¿Mi avakʼoj aba ta stojolal li pas mantal yuʼun Jeovae?
«Jech xavalic batel ta jujun banamil: “Li Mucʼul Diose jaʼ mucʼul Ajvalil stuc”.» (SALMO 96:10.)
1, 2. 1) ¿Kʼusi tsots skʼoplal kʼot ta pasel ta sjabilal 29? 2) ¿Kʼusitik te smakoj batel ta xkuxlejal Jesús li kʼusi kʼot ta pasel taje?
LI TA oktubre ta sjabilal 29 ta jkʼakʼaliltike oy kʼusi kʼot ta pasel ti stuk noʼox jech echʼem ta kuxlejale. Toj tsots skʼoplal, yuʼun te tsʼibabil ta xchanibal Evanjelioetik. Li Mateoe xi chalbe skʼoplale: «Cʼalal laj yichʼ voʼ li Jesuse ilocʼ ta ucʼum; ta ora ijam li vinajele. [Li Juan J-akʼvanej ta voʼe] laj yil iyal tal ta sba [Jesús] li Espíritu yuʼun Diose, xcoʼlaj xchiʼuc stsumut yilel. Ta ora ivinaj cʼop ta vinajel, jech laj yal: “Liʼi jaʼ Jnichʼon; lec jcʼanoj, lec jpatoj coʼnton yuʼun”», xi (Mateo 3:16, 17; Marcos 1:9-11; Lucas 3:21, 22; Juan 1:32-34).
2 Kʼalal lek laj yichʼ ilel ti laj yichʼ chʼul espiritu li Jesuse, jamal ivinaj ti jaʼ li Buchʼu Tʼujbile, jaʼ xkaltik, li Mesías o Cristoe (Juan 1:33). ¡Kʼot skʼakʼalil ivinaj un li albil nitilulale! Te vaʼal ta stojolal Juan J-akʼvanej ta voʼ li buchʼu ta xtibat xchak yakan yuʼun Satanase xchiʼuk ti jaʼ xtok li buchʼu ta xpechʼbe ta tekʼel sjol li bankilal yajkontra Jeova xchiʼuk yajkontra li mukʼul pas mantal yuʼune (Génesis 3:15, Ch). Vaʼun la snaʼ lek Jesús kʼusi jaʼ li yabtele: spasel li kʼusi tskʼan Jeova ta sventa li mukʼul pas mantal Yuʼune xchiʼuk li Ajvalilal yuʼun Diose.
3. ¿Kʼuxi la xchapan sba sventa tspas li yabtel Jesuse xchiʼuk ti chakʼ sba ta stojolal li mukʼul pas mantal yuʼun Jeovae?
3 Sventa chchapan sba ta sventa li yabtele, «li Jesuse iventainbat yoʼnton yuʼun li Chʼul Espiritue; ilocʼ batel ta ucʼum Jordán. Icʼbil ibat ta xocol banamil yuʼun li Chʼul Espiritue» (Lucas 4:1; Marcos 1:12). Li 40 kʼakʼal stuk te oye, la snop lek ta sventa ti la xchibal kʼopta Diablo li mukʼul pas mantal yuʼun Jeovae xchiʼuk ti kʼusi skʼan spas sventa tspakbe skʼoplale. Li chibal kʼoptael taje te tsakal skʼoplal skotol li kʼusitik pʼij kuxajtik ta vinajel xchiʼuk ta Balumile. Jech oxal chaʼa, jtunel kuʼuntik ti ta jkʼelbetik skʼoplal li stukʼil kuxlejal Jesuse xchiʼuk ti jnoptik li kʼusi skʼan jpastik sventa chkakʼ jbatik ta stojolal xchiʼuk jpakbetik skʼoplal li mukʼul pas mantal yuʼun Jeovae (Job 1:6-12; 2:2-6).
Jamal chchibal kʼopta mukʼul pas mantal yuʼun Jeova li Satanase
4. ¿Kʼusi yebat ta sat yuʼun Satanás li Jesús ti te tsakal skʼoplal xchiʼuk li mukʼul pas mantale?
