KʼALAL CHTOY STOJOL LI KʼUSITIKE

Junuk noʼox koʼontontik xchiʼuk li kʼusitik oy kuʼuntike

Xmuyubajik noʼox li buchʼutik jun noʼox yoʼontonik xchiʼuk li kʼusitik x-ayan yuʼunike. Jech xtok, kʼalal oy kʼusitik chjel ta anil ta xkuxlejalike, oy kʼusitik tspasik sventa mu toj epuk slajes stakʼinik.

¿KʼU YUʼUN TSOTS SKʼOPLAL TAJE?

Li psicóloga Jessica Koehler ti chchanbe skʼoplal li stalelal krixchanoetike laj yakʼ venta ti jaʼ mas xmuyubajik xchiʼuk muʼyuk mas ch-itʼixajik li buchʼutik jun noʼox yoʼontonik ti kʼu yelan xkuxlejalike. Li buchʼutik jech stalelalike muʼyuk mas tsvul yoʼontonik. Jech xtok, jlom li buchʼutik jutuk noʼox kʼusi x-ayan yuʼunike jaʼ mas xmuyubajik xchiʼuk jaʼ mas tsots skʼoplal chilik ti jmojuk kʼusi spasik xchiʼuk li yutsʼ yalalik xchiʼuk yamigotakike. Taje jaʼ onoʼox mas tsots skʼoplal, jaʼ mu sta li takʼine.

«Mi oy noʼox jveʼeltik xchiʼuk jkʼuʼ jpokʼtike, junuk noʼox koʼontontik yuʼun» (1 Timoteo 6:8).

LI KʼUSI XUʼ JPASTIKE

Mu jkoʼoltas jbatik xchiʼuk li yantike. Mi la jkoʼoltas jbatik xchiʼuk li buchʼutik ep kʼusitik x-ayan yuʼunike, xuʼ van chopol xkaʼi jbatik o xlik itʼixajkutik. Pe mu lekuk mi jech la jpastike. Li buchʼutik ep kʼusitik x-ayan yuʼunike xuʼ van ep tajek yilik. Jun ants ti te nakal ta Senegal ti Nicole sbie xi chale: «Sventa ximuyubaje, mu persauk ep kʼusi kuʼun. Mi jun noʼox koʼonton xchiʼuk li kʼusitik oy kuʼune, ximuyubaj noʼox akʼo mi jaʼ ep kʼusitik x-ayan yuʼun li yantike».

Jpastik liʼe: Mu jkʼeltik li anunsioetik ta internet o li kʼusitik tsmuyesik ta redes sociales ti bu chakʼik ta ilel li kʼusitik x-ayan yuʼun li krixchanoetike xchiʼuk ti kʼu yelan tslajes stakʼinike.

«Kʼalal ep kʼusitik oy yuʼun li jun krixchanoe, maʼuk tsta-o xkuxlejal li kʼusitik oy yuʼune» (Lukas 12:15).

Jnaʼuk jtojtik ta vokol. Li buchʼutik snaʼik stojel ta vokole xmuyubajik-o ti kʼu yepal oy yuʼunike xchiʼuk muʼyuk tsnopik ti skʼan epuk kʼusitik yuʼunike. Xi chal Roberton ti te nakal ta Haitie: «Ta jnopbe skʼoplal ti kʼu yelan skoltaojunkutik li yantike. Laje, ta jtojbeik ta vokol. Jech xtok, chkakʼbe xchan li kuni kerem ti vaxakib to sjabilal ti snaʼuk stoj ta vokol li kʼusitik ch-akʼbate».

Jpastik liʼe: Xuʼ jtsʼibatik jujun kʼakʼal li kʼusitik ta jtojtik ta vokole. Jech kʼuchaʼal liʼe, ti muʼyuk iputike, ti tsobol li kutsʼ kalaltike, ti oy lek kamigotaktike o ti kʼupil sba laj kiltik ti kʼu yelan bat kʼakʼale.

«Li buchʼu xkuxet noʼox yoʼontone xmuyubaj noʼox skotol kʼakʼal» (Proverbios 15:15).

Bateltike, ta onoʼox jkʼantik ti oyuk ep kʼusi x-ayan kuʼuntike. Pe mi laj kakʼtik persa ti junuk noʼox koʼontontik xchiʼuk li kʼusi x-ayan kuʼuntike, xijmuyubaj ta melel.