Laj yakʼbe mas sbalil li xkuxlejalike ¿Mi xuʼ jech xa pas ek?

MARC ti nakal ta Canadae jaʼ jun prekursor regular ti mu sjunuluk kʼakʼal ch-abtej ta jun empresa ti bu tsmeltsanik robotetik ch-abtej ta vinajele. Jun kʼakʼale, albat yuʼun li jkʼel abtel ti chtoybat mas tsots yabtele. Toj lek li tojolil taje, pe vaʼun skʼan sjunul kʼakʼal x-abtej. ¿Kʼusi van tspas?

Amy ti te nakal ta Filipinase, lik tunuk ta prekursora kʼalal ta slajebtik xaʼox batel jabiletik chchanunaje. Kʼalal tsuts yuʼun li xchanune, akʼbat jun yabtel ta sjunul kʼakʼal. Manchuk mi mas chchʼak skʼakʼal li ta abtele, pe lek chtojat. ¿Kʼusi van tspas?

Mu koʼoluk kʼusi la snopik li Marc xchiʼuk Amy taje, xchiʼuk ti kʼusi kʼot ta pasel ta skoj taje chakʼ ta ilel ti jech ta melel li tojobtasel akʼbatik yuʼun Pablo li ermanoetik ta Corintoe: «Li bochʼo oy ep cʼusitic oy yuʼun liʼ ta banamile, acʼo muʼyucuc cʼusi oy yuʼun chaʼay», x-utatik (1 Cor. 7:29-31).

Mu jtunestik ta skotol li balumile

Kʼalal mu to ta jchanbetik skʼoplal li Marc xchiʼuk li Amy laj kaltike, jkʼelbetik smelolal jlikeluk li jpʼel kʼop «banamil» ti xie (ta griego kʼope jaʼ kó·smos), ti la stunes ta skarta Pablo sventa li ermanoetik ta Corintoe. Li ta teksto liʼe, li jpʼel kʼop kó·smos xie, jaʼ chalbe skʼoplal li kʼusitik ta balumile, jaʼ xkaltik, skotol li krixchanoetik ti chtun yuʼunik li kʼusitik toj jtunel kuʼuntike, jech kʼuchaʼal veʼlil, jkʼuʼ jpokʼtik xchiʼuk ti bu xuʼ chi jnakie.a Jech onoʼox ta melel, skʼan xi j-abtejutik sventa oyuk kuʼuntik li kʼusitik jtunel taje. Muʼyuk kʼusi stakʼ xkutik, yuʼun onoʼox persa ta jtunestik li balumil sventa chkʼot ta pasel kuʼuntik ti jbainojtik smakʼlinel kutsʼ kalaltik jech kʼuchaʼal chal Vivliae. Pe jech kʼuchaʼal chkiltike, li «banomile, ta xlaj batel ti cʼusi oy yuʼune» (1 Juan 2:17, Ch). Jech oxal chaʼa, mu me epuk «cʼusitic oy [kuʼuntik] liʼ ta banamile», jaʼ noʼox me ta jtunestik-o ta sventa li kʼusitik tsots chtun kuʼuntike (1 Cor. 7:31).

Stijojbe yoʼonton ep ermanoetik li tojobtasel ta Vivlia taje sventa jutuk xa noʼox stunesik li balumile. La skʼel lek li xkuxlejalike, la sjutukajesik ti kʼuyepal ch-abtejike xchiʼuk la sjel ti kʼuyelan toʼox kuxulike. Ta skoj taje, mu jaluk laj yakʼik venta ti mas xa oy sbalil li xkuxlejalike, yuʼun mas xa jal te xchiʼuk li yutsʼ yalalike xchiʼuk mas xa jal chtunik ta stojolal Dios. Mu xa jaʼuk tajmek yakʼoj sbaik ta stojolal li balumile, jaʼ xa mas yakʼoj sbaik ta stojolal li Jeovae. ¿Mi xuʼ jech xa pas ek? ¿Mi xuʼ xa jel li akuxlejal sventa xa chʼakbe mas yorail ta xcholbel skʼoplal li Ajvalilal yuʼun Diose? (Mat. 6:19-24, 33.)