4 Jech ta melel, li Satanase solel te yakʼoj-o sat li kʼusitik taje, ta anil noʼox bat saʼ ta kʼop li bankilal «snitilul ti antse», li yajnil Diose (Génesis 3:15, Ch). Li Satanase oxib preva laj yakʼbe Jesús sventa tstijbe yoʼonton yoʼ mu spas li kʼusi tskʼan sTote xchiʼuk ti jaʼuk spas li kʼusi mas lek chaʼi stuke. Li yoxibal prevae, yebat ta stojolal li kʼusi tsakal skʼoplal xchiʼuk li mukʼul pas mantale. Kʼalal laj xaʼox «yacʼbe yil scotol svuʼelic li ajvaliletic liʼ ta banamile xchiʼuc li slequilal yutsilalique», solel mu xkʼexav xi laj yal li Diabloe: «Scotol leʼe, voʼot chacacʼbot scotol me chaquejan aba ta jtojole, me chavichʼun ta muqʼue», xut. Li Jesuse snaʼoj ti oy ta skʼob Diablo skotol «li ajvaliletic liʼ ta banamile». Pe la spʼaj skotol li kʼusi yebate, vaʼun jaʼ jech lek jamal laj yakʼ ta ilel bu jotukal oy ta sventa li mukʼul pas mantale. «Batan, Satanás —xut—. Yuʼun jech tsʼibabil ta scʼop Dios: “Jaʼ noʼox xavichʼic ta mucʼ stuc li Cajvaltique, jaʼ li Dios avuʼune, jaʼ noʼox xaquejan aba ta stojol”, xi tsʼibabil.» (Mateo 4:8-10.)
5. ¿Kʼusi tsatsal abtelal skʼeloj batel li Jesuse?
5 Li kʼusi mas tsots skʼoplal laj yaʼi Jesuse, jaʼ ti tspakbe skʼoplal li mukʼul pas mantal yuʼun Jeovae, vaʼun skotol ora laj yakʼ ta ilel ta xkuxlejal. Li stuke lek snaʼoj ti sventa chakʼ ta ilel ti jaʼ oy sderecho ta Mukʼul Jpasvanej ta mantal li Diose, skʼan tukʼ-o chakʼ sba manchuk mi xcham, o jech kʼuchaʼal yaloj onoʼox li albil kʼope, jaʼ to mi tibat xchak yakan yuʼun Satanás li «snitilul» antse (Mateo 16:21; 17:12). Jech xtok, skʼan chakʼ ta naʼel ti Ajvalilal yuʼun Diose jaʼ tstunes Jeova sventa tspajtsan li jtoyba Satanase xchiʼuk ti jaʼ chchaʼichʼ tal lekilal xchiʼuk jun oʼontonal ta skotol li spasbentake (Mateo 6:9, 10). ¿Kʼuxi van tspas yuʼun Jesús li tsatsal abtelal taje?
«Yorail xa chlic sventainoxuc li Diose»
6. ¿Kʼuxi laj yakʼ ta ojtikinel Jesús ti chtunesat yuʼun Jeova li Ajvalilal yuʼun Dios sventa «slilinbe yabtel ti pucuje»?
6 Sventa tspas yabtel «li Jesuse ibat ta Galilea banamil; te lic xchol li Lequil Aʼyej yuʼun Diose. Jech laj yal: “Ista xa scʼacʼalil, yorail xa chlic sventainoxuc li Diose”», xi (Marcos 1:14, 15). Xi laj yal stuk ta tsʼakale: «Ta persa [...] chbat jcholbe yaʼyic li Lequil Aʼyej ta sventa ventainel yuʼun Diose. Yuʼun jaʼ ta sventa ti tacbilun tale», xi (Lucas 4:18-21, 43). Jaʼ jech la spas: la xan skotol Israel sventa «xchol batel li Lequil Aʼyej ta sventa ventainel yuʼun Diose» (Lucas 8:1). La spas ep skʼelobiltak juʼelal xtok: la smakʼlin epal krixchanoetik, la spajes tsatsal ikʼaloʼetik, la xpoxta jchameletik xchiʼuk la xchaʼkuxes animaetik. Jaʼ jech taje, li Jesuse laj yakʼ ta ilel ti Diose xuʼ tslajesbe skʼoplal skotol li vokolil ti yakʼoj li toybail ti lik ta Edene xchiʼuk ti jaʼ «jech ta slilinbe yabtel ti pucuje» (1 Juan 3:8, Ch).
