Oyuk slekil koʼontontik xchiʼuk mu me xi j-echʼ ta mas

«Vulesbo ta yoʼntonic [...] ti lamajemuc ti yoʼntonique.» (TITO 3:1, 2, Ch.)

1, 2. ¿Kʼusi chal li Tsʼibetik ta sventa ti oyuk slekil koʼontontike, xchiʼuk kʼu yuʼun skʼan jechuk jtalelaltik?

LI JKʼANVANEJ jTotik Jeova ta vinajele, muʼyuk spajeb li spʼijile. Jech oxal, chkalbetik ti akʼo sbeiltasutike (Sal. 48:14). Li yajtsʼaklom Cristo ti Santiago sbie, chal kaʼitik «ti buchʼu liquem talel sbijilic ta stojol ti Diose, stamojbe lec smelol stuqʼuil ti xcuxlejale, oy slamajemal yoʼnton, oy xcʼuxul yoʼnton, oy lec srazon, snaʼ xcoltavan, lec ti cʼusi ta spase, xcʼot xcʼopoj, xchiʼuc jamal ye stiʼic» (Sant. 3:17, Ch).

² Li jtakbol Pabloe xi laj yale: «Acʼbeic yil scotol cristianoetic ti oy xa slequil avoʼntonique [slamajemal avoʼontonik]», xi (Fili. 4:5).a Kʼuchaʼal chkiltike, toj tsots skʼoplal ti oyuk slekil koʼontontike, ti xkakʼ jbatik ta pasel ta mantale. Jtos ti kʼuyelan skʼan xkakʼtik ta ilel li talelalil taje jaʼ ti jchʼunbetik smantal li Jesucristoe, li Kajvaltik xchiʼuk li Jolil yuʼun tsobobbaile (Efe. 5:23). Yan xtoke, jaʼ ti kʼunuk noʼox jtalelaltik ta stojolal li krixchanoetike.

3, 4. 1) Albo skʼelobil ti oy sbalil kʼalal oy slekil koʼontontike. 2) ¿Kʼusitik ta jchanbetik skʼoplal?

³ Jkotoltik ta jtabetik sbalil kʼalal chkakʼ ta ilel slekil koʼontontik mi jech skʼan pasel chkiltike. Kalbetik junuk skʼelobil: Kʼalal laj yilik terrorismo ta Gran Bretañae xchiʼuk ti laj yichʼ alel ti mu xa stakʼ ichʼel batel ta avion li kʼusitik xuʼ toʼoxe, jutuk mu skotoluk ta sjunul yoʼonton la xchʼunik li mantal ta sventa xchabielik li jxanviletik ta avione. Kʼalal ta jtijtik karoe, jnaʼojtik onoʼox ti oy bateltik skʼan xkakʼtik jelavuk li yantik karo sventa ta jchabi jbatik xchiʼuk sventa mu xi jmakvan ta be, jech kʼuchaʼal kʼalal ta jtuchʼtik mukʼta bee.

⁴ Manchuk mi jech, eputik ti vokol chkaʼitik spasel jeche. Sventa kʼun xkaʼitike, jkʼelbetik oxibuk smelolal: kʼusi skʼan stij koʼontontik ti oyuk slekil koʼontontike, kʼuyelan skʼan jtalelaltik ta sventa li j-abteletike xchiʼuk bu to kʼalal xuʼ xkakʼ jbatik ta pasel ta mantal.

¿Kʼu yuʼun skʼan oyuk ta koʼontontik xkichʼtik pasel ta mantal?

5. ¿Kʼusi chtijbat-o yoʼonton jlom mosoetik ti teuk-o spasatik ta mantale?

⁵ Jkʼelbetik skʼoplal jtosuk mantal ti la stsʼiba Moisese, ti chal kaʼitik kʼu yuʼun skʼan xkakʼ jbatik ta pasel ta mantale. Li Mantale chal kaʼitik ti j-hebreoetik ti mosoinbilike, mi lokʼ vukub jabile xuʼ la xkol lokʼel li ta yabtelike o mi moʼoje jaʼ li ta sjabilal ti Kolem Chkom skotole, jaʼ ti kʼusi baʼyel xkʼot skʼakʼalile. Pe xuʼ mu skʼan xkol lokʼel li mosoe (kʼelo Éxodo 21:5, 6). ¿Kʼu yuʼun? Ta skoj kʼanelal. Jaʼ jech, mi lek ichʼat ta kʼux yuʼun li yajvale, yikʼaluk van xtijbat-o yoʼonton ti akʼo xchʼunbe smantal ta skoj ti skʼanoje.