«Mas nopol oyun chkaʼikutik ta stojolal li Jeovae»

Marc, ti laj kalbetik skʼoplal ta slikebal loʼile, la xchʼun li tojobtasel ta Vivlia ti mu stunes ta skotolal li balumile, muʼyuk la xchʼam li kʼusi kʼupil ch-akʼbat ox yuʼun li buchʼu sbainoj skʼelel abtele. Te van jayibuk kʼakʼal ta tsʼakale, albat ti chtojat mas sventa xuʼ xchʼam li abtelal taje. «Jaʼ jun preva laj kaʼi, —xi li Marc taje—, pe muʼyuk bu la jchʼam xtok.» ¿Kʼu yuʼun jech la spas? Xi chal kaʼitik stuke: «Li voʼon xchiʼuk li kajnil Paulae ta jkʼan chi tunkutik ta stojolal Jeova ti bu kʼalal xuʼ kuʼuntike. Jech oxal chaʼa, la jel ti kʼu toʼox yelan jkuxlejalkutike. Sventa jtakutik ti kʼusi oy ta koʼontonkutike, laj kʼanbe jpʼijilkutik li Jeovae xchiʼuk laj kalkutik kʼusi ora ta jkʼan chlik kepajes li kabtelkutik ta stojolal Jeovae», xi.

Li Paulae xi chal eke: «Chi tun xa onoʼox ta prekursora regular ek, oxib kʼakʼal ta xemana chi abtej ta sekretaria ta jun ospital ti lek chi stojikune. Pe jech kʼuchaʼal chaʼi jmalale: ta jkʼan chi tun ta stojolal Jeova ti bu mas chtun jchol mantaletike. Jaʼ yuʼun laj kikta li kabtele. Pe kʼalal laj kakʼbe svunal ti chi lokʼ li jkʼel abtel kuʼune, laj yalbun ti oy xokol jun abtel ta sekretaria ejecutiva xchiʼuk ti xuʼ la xi abtej tee, yuʼun la pasem xa kuʼun li kʼusitik skʼan pasele. Manchuk mi jaʼ jun abtelal ta ospital ti lek tojbile, muʼyuk bu la jchʼam, jaʼ laj kakʼ-o ta koʼonton li kʼusi onoʼox jnopoje, vaʼun li lokʼ li ta abtele. Kʼalal laj kalbe yaʼi li buchʼu tskʼel kabtel ti kʼu yuʼun muʼyuk la jchʼam taje, laj yalbun ti toj lek ti jech lek tsots xchʼunel koʼontone», xi.

Ta mas tsʼakal jutuke, li Marc xchiʼuk Paulae laj yichʼik biiltasel ta prekursor espesial, laj yichʼik takel batel ta jun tsobobbail ta jvokʼ namal lum te ta Canadá. ¿Kʼu yelan laj yaʼiik ti jel li xkuxlejalike? Xi chal li ermanoe: «Kʼalal laj kikta li kabtel ti oy-oe xchiʼuk ti lek tojolile ti jutuk mu oʼloluk jkuxlejal li abtej tee, laj kat koʼonton, pe laj yakʼbunkutik sbendision Jeova ti chi tunkutik ta stojolale. Li avi une, ta jkʼupinkutik li muyubajel ta jtakutik ta skoj ti ta jkoltakutik ta mantal li krixchanoetike. Jech noxtok, li kabtelkutik ta tsʼakal ora ta stojolal Diose slekubtasoj tajmek li jnupunelkutike. Naka jaʼ ta sventa mantal li jloʼilkutike, ti jaʼ ti kʼusi mas toj tsots skʼoplale. Mas nopol oyun chkaʼikutik ta stojolal li Jeovae», xi (Hech. 20:35). Xi chal li Paula eke: «Skomtsanel li kabteltik xchiʼuk li kʼusitik lek chkaʼi ta jnatike jaʼ tsujutik sventa jpat lek koʼontontik ta stojolal li Jeovae. Jaʼ jech la jpaskutik, vaʼun yakʼojbunkutik bendision. Skʼanojunkutik tajmek li ermanoetik ta j-achʼ tsobobbailkutike xchiʼuk jtunel chkaʼi jbakutik yuʼunik. Li kipal ta jtunes toʼox ta kabtele, li avie jaʼ xa ta jtunes sventa ta jkolta li krixchanoetik ta yojtikinel Diose. Xi muyubaj tajmek ti liʼ chi tune», xi.

