; 33 li viniketik ta yan Neboe jaʼ 52; 34 li xnichʼnabtak yan Elame jaʼ 1,254; 35 li xnichʼnabtak Arime jaʼ 320; 36 li jnaklejetik ta Jerikoe jaʼ 345; 37 li xnichʼnabtak Lod, Adid xchiʼuk Onoe+ jaʼ 721; 38 li xnichʼnabtak Senaae jaʼ 3,930.

39 »Li paleetike+ jaʼik liʼe: li xnichʼnabtak Jedaya li ta yutsʼ yalal Jesuae jaʼ 973; 40 li xnichʼnabtak Imere jaʼ 1,052; 41 li xnichʼnabtak Pasjure+ jaʼ 1,247; 42 li xnichʼnabtak Arime+ jaʼ 1,017.

43 »Li jlevietike+ jaʼik liʼe: li xnichʼnabtak Jesua xchiʼuk Kadmiel+ ti jaʼ snitilulal Odevae jaʼ 74. 44 Li jkʼejimoletike+ jaʼik liʼe: li xnichʼnabtak Asafe+ jaʼ 148. 45 Li jchabiej ochebaletike+ jaʼik liʼe: li xnichʼnabtak Salume, li xnichʼnabtak Atere, li xnichʼnabtak Talmone, li xnichʼnabtak Akube,+ li xnichʼnabtak Atitae xchiʼuk li xnichʼnabtak Sobaie jaʼ 138.

46 »Li buchʼutik chtunik ta temploe*+ jaʼik liʼe: li xnichʼnabtak Silae, li xnichʼnabtak Asufae, li xnichʼnabtak Tabaote, 47 li xnichʼnabtak Kerose, li xnichʼnabtak Siae, li xnichʼnabtak Padone, 48 li xnichʼnabtak Lebanae, li xnichʼnabtak Agabae, li xnichʼnabtak Salmaie, 49 li xnichʼnabtak Anane, li xnichʼnabtak Guidele, li xnichʼnabtak Gaare, 50 li xnichʼnabtak Reayae, li xnichʼnabtak Resine, li xnichʼnabtak Nekodae, 51 li xnichʼnabtak Gasame, li xnichʼnabtak Usae, li xnichʼnabtak Paseae, 52 li xnichʼnabtak Besaie, li xnichʼnabtak Meunime, li xnichʼnabtak Nefusesime, 53 li xnichʼnabtak Bakbuke, li xnichʼnabtak Akufae, li xnichʼnabtak Arure, 54 li xnichʼnabtak Baslite, li xnichʼnabtak Meidae, li xnichʼnabtak Arsae, 55 li xnichʼnabtak Barkose, li xnichʼnabtak Sisarae, li xnichʼnabtak Temae, 56 li xnichʼnabtak Nesiase xchiʼuk li xnichʼnabtak Atifae.

57 »Li xnichʼnabtak yajtuneltak Salomone+ jaʼik liʼe: li xnichʼnabtak Sotaie, li xnichʼnabtak Soferete, li xnichʼnabtak Peridae, 58 li xnichʼnabtak Jaalae, li xnichʼnabtak Darkone, li xnichʼnabtak Guidele, 59 li xnichʼnabtak Sefatiase, li xnichʼnabtak Jatile, li xnichʼnabtak Pokeret-Asebaime xchiʼuk li xnichʼnabtak Amone. 60 Ta skotol li buchʼutik chtunik ta temploe*+ xchiʼuk li xnichʼnabtak yajtuneltak Salomone jaʼ 392.

61 »Li buchʼutik lokʼik tal li ta Tel-Mela, ta Tel-Arsa, ta Kerub, ta Adon xchiʼuk ta Imere, ti muʼyuk sprevail yuʼunik ti bu li yutsʼ yalal stotike xchiʼuk ti bu likemike, ti mu stakʼ naʼel mi jaʼ j-israeletike,+ jaʼik liʼe: 62 li xnichʼnabtak Delayae, li xnichʼnabtak Tobiase, li xnichʼnabtak Nekodae jaʼ 642. 63 Yan li xnichʼnabtak paleetike jaʼ liʼe: li xnichʼnabtak Abayae, li xnichʼnabtak Akose,+ li xnichʼnabtak Barsilaie, ti laj yikʼbe stseb li Barsilai+ ti jaʼ jgalaad vinike, ti jaʼ li buchʼu laj yichʼbe sbi smolniʼe.* 64 Taje la sabeik sbi yutsʼ yalalik ta svunal, pe muʼyuk laj yichʼ tael, jaʼ yuʼun albatik ti mu xa xuʼ xtunik ta paleale.*+ 65 Albatik yuʼun ajvalil*+ ti mu stakʼ slajesik li kʼusitik toj chʼulike,+ jaʼ to mi la staik jun pale ti tskʼopon Dios ta Urim xchiʼuk ta Tumime.+

66 »Ti kʼu yepal ta skotolike* jaʼ 42,360,+ 67 taje muʼyuk te tsakal skʼoplal li smosotakike xchiʼuk li skiaratakik+ ti jaʼik 7,337; jech xtok, oy 245 jkʼejimoletik+ yuʼunik ti oy antsetik xchiʼuk viniketike. 68 Li skaʼike oy 736, li smulaike oy 245, 69 li skameyoike oy 435 xchiʼuk li svuroike oy 6,720.

70 »Junantik joliletik ta jujuchop yutsʼ yalalike la skolta sbaik li ta abtelale.+ Li ajvalile* laj yakʼ jmil ta sep drakma* oro li ta skʼejobil* takʼine, laj yakʼ 50 mukʼta boch xchiʼuk 530 ta lik kʼuʼil pokʼiletik sventa paleetik.+ 71 Oy junantik joliletik ta jujuchop yutsʼ yalalike laj yakʼik 20 mil ta sep drakma oro li ta skʼejobil* takʼin ta sventa li abtelale xchiʼuk laj yakʼik 2,200 mina* plata. 72 Li yantik ta jteklume laj yakʼik 20 mil ta sep drakma oro, chaʼmil mina plata xchiʼuk 67 ta lik kʼuʼil pokʼil sventa paleetik.

73 »Vaʼun, te naki ta steklumalik li paleetike, li jlevietike, li jchabiej ochebaletike, li jkʼejimoletike,+ li junantik krixchanoetik ta jteklume, li buchʼutik chtunik ta temploe* xchiʼuk skotol li yan j-israeletike.+ Kʼalal kʼot li svukubal ue,+ te xa ox nakajtik ta steklumalik li j-israeletike».+

8 Sjunul li jteklume kʼot ta nopel yuʼunik ti tstsob sbaik li ta kaye* ta yeloval li ochebal ti Voʼ+ sbie, vaʼun laj yalbeik li jtsʼibajom* Esdras+ ti akʼo yichʼ tal li slivroal Smantal Moisese,+ ti yakʼojbe Israel li Jeovae.+ 2 Jaʼ yuʼun, li ta baʼyel kʼakʼal ta svukubal ue,+ li Esdras ti jaʼ palee laj yichʼ talel li Mantal ta yeloval ti bu oy epal* viniketik,+ antsetik xchiʼuk skotol li buchʼutik xuʼ yuʼunik xchikintael xchiʼuk ti xaʼibeik smelolale. 3 Tsots laj yapta+ ta yeloval kaye* ti te ta yeloval li ochebal ti Voʼ sbie, lik yaptabe ta sob kʼalal to ta oʼlol kʼakʼal li viniketik, antsetik xchiʼuk skotol li buchʼutik xaʼibeik smelolale; li jteklume la stsʼet chikinta+ lek li slivroal Mantale. 4 Li Esdras ti jaʼ jtsʼibajome te vaʼal li ta luchlebal ti pasbil ta teʼ ti jaʼ sventa li tsobajele. Li ta sbatsʼikʼobe te vaʼal Matitias, Sema, Anaya, Urias, Ilkias xchiʼuk Maaseya, yan li ta stsʼetkʼobe* te vaʼal Pedaya, Misael, Malkiya,+ Asum, As-Badana, Sakarias xchiʼuk Mesulam.

