¿Mi xvul ta ajol?

¿Mi akʼupinoj skʼelel Li Jkʼel osil ta toyole, ti achʼik to lokʼem tale? Mi jeche, paso preva mi xtakʼ avuʼun li kʼusitik liʼe:

• Li Ajvalilal yuʼun Diose, ¿mi te ichʼbil bal ta oʼontonal?

Li Jesuse xi laj yale: «Ta yut yoʼnton cristiano ta xlocʼ tal li cʼusi chopol ta snopique, me ta xmulivaj, me ta xʼelcʼaj, me ta xmilvan, me cʼusiuc noʼox ta scʼupin, me ven chopol cʼusi tspas», xi (Marcos 7:20-22). Li kʼusi chopole ta yoʼonton krixchano ta xlik talel. Jaʼ yuʼun chaʼa, ti chichʼ nopel ti oy ta oʼontonal li Ajvalilal yuʼun Diose mu jechuk, yuʼun li Ajvalilal yuʼun Diose jaʼ li kʼusi leke. Jamal lek ta aʼiel chaʼa, ti chichʼ nopel ti oy ta oʼontonal li Ajvalilal yuʼun Diose mu xkʼot-o kʼuchaʼal chal li Vivliae. Li kʼusi xkʼot-oe, jaʼ ti jech kʼuchaʼal laj yalik li j-alkʼopetike, jaʼ jun melel ajvalil ti ep kʼusitik labalik sba ta sjel li ta Balumile.—wp 01-03, pajina 13.

• ¿Bakʼin la svulaʼanik Jesús li jkʼel kʼanaletike?

Jlik Vivliae xi chale: «Li pʼijil krixchanoetike muʼyuk bu te xchiʼukik li jchabi chijetik ta veʼeb vakax ta yakʼobalil kʼalal ivokʼ Jesuse. Jaʼ to ikʼotik kʼalal echʼem xaʼox jayibuk ue». Kʼalal kʼotike jaʼ xaʼox jun olol li Jesuse xchiʼuk nakal ta jpʼej na (Mat. 2:7-11). Ati lajuk yakʼbeik kʼanal takʼin xchiʼuk yantik kʼusitik ti toyolik tajmek stojol li ta yakʼobalil kʼalal ivokʼe, ¿mi chaʼkot noʼox van mut laj yakʼ ta chʼulna María jechuk kʼalal echʼem xaʼox 40 kʼakʼal svokʼel li Jesuse?—wp 01-03, pajina 31.

• ¿Kʼuxi xuʼ xa tabe lek sbalil li akuxlejale?

Xi xa jakʼbe abae: «¿Mi oy van bu stakʼ jel li kʼusitik ta jkuxlejale xchiʼuk ti lekuk noʼox sbae?» Jaʼ jech la spas Amy. Akʼo mi lek tspas kanal, pe muʼyuk bu xmuyubaj. Laj yakʼ venta ti jutuk mu kʼejav ta be ta skoj ti tskʼan lek ojtikinbil liʼ ta balumile. Jaʼ yuʼun jaʼ lik yakʼ ta baʼyel li Ajvalilal yuʼun Diose xchiʼuk lek jal abtej ta prekursora. Chal kaʼitik ti xmuyubaj la tajmeke ti jaʼ la muʼyuk bu jech xaʼi kʼalal tskʼan ox lek ojtikinel ta balumile.—15/1, pajina 19.

• ¿Buchʼu laj yalbe skʼoplal Jesús kʼalal «li cristianoetic ti liʼ cuxulic», ti xie?

Li Jesuse chopoltik skʼoplal laj yalbe li jpʼel kʼop «cristianoetic», ti xie, kʼalal jaʼ laj yalbe li chopol krixchanoetik ta skʼakʼalile o kʼalal jaʼo yakal chalbe skʼoplale. Pe taje maʼuk laj yalbe skʼoplal ti kʼalal jaʼo chchiʼin ta loʼil li yajtakboltake, ti kʼalal jaʼo poʼot xaʼox xichʼik tʼujel ta chʼul espiritue. Jaʼik ti buchʼutik mas xaʼibeik smelolal li kʼusi chal Mateo 24:32, 33. Jaʼ yuʼun chaʼa, yaʼeluke jaʼ chalbe skʼoplal li yajtakboltak ti tʼujbilik ta baʼyel siglo xchiʼuk li ta jkʼakʼaliltike.—15/2, pajina 23, 24.

• ¿Kʼusi jtalelaltik skʼan xkakʼtik ta ilel jech kʼuchaʼal chal Santiago 3:17?

Jtose jaʼ ti sakuk jtalelaltike, yuʼun jaʼ jech xuʼ jpʼajtik ta anil li kʼusi chopole (Gén. 39:7-9). Jech noxtok skʼan me mu jlikestik kʼop, ti mu simaronuk jpas jbatike xchiʼuk ti mu jpastik ti kʼusi maʼuk sventa lekilale. Jaʼ yuʼun staʼo ti xi jakʼbe jbatike: «¿Mi ojtikinbilun ti jnaʼ saʼel lekilale o mi jaʼ noʼox ta jsaʼ kʼop? ¿Mi nopolik noʼox van ta jsaʼ kʼop? ¿Mi ta anil noʼox van chi ilin o mi nopem xkaʼi ta sabel sjol li yantike? ¿Mi oy ta koʼonton chkakʼ perton xchiʼuk mi muʼyuk persa ta jkʼan ti akʼo spasik ti kʼu yelan ta jkʼane?».—15/3, pajina 24, 25.