Oy kʼusi toj tsots skʼoplal ta jmala

OY KʼUSI ta jmala ti toj tsots skʼoplale. Chkal avaʼiik kʼu yuʼun ti oy kʼusi ta jmalae, xi jun tsebal meʼil ti likem ta Españae.

Chʼabal lekilal xchiʼuk muyubajel ti bu li chʼie. Li kutsʼ kalale laj yat tajmek yoʼontonik ta skoj ti kʼusi toj chopol la snuptan ti cham-o li jmuk kerem kʼalal yichʼoj chanib jabile. Jech xtok, ta skoj ti toj chopol tajmek kʼusi nopem xaʼi tspas li jtote, muʼyuk bu xmuyubaj ta snupunel li jmeʼe. Manchuk mi jech, lek laj yalbunkutik mantal xchiʼuk jbankil ta sventa jtalelalkutik.

Ta mas tsʼakale, li jbankile inupun, jechun ek. Ta mas tsʼakal jutuke, li jmeʼe tabat kanser chamel ti jaʼ ta xmilat-oe; pe kʼalal mu to chchame laj yakʼbunkutik komel jun mukʼta matanal.

Oy jun ants ti xojtikin li jmeʼe, jaʼ albat yaʼi li spatobil oʼontonal chakʼ Vivlia ta sventa li chaʼkuxesele, vaʼun la skʼan chanubtasel ta Vivlia. Li spatobil oʼontonal chal Vivliae, jaʼ akʼbat-o sbalil xkuxlejal xchiʼuk jaʼ imuyubaj-o ti kʼu to sjalil kuxule.

Kʼalal laj kilkutik ti kʼuyelan itun ta xkuxlejal li mantal ta Vivliae, lik jchanbekutik li sKʼop Dios xchiʼuk li jbankil eke. Kʼalal jun xaʼox u skʼan xvokʼ li xchibal kole, laj kichʼ voʼ kʼuchaʼal yajrextiko Jeova. Laj kil jun jtseb ti alakʼ sba tajmeke, Lucía laj kakʼbekutik sbi.

Toj tsots skʼoplal laj kaʼi ti kʼalal laj kichʼ voʼe, oy chib srasonal ti kʼu yuʼun jech laj kaʼie. June jaʼ ti jaʼ xa yuʼunun li Jeovae, yuʼun laj kakʼ jba ta stojolal sventa chi tun yuʼun sbatel osil. Li yane jaʼ ti xuʼ xkalbe kuni alabtak li kʼusitik jchʼunoje.

Pe li xchibal kʼusi laj kal ti xi muyubaj-oe, muʼyuk xjalij. Kʼalal chanib xaʼox jabil yichʼoj li Luciae, toj tsots lik kʼuxubuk xchʼut. Kʼalal oy xaʼox jayibuk velta laj yichʼ kʼelbel kʼusi ti ip chaʼie, ilbat yuʼun radiólogo ti chʼiem tumor ta sekube, jpʼej la ta alaxa smukʼul. Li doktore laj yal ti jmilvanej li tumor taje, jaʼ sbi neuroblastoma. Jaʼ jech vukub jabil lik stsʼik svokol ta tumor li Luciae, ti jalik chkom ta ospitale.

La stsʼik svokol

Ti vaʼ jayib jabil vokolil taje, nopolik noʼox tsmeyilanun xchiʼuk tstsʼutsʼilanun, jaʼ jech xi muyubaj xchiʼuk xpatet noʼox koʼonton yuʼun. Ti kʼuyelan kuch yuʼun li xchamele, toj labal laj yilik ek li buchʼutik ch-abtej ta ospitale. Oy noʼox ta yoʼonton tskolta li enfermeraetike, sventa chakʼbe syogur, sjugotak xchiʼuk yan kʼusitik chtun yuʼun li ololetik ti te nopol skuartoike. Laj yakʼbeik jlik sakil kʼuʼil xchiʼuk laj yakʼbeik jun uni vun ti jaʼ ch-ojtikinat-oe, «yajkoltaobba enfermera», xi li uni vune.

«La stijbun koʼonton li Luciae —xi jun j-abtel ta ospital—. Jaʼ jun baxbol tseb xchiʼuk xtal noʼox ta sjol kʼusi tspas, toj lek skʼupin sbonel kʼusitik. [...] Toj lek xloʼilaj, yijil krixchano xa yilel, toj lek xa yij li snopbene.»

La sta yip xchiʼuk spatobil yoʼonton ta sKʼop Dios li Luciae (Heb. 4:12). Spatoj tajmek yoʼonton ti «muʼyuc xa bochʼo chcham, muʼyuc xa bochʼo chat yoʼnton, muʼyuc xa bochʼo ch-ocʼ» li ta achʼ balumile, jech kʼuchaʼal chal li Vivliae (Apo. 21:4). Oy ta yoʼonton li yantike xchiʼuk ti kʼusi ora xuʼ chile ta xal li kʼusi chal Vivliae. Ti spatoj tajmek yoʼonton ta sventa li chaʼkuxesele jaʼ tsots laj yakʼ-o sba xchiʼuk ti xmuyubaj noʼox manchuk mi yantik stsatsaj li xchamele (Isa. 25:8). Jaʼ jech-o yelan yoʼonton ti kʼalal kʼot skʼakʼalil imilat yuʼun li kansere.