5 Li Esdrase la sjam ta yeloval sat sjunul jteklum li livroe, yuʼun mas toyol vaʼal ta stojolal sjunul li jteklume. Kʼalal la sjame, vaʼi skotolik. 6 Li Esdrase la skʼupil kʼopta li melel Dios Jeovae, jaʼ li mukʼul Diose. Laje, xi la stakʼ sjunul li jteklume: «¡Jechuk!* ¡Jechuk!»,+ te une la stoy muyel skʼobik. Vaʼun, la skejan sbaik ta yeloval Jeova xchiʼuk la spatan sbaik ta lumtik. 7 Li jlevietik ti jaʼik li Jesua, Bani, Serebias,+ Jamin, Akub, Sabetai, Odias, Maaseya, Kelita, Asarias, Josabad,+ Anan xchiʼuk Pelayae la sjambeik smelolal Mantal kʼalal jaʼo te vaʼajtik li jteklume.+ 8 Jech-o tsots laj yaptaik li livro ti jaʼ Smantal li melel Diose, lek jamal xchiʼuk lek tsʼakal la sjambeik smelolal. Jaʼ jech la skoltaik li krixchanoetik sventa xaʼibeik smelolal li kʼusi yakal chaptaike.+

9 Li Neemias ti jaʼ toʼox ajvalil* li vaʼ kʼakʼale, li Esdras+ ti jaʼ pale xchiʼuk jtsʼibajome xchiʼuk li jlevietik ti yakal chchanubtasik li krixchanoetike xi laj yalbeik sjunul li jteklume: «Li avie, chʼul kʼakʼal chil li Jeova ti jaʼ Adiosike.+ Mu xavat tajek avoʼontonik xchiʼuk mu xa-okʼik». Yuʼun skotol li krixchanoetike okʼik kʼalal laj yaʼiik kʼusi chal li Mantale. 10 Xi albatik yuʼun li Neemiase: «Batanik, bat lajesik li kʼusitik lekike,* uchʼanik li kʼusitik chiʼe xchiʼuk takbeik batel sveʼel+ li buchʼutik muʼyuk kʼusi smeltsanojike, yuʼun li avie chʼul kʼakʼal chil li Kajvaltike, mu xavul avoʼontonik, yuʼun jaʼ chkʼot ta atsatsal pojobbailik li kuxetel oʼontonal chakʼ tal Jeovae». 11 Li jlevietike xi la spajtsanik sjunul li jteklume: «¡Tsʼijlanik!, mu xavul avoʼontonik. Yuʼun chʼul kʼakʼal li avie». 12 Jaʼ yuʼun, bat veʼuk sjunul li jteklume, bat uchʼbolajikuk xchiʼuk bat stakbeik batel sveʼel yantik xchiʼuk xkuxet tajek yoʼontonik.+ Yuʼun laj yaʼibeik smelolal li kʼusi albatike.+

13 Ta yokʼomal une, li joliletik ta jujuchop yutsʼ yalalik ta sjunul jteklume, li paleetike xchiʼuk li jlevietike la stsob sbaik batel ta xokon Esdras ti jaʼ jtsʼibajome, sventa sta mas spʼijilik ta sventa li kʼusi chal li Mantale. 14 Vaʼun, te tsʼibabil la staik li mantal yaloj Jeova ta stojolal Moises ti skʼan xnakiik ta axibalnaetik* ta yorail kʼin ta svukubal u+ li j-israeletike. 15 Jech xtok, skʼan xi xlokʼ mantal yuʼunike+ xchiʼuk ti xalik batel ta skotol slumalik xchiʼuk ta sjunul Jerusalene: «Batanik li ta vitstikaltike, bat ichʼik tal skʼob oliva teʼ ti oy yanale, skʼob toj, skʼob mirto teʼ, skʼob xan xchiʼuk skʼobtak yan teʼetik sventa xichʼ pasel li axibalnaetik jech kʼuchaʼal tsʼibabile».

16 Jaʼ yuʼun, bat li jteklume xchiʼuk laj yichʼik tal sventa spasik li axibalnaetike, te ta sjol sna stukik la spasik, ta yamakʼik* xchiʼuk ta yamakʼil sna li melel Diose,+ ti bu oy ep krixchanoetik* li ta ochebal ti Voʼ+ sbie xchiʼuk li ta skayeal li ochebal ti Efrain+ sbie. 17 Skotol li buchʼutik* sutik talel ti chukbilik toʼoxe la spasik li axibalnaetike xchiʼuk te nakiik li ta axibalnaetike, yuʼun ta skʼakʼalil xa onoʼox Josue+ xnichʼon Nun ti muʼyuk jech yakal tspasik talel li j-israeletike. Jaʼ yuʼun, xkuxet tajek yoʼontonik.+ 18 Jujun kʼakʼal laj yichʼ aptael li slivroal Smantal melel Diose,+ lik ta baʼyel kʼakʼal kʼalal to ta slajebal kʼakʼal. Vukub kʼakʼal jalij li kʼine xchiʼuk laj yichʼ pasel jun tsobajel ti tsots skʼoplal li ta xvaxakibal kʼakʼal jech kʼuchaʼal skʼan pasele.+

9 Li ta skʼakʼalil 24 li ta u taje, la stsob sbaik li j-israeletike, la spasik ayuno,* la slapik chʼixal kʼuʼil* xchiʼuk la svij pukuk* ta sjolik.+ 2 Vaʼun, la xchʼak sbaik ta stojolal skotol jyanlumetik+ li buchʼutik jaʼik stsʼunbal j-israeletike, vaʼiik xchiʼuk laj yal ta jamal li smulike xchiʼuk li spaltailtak* stotike.+ 3 Laje, te vaʼiik ta yavilik xchiʼuk tsots aptabatik li slivroal Smantal+ Jeova ti jaʼ Sdiosike, oxib ora jech la spasik xchiʼuk oxib ora xtok laj yal ta jamal smulik xchiʼuk la snijan sbaik ta stojolal li Jeova ti jaʼ Sdiosike.

4 Te vaʼiik ta xluchleb+ jlevietik li Jesua, Bani, Kadmiel, Sebanias, Buni, Serebias,+ Bani xchiʼuk li Kenanie, vaʼun tsots x-avetik ta stojolal li Jeova ti jaʼ Sdiosike. 5 Li jlevietik ti jaʼik li Jesua, Kadmiel, Bani, Asabneya, Serebias, Odias, Sebanias xchiʼuk li Petaiase xi laj yalike: «Vaʼlanik xchiʼuk kʼupil kʼoptaik ta sbatel osil+ li Jeova ti jaʼ Adiosike. Dios kuʼun, akʼo skʼupil kʼoptaik li abie, ti mas to toj echʼ noʼox mukʼe, ti jaʼ mu sta li kʼupil kʼoptael xchiʼuk li bendision chakʼ li krixchanoetike.

6 »Voʼot noʼox atuk, Jeova;+ voʼot la apas li vinajele, jech, voʼot la apas li vinajel ti mas to toyol oye xchiʼuk skotol li soltaroetik tee, li balumile xchiʼuk skotol li kʼusitik te oye, li nabetike xchiʼuk skotol li kʼusitik te oye. Voʼot ta akoj ti kuxulike, jaʼ yuʼun tsnijan sbaik ta atojolal skotol li kʼusitik oy ta vinajele.* 7 Voʼot li Jeova ti melel Diosot ti la atʼuj li Abrane+ xchiʼuk ti la alokʼes tal li ta Ur+ yuʼun jkaldeaetike, vaʼun Abraan+ laj avakʼbe sbi. 8 Laj avil ti tukʼ yoʼonton yakʼoj sba ta atojolale,+ jaʼ yuʼun la apas jun trato xchiʼuk ti chavakʼbe yuʼunin snitilulal+ li yosil jkanaanetike, li j-etetike, li j-amorreoetike, li jperisitaetike, li jebusetike xchiʼuk li jguirgaseoetike, vaʼun kʼot ta pasel avuʼun li kʼusi laj avakʼ ave chapase, yuʼun tukʼot.

