KʼALAL CHTOY STOJOL LI KʼUSITIKE
Teuk ta joltik ti ta onoʼox xtoyanuk stojole
Kʼalal ta kʼunkʼun chtoy stojol li kʼusitik chtun kuʼuntike, xuʼ van mu xkakʼtik venta, mas to mi chtoy jtojoltik ta abtel eke. Pe mi jaʼ noʼox chtoy tajek stojol li kʼusitik chtun kuʼuntike, xuʼ van ta jvul tajek koʼontontik xchiʼuk mu xa jnaʼ kʼusi ta jpastik, mas to mi oy kutsʼ kalaltike.
Stalel onoʼox ti chtoy stojol li kʼusitike, pe mi te ta joltik taje, xuʼ me skoltautik.
¿KʼU YUʼUN TSOTS SKʼOPLAL TAJE?
Mi te ta joltik ti stalel onoʼox ti chtoy stojol li kʼusitike, xuʼ me skoltautik. . .
. . . sventa junuk noʼox koʼontontik. Yuʼun kʼalal jun koʼontontike, lek kʼusi chkʼot ta nopel kuʼuntik.
. . . sventa lekuk jtunes li jtakʼintike. Tskoltautik sventa mu jecheʼuk xkixtolantik, ti jaʼuk noʼox te jtunestik li ta kʼusitik chtun kuʼuntik ta melele. Jech kʼuchaʼal liʼe, ti jtoj jlustik xchiʼuk kaʼaltike.
. . . sventa mu xkut jbatik xchiʼuk kutsʼ kalaltik ta skoj takʼine.
. . . sventa teuk ta joltik li kʼusi xuʼ jpastik sventa oyuk-o kuʼuntik li kʼusi chtun kuʼuntike.
LI KʼUSI XUʼ JPASTIKE
Jeltik ti kʼu yelan nopem xkaʼi ta jlajes jtakʼintike. Kʼalal chtoyanuk tajek stojol li kʼusitik chtun kuʼuntike, lek onoʼox ti jutukajestik ti kʼu yelan nopem xkaʼitik ta jlajes jtakʼintike. Junantik krixchanoetike jech-o tsmanik li kʼusi nopem onoʼox xaʼiike akʼo mi mu xa xlokʼ-o li stakʼinike. Vaʼun, mas to chil-o svokolik. Stalel onoʼox ti ta jvul koʼontontik ta stojolal li kutsʼ kalaltike xchiʼuk ti ta jkʼan chkakʼbetik li kʼusi chtun yuʼunike. Akʼo mi jech, li kʼusi mas chtun yuʼun li kutsʼ kalaltike jaʼ ti xkakʼbetik yil ti jkʼanojantike, ti jchiʼintike xchiʼuk ti jkʼel jchabitike.
Mi jech-o chaman li kʼusi nopem onoʼox xavaʼi akʼo mi mu xa xlokʼ-o li atakʼine, jaʼ noʼox chavil-o avokol