Oy jtakʼin, pe muʼyuk bu xi muyubaj

Amy ti laj kalbetik skʼoplal ta slikeb eke, yan-o be la stam batel xchiʼuk la xchʼam li kʼusi akʼbate: jun abtelal ta sjunul kʼakʼal ti busanbil noʼox tojolile. Xi chal kaʼitike: «Li ta sba jabile laj kakʼbe yipal chol mantal, pe laj kakʼ venta ti yakal chchʼayesbe skʼoplal Ajvalilal yuʼun Dios ta jkuxlejal li kabtele. Laj kichʼ akʼbel kʼusitik kʼupilik sba sventa chi chʼi batel mas li ta kabtele, laj kakʼbe yipal sventa yantik xi muy batel li ta abtelaletik ta balumile. Kʼalal yantik x-epaj batel li kʼusitik jbainoj ta kabtele, jutukaj li chol mantal ta jpase; kʼot yorail ti laj kikta ta jyalele», xi.

Kʼalal tskʼel sutel spat li Amy laj kaltike, xi chale: «Lek oyun maʼ ta takʼine. Nomik li xanav xchiʼuk lek la jkʼupin ti lek ojtikinbilun ta sventa kabtele. Pe kʼelavil un, muʼyuk xi muyubaj. Ep jvokol, manchuk mi oy jtakʼin. “Kʼusi ti chopol ta jpase”, xi chi, vaʼun laj kakʼ venta ti jutuk xa mu “la [jkomtsan] xchʼunel Cajvaltic” ta skoj ti mukʼ jkʼoplal ta jkʼan li ta balumile. Jaʼ yuʼun, la jta ep jvokol jech kʼuchaʼal chal Vivliae», xi (1 Tim. 6:10).

¿Kʼusi la spas? Xi chal kaʼitike: «Laj kalbe li moletik ti akʼo skoltaikun ta mantale xchiʼuk lik batkun li ta tsobajeletike. Jun veltae, kʼalal yakal chi kʼejinkutik ta salone, li okʼ, yuʼun vul ta jol ti xi muyubaj toʼox tajmek ti kʼalal li tun voʼob jabil ta prekursora regulare manchuk mi abol jba. Laj kil ti jaʼ skʼan baʼyel xkakʼ ta jkuxlejal li Ajvalilal yuʼun Diose xchiʼuk ti mu xa xkixtolan jkʼakʼal ta saʼel takʼine. Jech oxal, la jkʼan jun kabtel ti mu toj tsotsuk skʼoplale —ti j-oʼlol to yal li jtojole— vaʼun lik jchol mantal yan velta», xi. Xmuyubaj noʼox xi laj yal xtoke: «Jaʼ jun lekilal ti li tun jayibuk jabil ta prekursorae. Li avie solel jun tajmek koʼonton, jaʼ muʼyuk jech laj kaʼi mi jutebuk kʼalal jaʼ toʼox jchʼakojbe tajmek yorail li kabtel ta sventa balumile», xi.

¿Mi xuʼ van xa jel kʼusitik jlomuk ta akuxlejal? Mi jech cha pase, mas me cha xokob, vaʼun mi jaʼ cha tunes-o akʼakʼal ta xcholbel skʼoplal li Ajvalilal yuʼun Diose, jaʼ me jech chavakʼbe mas sbalil ek li akuxlejale (Pro. 10:22).

[Tsʼibetik ta yok vun]

[Lokʼol ta pajina 19]

«¡Toj lek onoʼox la jkʼupin ta slikebal!»

[Lokʼol ta pajina 19]

David ti ta Estados Unidos nakale xchiʼuk ti chtun ta mole, tskʼan chchol mantal ta tsʼakal ora jech kʼuchaʼal tspas li yajnil xchiʼuk xnichʼnabe. Jech oxal, la skʼan ti xjutukajesbat yorail ti kʼu sjalil ch-abteje, vaʼun och ta prekursor regular. ¿Mi jaʼ van laj yakʼbe mas sbalil xkuxlejal taje? Veno, kʼalal echʼ jayibuk ue, xi laj yalbe yamigo li Davide: «Mu kʼusi mas xuʼ xakʼ jmuyubajeltik, jaʼ noʼox ti kʼalal chkakʼbetik yipal spasbel yabtel Jeova xchiʼuk li kutsʼ kalaltike. Kaloj mi vokol chi nop li ta abtelal ta prekursore, pe bu cha ta un mu jechuk. ¡Toj lek onoʼox la jkʼupin ta slikebal!», xi.

[Lokʼol ta pajina 19]

¿Mi xuʼ van xa jel kʼusitik jlomuk ta akuxlejal?

[Lokʼol ta pajina 18]

Li Marc xchiʼuk Paulae yakal chcholik mantal