9 »Jaʼ yuʼun, laj avil ti oy svokol li jmoltotakutik ta Ejiptoe+ xchiʼuk laj avaʼi ti xvokoletik ta xokon Tsajal nabe. 10 Vaʼun, la apas senyailtak xchiʼuk skʼelobiltak juʼelal ta skontrainel li faraone, skotol li yajtuneltake xchiʼuk skotol li krixchanoetik ta slumale,+ yuʼun anaʼoj ti xtoyetik+ ta stojolal li jmoltotakutike. Laj avakʼ ta ojtikinel abi ti jech-o lek ojtikinbil li avie.+ 11 Te skʼelojik kʼalal la achʼak ta oʼlol li nabe, vaʼun ta takin balumil+ echʼ xtuchʼik li nabe xchiʼuk la ajip yalel li yajkontraike, xkoʼolaj kʼuchaʼal jpʼej ton ti chichʼ jipel yalel ta voʼ ti xyukʼlajete.+ 12 Ta jvol tok* la abeiltas ta kʼakʼaltik xchiʼuk ta jvol kʼokʼ* la abeiltas ta akʼobaltik sventa sakjamanuk li be ti bu skʼan xbatike.+ 13 Layal talel ta vits Sinai,+ te la akʼopon yalel tal ta vinajel,+ laj avalbe li kʼusitik kʼotem ta nopel avuʼun ti tukʼike, mantaletik ta sventa li kʼusi melele,* li mantaletik xchiʼuk kʼusitik chapanbile xchiʼuk li lekil mantaletike.+ 14 La achanubtas ti kʼu yelan skʼan xchabiik li skʼakʼalil savado+ sventa chʼuluk xilike, ta stojolal avajtunel Moises laj avakʼbe mantaletik, laj avakʼbe kʼusitik chapanbil xchiʼuk jun mantal. 15 Laj avakʼbe tal spanik ta vinajel kʼalal viʼnajike+ xchiʼuk la alokʼes tal voʼ ta jpʼej tayal ton kʼalal takij yoʼontonike,+ laj avalbe ti akʼo x-ochik xchiʼuk xuʼuninik li balumil ti avaloj ta jamal* chavakʼbee.

16 »Pe jaʼuk li jmoltotakutike la stoy sbaik,+ pimubik ta mantal*+ xchiʼuk muʼyuk la xchikintaik li amantaltake. 17 Muʼyuk la skʼan la xchikintaik+ xchiʼuk la xchʼay ta sjolik li kʼusitik labalik sba la apas ta stojolalike, jaʼ noʼox pimubik ta mantal* xchiʼuk la svaʼanik jun jolil sventa sutik batel ta mosoil li ta Ejiptoe.+ Pe voʼot li Diosot ti chapalot ta yakʼel pertone, oy slekil avoʼonton, oy xkʼuxul avoʼonton, mu ta aniluk chlik skʼakʼal avoʼonton xchiʼuk toj echʼem tukʼil kʼanelal avuʼun,*+ vaʼun muʼyuk la akomtsan.+ 18 Kʼalal la spasik slokʼol chʼiom tot vakax ta unijesbil takʼine xchiʼuk kʼalal xi laj yalike: ‹Liʼe jaʼ li Adios ti laj yikʼot lokʼel tal ta Ejiptoe›,+ toj chopol kʼusitik la spasik, vaʼun laj yakʼik ta ilel ti muʼyuk ichʼvanik ta mukʼe. 19 Akʼo mi jech la spasik, muʼyuk laj avikta stukik ta takixokol balumil+ ta skoj ti ep xkʼuxul avoʼontone. Muʼyuk la achʼak lokʼel ta stojolalik li jvol tok* ti beiltasatik ta kʼakʼaltike xchiʼuk mi jaʼuk la achʼak lokʼel ta stojolalik li jvol kʼokʼ* ti beiltasatik ta akʼobaltik sventa sakjamanuk li be ti bu skʼan xbatike.+ 20 Laj avakʼbe a-espiritu* sventa xavakʼbe li spʼijilike+ xchiʼuk muʼyuk la ajalanbe li manae,+ jech xtok, laj avakʼbe voʼ kʼalal takij yoʼontonike.+ 21 40 jabil laj avakʼbe sveʼelik li ta takixokol balumile.+ Oy yuʼunik skotol. Muʼyuk xlaj li skʼuʼ spokʼike+ xchiʼuk muʼyuk situb li yakanike.

22 »Laj avakʼbe ajvaliletik xchiʼuk jteklumetik, ta jujuvokʼ la achʼakbe,+ jaʼ yuʼun laj yichʼik li yosil Seone,+ jaʼ xkaltik, yosil li ajvalil ta Esbone+ xchiʼuk li yosil Og+ ti jaʼ ajvalil ta Basane. 23 Jech xtok, laj avakʼ ti akʼo x-epaj li skerem stsebik jech kʼuchaʼal li kʼanaletik ta vinajele.+ Laje, laj avikʼ batel li ta balumil ti avakʼoj xa onoʼox ave chavakʼbe li smoltotakike xchiʼuk ti chuʼuninike.+ 24 Vaʼun, ochik li yalab xnichʼnabike xchiʼuk laj yuʼuninik li balumile,+ te skʼelojik ti la apas ta mantal li jkanaanetik+ ti jaʼ toʼox te nakalik li ta balumile. Jech xtok, laj avakʼbe ta skʼob yalab xnichʼnabik li ajvaliletike xchiʼuk li jteklumetik ta balumil sventa spasbeik li kʼusi tskʼan yoʼontonike. 25 Laj yuʼuninik li jteklumetik ti joyobtabil ta muroe+ xchiʼuk li jun balumil ti lek xchʼi kʼusitike,+ laj yuʼuninik li naetik ti noj ta jeltos kʼusitik lekike, posoetik ti jombil xae, ti bu tsʼunajtik uvae, ti bu tsʼunajtik oliva teʼetike+ xchiʼuk ep ta tos teʼetik ti chakʼ lek sate. Jaʼ yuʼun, la slajesik, noj lek xchʼutik, jupʼik xchiʼuk la skʼupinik ti toj echʼ xa noʼox li slekil avoʼontone.

26 »Akʼo mi jech, muʼyuk la xchʼunik mantal xchiʼuk lik stoy sbaik ta atojolal+ xchiʼuk la svalopatinik komel li Amantale.* La smilik li avaj-alkʼoptak ti pʼijubtasvanik sventa sutik talel ta atojolale xchiʼuk la spasik li kʼusi chopol ti jech laj yakʼik ta ilel ti muʼyuk ch-ichʼvanik ta mukʼe.+ 27 Ta skoj taje, laj avakʼ ta skʼob li yajkontratakik+ ti jaʼ akʼbat svokolike.+ Pe la skʼanik vokol ta atojolal kʼalal jaʼo laj yil svokolike xchiʼuk ta vinajel to laj avaʼibe li skʼopike. Jech xtok, ta skoj ti oy xkʼuxul avoʼontone, la atakbe tal li buchʼutik xuʼ xpojatik lokʼel ta skʼob li yajkontratakike.+

28 »Pe kʼalal jaʼo jun xa yoʼontonik chaʼiike, tspasik yan velta li kʼusi chopol chavile,+ vaʼun chavakʼ ta skʼob yajkontraik ti jaʼ tspasatik ta mantale.*+ Laj une, jaʼo tsutik talel ta atojolal, xvokoletik tskʼanbeikot koltael.+ Te to ta vinajel chachikintabe tal li skʼopike xchiʼuk ep ta velta la akolta ta skoj li xkʼuxul avoʼontone.+ 29 Akʼo mi la apʼijubtas sventa sutik talel ta stojolal li Amantale, mas to la stoy-o sbaik xchiʼuk muʼyuk la skʼan xchikintaik li amantaltake;+ la saʼ smulik ta stojolal li amantaltake xchiʼuk li kʼusitik chapanbil avuʼun ti jaʼ tsta-o xkuxlejal li buchʼu chchʼune.+ Pe la svalopatinikot komel xchiʼuk lik stoy sbaik,* vaʼun muʼyuk la skʼan la xchikintaik. 30 Ta epal jabiletik laj avakʼbe ta ilel smalael avuʼun+ xchiʼuk la atojobtas ta ajuʼel ta stojolal li j-alkʼopetike, pe muʼyuk la skʼan la xchikintaik. Laj une, laj avakʼ ta skʼob li jteklumetik ta spat xokonike.+ 31 Ta skoj ti toj echʼ xa noʼox xkʼuxul avoʼontone, muʼyuk laj avakʼbe slajeb+ xchiʼuk muʼyuk laj avikta, yuʼun oy slekil avoʼonton xchiʼuk jkʼuxubinvanej Diosot.+