7. ¿Kʼusi abtelal la yakʼbe spas yajchankʼoptak Jesús ti baʼyel la xchapane? ¿Xchiʼuk kʼusi kʼot ta pasel yuʼunik?
7 Sventa xkʼot ta stojolal epal krixchanoetik li lekil aʼyej ta sventa li Ajvalilal yuʼun Diose, li Jesuse la xchapan lek jtsop tukʼil yajchankʼoptak. Baʼyel la stʼuj li lajcheb yajtakboltake, vaʼun «la stac batel ta xcholel li ventainel yuʼun Diose» (Lucas 9:1, 2). Ta tsʼakale la stak batel 70 yajchankʼoptak xtok ti xi skʼan xalike: «Liʼ xa oy ta atojolic li ventainel yuʼun Diose», xiik (Lucas 10:1, 8, 9). Kʼalal isutik xchiʼuk laj yalbeik Jesús ti lek laj yaʼiik li lekil aʼyej li krixchanoetike, xi la stakʼ li Jesuse: «Ta melel laj quil sjislej yalel tal ta banamil jech chac cʼu chaʼal sacsevul li banquilal pucuje», xi (Lucas 10:17, 18).
8. ¿Kʼusi jamal laj yakʼ ta ilel Jesús ta sventa ti kʼu yelan ikuxie?
8 Muʼyuk la xkux ta spasel li yabtel ta sventa Ajvalilal yuʼun Dios li Jesuse, ta kʼakʼal-akʼobal la spas. Yuʼun oy ta yoʼonton laj yikta xtok li kʼusitik lek chichʼ kʼupinel jujun kʼakʼale. «Li vetetique oy xchʼenic; li mutetique oy stasic. Pero vuʼun ti Xnichʼon cristiano licʼote muʼyuc bu xuʼ ta jmochan jba», xi (Lucas 9:58; Marcos 6:31; Juan 4:31-34). Jech xtok, muʼyuk bu la xchʼay skʼakʼal. Jech kʼuchaʼal liʼe, kʼalal jutuk xaʼox skʼan xchame, xi tsots yoʼonton laj yalbe li Poncio Pilatoe: «Jaʼ sventa ti tal vocʼcune, xchiʼuc jaʼ sventa ti lital liʼ ta banamile, yuʼun tal cal li cʼusi melele», xut (Juan 18:37). Ta sventa ti kʼuyelan ikuxie, li Jesuse lek jamal laj yakʼ ta ilel ti maʼuk noʼox ital ta Balumil sventa jaʼuk jun mukʼta jchanubtasvaneje, jpas skʼelobiltak juʼelal o sventa chakʼ xkuxlejal ta jtojolaltik. Moʼoj, yuʼun li kʼusi mas tsots skʼoplal ta xkuxlejale jaʼ ti laj yakʼ sba ta stojolal li mukʼul pas mantal yuʼun Jeovae xchiʼuk ti chakʼ ta ojtikinel ti jaʼ ta stojolal Ajvalilal yuʼun Dios tspas li kʼusi tskʼan Jeovae (Juan 14:6).
«Ivuʼ xa cuʼun scotol»
9. ¿Kʼuxi la stibe xchak yakan «snitilul» yajnil Dios li Satanase?
9 Li yabtel la spas Jesús ta stojolal li Ajvalilal yuʼun Diose mi jsetʼuk lek laj yaʼi li yajkontrae, li Satanase. Ta stojolal li jvokʼ snitilulal ta balumile —li politika xchiʼuk li relijione—, li Diabloe laj yakʼilanbe yipal sventa tsmakbe ye li «snitilul» yajnil Diose. Ti kʼu sjalil ikuxi li Jesuse, jaʼ onoʼox kʼelbil yuʼun Satanás xchiʼuk yajtuneltak. Ta slajeb une, ta primavera ta sjabilal 33 ikʼot yorail ti chtibat xchak yakan yuʼun Jkontrainvanej li xNichʼon krixchanoe (Mateo 20:18, 19; Lucas 18:31-33). Li Evanjelioetike lek jamal chalbe skʼoplal kʼuyelan la stunes krixchanoetik li Satanase —Judas Iscariote, bankilal paleetik, jchanubtasvanejetik, fariseoetik, jromaetik xchiʼuk yantik— sventa chichʼ tabel smul li Jesuse xchiʼuk ti akʼo muʼyukuk xkʼuxul oʼontonal xichʼ milel ta jtel teʼe (Hechos 2:22, 23).