6. ¿Kʼuxi tsakal skʼoplal li kʼanelal xchiʼuk ti oy ta koʼontontik xi jpase ta mantale?

⁶ Jaʼ jech ek, ta skoj ti jkʼanojtik li Jeovae jaʼ me tstij koʼontontik ta yakʼbel jkuxlejaltik xchiʼuk ti jechuk jkuxlejaltik kʼuchaʼal laj kalbetike (Rom. 14:7, 8). Li jtakbol Juane xi la stsʼibae: «Me jcʼanojtic o li Diose, ta jchʼunbetic li smantaltaque. Muʼyuc tsots ta chʼunbel chcaʼitic li smantaltaque», xi (1 Juan 5:3). Li kʼanelal taje, maʼuk tsaʼ li kʼusi tskʼan stuke (1 Cor. 13:4, 5). Kʼalal ta jkʼopontik li buchʼutik ta jpat jxokontike, jaʼ me li kʼanelal tstij koʼontontik ti akʼo xlamaj koʼontontike xchiʼuk ti jaʼuk baʼyel jsabetik slekilalike. Jech ta melel, ta jkʼeltik kʼusitik tskʼanik, mu jaʼuk chbat ta koʼontontik li kʼusi ta jkʼan jtuktike (Fili. 2:2, 3).

7. ¿Kʼu yuʼun skʼan oyuk slekil koʼontontik li ta kabteltik ta stojolal Diose?

⁷ Skʼan me jkʼel jbatik lek ti mu me spʼosi yok kuʼuntik yantik ta skoj ti kʼusi chkaltik o kʼusitik ta jpastike (Efe. 4:29). Mi jkʼanoj li jchiʼiltaktike, muʼyuk me ta jmakbetik ta be li xchʼielik ta mantal ta skoj ti jelel slumalike xchiʼuk ti kʼuyelan chʼiemik tale. Ti vaʼ yelan taje, skʼan me persa oyuk slekil koʼontontik. Jech kʼuchaʼal liʼe, li misioneraetik ti nopem xaʼi tsbon sbaike o ti tstunesik mediaetike, ta skomtsanik spasel mi chopol chaʼiik li krixchanoetik chilike o mi ch-albat skʼoplalik ti chopol stalelalike (1 Cor. 10:31-33).

8. ¿Kʼuxi tskoltautik li skʼanel Dios ti akʼo «biqʼuit» xkakʼ jbatike?

⁸ Ti jkʼanojtik li Jeova noxtoke jaʼ me tskoltautik ta stsalel li toybaile. Kʼalal laj yut sbaik li yajtakboltak Jesús ta skoj ti buchʼu la bankilal yuʼunike, li Jesuse la svaʼan ta oʼlol jun neneʼ kerem, vaʼun xi laj yale: «Li bochʼo chichʼ ta mucʼ li jun olol liʼi, ti vuʼun ta jventa tspase, jaʼ vuʼun chiyichʼun o ta mucʼ. Li bochʼo chiyichʼun ta muqʼue, jaʼ chichʼ o ta mucʼ li Jtot ti la stacun tale. Jaʼ yuʼun li bochʼo biqʼuit ta xacʼ sba avuʼunique, jaʼ banquilal ta xcʼot», xi (Luc. 9:48; Mar. 9:36). Yikʼaluk van oy jlomutik ek ti vokol chkaʼitik ti «biqʼuit» xkakʼ jbatike, ta skoj ti jsaʼ mulilutik xchiʼuk ti lek chkaʼitik ti jtoy jbatike yikʼaluk van ta jkʼantik tsots jkʼoplaltik. Yan mi bikʼit chkakʼ jbatike, jaʼ me tskoltautik sventa oyuk slekil koʼontontik xchiʼuk ti xkichʼtik ta mukʼ li yantike (Rom. 12:10).

9. ¿Kʼusi skʼan xkakʼtik venta yoʼ kʼunuk xkaʼitik li xchʼunel mantale?

⁹ Jech noxtok, mi chkakʼtik venta ti oy jlom krixchanoetik akʼbil yabtelik yuʼun Diose, jaʼ me tskoltautik ti xkakʼ jbatik ta pasel ta mantale. Li melel yajtsʼaklomutik Cristoe kichʼojtik ta mukʼ ti bu likem tal li pas mantal ti toj tsots skʼoplale. Xi laj yalbe jcorintoetik li jtakbol Pabloe: «Ta jcʼan chanaʼic noxtoc, scotol li viniquetique jaʼ sjolic li Cristoe. Li antsetique jaʼ sjolic li viniquetique. Li Cristoe jaʼ sjol li Diose», xi (1 Cor. 11:3).