32 »Avi une, Dios kuʼunkutik ti echʼem amukʼule, ti toj echʼem atsatsale xchiʼuk ti toj labal abae, ti mu xchʼay ta ajol li atratoe xchiʼuk ti avakʼoj ta ilel li tukʼil kʼanelale.+ Teuk ta ajol li vokolil jnuptanojkutike, li kʼusi snuptanoj li ajvalil kuʼunkutike, li bankilaletik kuʼunkutike,+ li paleetik kuʼunkutike,+ li j-alkʼopetik kuʼunkutike,+ li jmoltotakutike xchiʼuk skotol li ateklumale, ti lik yil svokolik leʼ toʼox ta skʼakʼalil ajvaliletik ta Asiria+ kʼalal to li avie. 33 Tukʼ avakʼoj aba ta jtojolalkutik akʼo mi jech jnuptanojkutik, yuʼun tukʼ avakʼoj aba, yan li voʼonkutike toj chopol li kʼusi jpasojkutike.+ 34 Li ajvalil kuʼunkutike, li bankilaletik kuʼunkutike, li paleetik kuʼunkutike xchiʼuk li jmoltotakutike muʼyuk la xchʼunik li Amantale mi jaʼuk la stsʼet chikintaik li amantaltake xchiʼuk li pʼijubtaseletik laj avakʼanbee. 35 Kʼalal jaʼo ch-ajvalilajik xchiʼuk kʼalal la skʼupinik ti mu albajuk li slekil avoʼontone xchiʼuk kʼalal laj avakʼbe li balumil ti lek jamal xchiʼuk ti bu lek kʼusi xchʼie, muʼyuk xtunik ta atojolal+ xchiʼuk muʼyuk laj yiktaik spasel li kʼusitik chopole. 36 Li avie, liʼ mosoinbilunkutike,+ jech, mosoinbilunkutik li ta balumil laj avakʼbe jmoltotakutik sventa slajesbeik sat skotol li kʼusitik lekik chakʼ li balumile. 37 Li kʼusitik chakʼ balumil ti ep tajeke jaʼ sventa li ajvaliletik ti laj avakʼ sventainunkutik ta skoj li jmulkutike.+ Jaʼ tspasunkutik ta mantal* xchiʼuk jaʼ tspas ta mantal li jtsʼunbal chonbolomkutik jech kʼuchaʼal tskʼan yoʼontonike xchiʼuk solel ta jvul tajek koʼontonkutik.

38 »Jaʼ yuʼun, ta skoj ti jech kʼotem ta jtojolalkutike, ta jpaskutik jun trato+ ti tsʼibabiluk xkome xchiʼuk ti oyuk sbalil xkom ta skoj ti chakʼbeik seyoal li bankilaletik kuʼunkutike, li jlevietik kuʼunkutike xchiʼuk li paleetik kuʼunkutike».+

10 Li buchʼutik laj yakʼ seyoik+ sventa oyuk sbalil xkome jaʼik liʼe:

9 Te oy li jlevietik eke, jaʼik liʼe: Jesua xnichʼon Asanias, Binui ti jaʼ li ta xnichʼnabtak Enadade, Kadmiel+ 10 xchiʼuk li xchiʼiltak ti jaʼik li Sebanias, Odias, Kelita, Pelaya, Anan, 11 Mika, Reob, Asabias, 12 Sakur, Serebias,+ Sebanias, 13 Odias, Bani xchiʼuk Beninu.

14 Li joliletik ta jteklume jaʼ liʼe: Paros, Paat-Moab,+ Elam, Satu, Bani, 15 Buni, Asgad, Bebai, 16 Adonias, Bigvai, Adin, 17 Ater, Esekias, Asur, 18 Odias, Asum, Besai, 19 Arif, Anatot, Nebai, 20 Magpias, Mesulam, Esir, 21 Mesesabel, Sadok, Jadua, 22 Pelatias, Anan, Anaya, 23 Osea, Ananias, Asub, 24 Aloes, Pila, Sobek, 25 Reum, Asabna, Maaseya, 26 Aiya, Anan, Janan, 27 Maluk, Arim xchiʼuk Baana.

28 Skotol li yantik ta jteklume, jaʼ xkaltik, li paleetike, li jlevietike, li jchabiej ochebaletike, li jkʼejimoletike, li buchʼutik chtunik ta temploe* xchiʼuk skotol li buchʼutik la xchʼak sbaik lokʼel li ta lumetik ta spat xokonik sventa xchʼunbeik smantal li melel Diose,+ ti te oy li yajnilike, li skeremik xchiʼuk stsebike, skotol li buchʼutik xojtikinik xae xchiʼuk xaʼibeik xa smelolale,* 29 la snapʼan sbaik ta stojolal li xchiʼilike, li viniketik ti tsots yabtel yuʼunike xchiʼuk laj yakʼ yeik ti akʼo oyuk kʼusi chopol xkʼot ta stojolalik mi muʼyuk la xchʼunbeik li smantal Jeova ti jaʼ Kajvaltik xchiʼuk ti jaʼ melel Diose, taje jaʼ li mantal laj yakʼbe Moises ti jaʼ yajtunel li melel Diose. Jech xtok, laj yakʼ yeik ti akʼo oyuk kʼusi chopol xkʼot ta stojolalik mi muʼyuk la xchʼunbeik lek li smantaltake, li kʼusitik kʼotem ta nopel yuʼune xchiʼuk li kʼusitik yaloje. 30 Xi jamal laj yalike: «Muʼyuk chkakʼbe jtsebtik li lumetik ti oy ta jpat jxokontike xchiʼuk muʼyuk chkakʼbetik yikʼ jkeremtik+ li stsebetakike.

31 »Mi chtal pʼolmajikuk li lumetik ti oy ta jpat jxokontike xchiʼuk mi chtal xchonik li sat tsʼunobil ta skʼakʼalil savado+ o ta jun chʼul kʼakʼale,+ muʼyuk kʼusi ta jmanbetik. Jech xtok, muʼyuk ta jkʼantik li kʼusitik chlokʼ ta balumil ta svukubal jabile+ xchiʼuk muʼyuk ta jkʼantik sutel skotol li ililetike.+

32 »Jech xtok, laj kakʼ ketik ti chkakʼtik chanib gramo plata* jujun jabil ta sventa li kʼusitik chtun ta sna* li Jdiostike,+ 33 ta sventa li latsbil pane,*+ ta sventa li matanal sat tsʼunobil+ ti chichʼ akʼel jujun kʼakʼale, sventa li chikʼbil matanal ti chichʼ akʼilanel ta savado+ xchiʼuk li ta jujun achʼ lunae,*+ sventa li kʼinetik ti akʼbil yoraile,+ sventa li kʼusitik chʼulike, sventa li matanal yoʼ sta perton+ li Israele xchiʼuk sventa skotol li kʼusi chichʼ pasel ta sna li Jdiostike.

