Parte oyik pe muʼyuk bu jchʼayoj ta joltik

XI LAJ yalbe yermanotak li jtakbol Pabloe: «Jpastic cʼusi lec ta stojol scotol cristianoetic ti cʼalal jaʼ yoraile. Pero jaʼ echʼem to tscʼan ta jpastic ta stojol ti bochʼo coʼol jchʼunojtic Dios jchiʼuctique», xi (Gál. 6:10). Li avi eke ta to me jchʼuntik li mantal yakʼoj ta naʼel Dios taje xchiʼuk ta me jsabetik lek smelolal kʼuyelan ta jpastik li kʼusi lek ta stojolal kermanotaktike. Li buchʼutik skʼanik koltael xchiʼuk ti staik-o kʼanelal yuʼun stsobobbail yajtsʼaklomtak Cristoe jaʼ li kermanotaktik ti mol-meʼelik xa ti te oyik ta snail moletike.

Melel onoʼox ti nopem xaʼi chchabi ta sna stukik stot smeʼik li utsʼ-alaliletik ta jlom balumile, pe li ta yantik balumile jaʼ persa te chbat yichʼik chabiel li ta snail mol-meʼeletik li buchʼutik oy xa sjabilalike. ¿Kʼusi vokolal tsnuptanik li yajtsʼaklomtak Cristo tee? ¿Kʼuxi xuʼ tstsʼik batel yuʼunik mi muʼyuk chkoltaatik yuʼun li yutsʼ yalalike? ¿Kʼuxi xuʼ xkoltavan li tsobobbaile? ¿Xchiʼuk kʼusi sbalil ta jtatik kʼalal nopajtik noʼox ta jvulaʼantike?

Li vokolal tsnuptanik li ta snail mol-meʼeletike

Kʼalal ch-ochik ta snail mol-meʼeletik li buchʼutik oy xa sjabilalike, yikʼaluk van jaʼ te ti bu chchol mantal junuk tsobobbail ti mu xojtikinike. Jaʼ yuʼun , xuʼ van muʼyuk bu nopajtik noʼox chvulaʼanvanik li yajrextikotak Jeova ta tsobobbail taje. Li ta snail mol-meʼeletik noxtoke yikʼaluk van ep krixchanoetik ti yantik-o kʼusitik xchʼunojik ta sventa relijione, jaʼ yuʼun yikʼaluk van tsots xaʼiik li kermanotaktike.

Jech kʼuchaʼal liʼe, oy jlom li ta snail mol-meʼeletike chchapan stukik kʼuyelan chichʼik ta mukʼ Dios. Xi laj yal jun enfermeroe: «Oy jlom yajrextikotak Jeova ti mu xlokʼ xkʼopojik leke xujbilik echʼel ta xilaik ti oy syantail ta junuk relijione, akʼo mi maʼuk jech oy ta yoʼontonik», xi. Jech noxtok, li buchʼutik te ch-abteje tspasulanik li skʼinal lokʼel ta jabile, li sVokʼel Ninyoe o jaʼ li kʼin Koltaele, sventa mu jtosuk noʼox kʼusi tspasik jujun kʼakʼal li buchʼutik te oyike. Jech noxtok, oy junantik ermanoetike jaʼ akʼbil slajesik li kʼusi mu xuʼ chaʼi sjol yoʼontonike (Hech. 15:29). Mi nopajtik noʼox ta jvulaʼantik li ermanoetik ti mol-meʼelik xae, xuʼ me jkoltatik ta stsalel li svokolik taje.

Li koltael chakʼ tsobobbaile

Li baʼyel yajtsʼaklomtak Cristoe oy onoʼox ta sjolik li kʼusi sbainojik ta sventa li mol-meʼeletik ti muʼyuk bu chkoltaatik yuʼun yutsʼ yalalike (1 Tim. 5:9). Jaʼ me jech ek li avie, li buchʼutik yichʼojik ta venta tsobobbaile yakʼojik me ta venta ti mu xichʼ chʼayel ta jolil li mol-meʼeletik ti te oyik ta snail mol-meʼeletik ti bu chcholik mantale.a Jun mol ti Robert sbie xi chale: «Lek me ti akʼo svulaʼanik mol-meʼeletik li jkʼelvanej yajtsʼaklomtak Cristoe, sventa skʼelik kʼuyelan oyik xchiʼuk ti spasik orasion xchiʼukike. Ep tajmek kʼusi xuʼ spas li tsobobbail sventa skʼelik ti kʼusi chtun yuʼunike», xi. Kʼalal ta jchʼakbetik yorail svulaʼanel li mol-meʼeletike, jaʼ me jech chkakʼtik ta ilel ti xkaʼibetik lek smelolal ti toj tsots skʼoplal chaʼi Jeova ti akʼo jkʼeltik li buchʼu skʼanik koltaele (Sant. 1:27).