10. ¿Kʼusi chkakʼtik ta ilel kʼalal ta jchʼunbetik smantal Diose?

¹⁰ Kʼalal chkakʼtik akʼo spasutik ta mantal li Diose, chkakʼtik ta ilel ti jpatoj koʼontontik ta stojolal li jkʼanvanej Totil kuʼuntik Jeovae. Xojtikin kʼusitik ta jnuptan ta jkuxlejaltik xchiʼuk snaʼ stoj li jvokoltike. Taje teuk me ta joltik kʼalal mi oy buchʼu mu xichʼutik ta mukʼ o mi toj echʼem ch-ilin ti mu xa snaʼ kʼusi tspase. Xi la stsʼiba li jtakbol Pabloe: «Ti me xuʼe, jaʼ ti acʼo avaqʼuic persa ti muʼyucuc cʼop avuʼunic achiʼuquic scotol cristianoetique», xi. Sventa stsak mas yip li tojobtasele, xi laj yakʼ mantale: «Voʼoxuc ti lec jcʼanojoxuque, mu me xapac acʼoplal atuquic. Jaʼ acʼbeic spac sutel stuc li Diose. Yuʼun jech tsʼibabil ta scʼop Dios: “Vuʼun oy ta jventa ta xcacʼbe spacol; vuʼun jtuc ta xcacʼbe stoj”, xi li Cajvaltic Diose», xi (Rom. 12:18, 19).

11. ¿Kʼuxi chkakʼtik ta ilel ti ta jkʼan tspasutik ta mantal li Cristoe?

¹¹ Skʼan me jtsaktik ta mukʼ ti oy buchʼutik akʼbil yabtelik yuʼun Dios ta tsobobbail xtoke. Li ta baʼyel kapitulo yuʼun Apocalipsise te chakʼ kiltik ti oy «cʼanal» ta sbatsʼi kʼob li Jesucristoe (Apo. 1:16, 20). Jtos smelolal li «cʼanal» taje jaʼ chalbe skʼoplal jtsop moletik ta tsobobbailetik. Li jkʼelvanejetik taje chakʼ sbaik ta pasel ta mantal yuʼun Cristo xchiʼuk chchanbeik li slekil yoʼonton ta stojolal krixchanoetike. Li Jesuse laj yal ti «jʼabtel ti jun [«tukʼ», NM] yoʼnton [...], ti lec bije» jaʼ chakʼ ta yorail li veʼlil ta mantale, jech un, jkotoltik li yajtsʼaklomutik Cristoe jchʼunojtik li beiltasel chakʼ li j-abtel taje (Mat. 24:45-47). Kʼalal solel oy ta koʼontontik xchanel xchiʼuk yakʼel ta jkuxlejaltik li mantal chakʼbutike, jaʼ me svinajeb ti chkakʼ spasutik ta mantal li Cristoe. Jech xtok, jaʼ me jech chkakʼtik oyuk lekilal xchiʼuk jmojuk oyukutik (Rom. 14:13, 19).

¿Bu to kʼalal skʼan jchʼuntik mantal?

12. ¿Kʼu yuʼun oy bu mu xkakʼ jbatik ta pasel ta mantal?

¹² Veno, pe toj jelel me smelolal ti chkakʼ jbatik ta pasel ta mantal xchiʼuk ti muʼyuk tukʼ chkakʼ jbatik ta stojolal li kʼusi jchʼunojtike xchiʼuk li mantaletik ta Vivliae. ¿Kʼusi la spasik li baʼyel jchʼunolajeletik kʼalal albatik yuʼun jbabeetik ta relijion ti akʼo yikta sbaik ta xcholbel skʼoplal Jesuse? Li Pedro xchiʼuk li yantik jtakboletike xi tsots yoʼonton laj yalike: «Jaʼ tsots scʼoplal baʼyuc ta jchʼunbecutic smantal Dios; mu jaʼuc tscʼan baʼyuc ta jchʼunbecutic smantal cristiano», xiik (Hech. 4:18-20; 5:28, 29). Jaʼ jech li avi eke: kʼalal tskʼan tspajtsanutik yaʼiik ta xcholel lekil aʼyej «li ajvaliletique», muʼyuk bu chchibaj koʼontontik, jaʼ noʼox ti kʼusie mas chkichʼ jpʼijiltik. Mi chalik ti mu xa xuʼ jcholtik mantal ta naetike, ta jkʼeltik kʼuxi xuʼ xkutik sventa jchiʼintik ta loʼil li krixchanoetike xchiʼuk ti xkʼot ta pasel kuʼuntik li kabteltik yakʼoj Diose. Mi mu xa xakʼik jtsob jbatik xtoke, ta jujun xa grupo bu ta jtsob jbatik sventa mu yolbajuk xa chkakʼ jbatik ta ilel (Rom. 13:1; Heb. 10:24, 25).