10. ¿Kʼusi toj lek la spas kanal Jesús kʼalal cham ta jtel teʼe?
10 ¿Kʼusi chtal ta jnopbentik kʼalal chvul ta joltik ti kʼunkʼun xchiʼuk toj kʼux ti kʼu yelan icham Jesuse? Xuʼ van jaʼ ti oy ta yoʼonton laj yakʼ ta matanal xkuxlejal ta stojolal li jmulavil krixchanoetike (Mateo 20:28; Juan 15:13). Xuʼ van labal sba chkiltik ek li mukʼta kʼanelal laj yakʼ ta ilel Jeova kʼalal laj yakʼ li matanal taje (Juan 3:16). O xuʼ van jech chkaltik kʼuchaʼal li bankilal jromail soltaro ti xi laj yale: «Ta melel jaʼ xnichʼon Dios li vinic liʼi», ti xie (Mateo 27:54). Ta melel, lek mi jech ta jnoptik kʼuchaʼal taje. Pe jvules ta joltik li kʼusi laj to yal komel li Jesuse: «Ivuʼ xa cuʼun scotol», xi (Juan 19:30). ¿Kʼusi ti ijuʼ yuʼune? Melel onoʼox ti ep kʼusitik la spas ta sjunul xkuxlejal li Jesuse xchiʼuk ti ep kʼusitik ikʼot ta pasel yuʼun li slajele. Pe ¿mi mu jechuk ti kʼusi mas tsots skʼoplal tal spas ta Balumile, jaʼ ti tal xchapanbe skʼoplal li mukʼul pas mantal yuʼun Jeovae? ¿Mi mu meleluk ti chichʼ mukʼta tsatsal preva ta skʼob Diablo li nitilulal sventa tslekubtasbe skʼoplal sbi Jeova jech kʼuchaʼal chal Vivliae? (Isaías 53:3-7.) Veno, li Jesuse lek tajmek ipas yuʼun li tsatsal abtelal taje. ¡Toj lek la spas kanal!
11. ¿Kʼusi tspas Jesús sventa chkʼot ta pasel yuʼun ta j-echʼel li albil kʼop ta Génesis 3:15?
11 Ta skoj ti tukʼ yoʼonton laj yakʼ sba li Jesuse, laj yichʼ chaʼkuxesel, maʼuk kʼuchaʼal jun krixchano, jaʼ kʼuchaʼal «espiritu ti chakʼ kuxlejale» (1 Corintios 15:45, NM; 1 Pedro 3:18). Li Jeovae xi laj yalbe li xNichʼon ti oy xa ta lekilale: «Chotlan ta jbatsʼicʼob, jaʼ to cʼalal ta xcacʼ atecʼubin li avajcontrataque», xut (Salmo 110:1). Li yajkontratak taje jaʼ li Satanase —li jbabe ta toybaile— xchiʼuk skotol li buchʼutik kʼotem ta snitilultake. Ta sventa ti jaʼ Ajvalil li ta Ajvalilal yuʼun sMesías Jeova li Jesucristoe, jaʼ tsbeiltas li lajelal chichʼ tal ta stojolal skotol li jtoybaetik ta vinajel xchiʼuk ta Balumile (Apocalipsis 12:7-9; 19:11-16; 20:1-3, 10). Vaʼun jaʼ jech chkʼot ta pasel ta j-echʼel li albil kʼop ta Génesis 3:15, xchiʼuk li kʼusi xi la xchanubtas ta skʼanel ta orasion yajchankʼoptak li Jesuse: «Acʼo sta yorail chapas mantal, acʼo pasuc cʼusi tscʼan avoʼnton liʼ ta banamil jech chac cʼu chaʼal te ta vinajele», ti xie (Mateo 6:10; Filipenses 2:8-11).
Toj lek ta chanbel stalelal
12, 13. 1) ¿Kʼu yelan chaʼiik li lekil aʼyej ta sventa li Ajvalilal yuʼun Diose? 2) ¿Kʼusi skʼan ta jakʼbe jbatik li buchʼutik ta jkʼan ta jtsʼaklintik batel Cristoe?