Mi persa chilike, li jkʼelvanej yajtsʼaklomtak Cristoe ta slekil me yoʼonton chchapanik ti tskoltaik li ermanoetik ti te oyik ta snail mol-meʼeletik te nopole. Li Robert xi chal kaʼitik jtosuk ti kʼusi toj jtunele: «Skʼan me jtijbetik yoʼontonik ti akʼo xbatik ta tsobajel li mol-meʼeletik ti mi xuʼ yuʼunike», xi. Pe kʼalal mu xa xuʼ yuʼun xbatik ta Salon sventa tsobobbaile, yikʼaluk van oy kʼusi yan stakʼ spasik li jkʼelvanej yajtsʼaklomtak Cristoe. Jacqueline, ti ip ta osteoartritis chamele, ta telefono chaʼi li kʼusi ch-echʼ ta tsobajele. Xi chal kaʼitike: «Lek tajmek chkaʼi jba ti kʼalal ch-echʼ li tsobajele. ¡Persa onoʼox ta jkʼan ta xkaʼi!», xi.

Mi mu stakʼ xaʼi ta telefono tsobajel li jun yajtsʼaklom Cristo ti oy xa sjabilale, li jkʼelvanej yajtsʼaklomtak Cristoe xuʼ me spasik grabar li kʼusi ch-echʼe. Ti buchʼu chichʼ echʼel li kʼusi laj yichʼ pasel grabare lek me ti jaʼo kʼupil sba xchiʼin ta loʼile. Xi laj yal jun jkʼelvanej yajtsʼaklom Cristoe: «Kʼalal chkalbetik skʼoplal ermanoetik ta jtsobobbailtik li mol-meʼeletike, te to me kapal skʼoplal chaʼi sbaik ta kutsʼ kalaltik ta mantal», xi.

Chiʼino-o me ta loʼil

Ta melel, kʼalal chbatik ta snail mol-meʼeletik li buchʼu oy xa sjabilalike ta onoʼox me x-akʼbatik at-oʼonton xchiʼuk mu xa snaʼ kʼusi tspasik. Ti kʼusi chkʼot ta stojolalik yantike jaʼ ti oy xa noʼox kʼusi chchʼay ta sjolike. Pe kʼelavil, mi ta noʼox jvulaʼantik li ermanoetik kʼalal mi ochik li ta snail mol-meʼeletik xchiʼuk mi chkalbetik ti xuʼ spat yoʼontonik ta jtojolaltike, yikʼaluk van xkuxet likel yoʼontonik xchiʼuk ti mas xa van xmuyubajik jutukuke (Pro. 17:22).

Yikʼaluk van oy buchʼu tsnop ti mu kʼusi bal-o kʼalal ta jvulaʼantik li jun krixchano ti oy xa sjabilal kʼalal mu xa x-abtej lek skotol li snopbene o ti mu xa xaʼi lek kʼoponele, o ti oy yan xchamel ti vokol xa ta chiʼinel ta loʼil ta skoje. Manchuk mi jech, kʼalal chkakʼ kipaltik ti nopolik noʼox ta jvulaʼantik akʼo mi vokol tajmek chaʼi li kʼusi chkalbetike, yakal me ta xkakʼtik ta ilel ti jbabeutik echʼel ta yakʼel ta ilel slekil koʼontontik ta sventa li kermanotaktike (Rom. 12:10). Mi chchʼayilan ta sjol li kʼusi laj yal o ti kʼusi la spas li jun ermano ti oy xa sjabilale, xuʼ me jtijbetik yoʼonton ti akʼo yalbutik li kʼusi kʼotemik ta pasele —xuʼ xal noxtok li kʼusi kʼot ta pasel ta sbikʼtale— o ti xalbutik kʼuyelan laj yojtikin li mantale. ¿Kʼusi xuʼ jpastik mi mu sta ta alel jpʼeluk kʼop ti tskʼan chale? Oyuk me smalael kuʼuntik xkaʼibetik, xchiʼuk kalbetik chaʼoxpʼeluk kʼop mi jech staʼo chkiltike, o ti jchaʼ-altik ek li kʼusi laj yale xchiʼuk jpatbetik me yoʼontonik ti akʼo to yalik echʼele. Mi xmaklajet ye o ti mu xa lekuk xkʼopoje xchiʼuk ti mu xa xkaʼibetik lek smelolal li kʼusi chale, jtsʼetanbetik me lek xchikinal ti kʼuyelan yechʼomal ye chalike sventa xkaʼibetik smelolal li kʼusi chalike.