34 »Laj kakʼtik suerte xtok sventa xichʼ naʼel kʼusi ora staoj xchiʼuk bu junukal utsʼ alalil chichʼ tal siʼ ta jujun jabil ta sna li Jdiostike, mi jaʼ li paleetike, li jlevietike o mi jaʼ li jteklume, taje jaʼ sventa chichʼ tunesel li ta skajleb smoton Jeova ti jaʼ Jdiostike, jech kʼuchaʼal tsʼibabil li ta Mantale.+ 35 Jech xtok, jujun jabil chkichʼtik tal ta sna Jeova+ li sba sat kʼusitik lokʼem ta kosiltik ti lek xa yijike xchiʼuk skotol li sba sat jeltos teʼetik ti lek xa yijike. 36 Chkikʼtik talel xtok li sba jnichʼontike xchiʼuk li sba yol jtsʼunbal chonbolomtike,+ li sba yol jvakaxtike xchiʼuk li sba yol jchijtik jech kʼuchaʼal tsʼibabil ta Mantale. Chkichʼbetik tal li paleetik ti te chtunik ta sna li Jdiostike.+ 37 Jech xtok, chkichʼtik tal li arina ti jaʼ to sba velta ta juchʼtik ti vochʼ noʼoxe,+ li matanaletik chkakʼtike, li sba sat skotol jeltos teʼetike,+ li achʼ vinoe xchiʼuk li aseitee,+ skotol taje skʼan xkichʼbetik tal li paleetike, ti butik skʼejobil* ta sna Jdiostike.+ Chkichʼbetik tal jlevietik+ ek jun li ta lajlajuneb* ta skotol li kʼusi chlokʼ ta kosiltike, yuʼun li jlevietike jaʼ tstsobik li kʼusitik chlokʼ ta sjunul jteklumaltik ti bu chijtsʼunolaje.*

38 »Li pale ti jaʼ xnichʼon Aarone skʼan teuk xchiʼuk jlevietik kʼalal tstsobik li jun ta lajlajunebe; li jlevietik eke skʼan te xchʼakik lokʼel jun li ta lajlajuneb sventa xakʼik ta matanal li ta sna Jdiostike,+ li butik skʼejobile.* 39 Yuʼun li j-israeletike xchiʼuk li xnichʼnab jlevietike skʼan te xichʼik talel ti butik skʼejobil* matanal+ li sat tsʼunobile, li achʼ vinoe xchiʼuk li aseitee,+ yuʼun jaʼ te oy li kʼusitik chtun ta temploe xchiʼuk te oyik ek li paleetik ti te chtunike, li jchabiej ochebaletike xchiʼuk li jkʼejimoletike. Skʼan jtukʼulantik li sna Jdiostike».+

11 Li bankilaletik yuʼun jteklume te toʼox nakalik ta Jerusalen;+ pe li yantik ta jteklume laj yakʼik suerte+ sventa xikʼik tal nakluk ta Jerusalen jun li ta lajlajunvoʼe, ti akʼo xtalik li ta chʼul jteklume, pe li yan balunvoʼe te komik ta naklej ta yan jteklumetik. 2 Jech xtok, li jteklume ta sjunul yoʼonton la skʼupil kʼoptaik skotol li viniketik ti lokʼ ta yoʼonton bat nakiikuk ta Jerusalene.

3 Liʼe jaʼ li joliletik ta jteklumetik ti nakiik ta Jerusalene. (Li yantik ta Israele, li paleetike, li jlevietike, li buchʼutik chtunik ta temploe*+ xchiʼuk li xnichʼnab yajtuneltak Salomone+ nakiik ta yan jteklumetik ta Juda, te nakiik ta yosil stukik li ta steklumalike.+

4 Jech xtok, te nakiik ta Jerusalen jayvoʼ li snitilulal Juda xchiʼuk Benjamine). Li snitilulal Judae jaʼik li Ataya ti jaʼ xnichʼon Usiase, li Usiase jaʼ xnichʼon Sakarias, li Sakariase jaʼ xnichʼon Amarias, li Amariase jaʼ xnichʼon Sefatias, li Sefatiase jaʼ xnichʼon Maalalel li ta yutsʼ yalal Perese+ 5 xchiʼuk li Maaseya ti jaʼ xnichʼon Baruke, li Baruke jaʼ xnichʼon Kolose, li Kolosee jaʼ xnichʼon Asaya, li Asayae jaʼ xnichʼon Adaya, li Adayae jaʼ xnichʼon Joiarib, li Joiaribe jaʼ xnichʼon Sakarias li ta yutsʼ yalal Selae. 6 Ta skotol li xnichʼnab Peres ti nakiik ta Jerusalene jaʼ 468 viniketik ti lek tsots yipike.

7 Liʼe jaʼ li snitilulal Benjamine: Salu+ ti jaʼ xnichʼon Mesulame, li Mesulame jaʼ xnichʼon Joed, li Joede jaʼ xnichʼon Pedaya, li Pedayae jaʼ xnichʼon Kolaya, li Kolayae jaʼ xnichʼon Maaseya, li Maaseyae jaʼ xnichʼon Itiel, li Itiele jaʼ xnichʼon Jesaya 8 xchiʼuk te oy ek li Gabai xchiʼuk Salaie, ta skotolike jaʼ 928 viniketik; 9 li Joel ti jaʼ xnichʼon Sikrie jaʼ jkʼelvanej yuʼunik, li Juda ti jaʼ xnichʼon Asenuae jaʼ li xchaʼvoʼal jkʼelvanej ta jteklume.

10 Li paleetike jaʼik liʼe: Jedaya ti jaʼ xnichʼon Joiaribe, Jakin,+ 11 Seraya ti jaʼ xnichʼon Ilkiase, li Ilkiase jaʼ xnichʼon Mesulam, li Mesulame jaʼ xnichʼon Sadok, li Sadoke jaʼ xnichʼon Merayot, li Merayote jaʼ xnichʼon Aitub+ ti jaʼ jnitvanej li ta sna* melel Diose 12 xchiʼuk li xchiʼiltakik ti te tunik ta temploe, ta skotolik taje jaʼ 822. Te skʼoplal ek li Adaya ti jaʼ xnichʼon Jeroame, li Jeroame jaʼ xnichʼon Pelalias, li Pelaliase jaʼ xnichʼon Amsi, li Amsie jaʼ xnichʼon Sakarias, li Sakariase jaʼ xnichʼon Pasjur,+ li Pasjure jaʼ xnichʼon Malkiya 13 xchiʼuk li xchiʼiltakik ti jaʼ joliletik ta jujuchop yutsʼ yalalike, ta skotolike jaʼ 242. Te skʼoplal ek li Amaxai ti jaʼ xnichʼon Asarele, li Asarele jaʼ xnichʼon Asai, li Asaie jaʼ xnichʼon Mesilemot, li Mesilemote jaʼ xnichʼon Imer 14 xchiʼuk li xchiʼiltakik ti tsots yipik xchiʼuk ti tsots yoʼontonike, ta skotolike jaʼ 128. Li jkʼelvanej yuʼunike jaʼ Sabdiel ti likem tal ta jun utsʼ alalil ti lek ojtikinbile.

15 Li jlevietike jaʼik liʼe: Semaya+ (xnichʼon Asub, li Asube jaʼ xnichʼon Asrikam, li Asrikame jaʼ xnichʼon Asabias, li Asabiase jaʼ xnichʼon Buni), 16 Sabetai+ xchiʼuk Josabad.+ Li joliletik yuʼun li jlevietike jaʼik Sabetai xchiʼuk Josabad ti jaʼ sbainojik li kʼusitik ta spat xokon li sna melel Diose. 17 Te skʼoplal ek li Matanias+ ti jaʼ xnichʼon Mikease, li Mikease jaʼ xnichʼon Sabdi, li Sabdie jaʼ xnichʼon li Asaf+ ti jaʼ bankilal jnitvanej ta kʼejoj xchiʼuk jaʼ tskʼupil kʼopta Dios kʼalal chichʼ pasel orasione,+ te oy ek li Bakbukias ti jaʼ yajkoltavaneje xchiʼuk te oy ek li Abda ti jaʼ xnichʼon Samuae, li Samuae jaʼ xnichʼon Galal, li Galale jaʼ xnichʼon Jedutun.+ 18 Ta skotol li jlevietik ti te oyik ta chʼul jteklume jaʼ 284.

19 Li jchabiej ochebaletike jaʼik li Akub, Talmon+ xchiʼuk li xchiʼiltakike, ta skotolike jaʼik 172.

20 Li yantik ta Israele, li paleetike xchiʼuk jlevietike te oyik li ta yan jteklumetik ta Judae, li ta yosilik ti jaʼ xrextoik* ta jujuntale. 21 Te nakalik ta Ofel+ li buchʼutik chtunik ta temploe.*+ Li Sia xchiʼuk Guispae jaʼ oy ta sbaik li buchʼutik chtunik ta temploe.*

22 Li jkʼelvanej yuʼun jlevietik ta Jerusalene jaʼ Usi ti jaʼ xnichʼon Banie, li Banie jaʼ xnichʼon Asabias, li Asabiase jaʼ xnichʼon Matanias,+ li Mataniase jaʼ xnichʼon Mika li ta xnichʼnab Asaf ti jaʼ jkʼejimoletike; taje jaʼ oy ta sba li abtelal ta sna melel Diose. 23 Yuʼun oy kʼusi yaloj+ ajvalil ta sventa li jkʼejimoletike xchiʼuk albil kʼu yepal ti oy kʼusi chichʼik akʼbel sventa oyuk yuʼunik jujun kʼakʼal li kʼusi chtun yuʼunike. 24 Li Petaias ti jaʼ xnichʼon Mesesabel li ta xnichʼnab Sera ti jaʼ xnichʼon Judae jaʼ yajtojobtasvanej* ajvalil ta skotol li kʼusitik te ta jteklume.