13. ¿Kʼusi laj yal Jesús ta sventa ti xkakʼ akʼo spasutik ta mantal li buchʼutik oy yabtelike?

¹³ Pe kʼuchaʼal laj yal Jesús li ta Mantaletik ta Vitse, skʼan xkakʼ jbatik ta pasel ta mantal ta stojolal li buchʼutik oy yabtelike: «Me oy ta stsacoxuc ta cʼop ti tscʼan ta spojboxuc batel acʼuʼique, acʼbeic batel alapbolal xaquitaic noxtoc. Me oy chasujoxuc ta icatsil junuc revae, cuchbeic batel chibuc reva» (Mat. 5:40, 41).b Ti chkichʼtik ta mukʼ li jchiʼiltaktike xchiʼuk ti oy ta koʼontontik ta skoltaelik xtoke, jaʼ me tskoltautik ta xanel batel «chibuc reva», jaʼ xkaltik, ti maʼuk noʼox ta jpastik ti kʼusi chi j-albate (1 Cor. 13:5; Tito 3:1, 2).

14. ¿Kʼu yuʼun skʼan mu xkakʼ akʼo spasutik ta mantal li jvalopatinej mantaletike?

¹⁴ Manchuk mi lek ti xkakʼ jbatik ta pasel ta mantale, pe mu me jutebuk stakʼ spasutik ta mantal li jvalopatinej mantaletike. Skʼan me jechuk koʼontontik ta jyalel sventa mu jsokestik li chanubtaseletik ta Vivliae xchiʼuk ti jmojuk oyutik ta tsobobbaile. Xi laj yal Pablo ta sventa li «jchʼunolajeletic ta alel[e]»: «Me jutuc muc jchʼuncutic li cʼusi laj yalique. Yuʼun jech mu me xyanij smelol li Lequil Aʼyej achʼunojique, yuʼun jaʼ melel», xi (Gál. 2:4, 5). Li jvalopatinej mantaletike mu toj ojtikinbiluk tajmek, pe kʼalal oy bu chlokʼ tal junuke, li tukʼil jchʼunolajeletike tukʼ chakʼ sbaik ta stojolal li tukʼilale.

Skʼan me kʼun stalelal li jkʼelvanejetike

15. ¿Kʼuxi chakʼ sbaik ta pasel ta mantal li jkʼelvanejetik kʼalal tstsob sbaike?

¹⁵ Jtos ti kʼusi chichʼ kʼanbel li jkʼelvanejetike jaʼ ti kʼunuk noʼox stalelalike. Xi la stsʼiba li Pabloe: «Li bochʼo ta xʼoch ta jqʼuelvanej yuʼun jcholcʼopetique, tscʼan [...] lec noʼox yoʼnton [o «kʼun noʼox stalelal, ti oy noʼox slamajemal yoʼontone»]», xi (1 Tim. 3:2, 3). Skʼan me mas jechuk stalelalik kʼalal ta stsob sbaik ta xchapel kʼusitik sventa tsobobbaile. Kʼalal mu to chkʼot lek ta nopel yuʼunik ti kʼusi tspasike, xuʼ me xal sloʼilik ta jujuntal, akʼo mi mu persauk xal sloʼil skotolik. Mi laj xaʼox yaʼiik li tojobtaseletik ta Vivlia li ta tsobajel taje, yikʼaluk van oy junuk mol ti chjel li kʼusi snopoje. Jaʼ jech, li mol taje skʼan xakʼ sba ta pasel ta mantal, chakʼ ta yoʼonton li kʼusi chal xchiʼiltake xchiʼuk mu jaʼuk chbat ta yoʼonton li kʼusi tsnop stuke. Yikʼaluk van jelel li sloʼilik ta slikebale, pe li orasion, li snopel lek, ti bikʼit chakʼ sbaik xchiʼuk ti kʼun noʼox li stalelalike, jaʼ me jech jmoj oyik li moletike (1 Cor. 1:10; kʼelo Efesios 4:1-3).