Mi mu xa stakʼ xi jloʼilaj xchiʼuke, oy me kʼusi yan stakʼ jpastik noxtok. Jun prekursora ti Laurence sbie nopajtik noʼox tsvulaʼan li Madeleine, jaʼ jun yajtsʼaklom Cristo ti 80 xa sjabilale xchiʼuk ti mu xa xkʼopoje. Li Laurence chal kaʼitik ti kʼuyelan chchiʼin ta loʼile: «Ta jtsakbe skʼob li Madeleine kʼalal ta jpaskutik orasione. Kʼun xa chmichʼ li jkʼob eke, xchiʼuk tsmakʼulan sat sventa koliyal chi yalbun ta sventa ti alakʼ sba echʼ kuʼunkutik jlikele», xi. Kʼalal ta jtsakbetik skʼob li kermanotaktik ti mol-meʼelik xae o ti ta jmeytik ta sjunul koʼontontike xuʼ me xpatbat tajmek yoʼontonik.

Tsots skʼoplal ti te jchiʼuktike

Kʼalal nopajtik noʼox ta jvulaʼantik li buchʼutik mol-meʼelik xae, xuʼ me jaʼ mas lek xichʼik kʼelel. Danièle ti oy xa van ta jtob jabil tsvulaʼan yajrextikotak Jeova ti oyik ta snail mol-meʼeletike, xi chale: «Kʼalal chakʼik venta li j-abteletik ti nopajtik noʼox chichʼ vulaʼanel junuk krixchanoe, mas me lek chchabiik», xi. Li Robert ti laj kalbetik skʼoplale xi chale: «Li buchʼu te ch-abtej ta snail mol-meʼeletike jaʼ van mas chaʼibe li kʼusi chal jun krixchano ti nopajtik noʼox chkʼot ta vulaʼale. Pe kʼelavil, yikʼaluk van mu jechuk xichʼ ta mukʼ li jun jvulaʼal ti bakʼintik noʼox chkʼote», xi. Li jchabivanejetike nopolik onoʼox chchiʼinik ta loʼil utsʼ-alaliletik ti jpʼel xalike, jaʼ yuʼun toj lek chaʼiik ti koliyal ch-albatik ta skoj yabtelik yuʼun jlom jvulaʼaletike. Jech noxtok, mi lek xkil jba jchiʼuktike yikʼaluk van jaʼ mas chichʼbeik-o ta mukʼ li mantaletik sventa talelalil xchiʼuk li kʼusi xchʼunojik li mol-meʼel yajrextikotak Jeovae.

Jech noxtok xuʼ me lek xkil jbatik xchiʼuk li buchʼutik te ch-abtej mi ta jkʼan ta jkolta jbatik ta jtosuk kʼunil abtele. Li ta yantike chʼabal tajmek li buchʼutik chchabivanik ti lek xtojobike jaʼ yuʼun mu xa lekuk chichʼik kʼelel li mol-meʼeletike. Jun enfermera ti Rébecca sbie xi chale: «Toj ep noʼox kʼusi skʼan pasel kʼalal jaʼo yorail chveʼike. Jaʼ yuʼun, jaʼo van toj lek yorail jvulaʼantik li jun kamigotik ti vaʼ ora taje sventa jmakʼlintik», xi. Jaʼ yuʼun, mu me epuk skʼan jnoptik sventa jakʼbetik li j-abtel kʼuxi xuʼ jkoltatik li mol-meʼeletike.

Kʼalal jun noʼox bu nopolik ta jvulaʼantik li snail mol-meʼeletike, ta me xkakʼtik venta ti kʼusi chtun yuʼun li kermanotaktik tee xchiʼuk ti oy kʼusi jpastik sventa jkoltatike, pe ti ta jkʼanbetik permiso li j-abteletike. Jech kʼuchaʼal liʼe, mi ta xkakʼbetik ta skuartoik li slokʼoltak buchʼutik skʼanoje o li kʼusitik sbonoj ololetike xuʼ me jaʼ xmuyubajik-o tajmek. Kʼalal ta jnoptik ta slekilale, xuʼ me xkichʼbetik echʼel jlikuk snatil kʼuʼ o li kʼusitik chtun yuʼune. Mi oy tsʼunbil nichimetik tee, ¿mi xuʼ van xkikʼtik lokʼel jlikeluk sventa skʼupinik li ikʼ ta panae? Li Laurence ti laj kalbetik skʼoplale, xi chale: «Li Madeleine smalaoj xa tajmek ti kʼalal chbat jvulaʼan jujun xemanae. Kʼalal chkikʼ echʼel ololetike ta anil noʼox tstseʼin xchiʼuk xmuyubaj likel li sate», xi. Kʼalal jech ta jpastike jaʼ me jun-o yoʼonton chaʼi sbaik li buchʼutik te oy ta snail mol-meʼeletike (Pro. 3:27).