25 Liʼe jaʼ slistail li jteklumetik xchiʼuk li bikʼtal lumetik ti te noʼox nopajtike: junantik li snitilulal Judae te nakiik ta Kiryat-Arba+ xchiʼuk li ta bikʼtal lumetik ti te noʼox nopajtike, ta Dibon xchiʼuk li ta bikʼtal lumetik ti te noʼox nopajtike xchiʼuk ta Jekabseel+ xchiʼuk li ta bikʼtal lumetik yuʼune, 26 ta Jesua, ta Molada,+ ta Bet-Pelet,+ 27 ta Asar-Sual,+ ta Beer-Seba xchiʼuk li ta bikʼtal lumetik ti te noʼox nopajtike, 28 ta Siklag,+ ta Mekona xchiʼuk li ta bikʼtal lumetik ti te noʼox nopajtike, 29 ta En-Rimon,+ ta Sora+ xchiʼuk ta Jarmut, 30 ta Sanoa,+ ta Adulam xchiʼuk li ta bikʼtal lumetik yuʼune, ta Lakis+ xchiʼuk li ta yosilike, ta Aseka+ xchiʼuk li ta bikʼtal lumetik ti te noʼox nopajtike. Te kʼot nakiikuk* ta Beer-Seba kʼalal to ta stenlejaltik Inon.+

31 Li snitilulal Benjamine nakiik ta Gueba,+ Mikmax, Ai, Betel+ xchiʼuk li ta bikʼtal lumetik ti te noʼox nopajtike, 32 Anatot,+ Nob,+ Anania, 33 Asor, Rama,+ Guitaim, 34 Adid, Seboim, Nebalat, 35 Lod xchiʼuk Ono,+ li stenlejaltik ti bu oyik li buchʼutik xtojobik lek spasel kʼusitike. 36 Oy jayvokʼuk jlevietik ta Judae bat nakiikuk ta yosilal Benjamin.

12 Li paleetik xchiʼuk jlevietike la xchiʼinik muyel li Jesua+ xchiʼuk li Sorobabel+ ti jaʼ xnichʼon Sealtiele,+ li paleetike jaʼik liʼe: Seraya, Jeremias, Esdras, 2 Amarias, Maluk, Atus, 3 Sekanias, Reum, Meremot, 4 Ido, Guinetoi, Abias, 5 Mijamin, Maadias, Bilga, 6 Semaya, Joiarib, Jedaya, 7 Salu, Amok, Ilkias xchiʼuk Jedaya. Taje jaʼ li joliletik yuʼun paleetik xchiʼuk li xchiʼiltakik li ta skʼakʼalil Jesuae.

8 Li jlevietike jaʼik li Jesua, Binui, Kadmiel,+ Serebias, Juda xchiʼuk Mataniase.+ Li Matanias xchiʼuk xchiʼiltake jaʼ toʼox bankilal jnitvanejetik ta kʼejoj sventa stojel ta vokol. 9 Li xchiʼiltakik ti jaʼik li Bakbukias xchiʼuk Unie te vaʼiik ta yelovalik kʼalal tspas li yabtelik ta chabivaneje.* 10 Li xnichʼon Jesuae jaʼ Joiakim, li xnichʼon Joiakime jaʼ Eliasib,+ li xnichʼon Eliasibe jaʼ Joiada.+ 11 Li xnichʼon Joiadae jaʼ Jonatan, li xnichʼon Jonatane jaʼ Jadua.

12 Li ta skʼakʼalil Joiakime, liʼe jaʼik li paleetike, li joliletik ta jujuchop yutsʼ yalalike: ta sventa li Serayae,+ jaʼ li Merayae; ta sventa li Jeremiase, jaʼ li Ananiase; 13 ta sventa li Esdrase,+ jaʼ li Mesulame; ta sventa li Amariase, jaʼ li Jeoanane; 14 ta sventa li Malukie, jaʼ li Jonatane; ta sventa li Sebaniase, jaʼ li Josee; 15 ta sventa li Arime,+ jaʼ li Adnae; ta sventa li Merayote, jaʼ li Elkaie; 16 ta sventa li Idoe, jaʼ li Sakariase; ta sventa li Guinetone, jaʼ li Mesulame; 17 ta sventa li Abiase,+ jaʼ li Sikrie; ta sventa li Miniamine, [...];* ta sventa li Moadiase, jaʼ li Piltaie; 18 ta sventa li Bilgae,+ jaʼ li Samuae; ta sventa li Semayae, jaʼ li Jeonatane; 19 ta sventa li Joiaribe, jaʼ li Matenaie; ta sventa li Jedayae,+ jaʼ li Usie; 20 ta sventa li Salaie, jaʼ li Kalaie; ta sventa li Amoke, jaʼ li Ebere; 21 ta sventa li Ilkiase, jaʼ li Asabiase; ta sventa li Jedayae, jaʼ li Netanele.

22 Li joliletik ta jujuchop yutsʼ yalalik li jlevietik ta skʼakʼalil Eliasib, Joiada, Joanan xchiʼuk Jaduae+ te tsʼibabil sbiik ta vun jech kʼuchaʼal tsʼibabil sbiik li paleetike, jaʼ to kʼalal och ta ajvalil li Dario ta Persiae.

23 Li jlevietik ti jaʼ joliletik ta jujuchop yutsʼ yalalike te tsakal sbiik li ta slivroal li kʼusitik kʼotemik ta pasele, jech-o kʼalal to ta skʼakʼalil Joanan ti jaʼ xnichʼon Eliasibe. 24 Li joliletik yuʼun jlevietike jaʼik li Asabias, Serebias, Jesua+ ti jaʼ xnichʼon Kadmiele,+ yan li xchiʼiltakike te vaʼiik ta yelovalik sventa skʼupil kʼoptaik Dios xchiʼuk stojbeik ta vokol jech kʼuchaʼal yaloj mantal li David+ ti jaʼ yajtunel li melel Diose, li jtsop jchabivanejetike te oyik ta yeloval li yan jtsop jchabivanejetike. 25 Li Matanias,+ Bakbukias, Abdias, Mesulam, Talmon xchiʼuk Akube+ te chchabiik ochebaletik, jaʼ chchabibeik stiʼ+ ti butik skʼejobil* kʼusitike. 26 Taje jaʼo te tunik li ta skʼakʼalil Joiakim ti jaʼ xnichʼon Jesuae+ xchiʼuk ti jaʼ smom li Josadake xchiʼuk li ta skʼakʼalil ajvalil Neemias xchiʼuk Esdras+ ti jaʼ pale xchiʼuk jtsʼibajome.*

27 Kʼalal laj yakʼik ta stojolal Dios li smuroaltak Jerusalene, la saʼik li jlevietik ti butik to batemik ta nakleje xchiʼuk laj yikʼik tal ta Jerusalen sventa xmuyubajikuk xakʼik ta stojolal Dios li muroetike, kʼejinik sventa stojik ta vokol,+ la stijik simbalo,* stijobil son ti oy yakʼile xchiʼuk li arpae. 28 Li xnichʼnabtak jkʼejimoletike* te lik stsob sbaik talel ta yosilal Jordan, ta sjoylebal Jerusalen xchiʼuk li ta bikʼtal lumetik yuʼun jnetofaetike,+ 29 ta Bet-Guilgal,+ ta yosilal Gueba+ xchiʼuk ta Asmavet,+ yuʼun te xa ox nakalik ta bikʼtal lumetik ta sjoylebal Jerusalen li jkʼejimoletike. 30 Li paleetik xchiʼuk li jlevietike la sakubtas sbaik, la sakubtasik li jteklume,+ li ochebaletike+ xchiʼuk li muroe.+