12 Jech kʼuchaʼal laj yal Jesuse, li avie, yakal xichʼ cholel ta epal mukʼtik lumetik li lekil aʼyej sventa Ajvalilal yuʼun Diose (Mateo 24:14). Vaʼun ta smiyonal noʼox krixchanoetik yakʼoj xkuxlejalik ta stojolal Dios. Skotolik taje xmuyubajik tajmek ta skoj li bendisionetik chichʼ talel li Ajvalilal yuʼun Diose. Jech ta melel, tskʼan xa yaʼiik ti chkuxiik sbatel osil ta lekilal xchiʼuk ta jun oʼontonal li ta jun Balumil ti kʼatajem ta jun paraisoe, jaʼ yuʼun kʼupil chaʼiik ta yalbel yan krixchanoetik li spatobil yoʼontonike (Salmo 37:11; 2 Pedro 3:13). ¿Mi te akʼoplal ek li ta jchol mantaletik taje? Mi jaʼ jeche, lek tajmek ti jech kʼotem ta nopel avuʼune. Pe oy to kʼusi skʼan jnopbetik skʼoplal.
13 Xi la stsʼiba li jtakbol Pedroe: «Jaʼ jech laj yichʼ vocol ta aventaic ec li Cristoe. Jaʼ laj yacʼboxuc avilic cʼusi tscʼan chapasic, yuʼun jech acʼo atsʼaclinic batel», xi (1 Pedro 2:21). ¿Mi mu labaluk chavaʼi ti jaʼ mas chalbe skʼoplal svokol Jesús li Pedroe, ti maʼuk ti kʼuyelan xmuyubaj noʼox ta xcholel mantale xchiʼuk ti jaʼ pʼijil jchanubtasvaneje? Li jtakbole snaʼoj lek li kʼusi yakal chalbe skʼoplale, yuʼun laj yil ta sat stuk li svokol Cristo ti jaʼ oy ta yoʼonton la stsʼik ta skoj sventa chakʼ sba ta stojolal mukʼul pas mantal yuʼun Jeovae xchiʼuk sventa chakʼ ta ilel ti jaʼ jun jutkʼop li Satanase. Ati voʼotike, ¿kʼuxi xuʼ jtsʼaklintik batel li Jesuse? Xi jakʼbe jbatike: «¿Kʼu yepal oy ta koʼonton chkil jvokol ta sventa ti kakʼoj jba ta stojolal li mukʼul pas mantal yuʼun Jeovae? ¿Mi chkakʼ ta ilel ta jkuxlejal xchiʼuk ta kabtel ta stojolal Dios ti jaʼ mas tsots skʼoplal chkaʼi ti ta jpakbe skʼoplal li mukʼul pas mantal yuʼun Jeovae?» (Colosenses 3:17).
14, 15. 1) ¿Kʼusi la spas Jesús kʼalal albat ti akʼo spas li kʼusi skontrainoj kʼusi tskʼan Diose, xchiʼuk kʼu yuʼun jech la spas? 2) ¿Kʼusi ti skʼan teuk-o ta joltike? (Albo sloʼilal li rekuadro «Laj yakʼ sbaik ta stojolal Jeova».)
14 Skotol kʼakʼal ta jnuptantik prevaetik xchiʼuk ti oy kʼusi ta jnop ta jpastike. ¿Kʼu yelan skʼan ta jkʼeltik jujutos taje? Jech kʼuchaʼal liʼe, ¿kʼusi van ta jpastik mi chkichʼtik tijbel koʼontontik ta spasel jtosuk kʼusi ti chakʼ ta vokol jtukʼilaltik kʼuchaʼal yajtsʼaklomutik Cristoe? Veno, kʼalal albat yuʼun Pedro ti akʼo xkʼuxubin sba stuk li Jesuse, ¿kʼusi la stakʼ li Jesuse? «Locʼan ta jtojol Satanás», xi tsots laj yal li Jesuse. Vaʼun xi to laj yale: «Maʼuc chanop cʼusi ta scʼan Dios. Jaʼ noʼox chanop cʼusi tscʼan cristiano», xi (Mateo 16:21-23). Jech xtok, kʼalal chkiltik ti xuʼ to xi jchʼi batel mas li ta kabteltike o ti xuʼ chkepajestik batel mas jtakʼintike, pe ti skʼan xkiktatik komel li jlekilaltik ta mantale, ¿mi jech ta jpastik kʼuchaʼal la spas Jesuse? Kʼalal laj yakʼ venta Jesús ti «tsujic ti acʼo ochuc ta mucʼta [ajvalil]» yuʼunik li jlom krixchanoetik ti laj yilik li skʼelobiltak juʼelal la spase, ta anil noʼox inamaj batel ta stojolalik (Juan 6:15).