16. ¿Kʼu yelan skʼan stalelal li jkʼelvanej yajtsʼaklom Cristoe?

¹⁶ Li jkʼelvanej yajtsʼaklomtak Cristoe skʼan xakʼbeik yipal ta yichʼel ta mukʼ li mantaletik chakʼ Dios ta sventa skotol li kʼusitik tspasike. Tsots skʼoplal ti jechuk stalelalik xtok kʼalal chchabiik li chijetike, yuʼun me jaʼ jech ta xkʼuxul xchiʼuk ta slekil yoʼontonik ta skʼoponik. Xi laj yal mantal li jtakbol Pedroe: «Chabiic me li xchijtac Dios ti acʼbil aventainique. Mu me ta sujeluc xapasic; yutsiluc me avoʼnton xapasic jech chac cʼu chaʼal tscʼan li Diose. Mu me jaʼuc ta scoj ti xpichʼet avoʼntonic yuʼun taqʼuine. Scotoluc avoʼnton xapasic li avabtelique», xi (1 Ped. 5:2).

17. ¿Kʼuxi chakʼ ta ilel skotol jchʼunolajeletik ti snaʼ xakʼ sbaik ta pasel ta mantale?

¹⁷ Li mol-meʼeletik ta tsobobbaile ta stojik ta vokol li koltael chakʼik li kerem-tsebetike xchiʼuk chichʼik ta mukʼ. Jaʼ jech li kerem-tsebetik eke, ta xichʼik ta mukʼ li mol-meʼeletik ta skoj ti oy xa ta sjayibal tal jabil ti chanemik ta spasbel yabtel Jeovae (1 Tim. 5:1, 2). Li jkʼelvanejetike tsaʼik viniketik ti lek chanemike, sventa xakʼbeik sbain abtelaletik xchiʼuk chchanubtasik sventa xkoltavanik ta xchabiel li xchijtak Diose (2 Tim. 2:1, 2). Skotol li jchʼunolajeletike skʼan me xchʼunik li mantal ti akʼbat snaʼ yuʼun Dios li Pabloe: «Chʼunbeic me cʼusi chayalboxuc li bochʼotic sventainojoxuque; ichʼic me ta mucʼ [akʼo abaik ta pasel ta mantal]. Yuʼun jaʼ ta xchabioxuc, yuʼun tsnaʼic ti ta onoʼox xcʼot yalic ta stojol Dios ti cʼu xʼelan ch-abtejique. Me chavichʼic ta muqʼue, xcuxet noʼox yoʼnton ch-abtejic; muʼyuc bu chloʼilaj yoʼnton avuʼunic. Yuʼun muʼyuc cʼusi chataic ec me jech chapasique», xi (Heb. 13:17).

Kakʼ jbatik ta pasel ta mantal ta jnatik

18. ¿Kʼu yuʼun skʼan xkakʼ jbatik ta pasel ta mantal li ta kutsʼ kalaltike?

¹⁸ Skʼan xkakʼ jbatik ta pasel ta mantal li ta kutsʼ kalaltik noxtoke (kʼelo Colosenses 3:18-21). Li Vivliae chal kaʼitik kʼusi kabteltik ta jujuntal li ta kutsʼ kalaltike. Li vinike jaʼ jolil yuʼun li yajnile xchiʼuk jaʼ sbainoj spasel ta mantal li xnichʼnabtake. Skʼan me stsakbe ta mukʼ yabtel smalal li antse, li nichʼnabiletike skʼan me xakʼbeik yipal xchʼunel mantal, vaʼun jaʼ me jech xmuyubaj li Kajvaltike. Mi oy ta koʼonton jkotoltik ti xkichʼtik pasel ta mantale jmoj me oyutik xchiʼuk oy me lekilal kuʼuntik li ta jnailtike. Pe skʼan oyuk noʼox me spajeb, yuʼun bateltike xuʼ jchʼuntik pasel ta mantal, pe bakʼintike mu stakʼ. Jkʼeltik kʼusi kʼot ta pasel chal Vivlia ti chakʼ kiltik taje.

19, 20. 1) ¿Kʼuxi jelel slekil yoʼonton Elí xchiʼuk li Jeovae? 2) ¿Kʼusi xuʼ xchanik li totil-meʼiletik ta sventa li kʼusitik laj kaltike?