Koʼol ta jtabetik sbalil

Kʼalal nopajtik noʼox ta jvulaʼantik li buchʼutik mol-meʼelik xae yikʼaluk van jaʼ svinajeb mi ta melel chi jkʼanvan (2 Cor. 8:8). ¿Kʼu yelan? Yikʼaluk van toj kʼux chkiltik ti kʼunkʼun tslubtsaj echʼel li kamigotike. Li Laurence xi chale: «Kʼalal laj kil ti mas xa tslubtsaj li Madeleine chkat-o tajmek koʼonton, chi okʼ kʼalal mi li sut ta svulaʼanel jujukoje. Pe laj kakʼ venta ti xuʼ skoltautik ta stsalel xiʼel li orasion ta jpastik ta sjunul koʼontontike xchiʼuk ti ta jpatbetik yoʼonton li yantike. Li Robert laj kalbetik skʼoplale ep jabil la svulaʼan Larry, jun yajtsʼaklom Cristo ti ip ta chamel ti Parkinson sbie. Xi chal li Robert: «Chil tajmek svokol ta chamel li Larry, yuʼun solel xa mu xkaʼi li kʼusi chale. Pe kʼalal jmoj ta jpaskutik orasione xkilbe to li xchʼunel yoʼontone», xi.

Kʼalal ta jvulaʼantik li kermanotaktik ti oy xa sjabilalike maʼuk noʼox ta stabeik sbalil, yuʼun ta jtabetik sbalil ek. Kʼalal chkiltik ti oy-o tajmek ta yoʼontonik ti nopoluk oyik ta stojolal Jeova manchuk mi jelajtik kʼusitik xchʼunojik li yantik krixchanoetik ta spat xokonike jaʼ chakʼ kiltik ti oyuk xchʼunel koʼontontik eke xchiʼuk ti oyuk jtsatsaltike. Ti oy-o tajmek ta yoʼontonik li veʼlil ta mantal akʼo mi mu xa x-ilvanik leke xchiʼuk ti mu xa xaʼiik lek kʼoponele, jaʼ me chakʼ kiltik ti «muc ta vajuc noʼox ta xcuxi li cristianoe. Jaʼ ta xcuxi ta sventa scotol li scʼop chlocʼ ta ye Diose» (Mat. 4:4). Kʼalal ta skʼupinik mol-meʼeletik ti kʼusi mu masuk tsots skʼoplal yilele, jech kʼuchaʼal li stseʼej jun kʼox olol o kʼalal ta skʼupinik jtosuk veʼlil xchiʼuk yamigoike, jaʼ me chakʼ kiltik ti skʼan xi jmuyubaj noʼox li ta kʼusi oy kuʼuntike. Ti kʼalal skʼanojik tajmek li kʼusitik sventa mantale jaʼ me tskoltautik ta skʼelel lek li kʼusi skʼan xkakʼtik ta baʼyele.

Ta melel, sjunul tsobobbail ta stabe sbalil kʼalal ta jkoltatik li mol-meʼeletike. ¿Kʼu yelan? Li buchʼutik kʼun xa sbekʼtalike jaʼ me skʼanik mas kʼanel kʼuchaʼal kermanotik, vaʼun jaʼ me jech xuʼ xakʼ ta ilel mas slekil yoʼontonik li ermanoetik ta tsobobbaile. Jaʼ yuʼun chaʼa, jkotoltik me skʼan jkʼeltik li mol-meʼeletike, akʼo mi jal tajmek jech jpastik, yuʼun me jaʼ jech ta jkolta jbatik ta jujuntal (1 Ped. 4:10, 11). Mi jech chakʼ ta ilel stalelalik li jchabivanejetik yajtsʼaklomtak Cristoe, jaʼ me jech tskoltaik li ermanoetik ta tsobobbaile, yuʼun jaʼ onoʼox jech skʼan jpas ta jkuxlejaltik li yajtsʼaklomutik Cristoe (Eze. 34:15, 16). Li koltael chkakʼtike xchiʼuk ti ta kʼanelal ta jpastike jaʼ me chkakʼbetik-o yilik li ermanoetik ti mol-meʼelik xa ti muʼyuk jchʼayoj ta joltike.

[Tsʼibetik ta yok vun]

[Lokʼol ta pajina 26]

Kʼalal ta jpastik orasion ta sjunul koʼontontike xuʼ me jaʼ xkuxet-o yoʼonton chaʼi li jun ermano ti oy xa sjabilale

[Lokʼol ta pajina 26]

Mi chkakʼtik ta ilel ti jkʼanojtik li mol-meʼeletike jaʼ me tstsatsub-o yoʼontonik

[Lokʼol ta pajina 28]

«Kʼalal chakʼik venta li j-abteletik ti nopajtik noʼox chichʼ vulaʼanel junuk krixchanoe, mas me lek chchabiik»