31 Vaʼun, laj kikʼik muyel ta sba muro li bankilaletik ta Judae. Jech xtok, la jvaʼan chaʼchop jkʼejimoletik xchiʼuk jtsop krixchanoetik ti xcholet chbatik ta spat ta jujuchop li jkʼejimoletik sventa stojik ta vokole, li jchope xanav batel ta batsʼikʼob li ta sba muro ti chkʼot ta ochebal ti Chikʼobil Kʼaʼep+ sbie. 32 Li Osaya xchiʼuk li j-oʼlol bankilaletik ta Judae te napʼal batik ek, 33 te oy ek li Asarias, Esdras, Mesulam, 34 Juda, Benjamin, Semaya xchiʼuk li Jeremiase. 35 Te oyik ek jayvoʼ li xnichʼnab paleetik ti te yichʼojik li okʼese:+ Sakarias ti jaʼ xnichʼon Jonatane, li Jonatane jaʼ xnichʼon Semaya, li Semayae jaʼ xnichʼon Matanias, li Mataniase jaʼ xnichʼon Mikaya, li Mikayae jaʼ xnichʼon Sakur, li Sakure jaʼ xnichʼon Asaf+ 36 xchiʼuk li xchiʼiltak ti jaʼ li Semaya, Asarel, Milalai, Guilalai, Maai, Netanel, Juda xchiʼuk Ananie, te yichʼojik xtok li stijobil sonetik jech kʼuchaʼal tstunes toʼox li David+ ti jaʼ yajtunel li melel Diose; yan li Esdras+ ti jaʼ jtsʼibajome jaʼ jbabe bat yuʼunik. 37 Te kʼotik li ta ochebal ti Nioʼ+ sbie, te tukʼ muyik batel li ta S-eskalerail+ Steklumal David+ ti te nopol xil li muroe. Vaʼun, xanavik-o muyel, te jelavik ta stsʼel Sna David jaʼ to ti kʼotik li ta ochebal ti Voʼ+ sbi ti te xkom ta slokʼeb kʼakʼale.

38 Li jchop jkʼejimoletik sventa stojel ta vokole jot-o bu* xanavik batel, te tijil libat xchiʼuk li j-oʼlol krixchanoetike, te batik li ta sba muro ti te ta yakʼol li Tayal kʼelob osil ti Orno+ sbie xchiʼuk te jelavik batel li ta Mukʼta Muroe+ 39 xchiʼuk ta sba li ochebal ti Efrain+ sbie xchiʼuk te echʼik li ta ochebal ti Voʼneal Jteklum+ sbie xchiʼuk li ta ochebal ti Choy+ sbie, li ta Tayal kʼelob osil Ananele,+ li ta Tayal kʼelob osil Meae xchiʼuk te jelavik batel li ta ochebal ti Chij+ sbie. Vaʼun, te pajik li ta ochebal ti Jchabivanejetik sbie.

40 Laj une, xchaʼchopal li jkʼejimoletik sventa stojel ta vokole te vaʼiik ta yeloval li sna melel Diose; te livaʼi ek xchiʼuk li j-oʼlol itsʼinal jpasmantaletike 41 xchiʼuk li paleetik ti jaʼik li Eliakim, Maaseya, Miniamin, Mikaya, Elioenai, Sakarias xchiʼuk Ananias ti te yichʼojik li okʼese 42 xchiʼuk Maaseya, Semaya, Eleasar, Usi, Jeoanan, Malkiya, Elam xchiʼuk Eser. Tsots kʼejinik li jkʼejimoletike, jaʼ jkʼelvanej yuʼunik li Israiase.

43 Li vaʼ kʼakʼale, laj yakʼik epal milbil matanal xchiʼuk xmuyubajik,+ yuʼun jaʼ jech laj yakʼ melel Dios ti xkuxet tajek yoʼontonike. Muyubajik ek li antsetike xchiʼuk li alab nichʼnabiletike,+ jaʼ yuʼun ta nom to xaʼiik ti xmuyubajik li ta Jerusalene.+

44 Li vaʼ kʼakʼale, laj yichʼ vaʼanel viniketik li ta skʼejobil* kʼusitik chakʼike,+ li sba sat tsʼunobile+ xchiʼuk li slajlajunebale.*+ Vaʼun, te tskʼejik li kʼusitik chichʼ tsobel+ tal li ta yosilik te ta jteklumetik ti chal ta Mantal+ ti jaʼ sventa chichʼik akʼbel li paleetik xchiʼuk li jlevietike,+ yuʼun oy muyubajel ta Juda ta skoj ti te chtunik li paleetik xchiʼuk li jlevietike. 45 Jaʼ lik spasik li kʼusi akʼbil sbainik yuʼun li Sdiosike xchiʼuk li yabtelik ta sakubtasvaneje, jech lik spasik ek li jkʼejimoletike xchiʼuk li jchabiej ochebaletike, jech kʼuchaʼal yaloj mantal li Davide xchiʼuk li Salomon ti jaʼ xnichʼone. 46 Yuʼun li ta voʼne ta skʼakʼalil David xchiʼuk Asafe, oy toʼox bankilaletik* ta sventa li jkʼejimoletike, li kʼejojetik sventa skʼupil kʼoptael Diose xchiʼuk li stojbel ta vokole.+ 47 Li ta skʼakʼalil Sorobabel+ xchiʼuk Neemiase, sjunul Israel chakʼbeik toʼox sveʼel li jkʼejimoletike+ xchiʼuk li jchabiej ochebaletike,+ jaʼ ti kʼu yepal chtun yuʼunik jujun kʼakʼale. Jech xtok, tskʼejbeik* sparte li jlevietike,+ vaʼun li jlevietik eke tskʼejbeik sparte li snitilulal Aarone.

13 Li vaʼ kʼakʼale, laj yichʼ kʼelbel jteklum+ li slivro Moisese, vaʼun te tsʼibabil la staik ti j-echʼel mu stakʼ x-och ta stsobobbail melel Dios+ li j-ammonetike xchiʼuk li jmoabetike,+ 2 yuʼun muʼyuk laj yichʼik batel pan xchiʼuk voʼ kʼalal ay snupik ta be li j-israeletike, jaʼ noʼox la stojik Balaam sventa xchopol kʼopta+ li j-israeletike. Pe li Jdioskutike la sjoypʼin ta jun bendision li chopol kʼoptaele.+ 3 Kʼalal laj yaʼiik li Mantale, lik xchʼakik lokʼel ta Israel skotol li buchʼutik yan-o stsʼunbalike.*+

4 Akʼo mi jech, kʼalal muʼyuk toʼox jech kʼotem ta pasel taje, li pale ti oy toʼox ta sba skʼelel ti butik chichʼ kʼejel* kʼusitik ta sna* Jdiostike+ jaʼ li Eliasib+ ti jaʼ yutsʼ yalal li Tobiase.+ 5 Li Eliasibe laj yalbe ti xuʼ stunes Tobias li smukʼta kʼejobil* kʼusitike, jaʼ ti bu tskʼejik toʼox li sat tsʼunobiletik ti chakʼik ta matanale, li sakil pome* xchiʼuk li kʼusitik chtune, li slajlajunebal* sat tsʼunobile, li achʼ vinoe xchiʼuk li aseitee,+ ti persa chichʼ akʼbel li jlevietike,+ li jkʼejimoletike xchiʼuk li jchabiej ochebaletike, te toʼox tskʼejik xtok li kʼusitik chichʼ akʼbel li paleetike.+