15 ¿Kʼu yuʼun jpʼel yoʼonton jech la spas Jesús ta sventa taje xchiʼuk li ta yantik velta xtoke? Yuʼun laj yakʼ lek venta ti oy to kʼusi mas tsots skʼoplale, ti maʼuk li slekilale o ti kʼusi lek chil stuke. Li kʼusi mas tskʼan ta skotole, jaʼ li spasel kʼusi tskʼan sTote xchiʼuk ti chakʼ sba ta stojolal li mukʼul pas mantal yuʼun Jeovae (Mateo 26:50-54). ¿Kʼusi chchanubtasutik taje? Jaʼ ti skʼan teuk-o ta joltik ek ti chibal kʼoptabil li mukʼul pas mantal yuʼun Jeovae, yuʼun mi moʼoje xuʼ xi jtsʼuj ta mulil. Kʼun xuʼ xi jtsʼuj ta spetsʼtak li Satanase, yuʼun lek chanem ta stikʼel ta koʼontontik li kʼusi mu stakʼ pasele, jech kʼuchaʼal chakʼ ta ilel li kʼusi kʼot ta stojolal Evae (2 Corintios 11:14; 1 Timoteo 2:14).
16. ¿Kʼusi ti mas tsots skʼoplal jkʼelojtik batel kʼalal ta jcholtik mantale?
16 Kʼalal ta jcholbetik mantal li krixchanoetike chkakʼbetik yipal ta yakʼbel yilik ta Vivlia kʼuxi xuʼ xchapan li skʼopike, ta melel, taje jaʼ jtos ti kʼuxi xuʼ lek jtijbetik-o yoʼontonik ta xchanel li Vivliae. Pe li kʼusi mas tsots skʼoplal jkʼelojtik batele, maʼuk noʼox ti akʼo xojtikinik li kʼusi chal Vivliae o li bendisionetik chakʼ tal li Ajvalilal yuʼun Diose. Li kʼusi mas tsots skʼoplale, jaʼ ti akʼo yaʼibeik smelolal li kʼusi chibal kʼoptabile, jaʼ xkaltik, li mukʼul pas mantal yuʼun Jeovae. ¿Mi oy ta yoʼonton chkʼotik ta melel ta yajtsʼaklomtak Cristo, ti «xichʼ svocol[ik]» ta skoj li Ajvalilal yuʼun Diose? (Marcos 8:34, Ch.) ¿Mi chapalik sventa jmojikuk xchiʼuk li buchʼutik yakʼoj sbaik ta stojolal li mukʼul pas mantal yuʼun Jeovae xchiʼuk ti jaʼ jech chakʼik ta ilel ti jaʼ jun jutkʼop li Satanase? (Proverbios 27:11.) ¡Jaʼ jun mukʼta matanal li kʼusi jtaojtike! Maʼuk noʼox xuʼ xkakʼ jbatik ta stojolal li mukʼul pas mantal yuʼun Jeovae, yuʼun xuʼ jkoltatik yantik xtok sventa jech spasik ek (1 Timoteo 4:16).
Li skʼakʼalil ti «jaʼ chlic sventain o scotol li Diose»
17, 18. ¿Kʼusi kʼupil sba kʼakʼal xuʼ jmalatik mi chkakʼ jbatik ta stojolal li mukʼul pas mantal yuʼun Jeovae?