¹⁹ Kʼalal bikʼit toʼox li Samuele, jaʼo ochem ta mero bankilal pale ta Israel li Elie. Pe li Ofni xchiʼuk Finees li xnichʼnabtak Elie, «puru chopol viniquetic; muc xichʼic ta mucʼ li Mucʼul Diose». Laj yaʼi Elí ti oy kʼusitik chopol tspasik li xnichʼnabtake; jech kʼuchaʼal liʼe, ta xmulivajik xchiʼuk li antsetik ti te chtunik ta tiʼ chʼulna pasbil ta nukule. ¿Kʼusi la spas ta sventa taje? Laj yalbe ti mi la saʼ smulik ta stojolal Jeovae muʼyuk la buchʼu xuʼ spas orasion ta stojolalik, pe muʼyuk bu la stukʼibtasan un mi jaʼuk bu laj yakʼanbe mantal. Jech oxal, muʼyuk bu laj yikta sbaik ta spasel li kʼusi chopole, vaʼun li Jeovae staʼo xchamik laj yil. Kʼalal albat Elí ti icham li xnichʼnabtake, icham ek li stuke. ¡Toj kʼux ta alel taje! Jamal xvinaj ti mu lekuk ti oy noʼox slekil yoʼonton Elí ta sventa li kʼusi chopol la spas li xnichʼnabe, jaʼ xkaltik, ti muʼyuk bu la spajes ti kʼusi chopol la spasike (1 Sam. 2:12-17, 22-25, 34, 35; 4:17, 18).

²⁰ Li avie, ta jchantik ti jelel kʼuyelan chchiʼin ta loʼil xnichʼnabtak ta vinajel li Diose. Li j-alkʼop Micayae oy kʼusi toj labal sba laj yil, jaʼ jun tsobajel ti la spas xchiʼuk yaj-anjeltak li Jeovae. La sjakʼbe yaj-anjeltak buchʼu la xuʼ yuʼun ta sloʼlael li Acabe, li chopol ajvalil ta Israele, sventa la xyal ta lum. Vaʼun, la xchikinta li kʼusi chal jayvoʼuk xnichʼnabtake. Kʼalal laj yal jun anjel ti tsloʼlae, li Jeovae la sjakʼbe kʼuxi snopoj tspas. Lek laj yaʼi li kʼusi laj yale, jaʼ yuʼun la svaʼan sventa xbat spas taje (1 Rey. 22:19-23, NM). ¿Kʼusi xuʼ xchanik te skotol li utsʼ-alaliletik ti jaʼik yajtsʼaklomtak Cristoe? Jaʼ ti skʼan kʼun noʼox stalelalike. Toj lek ti xaʼibe sloʼil yajnil xchiʼuk xnichʼnabtak li jolil ta utsʼ-alalile. Jech li stukik ek une, mi chikintabat xa sloʼilik o ti kʼusi tskʼanike, skʼan me xakʼ sbaik ta pasel ta mantal, jaʼ xkaltik, skʼan xichʼik ta mukʼ li kʼusi tsnop tspas li jolile, yuʼun jaʼ akʼbil yabtel yuʼun Dios.

21. ¿Kʼusi ta jkʼeltik li ta yan xchanobile?

²¹ ¡Kolaval tajmek chkalbetik li jkʼanvanej Totil kuʼuntik xchiʼuk ti lek pʼije yuʼun tsvules ta joltik ti tsots skʼoplal ti xkakʼ jbatik ta pasel ta mantale! (Sal. 119:99.) Li ta yan xchanobile ta jkʼeltik kʼuxi xuʼ xmuyubaj ta snupunelik mi kʼun noʼox stalelalike xchiʼuk mi xyamet noʼox yoʼontonike.

[Tsʼibetik ta yok vun]

¿Kʼusi cha takʼ?

• ¿Kʼusi ta jtatik mi jnaʼ xkakʼ jbatik ta pasel ta mantale?

• ¿Kʼuxi chakʼ ta ilel moletik ti oy ta yoʼontonik spasatik ta mantale?

• ¿Kʼu yuʼun skʼan jchʼuntik mantal li ta kutsʼ kalaltike?

[Lokʼol ta pajina 4]

Li moletike jech yelan chkʼuxubinik krixchanoetik kʼuchaʼal la spas li Cristoe

[Lokʼol ta pajina 6]