6 Ti kʼu sjalil taje, muʼyuk te oyun ta Jerusalen, yuʼun libat ta stojolal ajvalil Artajerjes+ ta Babilonia kʼalal 32 xa ox jabil+ yochel ta ajvalile. Te van kʼuk sjaliluk ta tsʼakale, la jkʼanbe ajvalil ti xakʼbun permiso ti xisut batele. 7 Kʼalal livul ta Jerusalene, laj kakʼ venta kʼusi chopol spasoj li Eliasib+ ta skoj li Tobiase,+ yuʼun laj yalbe ti xuʼ stunes li skʼejobil* kʼusitik ti te oy ta yamakʼil* sna melel Diose. 8 Toj chopol laj kaʼi taje, jaʼ yuʼun la jipanbe lokʼel skotol kʼusitik oy yuʼun Tobias li ta skʼejobil* kʼusitike. 9 Laj une, laj kal mantal ti akʼo xchʼubaik li skʼejobil* kʼusitike, vaʼun te laj kakʼ yan velta li kʼusitik chtun te ta sna li melel Diose,+ te laj kakʼ xtok li sat tsʼunobiletik sventa matanale xchiʼuk li sakil pome.+

10 Laj kaʼi xtok ti muʼyuk laj yichʼ akʼbel sparte+ li jlevietike,+ jaʼ yuʼun sut batel ta yosil stukik+ li jlevietik xchiʼuk li jkʼejimoletik ti tspasik toʼox li abtelale. 11 Jech oxal, la jtsak ta utel li itsʼinal jpasmantaletike,+ xi laj kalbeike: «¿Kʼu yuʼun ti muʼyuk la akʼelbeik li sna melel Diose?».+ Vaʼun, la jtsobik* xchiʼuk laj kakʼbe sutel li yabtelike. 12 Sjunul li Judae laj yichʼ talel ta skʼejobil*+ kʼusitik li slajlajunebal+ sat tsʼunobile, li achʼ vinoe xchiʼuk li aseitee. 13 Laj une, laj kakʼbe sventain skʼejobil* kʼusitik li Selemias ti jaʼ palee, li Sadok ti jaʼ jtsʼibajome* xchiʼuk li Pedaya ti jaʼ jlevi vinike, la jvaʼanbe ta yajkoltaobbaik li Anan ti jaʼ xnichʼon Sakure xchiʼuk ti jaʼ smom li Mataniase. Yuʼun li viniketik taje xuʼ jpat-o koʼontontik ta stojolalik. Jaʼ oy ta sbaik ta xchʼakbel sparte li xchiʼiltakike.

14 «Dios kuʼun, mu me xachʼayun ta ajol+ ta sventa taje xchiʼuk mu me xachʼay ta ajol li tukʼil kʼanelal laj kakʼ ta ilel ta sventa li kʼusitik la jpas ta ana xchiʼuk ta sventa li kʼusitik te chtune».*+

15 Li vaʼ kʼakʼale, laj kil krixchanoetik ta Juda ti te tspitsʼik ta tekʼel uva ta savadoe,+ yichʼojik tal sat tsʼunobil xchiʼuk skajanojik tal ta sba vuroetik, yichʼojik tal vino, uva, igo xchiʼuk jeltos kʼusitik xkuchojanik tal ta Jerusalen li ta skʼakʼalil savadoe.+ Jaʼ yuʼun, laj kalbeik ti mu kʼusi xchonik li vaʼ kʼakʼale.* 16 Li jtiroetik ti nakalik toʼox ta jteklume chichʼik ochel choy xchiʼuk jeltos kʼusitik sventa chchonbeik li krixchanoetik ta Juda xchiʼuk ta Jerusalen li ta skʼakʼalil savadoe.+ 17 Jaʼ yuʼun, la jtsak ta utel li bankilaletik ta Judae, xi laj kalbeike: «¿Kʼusi xa noʼox ti vi yelan chapasike, ti chasokesbeik skʼoplal li skʼakʼalil savadoe? 18 ¿Mi mu jaʼuk ta skoj ti jech la spasik li amoltotakik ti chopol kʼusi laj yakʼ vuluk ta jtojolaltik li Jdiostike xchiʼuk ta stojolal li jteklum liʼe? Ta skoj ti chasokesbeik skʼoplal li savadoe,+ yakal chasabeik to mas skʼakʼal yoʼonton Dios sventa xkap ta stojolal li Israele».

19 Jaʼ yuʼun, kʼalal ch-ikʼub xa ox osil li ta ochebaletik ta Jerusalene, kʼalal skʼan toʼox li savadoe, laj kal mantal ti akʼo xichʼ makel li ochebaletike. Laj kal xtok ti jaʼ to xuʼ xichʼ jamel mi echʼ li savadoe; te la jvaʼan jayvoʼ kajtuneltak ta ochebaletik sventa mu kʼusi xichʼik tal li ta skʼakʼalil savadoe. 20 Jaʼ yuʼun, te echʼ yuʼunik junchibuk akʼobal ta spat Jerusalen li jpʼolmajeletik xchiʼuk li buchʼutik jeltos kʼusitik chchonike. 21 Vaʼun, la jpʼijubtasik xchiʼuk xi laj kalbeike: «¿Kʼu yuʼun ti te ch-echʼ avuʼunik akʼobal li ta yeloval muroe? Mi jech to chapasik yan veltae, ta jnutsoxuk lokʼel ta persa». Te une, muʼyuk xa xtalik-o ta savado.

22 Jech xtok, laj kalbe jlevietik ti nopajtikuk noʼox sakubtas sbaike, ti akʼo xtalike xchiʼuk ti akʼo xchabiik ochebaletik sventa chʼuluk-o xkom li skʼakʼalil savadoe.+ «Dios kuʼun, mu me xachʼayun ta ajol sventa jta jlekilal, akʼbun ta ilel xkʼuxul avoʼonton ta skoj ti toj echʼem li tukʼil kʼanelal avuʼune».+

23 Li vaʼ kʼakʼal xtoke, laj kil ti oy judaetik ti yikʼojik* j-asdod+ antsetike,+ j-ammonetik xchiʼuk jmoabetike.+ 24 J-oʼlol li xnichʼnabike chkʼopojik ta asdod kʼop xchiʼuk li j-oʼlole chkʼopojik ta yan kʼopetik ta jeltos jteklumetik; pe mi junuk xnichʼnabik snaʼ xkʼopojik li ta skʼop judaetike. 25 Jaʼ yuʼun, la jtsakik ta utel xchiʼuk laj kalbeik li kʼusi chopol chkʼot ta stojolalike, la jmaj junantik li viniketike+ xchiʼuk la jbulbe li stsotsil sjolike, xi laj kalbeike: «Alik ta jamal ta stojolal Dios ti muʼyuk chavakʼbe atsebik li skeremike, mi jaʼuk chachʼambeik stsebik sventa xikʼ li akeremike, mi jaʼuk ti xavikʼik eke.+ 26 ¿Mi mu jaʼuk ta skojik ti la saʼo smul li ajvalil Salomon ta Israele? Ta skotol li mukʼtik lumetike, muʼyuk bu yan ajvalil jech kʼuchaʼal li Salomone;+ kʼanat yuʼun li Sdiose,+ jaʼ yuʼun vaʼanat ta ajvalil yuʼun Dios ta sjunul li Israele. Pe li yajniltak ti jaʼik jyanlumetike la saʼ smul yuʼunik.+ 27 Toj chopol ti muʼyuk tukʼ laj avakʼ abaik ta stojolal Jdiostike, yuʼun chopol kʼusi la apasik kʼalal laj avikʼik li jyanlum antsetike».+

28 Oy jun xnichʼon Joiada+ xchiʼuk ti jaʼ smom li Eliasib+ ti jaʼ mero bankilal palee laj yikʼbe stseb li Sanbalat+ ti likem ta Bet-Orone. Jaʼ yuʼun, la jchʼak lokʼel ta jtojolal.

29 «Dios kuʼun, mu me xachʼay ta ajol, yuʼun sokesojbeik xa skʼoplal li paleale,+ li trato sventa paleale xchiʼuk li jlevietike».+

30 Vaʼun, la jsakubtasik ta skoj li kʼusitik ch-ikʼubtasvan ta yan lumetike, laj kakʼbe yabtelik ta jujuntal+ ti kʼusi onoʼox sbainojik spasel li paleetik xchiʼuk jlevietike, 31 la jchapan xtok ti xichʼ akʼel ta yorail noʼox li siʼe+ xchiʼuk ti xichʼ akʼel li sba sat kʼusitik yijik xae.

«Dios kuʼun, mu me xachʼayun ta ajol sventa jta jlekilal».+