17 Kakʼbetik-o yipal ta yakʼel ta ilel ta jtalelaltik xchiʼuk ta kabteltik ta stojolal Dios ti kakʼoj jbatik ta stojolal li mukʼul pas mantal yuʼun Jeovae. Jaʼ jech xuʼ lek jpatoj koʼonton jmalatik li skʼakʼalil ti «chacʼbe ta scʼob Dios Totil scotol li [yabtel]» Jesucristoe. ¿Bakʼin taje? Li jtakbol Pabloe xi chale: «Jaʼo ti cʼalal laj xa stsal scotol li jpasmantaletique, ti tsots svuʼelique, ti chʼunbil smantalique. [...] Yuʼun li Cristoe jaʼ to tsventain o batel scotol, jaʼ to ti cʼalal pechʼbil ta teqʼuel chcom yuʼun scotol li yajcontrae [...;] [vaʼun] li Nichʼonile jaʼo chlic yacʼ sba ta ventainel yuʼun ec li bochʼo iʼacʼbunuc sventain scotole, yuʼun jech jaʼ chlic sventain o scotol li Diose», xi (1 Corintios 15:24, 25, 28).
18 Kʼalal chkʼot skʼakʼalil ti «jaʼ chlic sventain o scotol li Diose» toj kʼupil me sba ta melel. Ijuʼ xaʼox me yuʼun yabtel li Ajvalilal yuʼun Diose. Lajem xaʼox me skotol li buchʼutik tskontrainik li mukʼul pas mantal yuʼun Jeovae, xchiʼuk staoj xaʼox me yav xtok li lekilal ta vinajel-balumile. Jech kʼuchaʼal la stsʼiba li jtsʼibajom yuʼun Salmoe, skotol li spasbentak Diose xi chkʼejinike: «Ichʼic ta mucʼ li Mucʼul Diose yuʼun jaʼ noʼox stuc ichʼbil o ta mucʼ. [...] Jech xavalic batel ta jujun banamil: “Li Mucʼul Diose jaʼ mucʼul Ajvalil stuc”», xiik (Salmo 96:8, 10).
[Lokʼol ta pajina 11]
LAJ YAKʼ SBAIK TA STOJOLAL JEOVA
[Lokʼol ta pajina 11]
Jech kʼuchaʼal snaʼojik ep ermanoetik ta Corea xchiʼuk ta yantik balumile, kʼalal ta jnuptik tsatsal prevaetike, tsots skʼoplal ti xkaʼibetik smelolal kʼu yuʼun ti chkil jvokoltike.
Jun yajrextiko Jeova ti laj yichʼ chukel yuʼun ajvalil ta Unión Sovieticae xi laj yale: «Li kʼusi la skoltaunkutik sventa xkuch kuʼunkutike jaʼ ti kaʼiojbekutik smelolal li kʼusi laj yichʼ chibal kʼoptael ta nichimaltik Edene [...]: li sderecho Dios ta ajvalilale. Jnaʼojkutik ti xuʼ xkakʼ jbakutik ta stojolal li mukʼul pas mantal yuʼun Jeovae. [...] [Taje] jaʼ laj yakʼ jtsatsalkutik xchiʼuk jaʼ la skoltaunkutik sventa tukʼ koʼonton xkakʼ jbakutik», xi.
Yan ermanoe chalbe smelolal kʼuxi ikuch yuʼunik xchiʼuk yan Testigoetik ti sujatik ta spasel tsatsal abtele. «Muʼyuk bu laj yiktaunkutik li Jeovae —xi laj yal—. Akʼo mi oy tsatsal vokolil, vikʼil jsatkutik ta mantal. Laj jtsatsubtasbe jba koʼontonkutik kʼalal la jvulesbe jba ta jolkutik ti kakʼoj jbakutik ta stojolal li mukʼul pas mantal yuʼun Jeova ta vinajel-balumile», xi.
[Lokʼol ta pajina 8]
¿Kʼuxi laj yakʼ sba ta stojolal mukʼul pas mantal yuʼun Jeova li Jesús kʼalal pasat ta preva yuʼun Satanase?
[Lokʼol ta pajina 10]
¿Kʼusi kʼot ta pasel yuʼun li slajel Jesuse?
[Lokʼol ta pajina 12]
¿Mi xa nabe li stakʼobile?
• ¿Kʼuxi laj yakʼ ta ilel Jesús ti jaʼ mas tsots skʼoplal laj yaʼi li mukʼul pas mantal yuʼun Jeovae?
• Ta skoj li yabtel xchiʼuk slajel Jesuse, ¿kʼusi ti mas tsots skʼoplal kʼot ta pasel yuʼune?
• ¿Kʼuxi xuʼ chkakʼtik ta ilel ti kakʼoj jbatik ta stojolal li mukʼul pas mantal yuʼun Jeova jech kʼuchaʼal la spas Jesuse?