Jaʼo kʼalal laj kal ti oy kʼusi tsots skʼoplal ta jmala kʼuchaʼal laj kal ta slikebal li loʼile. Mu xaʼox xvikʼ lek sat li Luciae. Tsakbat jun skʼob yuʼun li stote, li june la jtsakbe ek. «Mu xavat avoʼonton, muʼyuk bu cha kikta atuk —xi kʼunkʼun laj kalbe—. Kʼun xavichʼ ikʼ. Lek xa chavaʼi aba kʼalal mi la julave. Muʼyuk xa me kʼusi kʼux chavaʼi xchiʼuk te me jchiʼukot mi la julave», xkut.

Vaʼun skʼan me xkʼot ta pasel li kʼusi laj kale xchiʼuk ti xbat jmalae. Jnaʼoj ti mu kʼunuk ta malaele. Pe jnaʼoj xtok mi oy smalael kuʼune, mi jpatoj koʼonton ta stojolal Jeova xchiʼuk mi tukʼ chkakʼ jba ta stojolale, te me oyun ta jmala chchaʼkuxi li jtsebe.

Li kʼusi lek laj yikta li Luciae

Ti lek tsots yoʼonton laj yakʼ sba li Luciae xchiʼuk li mukʼta koltael laj yakʼ li tsobobbaile jaʼ tijbat-o yoʼonton li jmalale, ti muʼyuk toʼox xchʼunoj li kʼusitik jchʼunoje. Kʼalal cham li jtsebkutike, laj yal ti ta la snop lek kʼusi tspase. Echʼ jayibuk xemana, vaʼun laj yalbe jun mol ta tsobobbail ti akʼo xchanubtasat ta Vivliae. Mu jaluk echʼ un, lik kʼotuk ta stekel li tsobajeletike. Ta skoltaobba Jeova laj yikta li sikʼolajele, ti muʼyuk toʼox kʼusi xut xiktae.

Muʼyuk to bu chʼayem xkaʼi skotol li meʼonale, pe koliyal chkalbe Jeova li kʼusi lek laj yikta Luciae. Ta jpatbe jba koʼontonkutik ta jujuntal xchiʼuk li jmalale, chkalbe jbakutik li labal sba spatobil oʼontonal ta sventa li chaʼkuxesele; ta jnopbekutik li skʼakʼalil chkʼot ti ta jkʼopon li jtsebkutik ti pililik xa yuni sat xchiʼuk ti xpikʼet noʼox xokontak sat kʼalal tstseʼine.

Li slajel jtseb ti toj kʼux kʼot ta pasele, la stijbe yoʼonton jun ants ti te nopol nakale. Jun sob ta sabado ti yakal tajmek voʼe, tal ta jna, oy jun skerem ti jmoj toʼox chchanunajik xchiʼuk li Luciae. Li antse chamem jun skerem ti yichʼoj buluchib jabile, jaʼ onoʼox jech xchamel laj yaʼi ek. Kʼalal laj yaʼi li kʼusi kʼot ta stojolal li Luciae, la saʼ bu nakalunkutik, vaʼun tal ta vulaʼal. Tskʼan tsnaʼ kʼuxi tstsal kuʼun li meʼonale, laj yal ti akʼo la jtsob jbakutik jayvoʼuk sventa ta jpatbe jba koʼontonkutik xchiʼuk li yan meʼiletik ti jechtik tsnuptanik eke.

Laj kalbe ti jtaoj spatobil koʼonton ta jtos kʼusi albil ta Vivliae, jun spatobil oʼontonal ti mu x-akʼ yuʼun junuk krixchanoe. Xkuxet likel sat kʼalal laj kʼelbe li kʼusi chal Jesús ta Juan 5:28, 29. La xchʼam chanubtasel ta Vivlia, vaʼun lik yaʼi ta yoʼonton «li jun oʼntonal chacʼ Diose [ti] echʼem to xjelov jech chac cʼu chaʼal ta jnop ta jcʼanti[ke]» (Fili. 4:7). Kʼalal jmoj ta jchan jVivliakutike, nopolik noʼox chlik jnopbekutik skʼoplal li achʼ balumile, kʼalal te xa ta jmalakutik chchaʼkuxiik tal li buchʼutik chamem kuʼunkutike.

Manchuk mi mu jaluk ikuxi li Luciae, pe oy kʼusi lek laj yikta ti mu xchʼaye. Li xchʼunel yoʼontone jaʼ spasoj ta jun li kutsʼ kalal ta spasbel li yabtel Diose xchiʼuk yakʼoj yip koʼonton ti staojuk-o yav li xchʼunel koʼontone. Jech ta melel chaʼa, jkotoltik ti oy buchʼu chamem kuʼuntik ti chchaʼkuxiike oy me kʼusi ta jmalatik ti toj tsots skʼoplale.

[Lokʼol ta pajina 20]

Slokʼol Paraiso ti jaʼ spasoj Luciae